ޒިމްބާބްވޭގައި މިހާރު ކުރިއަށްދާ ޓީ20 ސީރީޒްގެ ދެވަނަ މެޗުގައި ޕާކިސްތާނުން އެ ޓީމުގެ މައްޗަށް ކުރި ހޯދައި، ސީރީޒްވެސް ކާމިޔާބުކޮށްފިއެވެ.
ޕާކިސްތާނުގެ ސްޕިން ބޯލަރު، ސުފިޔާން މުޤީމްގެ ކެރިއަރުގައި ފެނިގެންދިޔަ އެންމެ މޮޅު ކުޅުމާއެކު ވަނީ 10 ވިކެޓުން މޮޅުވާން އެހީތެރިވެދީފައެވެ.
ބުލަވާޔޯގައި އިއްޔެ ކުޅުނު މި މެޗުގެ ޓޮސް ދިމާވުމުން ޒިމްބާބުވޭ އިން ކުޅެން އަރައި، 27 ބޯޅައިން 37 ލަނޑުހަދާފައިވަނިކޮށް ހުރިހާ ކުޅުންތެރިން ވަނީ 12.4 އޯވަރުގެ ތެރޭގައި 57 ލަނޑަށް ނުބައިވެފައެވެ. މިއީ ޓީ20 ފޯމެޓުގައި އެ ޓީމުގެ އެންމެ ދަށް ސްކޯ އެވެ.
މި އިނިންގްސްގައި ޒިމްބާބުވޭގެ ކުޅުންތެރިން ދަށް ސްކޯއަކަށް ނުބައިކޮށްލުމުގައި މުހިއްމު ދައުރެއް އަދާކުރީ ޕާކިސްތާންގެ ސުފިޔާން މުޤީމް އެވެ. އޭނާ ވަނީ 2.4 އޯވަރުގެ ތެރޭގައި ތިން ލަނޑަށް ފަސް ވިކެޓްނަގައިފައެވެ. ދެން އެންމެ ރަނގަޅަށް އުކީ އައްބާސް އަފްރީދީ ދެ ވިކެޓްނެގިއެވެ.
ޒިމްބާބުވޭ އިން ކިރިޔާވެސް ރަނގަޅަށް ކުޅުނީ އޯޕަނިންގ ބެޓްސްމަނުން ކަމަށްވާ، ބްރަޔަން ބެނެޓް އާއި ޓަޑިވަނާޝޭ މަރުމާނީ އެވެ. ބެނެޓް ވަނީ 14 ބޯޅައިން 21 ލަނޑުހަދައިފައެވެ. މަރުމާނީ ނުބައިވީ 16 ލަނޑަށެވެ.
ޖަވާބުގައި ކުޅެން އަރައި، ޕާކިސްތާނުން ކަނޑައެޅިފައިވާ ޓާގެޓަށް ވާސިލްވީ ބާކީ 87 ބޯޅަ އޮއްވާ، އެއްވެސް ކުޅުންތެރިއަކު ނުބައިނުވެ 61 ލަނޑުހަދައިގެންނެވެ.
ޕާކިސްތާނުން އެންމެ ރަނގަޅަށް ކުޅުނު ސައިމް އަޔޫބް ނުބައިނުވެ 18 ބޯޅައިން 36 ލަނޑުހެދިއިރު، އޮމައިރް ޔޫސުފް ވަނީ ނުބައިނުވެ 15 ބޯޅައިން 22 ލަނޑުހަދައިފައެވެ.
މި ދެ ޓީމުގެ މެދުގައި ކުޅުމަށް ހަމަޖެހިފައިވާ ޓީ20 ސީރީޒްގެ ތިންވަނަ މެޗު އޮންނާނީ މާދަމާ އެވެ.