ޤާނޫނާއި ހިލާފަށް ވެރިކަންކުރި ބަޔަކަށް، ޤާނޫނުއަސާސީގެ ދިފާޢުގައި ކުރެވޭނެ ކަމެއް ނޯންނާނެ: މެމްބަރު އަބްދުﷲ ޝަރީފް

ޤާނޫނާއި ހިލާފަށް ވެރިކަން ކުރި ބަޔަކަށް ޤާނޫނު އަސާސީގެ ދިފާޢުގައި ނުނިކުމެވޭނެކަމަށް ރައްޔިތުންގެ މަޖިލީހުގެ ކެލާ ދާއިރާގެ މެމްބަރު އަބްދުﷲ ޝަރީފް ވިދާޅުވެއްޖެއެވެ.

ޝަރީފް މިފަދައިން ވިދާޅުވީ ޤާނޫނުއަސާސީގެ ދިފއެމްޑީޕީން ބާއްވަން އުޅޭ އެއްވުމަށް އިޝާރަތް ކުރައްވާ ވާހަކަފުޅު ދައްކަވަމުންނެވެ.

ޕީއެސްއެމް ނިއުސްއިން ގެނެސްދިން ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ކެލާ ދާއިރާގެ މެމްބަރު އަބްދުﷲ ޝަރީފް ވިދާޅުވީ އެމްޑީޕީއަށް ޤާނޫނު އަސާސީގެ ދިފާޢުގައި ނިކުތުމުގެ ޖާގަ މިއަދު ނެތް ކަމަށެވެ.

އެމްޑީޕީގެ ވެރިކަމުގައި ސަރުކާރުގެ ކުންފުނިތައް ދަރުވާލާފައިވާ ކަމަށާއި ބައެއް ކަންކަން އުސޫލާއި ހިލާފަށް ކުރެއްވި ކަމަށް މެމްބަރު ތުހުމަތުކުރެއްވިއެވެ. މީގެއިތުރުން ފަނޑިޔާރުން ޖަލަށްލާ ޤާނޫނާއި ހިލާފަށް އަމަލުކުރެއްވިކަމަށްވެސް އަބްދުﷲ ޝަރީފް ވިދާޅުވިއެވެ.

"ހަޤީޤަތުގައި މަޖިލިސް ތެރެއަށް ވަދެ، މުޅި ސިސްޓަމް ތެރޭގައި މަސައްކަތް ކުރަން ފެށުމުން ޤައުމުގައި ހުރި ބޮޑެތި މައްސަލަތައް އެބަ އެނގޭ. ވަރަށް ސާފުކޮށް އެނގޭ. މިދިޔަ ސަރުކާރުގައި ހިންގި ކޮރަޕްޝަންތައް ވެސް އަޅުގަނޑުމެންނަށް އެބަ އެނގޭ. ޤައުމަށް ވެގެން އުޅޭގޮތް ރައްޔިތުންނަށް މާބޮޑަށް ސާފު. އިދިކޮޅުން ކުރަން އުޅޭ އެއްވެސް ކަމެއް ހާސިލެއް ނުކުރެވޭނެ. ކުރީ ސަރުކާރުން ހިންގިކަމަށް ތުހުމަތުކުރެވޭ ކޮރަޕްޝަންގެ އަމަލުތަކަކީ ސިއްރު ކުރެވޭނެ ކަންކަމެއް ނޫން" މެމްބަރު އަބްދުﷲ ޝަރީފް ވިދާޅުވިއެވެ.

ސަރުކާރުގެ ފަރާތުން ޤާނޫނު އަސާސީއަށް ގެނައި ބައެއް އިސްލާހުތަކާއި ގުޅޭގޮތުން މެމްބަރުން ވިދާޅުވީ ޕާޓީ ބަދަލުކުރުމުން މެންބަރުކަމުގެ މަޤާމު ގެއްލޭގޮތަށް ޤާނޫނުއަސާސީއަށް ގެނައި އިސްލާހަކީ ވަރަށް ރަނގަޅު އިސްލާހެއް ކަމަށެވެ. އަދި އެކަން އެމްޑީޕީގެ މެމްބަރުން ޤަބޫލުކުރަންޖެހޭކަމަށެވެ.

