ޔަމަނުގައި ހުރި މުޙިންމު މަރުކަޒުތަކަކަށް އަމާޒުކޮށް، ޔަހޫދީ އިސްތިޢުމާރީ ފައުޖުން ދިން ވައިގެ ޙަމަލާތަކެއްގައި، މިހާތަނަށް ނުވަ މީހުން ޝަހީދުވެފައިވާ ކަމަށް، އެ ޤައުމުގައި ހަރަކާތްތެރިވާ ހަތިޔާރު އެޅި ޙޫޘީ ޖަމާޢަތުން ބުނެފިއެވެ.
ޙޫޘީ ޖަމާޢަތުން ބުނި ގޮތުގައި، އޭގެ ތެރެއިން ސަލީފް ބަނދަރަށް ދިން ޙަމަލާއެއްގައި ހަތް މީހުން ޝަހީދުވެފައިވާ ކަމަށާއި ރާސް އިއްސާގައި ހުންނަ ތެޔޮ ކަރުޚާނާއަށް ދިން ދެ ޙަމަލާއެއްގައި އިތުރު ދެ މީހުން ޝަހީދުވި ކަމަށެވެ.
އަދި ޔަމަނުގެ ވެރިރަށް ޞަންޢާގެ ދެކުނާއި އުތުރުގައި ހުންނަ މައި ދެ އިންޖީނުގެއަކަށް ވެސް ޔަހޫދީ އިސްތިޢުމާރީ ފައުޖުގެ ޙަމަލާތައް އަމާޒުކޮށްފައިވާ ކަމަށް ވެސް ބުނެފައިވެއެވެ.
ޣައްޒާ ޢުދުވާން ހުއްޓައިލުމަށް ބާރު އެޅުމުގެ ގޮތުން ޙޫޘީން ދަނީ ރަތް ކަނޑުން ދަތުރު ކުރާ އާގުބޯޓުފަހަރަށް ވެސް ޙަމަލާ ދެމުންނެވެ. އަސްކަރީ ޑްރޯނާއި ބެލިސްޓިކް މިސައިލް ފަދަ ނުރައްކާތެރި ހަތިޔާރު ބޭނުން ކޮށްގެން ދެމުންދާ ޙަމަލާތައް އަމާޒު ކުރަމުން ދަނީ ޔަހޫދީންގެ ބަނދަރުތަކަށް މުދާ އުފުލާ ބޯޓުފަހަރާއި, ޔަހޫދީންނާ ގުޅުން އޮތް އުޅަނދުފަހަރަށެވެ.
އޭގެ އިތުރުން, ޔަހޫދީންގެ މަދަދުގާރުން ކަމުގައިވާ އެމެރިކާއާއި އިނގިރޭސިވިލާތުގެ އާގުބޯޓުފަހަރާއި އަސްކަރީ މަނަވަރުތަކަށް ވެސް ޙޫޘީންގެ ޙަމަލާތައް އަމާޒު ކޮށްފައިވެއެވެ. އަދި އެ ޖަމާޢަތުން ދަނީ ޔަހޫދީ ދައުލަތުގެ ވެރިރަށް ކަމަށްވާ ތެލް އަވީވަށް ވެސް ޑްރޯނާއި މިސައިލް ޙަމަލާ ދެމުންނެވެ.