ވީއައިއޭގެ އައު ޓާމިނަލުގައި ބޭރުފައިސާ މާރުކުރަން ބޭންކުތަކަށް ޖާގަލިބޭނެ: ގަވަރުނަރު

ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލާއެކު ބޭރުފައިސާ މާރުކުރުމަށް ބޭންކުތަކަށް ޖާގަ ދެވި، ބޭރުފައިސާ މާރުކުރުމަށް އިތުރު ލުއިތައް ލިބޭނެކަމަށް މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަދު މުނައްވަރު ވިދާޅުވެއްޖެއެވެ. ގަވަރުނަރު ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުންނެވެ.

މޯލްޑިވްސް މަނިޓަރީ އޮތޯރިޓީން އަންނަނީ ބޭރުފައިސާގެ އައު ޤާނޫނެއް އެކުލަވާލުމަށް މަސައްކަތް ކުރައްވަމުންނެވެ. އެގޮތުން ބިލުގެ ޑްރާފްޓެއް އެކުލަވާލައި، އެޑްރާފްޓަށް އާންމުންގެ ޚިޔާލު ހޯދުމަށްވަނީ ހުޅުވާލާފައެވެ.

އެ ޤާނޫނު ވުޖޫދުވުމުގެ ކުރިންވެސް ބޭރުފައިސާގެ ކަންކަން ތަންފީޒުުރުމަށް ޤަވާޢިދެއް ވަނީ އެކުލަވާލާފައެވެ. އަދި އެޤަވާއިދަށް އަންނަ ޖެނުއަރީމަހުން ފެށިގެން އަމަލުކުރަން ފަށާނެއެވެ. އައު ޤަވާއިދަށް އަމަލުކުރަން ފެށުމާއެކު ރާއްޖެ އަންނަ ކޮންމެ ފަތުރުވެރިއަކަށް ރިސޯޓުތަކުންނާއި ގެސްޓް ހައުސްތަކުން އެ ފަތުރުވެރިއެއްގެ ބޮލަކަށް ވަކި މިންވަރަކަށް ޑޮލަރު މާރު ކުރުން ވަނީ ލާޒިމްކޮށްފައެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން އެމްއެމްއޭގެ ގަވަރުނަރު އަޙްމަދު މުނައްވަރު ވިދާޅުވީ، ވެލާނާ އިންޓަރނޭޝަނަލް އެއާޕޯޓުގެ އައު ޓާމިނާލު ނިމި ބޭނުންކުރަން ފަށާއިރު، އެތަނުގައި ބޭރުފައިސާ މާރުކުރުމަށް ޖާގަތައް ހަމަޖެހިގެންދާނެ ކަމަށެވެ. އެގޮތުން ރާއްޖޭގައި ހިންގާ ހުރިހާ ބޭންކުތަކަށްވެސް އެ ފުރުޞަތު ލިބޭނެކަން ގަވަރުނަރު ފާހަގަކުރެއްވިއެވެ.


"މިއަންނަ އަހަރު އަޅުގަނޑު މަސައްކަތް ކުރަމުން މިދަނީ އިންޑަސްޓްރީއަށާއި ވިޔަފާރިތަކަށް ފަސޭހަކުރުމަށްޓަކައި، އައު ޓާމިނަލް މަސައްކަތް ނިގެންދާއިރު އަޅުގަނޑުމެން މިހާރު ބޭންކުތަކާއި އެކު މަޝްވަރާވެސް ކުރަމުންދަނީ؛ އެހެން ޤައުމުތަކުގައި ހުންނަ ގޮތަށް ހުރިހާ ބޭންކުތަކެއްގެ ފޮރިން އެކްސްޗޭންޖް ކައުންޓަރތަކެއް އަޅުގަނޑުމެންނަށް ފެނިގެންދާނެ. އޭގެ މާނައަކީ ފަތުރުވެރިއަކު 500 ޑޮލަރު މާރުކުރުމުން ހުރިހާ ވިޔަފާރިތަކަށްވެސް ފަސޭހަވެގެންދާނެ، އިންޑަސްޓްރީ ބޭފުޅުންނަށްވެސް. ނުކުމެގެންދަމުން އިތުރަށް ހުރެއްޖެއިއްޔާ މާރުކޮށްފައި ހިފައިގެންދާނީ." ގަވަރުނަރު އަޙްމަދު މުނައްވަރު ވިދާޅުވިއެވެ.

ގަވަރުނަރު މުނައްވަރު ވިދާޅުވީ، މިއީވެސް ވިޔަފާރިތަކައް ބޭރުފައިސާ މާރުކުރުމަށް އިތުރަށް ލުއިތަކެއް ދިނުމުގެ ގޮތުން ގެނެވޭ ބަދަލެއް ކަމަށެވެ. މިއީ އެހެން ހުރިހާ ޤައުމެއްގައިވެސް ޢަމަލުކުރަމުންދާ އުސޫލެއްކަން ގަވަރުނަރު ފާހަގަކުރެއްވިއެވެ. މިއާއެކު ބޭންކުތައް ޖަވާބުދާރީކުރުމަށް، ހާމަކަން ބޮޑު ގޮތެއްގައި މިކަން ކުރެވޭނެ ނިޒާމެއް ޤާއިމް ކުރެވޭނެކަމަށްވެސް ގަވަރުނަރު ވިދާޅުވިއެވެ.

"އަދި ޔަޤީންކޮށް މިއަރުވަނީ އިރާދަކުރެއްވިއްޔާ ސިސްޓަމްތަކެއް ހެދިގެންދާނެއޭ، ބޭންކުތައް މިހާރަށް ވުރެ ބޮޑަށް އެކައުންޓަބަލް ކުރެވޭނެ ގޮތަށްވެސް، މާނައަކީ އެ ބޭފުޅުންނަށް އަޅުގަނޑުމެން މި ދޭ ލޮކޭޝަންތައް، އެންމެ ބޭނުންވާ ފަރާތްތަކަށް ލިބޭކަން ޔަޤީންކުރުމަށް. އޭގެ ބޭނުމަކީ ދެފުށް ފެންނަގޮތަކަށް، އެމްއެމްއޭއަށްވެސް ބޭންކުތަކަށް އަދި ކަސްޓަމަރުންނަށްވެސް ފެނިގެންދާނެ އަޅުގަނޑުމެން އެލޮކޭޓް ކުރާ ފައިސާ އެންމެ ބޭނުންވާ މީހުންނަށް އިންސާފުވެރިކަމާއެކު ލިބިގެންދާތަން. " ގަވަރުނަރު އަޙްމަދު މުނައްވަރު ވިދާޅުވިއެވެ.

ވެލާނާ އެއާޕޯޓުގައި މިހާރުވެސް ފުރަންދާ ފަރާތްތައް ބޭރުފައިސާ ގަތުމަށް ކައުންޓަރެއް ޤާއިމް ކުރެވިފައިވެއެވެ. އަދި އެރައިވައިލް އިން ނިކުންނަ ހިސާބުގައި ބީއެމްއެލްގެ ކައުންޓަރެއް ބޭރުފައިސާ މާރުކުރުމަށް ޤާއިމް ކުރެވިފައިވެއެވެ. ނަމަވެސް އައު ޓާމިނަލާޢެކު އިތުރު ބޭންކުތަކަށް ޖާގަ ލިބިގެންދާނެ ކަމަށް އެމްއެމްއޭއިން ވިދާޅުވެއެވެ.