ފްރާންސްގެ އައިއެލްޓީއެމް ކާންސްގައި ރާއްޖެ އިސްތިހާރުކުރަނީ

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން، އައިއެލްޓީއެމް ކާންސް 2024ގައި ބައިވެރިވެ ރާއްޖެ އިސްތިހާރުކުރަން ފަށައިފިއެވެ. އައިއެލްޓީއެމް ކާންސް އަކީ އިންޓަނޭޝަނަލް ލަގްޒަރީ ޓްރެވަލް މާކެޓް (އައިއެލްޓީއެމް)ގެ ފްލޭގްޝިޕް ޝޯއެވެ.

މި ހަރަކާތް ކުރިއަށްދަނީ މިމަހުގެ 2 އިން 5 ކަށް ފްރާންސްގައެވެ. ދިވެހިރާއްޖޭގެ ފަތުރުވެރިކަމުގެ ސިނާއަތުގެ 67 ކުންފުންޏެއްގެ 12 މަންދޫބުން މި ހަރަކާތުގައި ބައިވެރިވެ އެ ކުންފުނިތަކުގެ ތަފާތު މަތީފަންތީގެ އުފެއްދުންތަކާއި ހިދުމަތްތައް އިސްތިހާރުކުރަމުންދާކަމަށް އެމްއެމްޕީއާރުސީން ވިދާޅުވެއެވެ.

އައިއެލްޓީއެމް ކާންސް 2024 އަކީ ފްރާންސްގައި ބާއްވާ ޓްރެވަލް ޓްރޭޑް ފެއަރތަކުގެ ތެރެއިން ދުނިޔޭގެ އެންމެ ބޮޑު އެއް ލަގްޒަރީ ޓްރެވަލް ފެއަރއެވެ. މި ހަރަކާތުގެ ސަބަބުން ބައިނަލްއަޤްވާމީ މާކެޓްތަކުގެ ތެރެއިން ފްރާންސްގެ އިތުރުން އެހެން މާކެޓްތަކުގެ ލަގްޒަރީ ޓްރެވަލް ޓްރޭޑް މެންބަރުންނާއި ބައްދަލުކުރުމަށް އަގުހުރި ފުރުސަތުތައް ލިބޭނެކަމަށް އެމްއެމްޕީއާރުސީން ވަނީ ވިދާޅުވެފައެވެ. އެގޮތުން ވިޔަފާރީގެ ބައްދަލުވުންތަކާއ،ި ތައުލީމީ ސެޝަންތަކާއ،ި ނެޓްވޯކިން އިވެންޓްތައް ކުރިއަށް ގެންދިއުމަށް މިއީ މުހިންމު ޕްލެޓްފޯމެކެވެ.

ދިވެހިރާއްޖެއަކީ ތަފާތު މަތީފަންތީގެ ފަތުރުވެރިކަމުގެ ތަޖުރިބާތަކާއި އުފެންދުންތަކާއި ހިދުމަތްތައް ފޯރުކޮށްދޭ ދުނިޔޭގެ ފެންވަރުގައި ލަގްޒަރީ މަންޒިލެއް ގޮތުގައި އެންމެ މަޝްހޫރު އެއް ޤައުމެވެ. އައިއެލްޓީއެމް ކާންސް 2024 ގައި އެމްއެމްޕީއާރުސީއިން ބައިވެރިވުމުގެ މަގުސަދަކީ ދިވެހިރާއްޖޭގެ މަތީ ފަންތީގެ ފަތުރުވެރިކަން ވަރުގަދަކޮށ،ް ލިބެންހުރި ތަޖުރިބާތައް ދައްކާލުމެވެ.

އައިއެލްޓީއެމް ކާންސް 2024 ގައި ރާއްޖޭގެ ސްޓޭންޑް ފަރުމާކުރެވިފައިވަނީ ރާއްޖޭގެ ލަގްޒަރީ ފަތުރުވެރިކަމުގެ ސިފަތަކާއެކުއެވެ. ދިވެހިރާއްޖޭގެ ރިސޯޓްތަކާއި ލިވަބޯޑްތައް އަދި ޔުނީކް ޖިއޮގްރަފީ ހިމެނޭގޮތަށް ފަރުމާކޮށްފައިވާ ރާއްޖޭގެ ސްޓޭންޑްއިން ލަގްޒަރީ އުފެންދުންތަކާއި ތަޖުރިބާތައް ވަރަށް ފުރިހަމައަށް ދައްކުވައިދޭނެކަމަށް އެމްއެމްޕީއާރުސީން ވަނީ ވިދާޅުވެފައެވެ.