ޚާއްސަ ސްކޮލަރޝިޕްތައް ލިބޭ ދަރިވަރުން ކޯސް ފެށުމަށްފަހު ކޯސް ބަދަލުކުރުމުގެ ފުރުޞަތު ދީފި

ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕާއި ހައި އެޗީވާސް ސްކޮލަރޝިޕްގައި ކިޔަވާ ދަރިވަރުންގެ ކޯސް ފެށުމަށްފަހު އެހެން ކޯހަކަށް ބަދަލުވާން ބޭނުންނަމަ އެ ފުރުޞަތު ދިނުމަށް ނިންމައިފިއެވެ.

މަތީ ތަޢުލީމާ ބެހޭ ވުޒާރާއިން ވަނީ މަތީ ސާނަވީ އިމްތިޙާނުން އެއްވަނަ ދަރަޖައިގައި ފާސްވާ ދަރިވަރުންނަށް ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕާއި ހައި އެޗީވާރސް ސްކޮލަރޝިޕާ ބެހޭ އައު އުޞޫލް ގެޒެޓްކޮށްފައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން މަތީ ތަޢުލީމާ ބެހޭ ވުޒާރާގެ ސްޓޭޓް މިނިސްޓަރ ޑރ.އަބްދުއްރަޙީމް ޙަސަން ވިދާޅުވީ 2019 ވަނަ އަހަރު އެކުލަވާލާފައިވާ އުޞޫލްގައިވާގޮތުން ފައިސާއެއްގެ އެއްވެސް މުޢާމަލާތެއް ހިންގުމަށްފަހު ކޯސް ބަދަލު ނުކުރެވެއެވެ. ނަމަވެސް އެކި ސަބަބުތައް ދިމާވެގެން ކޯސް ބަދަލުކުރުމުގެ ހާލަތްތައް އައިސްފައި ހުރިކަމަށް ސްޓޭޓް މިނިސްޓަރ ވިދާޅުވިއެވެ. އެހެންކަމުން އައު އުސޫލުގައި އެކަމަށް ރިޢާޔަތްކުރުމަށްފަހު ޕްރޮގްރާމް ބަދަލުކުރެވޭނެ ގޮތްތަކެއް ކަނޑައަޅާފައިވާ ކަމަށް ސްޓޭޓް މިނިސްޓަރ ވިދާޅުވިއެވެ.

"މިއީ ކުދިންނަށް ވަރަށްބޮޑު ފަސޭހައަކަށް ވާނެކަމެއް. މިކަން އަޅުގަނޑުމެން ކޮށްފައި މިވަނީ ރައީސުލްޖުމްހޫރިއްޔާގެ ލަފާފުޅާއެކު."މަތީ ތަޢުލީމާ ބެހޭ ވުޒާރާގެ ސްޓޭޓް މިނިސްޓަރ ޑރ.އަބްދުއްރަޙީމް ޙަސަން ވިދާޅުވިއެވެ.

އަލަށް އެކުލަވާލާފައިވާ އުޞޫލްގައިވާގޮތުން ޕްލޭސްމަންޓް ލިބުނުކަމުގެ ލިޔުން ސްކޮލަރޝިޕް ލިބޭ ދަރިވަރު މަތީ ތަޢުލީމާ ބެހޭ ވުޒާރާއަށް ހުށަހެޅުމަށްފަހު، ފުރިހަމަކުރަން އެދޭ ޕްރޮގުރާމު ބަދަލުކުރެވޭނީ 3 ހާލަތެއްގައެވެ. އަދި އެހާލަތައް އުޞޫލްގައި ތަފްޞީލްކޮށް ކިޔާދީފައިވެއެވެ.

އައު އުސޫލުގައިވާ ގޮތުން ޕްރޮގުރާމު ބަދަލުކުރަން އެދޭއިރ،ު ކުރިން ހުށަހެޅި ޕްލޭސްމަންޓް ލިބުނުކަމުގެ ލިޔުމުގައި ބަޔާންކޮށްފައިވ،ާ މަތީ ތަޢުލީމު ދޭ މުއައްސަސާއަށް އެއްވެސް ޕޭމަންޓެއް ހަދައިފައި އޮވެގެން ނުވާނެއެވެ.

