މުލީގައި ފަތުރުވެރިކަމުގެ ދާއިރާއިން މީހުން ބިނާކުރާނެ މަރުކަޒެއް އަޅަނީ

މުލަކަތޮޅު މުލަކުގައި ފަތުރުވެރިކަމުގެ ދާއިރާއިން ތަޢުލީމާއި ތަމްރީނުދީ، މި ދާއިރާއަށް މީހުން ބިނާކުރުމަށް ޚާއްޞަ މަރުކަޒެއް ޤާއިމްކުރުމަށް ނިންމައިފިއެވެ. މި މަރުކަޒު އެޅުމަށް އެ ރަށުގެ އުތުރު ފަރާތުން ބިން ދޫކުރަން ވަނީ ހަމަޖެހިފައެވެ.

މ. މުލަކު ކައުންސިލުން ވިދާޅުވީ، ފަތުރުވެރިކަމުގެ ދާއިރާއިން ތައުލީމާއި ތަމްރީންދީ މީހުން ބިނާކުރާނެ މަރުކަޒެއް ޤާއިމްކުރުމަށް އެރަށުން 53،000 އަކަފޫޓުގެ ބިން ދޫކުރަން ހަމަޖެހިފައިވާކަމަށެވެ. އެކަމަށް ޝައުޤުވެރިވާ ފަރާތްތަކަށް މިހާރު ބީލަން ހުށައެޅުމުގެ ފުރުސަތު އެރަށު ކައުންސިލުން ވަނީ ހުޅުވާލާފައެވެ. ބީލަން ހުށައެޅުމުގެ އެންމެ ފަހު ތާރީޚަކީ ޑިސެމްބަރ 5 ވަނަ ދުވަހެވެ.

ބީލަން ހުށައެޅޭނީ ރާއްޖޭގައި ރަޖިސްޓްރީކޮށްފައިވާ ވިޔަފާރިތަކަށެވެ. މި ބިން ދޫކުރަން ހަމަޖެހިފައިވަނީ 50 އަހަރުގެ މުއްދަތަކަށެވެ. މި އިމާރާތް 18 މަސްދުވަހުގެ ތެރޭގައި އަޅައި ނިންމަންޖެހޭނެކަމަށް ކައުންސިލުން ވަނީ ވިދާޅުވެފައެވެ.

ޕްރޮޕޯސަލް ހުށައަޅާއިރު ސީއެސްއާރުގެ ގޮތުގައި ކައުންސިލަށް ކޮށްދިނުމަށް ހުށައަޅާ ކަންކަމާއި، ތައުލީމީ ދާއިރާ އަދި އިޖްތިމާޢީ ދާއިރާއިން ކުރާނެ ކަންކަން ހިމަނަން ޖެހޭކަމަށް ކައުންސިލުން ވިދާޅުވެއެވެ.

މުލީގައި ފަތުރުވެރިކަން ތަރައްޤީކުރަމުން އަންނައިރު އެރަށުގައި އަންނަނީ އެއަރޕޯޓެއްވެސް ތަރައްޤީކުރަމުންނެވެ. މުލަކަތޮޅުގައި މީހުން ދިރިއުޅޭ 8 ރަށް އޮންނައިރު މުލީ އެއަރޕޯޓަކީ އެ އަތޮޅުގެ ރައްޔިތުންގެ އުންމީދާއި ގުޅިފައިވާ މުހިންމު މަޝްރޫއެކެވެ.

އެއަރޕޯޓާއެކު ފަތުރުވެރިކަން ފުޅާކުރުމަކީ މުލީ ކައުންސިލްގެ ވިސްނުމެކެވެ. އެހެންކަމުން މިހާރު ފަތުރުވެރިކަމަށް 3 ބިމެއް ވަނީ ހުޅުވާލާފައެވެ. މިތަނުން އެއް ބިމަކީ ފަތުރުވެރިކަމުގެ ދާއިރާއިން މީހުން ބިނާކުރުމަށް މަރުކަޒެއް އެޅުމަށް ހުޅުވާލާފައިވާ ބިމެވެ.