ޚާރިޖީ ވަޒީރުގެ އަރިހަށް، ޗައިނާ ސަފީރާއި އިންޑިއާ ސަފީރު ވަދާޢީ ޒިޔާރަތްކުރައްވައިފި

ޗައިނާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވޮންގ ލިޝިން އާއި އިންޑިއާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، މަނޫ މަހާވަރު ޚާރިޖީ ވަޒީރު ޑރ. ޢަބްދުﷲ ޚަލީލުގެ އަރިހަށް ވަދާޢީ ޒިޔާރަތެއް ކުރައްވައިފިއެވެ.

ޚާރިޖީ ވަޒީރު ޑރ. ޢަބްދުﷲ ޚަލީލުގެ އަރިހަށް އިންޑިއާއާއި ޗައިނާގެ ސަފީރު ވަދާޢީ ޒިޔާރަތްކުރެއްވީ އެ ދެބޭފުޅުންގެ ސަފީރުކަމުގެ ދައުރު ހަމަވާން ގާތްވެފައިވާތީއެވެ. ވަކިވަކީން ބޭއްވެވި މި ބައްދަލުވުންތައް ކުރިއަށްދިޔައީ ޚާރިޖީ ވުޒާރާގައެވެ.

ޗައިނާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވޮންގ ލިޝިންގެ ޚާރިޖީ ވަޒީރު ޑރ. ޢަބްދުﷲ ޚަލީލުގެ އަރިހަށް ކުރެއްވި ވަދާޢީ ޒިޔާރަތުގައި، ވޭތުވެދިޔަ އެއް އަހަރުގެ ތެރޭގައި ކުރިޔަށް ދިޔަ މުހިއްމު މަސައްކަތްތަކާއި ޙާޞިލުކުރެވިފައިވާ ކަންތައްތަކުގެ މައްޗަށް އަލިއަޅުއްވާލައްޗައި ވާހަކަ ދެއްކެވިކަމަށެވެ. އަދި މިހާރު ކުރިޔަށް ގެންދާ މުހިއްމު މަޝްރޫޢުތަކުގެ ފަހުގެ އަދާހަމައާއި ކުރިޔަށް ރޭވިފައި ހުރި މަސައްކަތްތަކާގުޅޭގޮތުންވެސް މަޝްވަރާ ކުރެއްވިއެވެ.

މި ބައްދަލުވުމުގައި ޚާރިޖީ ވަޒީރު ވަނީ ޗައިނާ ސަފީރު ކޮށްދެއްވާފައިވާ މުހިއްމު މަސައްކަތްތައް ފާހަގަކުރައްވައި، ދިވެހިރާއްޖެއާއި ޗައިނާއާ ދެމެދު އޮތް ގުޅުން ކުރިއެރުވުމަށްޓަކައި އެކަމަނާ ދެއްވި އެހީތެރިކަމާއި އެއްބާރުލުމަށް ޝުކުރު އަދާކުރައްވާފައެވެ.

މި ބައްދަލުވުމުގައި ޗައިނާ ސަފީރު ވަނީ އެކަމަނާގެ ދައުރުގައި ދިވެހި ސަރުކާރުން ބެހެއްޓެވި ގާތްކަން ފާހަގަކުރައްވާފައެވެ. އަދި އެކަމަނާގެ މަސްއޫލިއްޔަތުތައް އަދާކުރުމުގައި ދެއްވި އެއްބާރުލެއްވުމަށް ދިވެހި ސަރުކާރަށާއި، ދިވެހި ރައްޔިތުންނަށް ޝުކުރު އަދާކުރެއްވިއެވެ. އަދި ކުރިޔަށް އޮތް ތަނުގައިވެސް ދެ ޤައުމުގެ ގުޅުން އިތުރަށް ބަދަހިވެގެންދާނެކަމަށް އުއްމީދުކުރައްވާކަމަށްވެސް ޗައިނާ ސަފީރު ވިދާޅުވިއެވެ.

އިންޑިއާ އިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، މަނޫ މަހާވަރު ޚާރިޖީ ވަޒީރު ޑރ. ޚަލީލް އަރިހަށް ކުރެއްވި ވަދާޢީ ޒިޔާރަތުގައި ފާއިތުވެދިޔަ އަހަރުގެ ފާހަގަކޮށްލެވޭ ކާމިޔާބީތަކަށް އަލިއަޅުވާލެއްވިއެވެ. އަދި ރައީސުލްޖުމްހޫރިއްޔާ އިންޑިއާއަށް ކުރެއްވި ކާމިޔާބު ދަތުރުފުޅުގައި އެއްބަސްވެވުނު ކަންކަމާމެދު މަޝްވަރާކުރެއްވިއެވެ.

މި ބައްދަލުވުމުގައި ޚާރިޖީ ވަޒީރު ވަނީ ރާއްޖޭގެ އުމްރާނީ ތަރައްގީގެ ބިޔަ މަޝްރޫއުތައް އަދި މުހިންމު ރަށްރަށުގެ ފަރުދީ ތަރައްޤީއަށް އިންޑިއާ ސަރުކާރުން ދެއްވާ އެހީތެރިކަން ފާހަގަކުރައްވާފައެވެ. އަދި ރޫޕޭ ކާޑު އޮޕަރޭޝަނަލައިޒް ކުރުމާއި، ޔޫޕީއައި ތައާރަފް ކުރުމާއި، ލޯކަލް ކަރަންސީ ޓްރޭޑް އެގްރީމަންޓްތަކަކީ އިގްތިސާދަށް އެޅުނު ހަރުދަނާ ފިޔަވަޅެއްކަން ވަޒީރު ފާހަގަކުރެއްވިއެވެ.

މި ބައްދަލުވުމުގައި ދެޤައުމުގެ ގުޅުން ބަދަހިކުރުމަށް، ދެޤައުމުގެ ދޭދޭ ފަރުދުން މެދުގައި އާއި ވިޔަފާރީގެ ގުޅުން ބަދަހިކުރުމާއި، ދެގައުމުގެ މެދު މުއާމަލާތްތަކަށް މަގުފަހިކޮށްދިނުމުގައި ސަފީރު އަދާކުރެއްވި މުހިންމު ދައުރަށް ވަޒީރު ތައުރީފު ކުރެއްވިއެވެ.

އިންޑިއާ ސަފީރު މަނޫ މަހާވަރު ވަނީ ދިވެހި ސަރުކާރާއި، ރައްޔިތުން ދެއްވި ފުރިހަމަ އެއްބާރުލުމާއި ބެހެއްޓެވި ގާތްކަމަށް ޝުކުރު އަދާކުރައްވާފައެވެ. އަދި އިންޑިއާ އާއި ދިވެހިރާއްޖޭގެ ގުޅުން ކުރިއަށް އޮތްތަނުގައި ބަދަހިވެގެންދާނެކަމަށް އުންމީދުކުރައްވާކަމަށްވެސް ސަފީރު ވިދާޅުވިއެވެ.