ޕާޓީ ބަދަލުކުރުމުން މެންބަރުކަމުގެ މަޤާމު ގެއްލޭގޮތަށް ޤާނޫނުއަސާސީއަށް ގެނައި އިސްލާހާއި ގުޅޭގޮތުން ރައްޔިތުންގެ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު ވިދާޅުވީ ޤާނޫނު އަސާސީއަށް އެ އިސްލާހު ގެންނަންޖެހުނު ސަބަބު ވިސްނާލުން މުހިންމު ކަމަށެވެ.

އެގޮތުން އެންޓި ޑިފެކްޝަން ޤާނޫނަކީ އެމްޑީޕީން ހެދި ޤާނޫނެއް ކަމަށާއި ނަމަވެސް އެ ޤާނޫނު ތަސްދީޤު ކުރެއްވީ ރައީސުލްޖުމްހޫރިއްޔާކަމަށް ވިދާޅުވިއެވެ. އޭރު އެ ޤާނޫނު ތަސްދީޤުކުރުން ލަސްވުމުން އިދިކޮޅުން އެކި ގޮތްގޮތަށް ވާހަކަ ދެއްކި ކަމަށާއި ނަމަވެސް ރައީސުލްޖުމްހޫރިއްޔާ އެ ޤާނޫނު ތަސްދީޤު ކުރެއްވި ހިސާބުން އެމީހުން ރާގު އެއްކޮށް ބަދަލުވިކަމަށް މެމްބަރު އަބްދުއްސައްތާރު ވިދާޅުވިއެވެ.

"އަސްލު ހަޤީޤަތުގައި ޤާނޫނަށް ގެނެވުނު އެ އިސްލާހު ތަސްދީޤު ކުރުމާއި ގުޅިގެން ރައްޔިތުންގެ މަޖިލިސް މެމްބަރުން ގަނެ، ވިއްކުމުގެ ބާޒާރު އެއްކޮށް ހުއްޓުނީ. އެކަން އެގޮތަށް ކުރުމަށް ތަޅު އެޅުވުނީ. މިއީ ރައްޔިތުންނަށް އިޚްލާސްތެރި ވެރިން ކަން ކުރައްވާގޮތް. ތިމާގެ ނަފްސު ވިކިގެންދިޔަ ސަޤާފަތް އެއްކޮށް ނައްތާލީ މި އިސްލާހާއެކު" މެމްބަރު އަބްދުއްސައްތާރު ވިދާޅުވިއެވެ.

މެމްބަރު ވިދާޅުވީ މިހާރު އޮތް ވެރިކަމަކީ ޤާނޫނަކުން ގެނައި ވެރިކަމެއް ކަމަށާއި ވެރިކަން ބަދަލުކުރެވޭނީވެސް އޮންނަ ޤާނޫނީ ހަމައިގެ ތެރެއިން 5 އަހަރު ފަހުން ކަމަށެވެ. އަދި ޤާނޫނު އަސާސީގެ ދިފާޢުގައި އެމްޑީޕީން ކުރަންވީ ކަމަކީ އެހިސާބަށް ދަންދެން މި ސަރުކާރަށް ފުރުސަތު ދެއްވުން ކަމަށްވެސް އޭނާ ވިދާޅުވިއެވެ. ރައްޔިތުންގެ ހައްޤުތައް ހޯދައިދީ ޤާނޫނު އަސާސީގެ ދިފާޢުގައި ނިކުންނެވި ހަމައެކަނި ވެރިޔަކީ ރައީސުލްޖުމްހޫރިއްޔާކަމަށްވެސް ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު ވިދާޅުވިއެވެ.