ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި މިއަދު ހަވީރު ފަސޭހަކަމާއެކު ދ. ކުޑަހުވަދޫ ބަލިކޮށް، ގްރޫޕުގެ ދެވަނައަށް ހއ. ދިއްދޫ ޖެހިލައިފިއެވެ.
ގައުމީ ފުޓްބޯޅަ ދަނޑުގައި ކުޅުނު ގްރޫޕް އޭގެ މި މެޗު ދިއްދޫން ކާމިޔާބުކޮށްފައިވަނީ 6-2 ގެ ނަތީޖާއަކުންނެވެ. މި މޮޅާއެކު ތާވަލުގެ ދެވަނައަށް ދިއްދޫ ޖެހިލިއިރު، އެ ޓީމާއި، ތިންވަނައިގައި އޮތް ދ. މީދޫ އަދި ހަތަރުވަނައިގައި އޮތް ކުޑަހުވަދުއަށްވެސް ވަނީ ތިން ޕޮއިންޓް ލިބިފައެވެ. މި ގްރޫޕުން އެއްވަނައިގައި އޮތީ ކުޅުނު ތިން މެޗުވެސް ކާމިޔާބުކޮށް، ދެވަނަ ބުރުގެ ޖާގައެއް ކަށަވަރުކޮށްފައިވާ ފުވައްމުލައް ސިޓީއެވެ. އަދި ފުލުގައި އޮތް ގދ. ފަރެސްމާތޮޑާއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.
މިއަދު ހަވީރު ކުޅުނު މެޗުގައި ދިއްދޫގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 33 ވަނަ މިނެޓުގައި އަލީ ފަރީދު ލީޑު ނަގައިދިންއިރު، އޭގެ 10 މިނެޓު ފަހުން އާދަމް އާޒިމް ވަނީ ލީޑު ފުޅާކޮށްދީފައެވެ.
މި މެޗުގެ ދެވަނަ ހާފު ފަށައިގެން ހަތްވަނަ މިނެޓުގައި ދިއްދޫން އިތުރު ލަނޑެއް ޖެހިއިރު، މި ލަނޑު ކާމިޔާބުކޮށްދިނީ ފުރަތަމަ ލަނޑުވެސް ޖަހައިދިން ފަރީދެވެ. އެކަމަކު އޭގެ ފަހުން ގާތްގާތުގައި ދެ ލަނޑު ޖަހައި، ކުޑަހުވަދޫން ވަނީ ފަރަގު ކުޑަކޮށްފައެވެ. އެގޮތުން މެޗުގެ 56 ވަނަ މިނެޓުގައި ކުޑަހުވަދޫގެ ފުރަތަމަ ލަނޑު މުޙައްމަދު ޒިހާން ހުސައިން ޖަހައިދިންއިރު، އޭގެ ތިން މިނެޓު ފަހުން ހާރޫން އިބްރާހީމް ވަނީ ފަރަގު ކުޑަކޮށްދީފައެވެ. ނަމަވެސް އޭގެ ފަހުން ދިއްދޫގެ އަހުޒަމް ރަޝީދު ވަނީ ބަދަލު ކުޅުންތެރިއެއްގެ ގޮތުގައި ކުޅެން އަރައި ހެޓްރިކެއް މި މެޗުގައި ހަދާފައެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.