ބްރައިޓަން ހޯވް އެންޑް އެލްބިއަން އަށް ކުޅެމުންއަންނަ ރިޕަބްލިކް އޮފް އަޔާލެންޑްގެ ޒުވާން ފޯވާޑް، އިވާން ފާގަސަން ލޯނު އުސޫލުން ދޫކޮށްލަން އެ ކްލަބުން ތައްޔާރަށް އޮތް ކަމަށް ފަހުގެ މީޑިއާ ހަބަރުތައް ބުނެފިއެވެ.
އުމުރުން 20 އަހަރުގެ ފާގަސަން އަށް ފަހަކަށްއައިސް އަނިޔާގެ ގިނަ މައްސަލަތަކެއް ކުރިމަތިވެފައިވާއިރު، ބްރައިޓަންގެ މިހާރުގެ ކޯޗު، ފަބިއެން ހުރްޒްލާގެ އިރުޝާދުގެ ދަށުން ގަވާއިދުން ކުޅުމުގެ ފުރުޞަތު ނުލިބެއެވެ.
އެހެންކަމުން، އޭނާ އަށް ގަވާއިދުން ކުޅުމުގެ ފުރުޞަތު ހޯދައިދިނުމުގެ ގޮތުން ބްރައިޓަން އިން ކުރިއަށް އޮތް ޖަނަވަރީ މަހުގެ ޓްރާންސްފާ ބާޒާރުގައި ލޯން އުސޫލުން ދޫކޮށްލަން އޮތީ ތައްޔާރަށެވެ.
"ކުރިއަށް އޮތް ޖަނަވަރީ މަހުގައި ޓްރާންސްފާ ބާޒާރު ހުޅުވުމުން ބްރައިޓަންގެ ފޯވާޑް، އިވާން ފާގަސަން ލޯން އެއްބަސްވުމެއްގައި ދޫކޮށްލަން އެ ކްލަބުން އޮތީ ތައްޔާރަށް" އިނގިރޭސި ނޫހެއްގައިވެއެވެ.
މީގެ ދެތިން އަހަރު ކުރީން، ޕްރިމިއަރ ލީގުގައި ދެއްކި ރަނގަޅު ކުޅުމާއެކު އަޔާލެންޑްގެ މި ޒުވާން ފޯވާޑު ވަނީ ގިނަ ބައެއްގެ ސަމާލުކަން ހޯދާފައެވެ. އެކަމަކު، ފަހަކަށް އައިސް އަނިޔާގެ ގިނަ މައްސަލަތަކެއް ކުރިމަތިވެ، އެންމެ ރަނގަޅު ފޯމުގައި ނުކުޅެވި އައު ކޯޗު، ހުރްޒްލާގެ ރޭވުންތެރިކަމުގެ ތެރެއިން ކުޅުމަށް ލިބެނީ ވަރަށް މަދު ފުރުޞަތުތަކެކެވެ.
ބްރައިޓަންގެ ޖާޒީގައި ފާގަސަންގެ ފަރާތުން އެންމެ ރަނގަޅު ކުޅުމެއް ފެނިގެންދިޔައީ 2022/2023 ވަނަ އަހަރުގެ ސީޒަނުގައެވެ. އެ ފަހަރުގެ ލީގުގައި ވެސް 19 މެޗުގައި އޭނާ ވަނީ ހަ ލަނޑުޖަހައިފައެވެ. އަދި އެފްއޭ ކަޕްގައި ވެސް ހަތަރު މެޗުގައި ތިން ލަނޑުޖެހިއެވެ.
ބްރައިޓަން އާއެކު ފާގަސަން ހަދާފައިވާ އެއްބަސްވުން އިތުރު ހަ އަހަރަށް އައު ކޮށްްފައިވަނީ މިދިޔަ ޑިސެންބަރު މަހު އެވެ. އޭރު ވަރަށް ރަނގަޅަށް އިންވެސްޓްމަންޓެއްގެ ގޮތުގައި ފެނިގެންދިޔަ ފާގަސަން އަކީ މިހާރު ބްރައިޓަންގެ ފޯވާޑުންގެ ލިސްޓުގައި ޑެނީ ވެލްބެކް އާއި ޖޯޖީނިއޯ ރުޓާ އަދި ޖާއޯ ޕެޑްރޯގެ ފަހަތުން ހަތަރުވަނައިގައި ހިމެނޭ ކުޅުންތެރިޔާ އެވެ.