މުސްތަގުބަލާ މެދު އަދި ވަކިގޮތެއް ނުނިމޭ ކަމަށާއި، މިއީ މެންޗެސްޓާ ސިޓީގައި އޭނާ ހޭދަކުރާ ފަހު ސީޒަން ކަމާ މެދު އެއްޗެއް ބުނަން ނޭނގޭ ކަމަށް ބެލްޖިއަމްގެ މިޑްފީލްޑަރު ކެވިން ޑި ބްރޭނާ ބުނެފިއެވެ.
ޗެމްޕިއަންސް ލީގުގައި މިރޭ ފެޔަނޫޑާ ދެކޮޅަށް ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން ޑި ބްރޭނާ ބުނެފައިވަނީ މި ސީޒަން ފެށުނުއިރު އޭނާގެ އެއްބަސްވުމާ މެދު ގޮތެއް ނިންމާނެކަމަށް ގަބޫލުކޮށްގެން ހުރި ނަމަވެސް، ބްރެންޓްފޯޑާ ދެކޮޅަށް ކުޅެނިކޮށް ލިބުނު އަނިޔާގެ ސަބަބުން އެ މަޝްވަރާތައްވެސް ހުއްޓިފައިވާ ކަމަށެވެ.
އުމުރުން 33 އަހަރުގެ ޑި ބްރޭނާ އާއެކު ސިޓީން ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެ އެވެ.
މިދިޔަ ސެޕްޓެމްބަރު މަހު ޑި ބްރޭނާއަށް ލިބުނު އަނިޔާގެ ސަބަބުން އެ ޓީމު މި ސީޒަނުގައި ކުޅުނު 8 މެޗު އޭނާއަށް ގެއްލިފައިވާއިރު، އެންމެ ފަހުން ސިޓީ ކުޅުނު ތިން މެޗުގައިވެސް ކޯޗު ޕެޕް ގާޑިއޯލާ ވަނީ ބަދަލު ކުޅުންތެރިއެއްގެ ގޮތުގައި އޭނާ ބޭނުންކޮށްފައެވެ.
ޑި ބްރޭނާ އިތުރަށް ބުނެފައިވަނީ އެއްބަސްވުން އައުކުރުމުގެ ވިސްނުމުގެ ބަދަލުގައި އޭނާ މިހާރު އެންމެ ބޮޑު ސަމާލުކަމެއް ދެނީ އަނިޔާއިން ރަނގަޅުވެ އޭނާގެ އަސްލު ފޯމަށް އެނބުރި އައުން ކަމަށާއި، އަދި އެއާއެކު އެއްބަސްވުމުގެ ވާހަކަތައްވެސް ކުރިއަށްދާނެ ކަމަށް ގަބޫލުކުރާ ކަމަށެވެ. އަދި އެކަން އެގޮތަށް ނުގޮސްފިނަމަ މިއީ އޭނާ ސިޓީގައި މަޑުކުރާނެ ފަހު ސީޒަން ކަމަށާއި، އޭނާ ބޭނުންވަނީ އަދިވެސް ރަނގަޅު ފުޓްބޯޅަ ކުޅުމަށް ކަމަށް ޑި ބްރޭނާ ވަނީ ބުނެފައެވެ.
2015 ވަނަ އަހަރުގެ ޖަރުމަނުގެ ވުލްފްސްބާގުން 55 މިލިއަން ޕައުންޑުގެ ޓްރާންސްފާ ފީއަކަށް ސިޓީއާ ގުޅުނު ޑި ބްރޭނާ ވަނީ ގަޑިއޯލާ ކޯޗުކަމާ ހަވާލުވުމާއެކު ތަފާތު މޮޅު ކުޅުމެއް އެ ޓީމުގައި ދައްކާފައެވެ.