މަތީ ތަޢުލީމު ދޭ މުއައްސަސާއަކަށް ޕޭމަންޓެއް ހަދާފައިވަނިކޮށް ޕްރޮގްރާމު ބަދަލުކުރަން ޖެހިއްޖެނަމަ

* ޕްރޮގްރާމް ބަދަލުކުރަން ހުށަހަޅަންވާނީ ކިޔަވަން ފެށި ޕުރޮގުރާމުގެ ފުރަތަމަ ސެމެސްޓަރ ނިމުމުގެ ކުރިން
* ދޫކޮށްލާ ޕްރޮގްރާމް ފުރިހަމަކުރުމަށް ދަރިވަރުގެ ނަމުގައި ކޮށްފައިވާ ޚަރަދުތަކަކ،ީ ބަދަލުވާ ޕްރޮގްރާމަށް ހިނގާ ޖުމުލަ ޚަރަދުން އުނިކުރެވޭނެ އެއްޗެއްކަމަށް އެއްބަސްވުން.
* ޕްރޮގްރާމް ބަދަލުކުރަންޖެހޭ ސަބަބު އެކަން ކުރުން މުހިންމުކަމަށް ބާރުދ،ޭ ކަމާ ގުޅުންހުރި ރަސްމީ ފަރާތްތަކުގެ ލިޔުންތައް ހުށައެޅުން
* ޕްރޮގްރާމް ބަދަލުވީނަމަވެސ،ް އެސްކޮލަރޝިޕްގެ އުސޫލުގެ އެހެން އެއްވެސް މާއްދާއަކާ ތައާރުޒުވުމެއް ނެތުން
* ޕްރޮގްރާމް ބަދަލުކުރާ ފުރަތަމަ ފަހަރު ކަމުގައިވުން
* ދޫކޮށްލާ ޕްރޮގްރާމް ފުރިހަމަކުރުމަށް ހިނގާނެ ޚަރަދަށްވުރެ ޖުމުލަ ޚަރަދު ބޮޑުނުވާނެ ޕްރޮގްރާމަކަށް ބަދަލުވާން އެދުން

ފުރަތަމަ ޑިގްރީއާ ނުލައި ސީދާ އެންޓްރީ ލިބޭ 4 އަހަރަށްވުރެ ދިގުނޫން މާސްޓަރސް ޑިގްރީ ޕްރޮގްރާމެއްނަމަ

* މިއުސޫލަށް ޢަމަލުކުރަން ފެށިއިރު ކިޔަވަމުންދާ ދަރިވަރެއް ކަމުގައިވުން
* ޕްރޮގްރާމް ބަދަލުކުރާ ފުރަތަމަ ފަހަރު ކަމުގައިވުން
* ޕްރޮގްރާމް ބަދަލުވީނަމަވެސ،ް އެސްކޮލަރޝިޕްގެ އުސޫލުގެ އެހެން އެއްވެސް މާއްދާއަކާ ތައާރުޒުވުމެއް ނެތުން

މަތީ ސާނަވީ އިމްތިޙާނުން އެއްވަނަ ދަރަޖައިގައި ފާސްވާ ދަރިވަރުންނަށް ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕަކީ ދިވެހި އިސްލާމް ހިމެނޭގޮތަށް ފަސް މާއްދާއިން އޭ ސްޓަރ ލިބޭ ދަރިވަރުންނަށް ދޭ ސްކޮލަރޝިޕެކެވެ.

ހައި އެޗީވަރސް ސްކޮލަރޝިޕަކީ ދިވެހި އިސްލާމް މާއްދާ ހިމެނޭގޮތަށް ފަސް މާއްދާއިން "އޭ" އަށް ވުރެ ދަށް ނޫން ފާހެއް ލިބިފައި އޮންނަ ދަރިވަރުންނަށް ދޭ ސްކޮލަރޝިޕެކެވެ. މި ދެ ސްކޮލަރޝިޕްގެ ތެރެއިން ރައީސުލްޖުމްހޫރިއްޔާގެ ސްކޮލަރޝިޕް ލިބޭ ދަރިވަރުންނަށް ބޭނުން ޤައުމަކުން ބޭނުން ޔުނިވަރސިޓީއަކުން ކިޔެވުމުގެ ފުރުޞަތު ލިބެއެވެ.

ހައި އެޗީވާރސް ސްކޮލަރޝިޕްގައި މި ސަރަޙައްދުގެ ޤައުމުތަކާއި މެލޭޝިޔާއާއި ޗައިނާއާއި ފިލިޕީންސްގެ އިތުރުން އޯއައިސީޑީގެ ޤައުމުތަކަށް ކިޔަވަން ދިޔުމުގެ ފުރުޞަތު ލިބޭނެއެވެ. އަދި މި ސްކޮލަރޝިޕުގައި ކިޔަވަންދެވޭނީ ރާއްޖެއަށް ބޭނުންވާ ދާއިރާތަކަށެވެ.