ވޮލީބޯޅައިގެ އެންމެ މަތީ ފެންވަރުގެ ކޯޗިން ކޯސް ރާއްޖޭގެ ތިން ކޯޗަކު ފުރިހަމަކޮށްފިއެވެ.
ރާއްޖޭގެ ތިން ކޯޗުން ފުރިހަމަކޮށްފައިވަނީ އެފްއައިވީބީ ލެވެލް ތިނެއްގެ ކޯޗިން ކޯހެވެ. ތައިލެންޑުގައި ކުރިޔަށްދިޔަ އެފްއައިވީބީ ލެވެލް ތިނެއްގެ މި ކޯސް ފުރިހަމަކުރި ތިން ކޯޗުންނަކީ މުޙައްމަދު ސާޖިދު (ބޮޑު ކާއްޓޭ) އާއި، އަޙްމަދު އަދީލް އަދި ސޮފްވާން އަޙްމަދެވެ. މި ކޯސް ކުރިޔަށްދިޔައީ މި މަހުގެ 18 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ހިއްސާކޮށްފައިވާ ޕޯސްޓެއްގައި ވަނީ މިކަން ފާހަގަކޮށްފައެވެ. އަދި މިއީ ރާއްޖޭގެ ވޮލީބޯޅައަށް ލިބުނު ކުރިއެރުމެއްގެ ގޮތުގައިވެސް ވަނީ ފާހަގަކޮށްފައެވެ.
މި ހޯދި ކާމިޔާބީ ފާހަގަކޮށް ވީއޭއެމް އަދި ސެންޓްރަލް އޭޝިއަން ޒޯން އޮފް ވޯލީބޯލް އެސޯސިއޭޝަން (ކާވާ) ގެ ރައީސް މުޙައްމަދު ލަތީފުވެސް ވަނީ މަރުހަބާ ވިދާޅުވެފައެވެ. އެގޮތުން މިއީ ވޮލީބޯޅައަށް ލިބުނު ވަރަށް ބޮޑު ކުރިއެރުމެއް ކަމަށާއި، މިކަމާމެދު ވަރަށް ފަޚުރުވެރިވާ ކަމަށްވެސް ވަނީ ވިދާޅުވެފައެވެ.
ބޮޑު ކާއްޓޭއަކީ ގައުމީ ފިރިހެން ވޮލީބޯޅަ ޓީމުގައި ކާމިޔާބު އަހަރުތަކެއް ހޭދަކޮށްފައިވާ ކޯޗެކެވެ. މީގެ އިތުރުން ސޮފްވާން އަކީ މިއަހަރު ބޭއްވި ބައިނަލްއަގްވާމީ އަންހެން ވޮލީބޯޅަ މުބާރާތްތަކުގައި ޓީމުގެ ހެޑު ކޯޗެވެ. އަދި އަޙްމަދު އަދީލް އަކީ އަންހެން ޓީމުގެ އެސިސްޓަންޓު ކޯޗެވެ.