ރާއްޖޭގެ މެޑިކަލް ސުކޫލުގައި ކިޔެވުމަށް ބޮޑު ތަރުހީބެއް، އެއް ޤައުމަކުން 500 އެޕްލިކޭޝަން

ދިވެހިރާއްޖޭގެ ޤައުމީ ޔުނިވާރސިޓީގައި ޤާއިމްކޮށްފައިވާ މެޑިކަލް ސުކޫލުގައި ކިޔެވުމަށް އެދި ބޭރު ޤައުމުތަކުންވެސް ހުށައެޅުންތައް ލިބެމުންދާކަމަށާއި، އެގޮތުން އެއް ޤައުމަކުން އެކަނިވެސް 500 އެޕްލިކޭޝަން ހުށައަޅާފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ވިދާޅުވެއްޖެއެވެ. އެ ވުޒާރާއިން މިހެން ވިދާޅުވީ ޕީއެސްއެމުން ގެނެސްދިން ކާމިޔާބުގެ 52 ހަފްތާ ޕްރޮގްރާމްގައި، އެ ވުޒާރާއިން މި އެއް އަހަރުތެރޭ ކުރެއްވި މަސައްކަތްތައް ތަފްސީލްކޮށްދެއްވަމުންނެވެ.

މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާގެ ސްޓޭޓް މިނިސްޓާރ ޑރ. ޢަބްދުﷲ ނަޒީރު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުގެ ކާމިޔާބު 1 އަހަރު ތެރޭގައި މީހުން ބިނާކުރުމަށް މުހިންމު އަދި ގިނަ މަސައްކަތްތަކެއް ކުރައްވާފައިވާކަމަށެވެ.

ޑރ. ނަޒީރު ވިދާޅުވީ ރާއްޖޭގެ މަތީ ތައުލީމު ހޯދުމަށް ރާއްޖޭގެ ދަރިވަރުން ރާއްޖޭން ބޭރަށް ކިޔަވަން ދާ އުސޫލުން، ރާއްޖޭން ބޭރުގެ ދަރިވަރުން ރާއްޖޭގައި ކިޔެވުމުގެ ޝައުގުވެރިކަންވެސް ބޮޑުވަމުން ދާކަމަށެވެ. އެގޮތުން ދިވެހިރާއްޖޭގެ ޤައުމީ ޔުނިވާރސިޓީގައި ޤާއިމްކޮށްފައިވާ މެޑިކަލް ސުކޫލުގައި ކިޔެވުމައްޓަކައި އެއްޤައުމަކުން މި އަހަރު ޖަނަވަރީމަހު 500 އެޕްލިކޭޝަން ހުށައަޅާފައިވާކަމީ މިކަމުގެ ހެއްކެއްކަމަށް އޭނާ ވިދާޅުވިއެވެ.

އެހެންނަމަވެސް ޤައުމީ ޔުނިވަރސިޓީގައި މިހާރު ހުރި މެޑިކަލް ސުކޫލުގައި ޖާގައިގެ ދަތިކަން ހުރުމުންނާއި، ރާއްޖޭގެ ދަރިވަރުންގެވެސް ޑިމާންޑު އެކަމަށް އޮތުމުން އެ ފުރުސަތު ބޭރުގެ ދަރިވަރުންނަށް ދެވިފައިނުވާކަމަށް ޑރ. ނަޒީރު ވިދާޅުވިއެވެ. ނަމަވެސް ސަރުކާރުގެ އަމާޒަކީ ޖާގަ ތަނަވަސް މެޑިކަލް ސުކޫލެއް ހުޅުމާލޭގައި ގާއިމްކޮށް ވީހާވެސް ގިނަ ދަރިވަރުނަށް ފުރުސަތު ފަހިކުރުންކަމަށް ސްޓޭޓް މިނިސްޓަރ ވިދާޅުވިއެވެ.

ޑރ. ނަޒީރު ވިދާޅުވީ ބޭރުގެ ދަރިވަރުން ރާއްޖޭގައި ކިޔެވުމަށް ފުރުސަތު ފަހިކުރުމުގެ ގޮތުން މިކަމަށް އަމާޒުކޮށްގެން އިންޓަރނޭޝަނަލް ސްޓޫޑަންޓް ވިސާ ފަސޭހަކަމާއެކު ލިބޭނެގޮތް ފަހިކުރުމާއި، ބޭރުގެ ދަރިވަރުންނަށް ރާއްޖޭގައި ކިޔެވުން ފަހިކުރުމާއެކު އެކަމަށް ޚާއްޞަ ޤާނޫނެއް ވުޖޫދު ކުރުމަށްވެސް މަސައްކަތްތަކެއް ކުރެވެމުން އަންނަކަން ސްޓޭޓް މިނިސްޓަރ ފާހަގަކުރެއްވިއެވެ. އަދި ބޭރުގފެ ދަރިވަރުންނަށް ފަސޭހަކަމާއެކު އެކޮމޮޑޭޝަން ލިބޭނެގޮތް ފަހިކުރުމަށް ހުޅުމާލޭގައި ދަނާލެއް އެޅުމުގެ މަސައްކަތް ކުރަމުންދާކަމަށްވެސް ވިދާޅުވިއެވެ.

"އެކަމަށް އަމާޒުކޮށްގެން އިންޓަރނޭޝަނަލް ވިސާ ފަސޭހަކަމާއެކު ލިބޭނެ ގޮތް ފަހިކުރުމާއި، ހެސެޓޯރަލް ޤާނޫނެއް ވުޖޫދު ކުރުމާއި، ފަސޭހަކަމާއެކު އެކޮމޮޑޭޝަން ލިބޭނެގޮތް ފަހިގޮތް ހަމަޖެއްސުމަށްޓަކައި ހުޅުމާލޭގައި ދާނާލެއް އެޅުމާއި، މާލޭގައި 1 ދަނާލު އަތޮޅުގައި 5 ދަނާލު މީގެ ތެރެއިން 3 ރަށެއްގެ މަސައްކަތް ފަށާނެ ބަޖެޓް ކުރެވިފައި ވަނީ." ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވިއެވެ.

ސްޓޭޓް މިނިސްޓަރ ޑރ. ނަޒީރު ވިދާޅުވީ މިއީ އިގްތިޞާދު ސިންދަފާތުކުރުމައްޓަކައި މަތީ ތައުލީމުގެ ތެރެއިން ކުރެވޭނެ ވަރަށް މުހިންމު މަސައްކަތެއްކަމަށެވެ. އެގޮތުން ސަރުކާރުގެ އަމާޒަކީ މި 5 އަހަރުގެ ދައުރުގެ ތެރޭގައި ރާއްޖޭގައި މަތީ ތައުލީމު ހާސިލްކުރާ 20،000 ކުދިންގެ ތެރެއިން 5 އިންސައްތައަކީ ރާއްޖޭން ބޭރުގެ ދަރިވަރުންނަށް ހެދުންކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވިއެވެ.