މަސްވެރިން ކޫއްޑުއާއި އައްޑުއަށް ކިރުވާފައިވާ މަހަށް ފައިސާދީ ޚަލާސްކޮށްފި

ކޫއްޑޫ ފިޝަރީޒް ކޮންޕްލެކްސްއާއި އައްޑޫ ފިޝަރީޒް ކޮންޕްލެކްސްއަށް މަސްވެރިން ކިރާފައިވާ މަހަށް ދައްކަންޖެހޭ ހުރިހާ ފައިސާއެއް ދައްކާ ޚަލާސްކޮށްފައިވާކަމަށް މިފްކޯއިން ވިދާޅުވެއްޖެއެވެ. މިފްކޯއިން އެންމެ ފަހުން މަސްވެރިންނަށް ފައިސާ ދޫކޮށްފައިވަނީ އިއްޔެއެވެ.

މިފްކޯއިން ވިދާޅުވީ، 2023 ވަނަ އަހަރުގެ ނޮވެމްބަރ 17 އިން މިއަހަރުގެ ނޮވެމްބަރ 15 ވަނަ ދުވަހަށް މަސްވެރިންނަށް 918 މިލިޔަން ރުފިޔާ ދޫކޮށްފައިވާކަމަށެވެ. އެއީ ޖުމްލަ 50،588 މެޓްރިކް ޓަނަށްވާ ފައިސާއެވެ.

މިފްކޯއިން ވިދާޅުވީ، އެ ކުންފުނިން ހިންގަމުން އަންނަ ކޫއްޑޫ ފިޝަރީޒް ކޮންޕްލެކްސްއާއި އައްޑޫ ފިޝަރީޒް ކޮންޕްލެކްސްއަށް މަސްވެރިން ކިރާފައިވާ މަހަށް ފައިސާދީ ޚަލާސްކޮށްފައިވާކަމަށެވެ.

ނަމަވެސް އޮކްޓޯބަރ 28 އިން ނޮވެމްބަރ 15 އަށް މަސްވެރިން ފެލިވަރަށް ކިރުވާފައިވާ މަހަށް ފައިސާ ދިނުމުގެ ކަންކަން މިހާރު އެ ކުންފުނިން ކުރަމުން އަންނަކަމަށެވެ. މިފްކޯގެ ބެކްލޮގްގައި މިވަގުތު މަސްވެރިންނަށް ދައްކަންޖެހޭ ފައިސާގެ އަދަދަކީ 30 މިލިޔަން ރުފިޔާއެވެ.

މިސަރުކާރު ވެރިކަމާ ހަވާލުވީއިރު ދިވެހި ސަރުކާރުން މަސްވެރިންނަށް ދައްކަންޖެހޭ ގާތްގަނޑަކަށް 250 މިލިއަނެއްހާ ރުފިޔާހުއްޓެވެ. މިހުރިހާ ފައިސާއެއް މިސަރުކާރުންވަނީ ދައްކާ ޚަލާސްކޮށްފައެވެ. އަދި މަސްވެރިން މިފްކޯއަށް ކިރުވާ މަހަށް އެންމެ ލަސްވެގެން 2 ހަފްތާގެ ތެރޭގައި ފައިސާ ދޫކުރުމަށް މިސަރުކާރުންވަނީ ނިންމާފައެވެ. އަދި އެކަމަށް ދަނީ މަސައްކަތްވެސް ކުރަމުންނެވެ.