އެމެރިކާގެ ސަލާމަތީ ބާރުތަކުން ކިއުބާގައި ހިންގަމުންދާ ގުއަންޓަނާމޯ ބޭ ޖަލުގައި ބަންދުކޮށްފައި ތިބި މެލޭޝިޔާގެ ދެ ރައްޔިތުން ޤައުމަށް ފޮނުވައިލަން ނިންމައިފިއެވެ.
އެމެރިކާގެ ދިފާޢީ ވުޒާރާއިން ނެރުނު ބަޔާނެއްގައި ބުނެފައި ވަނީ މެލޭޝިޔާގެ ދެ ރައްޔިތުން ކަމަށްވާ މުޙައްމަދު ފާރިކް ބިން އަމީންނާއި މުޙައްމަދު ނާޒިރު ބިން ލެޕް މެލޭޝިޔާގެ ސަރުކާރާ ޙަވާލުކުރަން ނިންމާފައިވާ ކަމަށެވެ. އެ ދެ މީހުން ވެސް މެލޭޝިޔާއަށް ފޮނުވާލުމަށް ނިންމީ އެ މީހުން ބައިވެރިވެ ހިންގާފައިވާ ނުރައްކާތެރި ކުށްތަކަށް އިޢުތިރާފުވެ އިތުރު މީހަކާ ދެކޮޅަށް ދަޢުވާ ކުރެވޭ މިންވަރަށް ހެކިބަސް ދިނުމުންނެވެ.
އެ ވުޒާރާއިން ބުނެފައިވާ ގޮތުގައި އެ ދެ މީހުން ހެކިބަސް ދީފައި ވަނީ އެންސެޕް ނޫރްޖަމަން ނަމަކަށް ކިޔާ އަލް-ޤައިދާއާ ގުޅުން އޮންނަ މީހަކާ ދެކޮޅަށެވެ. އޭނާއަކީ 2002ވަނަ އަހަރު އިންޑޮނޭޝިޔާގެ ބާލީއާއި 2004ވަނަ އަހަރު އިންޑޮނޭޝިޔާގެ ޖަކާޓާގައި ދިން ނިރުބަވެރި ޙަމަލާތަކުގެ މޭސްތިރިއާއެވެ. އޭނާ ވެސް ހުރީ ގުއަންޓަނާމޯ ބޭ ޖަލުގައި ބަންދުކޮށްފައެވެ.
ދުނިޔޭގެ އެންމެ އަނިޔާވެރި ޖަލުގެ ގޮތުގައި ބަލައި ގުއަންޓަނާމޯ ބޭ ޖަލުގައި 50 ޤައުމަކަށް ނިޞްބަތްވާ 700އަށްވުރެ ގިނަ މީހުން ބަންދުކޮށްގެން ގެންގުޅުނެވެ. ނަމަވެސް އެ ޖަލުގައި މިހާރު ތިބީ 27 މީހުންނެވެ.
2002ވަނަ އަހަރު ހުޅުވި އެ ޖަލު ބަންދު ކުރުމަކީ އެމެރިކާގައި ވެރިކަން ކުރެއްވި ބައެއް ބޭފުލުން ވަޢުދުވެވަޑައިގެންފައިވާ ކަމެކެވެ.