ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގެ ޖާގައެއް ރ. އަލިފުށިން ހޯދިއިރު، ޅ. ކުރެންދޫ ބަލިކޮށް ކ. ހުރާއިން މުބާރާތުގެ ފުރަތަމަ މޮޅު ހޯދައިފިއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު ގްރޫޕް ޑީގެ މެޗު އަލިފުށިން ކާމިޔާބުކޮށްފައިވަނީ ޅ. ނައިފަރު އަތުން 2-0 ގެ ނަތީޖާއަކުންނެވެ. މި މޮޅާއެކު މުބާރާތުގެ ދެވަނަ ބުރަށް އަލިފުށި ދަތުރުކުރިއިރު، އެ ޓީމުން ވަނީ ކުޅުނު ފުރަތަމަ މެޗުގައި ބ. ކެންދޫ އަތުން 5-1 ގެ ނަތީޖާއަކުން މޮޅުވެފައެވެ.
މިރޭ ކުޅުނު މެޗުގައި ފޯރިގަދަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި އަލިފުށިން ވަނީ ލީޑު ނަގާފައެވެ. މި ހާފު ނިމެން ދެ މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ އަޙްމަދު ހުސާމެވެ. އަދި ދެވަނަ ހާފު ނިމެން އަށް މިނެޓަށް ވެފައި ވަނިކޮށް އަލިފުށިން ލީޑު ފުޅާކުރިއިރު، މި ލަނޑު ޖަހައިދިނީ އާދަމް އިމްރާނެވެ.
މީގެ އިތުރުން މި މުބާރާތުގައި މިއަދު ހަވީރު ކުޅުނު ގްރޫޕް ސީގެ މެޗުން ހުރާ މޮޅުވީ ޅ. ކުރެންދޫ އަތުން 1-0 ގެ ނަތީޖާއަކުންނެވެ. މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 74 ވަނަ މިނެޓުގައި ލިބުނު ޕެނަލްޓީއަކުން ހުރާއަށް ކާމިޔާބުކޮށްދިނީ އަރީން އަބްދުﷲ އިބްރާހީމެވެ.
މި މެޗުން ހުރާ މޮޅުވިއިރު، އެ ޓީމުން ކުޅުނު ފުރަތަމަ މެޗުން ވަނީ ކ. ގުރައިދޫ އަތުން 3-1 ގެ ނަތީޖާއަކުން ބަލިވެފައެވެ. އަދި ކުރެންދޫގެ ފުރަތަމަ މެޗުން ވަނީ އައްޑޫ ސިޓީއާ 1-1 ގެ ނަތީޖާއަކުން އެއްވަރުވެފައެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.