މި ސަރުކާރުގެ އަމާޒަކީ ހަތަރަކަށް ވުރެ ގިނަ ރަށުގައި ސިންތެޓިކް ޓްރެކް އެޅުން ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. ވަޒީރު މިހެން ވިދާޅުވީ 52 ހަފުތާގައި ހާސިލުކުރެވުނު ނަތީޖާތަކާ ގުޅޭގޮތުން "ޕީއެސްއެމް ނިއުސް" އިން ގެނެސްދިން ޚާއްސަ ޕްރޮގްރާމުގައި ވާހަކަދައްކަވަމުންނެވެ.
ވަޒީރު ވިދާޅުވީ ކުޅިވަރު ވަސީލަތްތައް ގާއިމުކުރުމުގެ އެންމެ މުހިންމު މަސައްކަތްތަކުގެ ތެރޭގައި ރާއްޖޭގެ އެކި ކަންކޮޅުތަކުގައި ސިންތެޓިކް ޓްރެކުތައް ގާއިމުކުރުން ހިމެނޭ ކަމަށެވެ. އެގޮތުން އަމާޒަކީ ހަތަރަކަށް ވުރެ ގިނަ ރަށުގައި ސިންތެޓިކް ޓްރެކް އެޅުން ކަމަށްވެސް ވަނީ ވިދާޅުވެފައެވެ. މީގެ އިތުރުން ވަޒީރު ވަނީ މާލޭ ސިންތެޓިކް ޓްރެކް ބައިނަލްއަގުވާމީ ފެންވަރަށް ތަރައްގީކުރެވިގެންދާނެ ކަމަށްވެސް ވިދާޅުވެފައެވެ.
"އެނގިވަޑައިގަންނަވާނެ ވަރަށް ގިނަދުވަސްތަކެއް ވެއްޖެ އިންޑިއާގެ އެގްޒިމް ބޭންކުގެ އެހީގައި ރާއްޖޭގެ ހަތަރު ސަރަހައްދެއްގައި ސިންތެޓިކް ޓްރެކް އަޅަން ރާވަމުންދާތާ. މިހާރު އޮތް ގޮތް ލަސްވާކަމަށް ވަންޏާ، އެހެން ގޮތެއް ހޯދައިގެންވެސް ކުރިއަށް ގެންދަން ވިސްނުން ހުރީ." ރާފިޢު ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅުތަކުގެ ތެރެއިން ކުރިއަށް ހުރި ކުޅިވަރު މަޝްރޫތަކުގެ ތެރޭގައި ސާފިން ސްޓޭޑިއަމް ގާއިމުކުރުމުގެ މަސައްކަތް މިހާރު ވަނީ ފެށިފައެވެ. އަދި ނެޓްބޯޅަ އާއި ފުޓްސެލް ކޮމްޕްލެކްސް ގާއިމުކުރުމުގެ މަސައްކަތްވެސް ދަނީ ކުރިއަށެވެ.