ބާސެލޯނާގެ ސްޕެއިން ވިންގް، ލަމީން ޔަމާލްގެ ކަނާތުފައިގެ ކުޑަހުޅަށް ލިބިފައިވާ އަނިޔާއިން ރަނގަޅުވެފައިވާ ކަމަށް އެ ޓީމުގެ ކޯޗު، ހަންސީ ފްލިކް ބުނެފިއެވެ.
އުމުރުން 17 އަހަރުގެ ޔަމާލް އަށް އަނިޔާވީ، މީގެ ތިން ހަފްތާއެއްހާ ދުވަސް ކުރިން ޔުއެފާ ޗެމްޕިއަންސް ލީގުގައި ސާބިއާގެ ރެޑް ސްޓަރ ބެލްގްރޭޑްއާ ދެކޮޅަށް ބާސެލޯނާ ކުޅުނު މެޗުގައެވެ. މި މުއްދަތުގެ ތެރޭގައި، ޔަމާލް އަށް ވަނީ ރިކަވަރީގައި ހުރުމުން ބާސެލޯނާގެ ތިން މެޗާއި ސްޕެއިންގެ ދެ ނޭޝަންސް ލީގު މެޗު ގެއްލިފައެވެ.
ބާސެލޯނާގެ ކޯޗު، ފްލިކް ބުނީ، އޭނާގެ ޓީމުގެ ޒުވާން ތަރި، ޔަމާލް އަށް ސްޕެނިޝް ލީގުގެ މިރޭ އަމިއްލަ ދަނޑުގައި ލަސް ޕަލްމާސްއާ ދެކޮޅަށް ބާސެލޯނާ ކުޅޭ މެޗުގެ ކޮންމެވެސް ހިސާބަކުން ފެނިގެން ގޮސްދާނެ ކަމަށެވެ.
"އޭނާ އެނބުރި އައިސްފި. އަދި ކުޅެން ވެސް ހުރީ ތައްޔާރަށް،" ފްލިކް ބުންޏެވެ.
ފްލީކް ބުނީ، މެޗުގައި ފުރަތަމަ އެގާރައިގައި ހިމެނިގެން ޔަމާލް ކުޅޭނެ ކަމާމެދު ގޮތެއް ނިންމާފައިނުވާ ކަމަށާއި، އެކަމަކު އޭނާ އެ ކަމަށް ވެސް ހުރީ ތައްޔާރަށް ކަމަށެވެ.
މިދިޔަ ދުވަސްތަކުގައި ޔަމާލް ނެތި ބާސެލޯނާ އަށް އުނދަގޫތައް ކުރިމަތިވެފައިވެއެވެ. އޭގެތެރޭގައި، ރެއާލް ސޮސިއެޑާޑް އަތުން 1-0 އިން ބަލިވި މެޗާއި، ސެލްޓާ ވިގޯއާ 2-2 އިން އެއްވަރުވި މެޗު ހިމެނެއެވެ. އެކަމަކު، އޭނާ ނުލައި ޗެމްޕިއަންސް ލީގުގައި ފްރާންސްގެ ބްރެސްޓް އަތުން ވަނީ 3-0 އިން މޮޅުވެފައެވެ.
އެންމެ ފަހުގެ ޔޫރޯ ފުޓްބޯޅަ މުބާރާތް ސްޕެއިނަށް ކާމިޔާބުކޮށްދިނުމުގައި މުހިއްމު ދައުރެއް އަދާކުރި ޔަމާލް ވަނީ ދާދިފަހުން ހޮވި މިދިޔަ އަހަރުގެ އެންމެ މޮޅު ޒުވާން ކުޅުންތެރިޔާ އަށް ދޭ ގޯލްޑެން ބޯއީ އެވޯޑް ވެސް ހާސިލްކޮށްފައެވެ. އޭނާ ވަނީ ޔޫރޯގައި ވެސް އެންމެ މޮޅު ޒުވާން ކުޅުންތެރިޔާގެ އެވޯޑް ހޯދާފައެވެ.
މި ފަހަރުގެ ސީޒަނުގެ ލީގުގައި ވެސް ޔަމާލް އަންނަނީ މޮޅު ކުޅުމެއް ދައްކަމުންނެވެ. މިހާތަނަށްއައިއިރު ލީގުގައި އޭނާ ވަނީ ހަތް ލަނޑުޖެހުމަށް އެހީތެރިވެދީ އެސިސްޓް ލިސްޓުގެ ކުރީގަ އެވެ. މީގެއިތުރުން، ޔަމާލް ވަނީ ލީގުގައި ފަސް ލަނޑުޖަހައިފައެވެ.
ޔަމާލްގެ ރަނގަޅު ފޯމާއެކު، އޭނާ ކުޅެމުން އަންނަ ބާސެލޯނާ އަށް ވެސް އެކަމުގެ ފައިދާވަނީ ކޮށްފައެވެ. މިވަގުތު އެ ޓީމު އޮތީ ލީގުގެ އެއްވަނައިގައެވެ. އެއީ، މިހާތަނަށް ކުޅުނު 14 މެޗުން 34 ޕޮއިންޓް ހަމަކޮށްގެންނެވެ. ދެވަނައިގައި އޮތީ ވާދަވެރި ރެއާލް މެޑްރިޑެވެ. އެ ޓީމަށް އެއްމެޗު މަދުން ކުޅެގެން ލިބިފައިވަނީ 13 މެޗުން 30 ޕޮއިންޓެވެ.