އެންމެ ފަހު ވަގުތާ ޖެހެދެން ވެސް މަޤާމު ދިފާޢުކުރެއްވުމުގައި ދެމިހުންނަވާނެ ކަމަށް ދެކުނު ކޮރެޔާގެ ރައީސް ޔޫން ސުކް ޔޯލް ވިދާޅުވެއްޖެއެވެ.
ޓީވީ މެދުވެރިކުރައްވައި ވަރަށް ދިގުކޮށް ދެއްވި ޙިޠާބެއްގައި ޔޫން ވަނީ، މިދިޔަ އޭޕްރީލް މަހު ބޭއްވި އިންތިޚާބުގައި އެ މަނިކުފާނުގެ ޕާޓީއަށް ކުރިމަތިވި ބޮޑު ނާކާމިޔާބީ ފަހަތުގައި އޮތީ އުތުރު ކޮރެޔާ ކަމަށް ތުހުމަތު ކުރައްވައިފައެވެ.
މި ޙިޠާބު ދެއްވުމުގެ މަޤްޞަދަކީ، ސިޔާސީ ފަރާތްތަކުގެ ތާޢީދު އަނބުރާ ހޯދުން ކަމަށް ބެލެވުނަސް، ޔޫންގެ އަމިއްލަ ޕާޓީގެ ރާގު ވެސް ހުރީ އެ މަނިކުފާނު މަޤާމުން ދުރުކުރުމަށެވެ.
މި ގޮތުން، ވެރިކަން ކުރާ ޕީޕަލް ޕަވަރ ޕާޓީ (ޕީޕީޕީ)ން ބުނީ ރައީސްކަމުން އިސްތިޢުފާ ދެއްވުން ނުވަތަ ޤާނޫނު ހަދާ މަޖިލިސް މެދުވެރިކޮށް ޔޫން މަޤާމުން ދުރުކުރުމުގެ ވަގުތު ޖެހިއްޖެ ކަމަށެވެ.
ދެކުނު ކޮރެޔާގެ ޑިމޮކްރެޓިކް ޕާޓީ އިސްވެ އޮވެ އިދިކޮޅު ހަ ޕާޓީއަކުން ވަނީ ޔޫން މަޤާމުން ދުރުކުރުމަށް އިތުބާރު ނެތް ކަމުގެ މައްސަލައެއް އަނެއްކާވެސް ވަނީ މަޖިލީހަށް ހުށަހަޅައިފަ އެވެ. ޔޫން މަޤާމުން ދުރުކުރަން އިދިކޮޅުން ހުށަހެޅި ފުރަތަމަ މައްސަލަ ނާކާމިޔާބުވީ، ޕީޕީޕީގެ ގިނަ މެމްބަރުން ވޯޓު ބޮއިކޮޓް ކުރުމުންނެވެ.
ދެވަނަ ފަހަރަށް ހުށަހެޅި މައްސަލަ ވަނީ އަންނަ ހޮނިހިރު ދުވަހަށް ތާވަލުކޮށްފައެވެ.
ޔޫންގެ ޕާޓީގެ ހަތް މެމްބަރަކު އެ މައްސަލައަށް ތާޢީދުކުރާނެ ކަމަށް ބެލެވެއެވެ. އެކަމަކު އެ މައްސަލަ ކާމިޔާބު ކުރަން، ޕީޕީޕީގެ އަށް މެމްބަރުންގެ ތާޢީދު ބޭނުންވާނެއެވެ.
ޔޫން ވަނީ، ޑިމޮކްރަސީގެ ހަމަތަކުގެ މަތިން ރައްޔިތުން އިންތިޚާބުކޮށްފައިވާ ރައީސަކު މަޤާމުން ވަކި ކުރަން ކުރާ މަސައްކަތަކީ އިދިކޮޅުން ޖަހާ ސަކަރާތެއްގެ ގޮތުގައި ސިފަކުރައްވައިފައެވެ.
"އެންމެ ފަހު ވަގުތާ ޖެހެންދެން ދިފާޢުގައި އަޅުގަނޑު މަސައްކަތް ކުރާނަން،" ޔޫން ވިދާޅުވިއެވެ.
