ފަލަސްޠީނުގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން ދެމުންދާ ޙަމަލާތަކުގައި މަރުވެފައިވާ އަސީރުންގެ އަދަދު 33އަށް އުފުލިފައިވާ ކަން ޙަމާސް ޖަމާޢަތުން ހާމަކޮށްފިއެވެ. ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ މީގެ 13 މަސް ކުރިންނެވެ. އެ ޢުދުވާނުގެ ދަށުން ޝަހީދު ކޮށްލާފައިވާ މީހުންގެ އަދަދު ވަނީ 44,500އަށްވުރެ މައްޗަށް އުފުލިފައެވެ.
ޣައްޒާގައި ވެރިކަން ކުރާ ޙަމާސްގެ މުޖާހިދުން ޔަހޫދީންގެ ބައިގަނޑެއް ރަހީނު ކޮށްފައި ވަނީ 2023 އޮކްޓޫބަރު 7ވަނަ ދުވަހު ޒަޔަނިސްޓު އިސްރާއީލުގެ ރަށްތަކަށް ދިން ޖިހާދީ ޙަމަލާގައެވެ. ޙަމާސުން ޔަހޫދީންނަށް ޙަމަލާ ދީފައި ވަނީ އަޅުވެތިކަމާއި ޔަހޫދީންގެ އިސްތިޢުމާރީ ވެރިކަމަށް ކެތް ނުކުރެވިގެންނެވެ.
އެ ޙަމަލާތަކުގައި ޔަހޫދީންގެ 250އެއްހާ މީހުން ރަހީނުކޮށްގެން ގެންގޮސްފައިވާއިރު، އޭގެ ތެރެއިން 100އެއްހާ މީހުން ވަނީ މިނިވަން ކޮށްފައެވެ. ޙަމާސްގެ ބެލުމުގެ ދަށުގައި މި ވަގުތު ތިބި 101 މީހުންގެ ތެރެއިން ދެބައިކުޅަ އެއްބައި މީހުން އަދިވެސް ދުނިޔޭގައި ތިބި ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ޙަމާސުން ބުނީ، ފާއިތުވި 14 ވަރަކަށް މަސް ދުވަހުގެ ތެރޭގައި ޔަހޫދީ ފައުޖުން ދީފައިވާ ޢުދުވާނީ ޙަމަލާތަކުގައި އަސީރުންގެ ތެރެއިން 33 މީހުން މަރުވެފައިވާ ކަމުގައެވެ. އަދި، ބައެއް މީހުން ވީނުވީއެއް ނޭނގި ގެއްލިފައިވާ ކަމުގައެވެ. "ކަލޭމެންގެ [ޔަހޫދީންގެ] މޮޔަ ހަނގުރާމައާ ގުޅިގެން އަސީރުން މުޅި އުމުރަށް ގެއްލިގެން ހިނގައިދާނެ. އެ ކަން ވިޔަ ނުދިނުމަށް ކުރަންޖެހުނު ހުރިހާ ކަމެއް ކުރޭ،" އެ ޖަމާޢަތުން ނެރުނު ބަޔާނެއްގައި ބުންޏެވެ. މަރުވެފައިވާ އަސީރުންނަކީ ކޮން ޤައުމުތަކެއްގެ ރައްޔިތުންނެއް ކަން ޙަމާސުން ސާފުކޮށްދީފައެއް ނެތެވެ.
އެއަށް ފަހު، ޙަމާސުން ވަނީ، އަސީރުންތައް މަރުވާން މެދުވެރިވި ސަބަބުތައް ބަޔާން ކޮށްދީފައިވާ ވީޑިޔޯއެއް ވެސް ޢާންމު ކޮށްފައެވެ. އެ ޖަމާޢަތުން ބުނީ، އަަސީރުންތައް މަރުވުމުގެ ފުރިހަމަ ޒިންމާ އުފުލަން ޖެހޭނީ ޒަޔަނިސްޓުންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ކަމުގައެވެ. މި ކަމާ ގުޅޭ ގޮތުން ޔަހޫދީން ވަކި އެއްޗެއް ހާމަކޮށްފައެއް ނެތެވެ.
ޙަމާސުން ބުނަމުން ގޮސްފައި ވަނީ، ހުރިހާ އަސީރުން މިނިވަން ކުރާނީ، ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތައް ދާއިމަށް ހުއްޓައިލައި، އެ ސަހަރަށް އަރައިގަނެފައިވާ ޔަހޫދީ ނިރުބަވެރި ސިފައިން އެ ބިމުން ފޭބުމުން ކަމުގައެވެ. ނަމަވެސް، އަނިޔާވެރި ނަތަންޔާހޫ ދަނީ އެ ކަމަށް އިންކާރު ކުރަމުންނެވެ. ޣައްޒާ ޢުދުވާން ހުއްޓުމަކަށް ގެނައުމާ މެދު ކުރަމުން ދިޔަ މަޝްވަރާތައް މެދުކެނޑިފައި ވަނީ ވެސް ނިރުބަވެރި ނަތަންޔާހޫގެ އަމަލުތަކުގެ ސަބަބުންނެވެ.
ޖައްބާރު ނަތަންޔާހޫ ބުނަމުން ދަނީ، ޣައްޒާގެ މުސްލިމުން ޝަހީދުކޮށް ނެތިކޮށްލަން ހިންގަމުންދާ ޤަތުލުޢާންމު ހުއްޓައިލާނީ، ޙަމާސް ޖަމާޢަތް ނައްތައިލުމަށް ފަހު ކަމުގައެވެ. ނަތަންޔާހޫގެ އަމުރަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތައް ހުއްޓުވުމާ ގުޅޭ ގޮތުން އަލުން މަޝްވަރާތައް ފެށުމަށް މިޞްރާއި ޙަމާސުން ދަނީ މަސައްކަތް ކުރަމުންނެވެ. މެދުވެރިންގެ ގޮތުގައި މަޝްވަރާތައް ވިލަރެސް ކުރަނީ މިޞްރާއި ޤަޠަރު ގުޅިގެންނެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 44,466އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 105,358 މީހުން ޒަޚަމު ކޮށްލާފައެވެ.