ގޯއްޗާއި ފްލެޓް ދޫކުރުމުގައި އުސޫލުތަކާ ޚިލާފުވެފައިވާނަމަ ތަހުގީގުކޮށް، ދަޢުވާކުރަން ފޮނުވަން ޕީޖީ އަމުރުކުރައްވައިފި

ގޯއްޗާއި ފްލެޓް ދޫކުރުމުގައި އުސޫލުތަކާ ޚިލާފުވެފައިވާނަމަ ތަހުގީގުކޮށް، ދަޢުވާކުރަން ފޮނުވަން ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފް ދިވެހި ފުލުހުންގެ ޚިދުމަތާއި އެންޓި-ކޮރަޕްޝަން ކޮމިޝަން، އޭސީސީއަށް އަމުރުކުރައްވައިފިއެވެ.

ޕީޖީ އޮފީހުން ނެރުއްވި ބަޔާނެއްގައި ވިދާޅުވީ ސަރުކާރުން އިޢުލާންކޮށްފައިވާ "ބިންވެރިޔާ'' އަދި ''ގެދޮރުވެރިޔާ'' ސްކީމަށް އެދި ފޯމު ބަލައިގަތުމުގައާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުޞޫލުތަކާއި ގަވާއިދުތަކާ ޚިލާފަށް ޢަމަލުކޮށްފައިވުމުގެ ކަންބޮޑުވުން އެ އޮފީހުގެ ސަމާލުކަމަށް އައިސްފައިވާ ކަމަށެވެ. އަދި މިއީ ޢާންމު މަސްލަޙަތު މަތީ މިންވަރަކަށް އެކުލެވޭ ކަމަކަށްވާތީ ފުރިހަމަ ޖިނާއީ ތަޙުޤީޤެއް ހިންގަންޖެހޭ ކަމެއްކަމަށް ޕްރޮސެކިއުޓަރ ޖެނެރަލް ދެކެވަޑައިގަންނަވާ ކަމަށްވެސް ވިދާޅުވިއެވެ.

މިސަބަބުތަކާހުރެ ޤާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސެކިއުޓަރ ޖެނެރަލަށް ލިބިވަޑައިގަންނަވާ ބާރުގެ ދަށުން، "ބިންވެރިޔާ" އަދި "ގެދޮރުވެރިޔާ" ސްކީމްގެ ފޯމު ބަލައިގަތުމާއި، ފްލެޓާއި ގޯތި ލިބޭ ފަރާތްތައް ކަނޑައެޅުމާއި، ގޯއްޗާއި ފްލެޓް ދޫކުރުމުގައި ޢަމަލުކޮށްފައިވާ ގޮތުގެ ތަހުގީގެއް ހިންގުމަށްފަހު، އެކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ، އެކަން ތަހުގީގެއްކުރުމަށްފަހު ދަޢުވާކުރުމަށްޓަކައި އެއޮފީހަށް ހުށަހެޅުމަށް، ދިވެހި ފުލުހުންގެ ޚިދުމަތަށާއި އެންޓި ކޮރަޕްޝަން ކޮމިޝަނަށް ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފް އަމުރުކުރައްވާފައިވާކަމަށެވެ.

މީގެ އިތުރުން މި މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފްތާއަކު 1 ފަހަރު ޕްރޮސެކިއުޓަރ ޖެނެރަލާ ހިއްސާކުރަމުން ގެންދިއުމަށާއި، އެ މައްސަލައިގެ އަވަސް ތަހުގީގެއް ހިންގުމަށް ޕްރޮސެކިއުޓަރ ޖެނެރަލް ވަނީ އަމުރުކުރައްވާފައެވެ.

ޕްރޮސެކިއުޓަރ ޖެނެރަލް މިހެން އަމަރުކުރައްވާފައިވާއިރު ފުލުހުން ދަނީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމަށް ތުހުމަތުކުރެވޭ މައްސަލައެއް ތަހުގީގުކުރައްވަމުންނެވެ. ފުލުހުން ވިދާޅުވެފައިވާ ގޮތުގައި ތަހުގީގުކުރަމުންދަނީ ޑޮކިއުމަންޓުތަކެއް ފޯޖުކޮށްފައިވާ ކަމަށް ތުހުމަތު ކުރެވޭ މައްސަލައެކެވެ. މިއީ ފުލުހުންނަށް ލިބިފައިވާ މައުލޫމާތަކާ ގުޅިގެން ފުލުހުން އިސްވެ ފެށި ތަހުގީގެއް ކަމަށްވެސް ފުލުހުން ވިދާޅުވެއެވެ.

މި މައްސަލައާ ގުޅިގެން އެޗްޑީސީގެ ބޯޑުގެ ޗެއަރމަން ފިޔަވައި އެހެން ހުރިހާ ބޯޑު މެންބަރުން ވަނީ ސަސްޕެންޑުކޮށްފައެވެ. މީގެ ތެރޭގައި އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޟުލް ރަޝީދުވެސް ހިމެނިވަޑައިގަންނަވައެވެ.

މީގެ އިތުރުން މި މައްސަލައިގައި ހިމެނޭ މުޙައްމަދު ފަޒީލް ރަޝީދުވެސް ވަނީ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރުގެ މަގާމުން މިހާރު ސަސްޕެންޑްކޮށްފައެވެ.