"އެ މީހުން އަޅުގަނޑުގެ މައްޗަށް އިތުބާރު ނެތް ކަމަށް ފާސްކުރިޔަސް ނޫނީ ތަހުޤީޤު ހިންގިޔަސް، އެ ހުރިހާ ކަމަކާ ކެރިގެން ކުރިމަތިލާނަން."
ގަދަބަސް ވިދާޅުވެ، މީގެ ކުރިން ޕްރޮސެކިޔުޓަރެއްގެ ގޮތުގައި މަސައްކަތް ކުރައްވާފައިވާ ޔޫންގެ ވިސްނުން ހުރީ، ދުސްތޫރީ ކޯޓުގައި މަޤާމު ދިފާޢުގައި ވަކާލާތު ކުރައްވަން ކަމަށް ސިޔާސީ ބައެއް މާހިރުން ދަނީ ބުނަމުންނެވެ.
ޔޫންގެ މައްޗަށް އިތުބާރު ނެތް ކަމަށް ފާސްކޮށްފިނަމަ، އެ ކަމާމެދު ގޮތެއް ނިންމާނީ ދެކުނު ކޮރެޔާގެ ދުސްތޫރީ ކޯޓުންނެވެ. މަޖިލީހުން ޔޫންއަށް އިތުބާރު ނެތް ކަމަށް ފާސްކުރި ނަމަވެސް، ރައީސްކަމުގައި ބެހެއްޓުމުގެ ބާރު ވެސް އެ ކޯޓަށް ލިބިގެންވެއެވެ.
ޕީޕީޕީގެ ތެރޭގައި ޔޫންގެ ބާރު ފަނޑުވަމުންދާ ކަމުގެ މަލަމަތި ވެސް ވަނީ ފެންނަން ފަށައިފައެވެ.
މި ގޮތުން، އިތުބާރު ނެތް ކަމުގެ މައްސަލައަށް ތާއީދުކުރަން ޕީޕީޕީގެ މެމްބަރުންނަށް އެ ޕާޓީގެ ވެރިޔާ ހާން ޑޮންގް ހޫން ވަނީ ލަފާ ދެއްވައިފައެވެ.
ނަމަވެސް، ޕީޕީޕީގެ ބައެއް މެމްބަރުން ޔޫންގެ މައްޗަށް އިތުބާރު ނެތް ކަމަށް ފާސްކުރަން އަދިވެސް ދެކޮޅު ކަމުގެ މަޢުލޫމާތު ލިބެއެވެ.
މުޅި ދުނިޔެ ސިއްސުވާލައި، ޑިސެމްބަރ 3 ވަނަ ދުވަހު ޔޫން ކުއްލި ޙާލަތު އިޢުލާނު ކުރެއްވީ، އިދިކޮޅު ޕާޓީތަކުން ދައުލަތާ ދެކޮޅަށް މަސައްކަތް ކުރަމުންދާތީ އެ ކަން ހުއްޓުވަން ކަމަށް ވިދާޅުވެއެވެ. އެކަމަކު ކުއްލި ޙާލަތު އިޢުލާނު ކުރެއްވިތާ ހަ ގަޑިއިރު ތެރޭގައި އެ ނިންމެވުން ޔޫން ބާޠިލުކުރެއްވީ އަމިއްލަ ޕާޓީގެ ބައެއް މެންބަރުންގެ ވެސް ތާއީދާ އެކު، ކުއްލިހާލަތު އުވައިލަން ޤާނޫނު ހަދާ މަޖިލީހުން ފާސްކުރުމުންނެވެ.
ޤައުމަށް ޚިޔާނާތްތެރިވެވަޑައިގަތް ކަމުގެ ތުހުމަތުގައި ޔޫނާ ދެކޮޅަށް ޖިނާޢީ ތަހުޤީޤެއް މިހާރު ވަނީ ފަށައިފައެވެ. އަދި ޤައުމު ދޫކުރައްވައި ވަޑައިނުގެންނެވޭ ގޮތަށް، ޔޫންގެ ޕާސްޕޯޓު ވެސް ވަނީ ހިފަހައްޓައިފައެވެ.