22 މީހުން އަދިވެސް ވަގުތީ ހިޔާތަކުގައި، އަމިއްލަ ގެދޮރަށް ބަދަލުކުރެވޭނީ މަރާމާތަށްފަހު: އެންޑީއެމްއޭ

ތިން ވުޒާރާގައި ހިނގި އަލިފާނުގެ ހާދިސާއާއި ގުޅިގެން ވަގުތީ ހިޔާތަކަށް ބަދަލުކުރި މީހުން އަދިވެސްތިބީ ވަގުތީ ހިޔާތަކުގައިކަމަށާއި، އެމީހުންގެ އަމިއްލަ ގެދޮރަށް ބަދަލުކުރެވޭނީ އެތަންތަން މަރާމާތު ކުރެވިގެންކަމަށް ނޭޝަނަލް ޑިޒާސްޓަރ މެނޭޖުމަންޓް އޮތޯރިޓީ، އެންޑީއެމްއޭއިން ވިދާޅުވެއެވެ.

މިމަހުގެ 12 ވަނަ ދުވަހު ގެދޮރުވެރިކަމާއި ބެހޭ ވުޒާރާއާއި، ބިނާރާއި ބެހޭ ވުޒާރާގެ އިތުރުން ތިމާވެށްޓާ ބެހޭ ވުޒާރާ ހިންގަމުން ދިޔަ އިމާރާތުގައި އަލިފާން ރޯވެ ވަނީ އަނދާފައެވެ. އެ ހާދިސާއާއި ގުޅިގެން އެސަރަހައްދުގެ އެހެން ބައެއް އިމާރާތްތަކުން މީހުން ވަގުތީ ހިޔާތަކަށް ބަދަލުކުރިއެވެ.

އެގޮތުން ތިން އިމާރާތެއްގެ 7 ގޭބިސީއަކުން 29 މީހުން ވަގުތީ ހިޔާތަކަށް ބަދަލުކުރިއެވެ. މީގެ ތެރޭގައި ހިމެނެނީ 15 ފިރިހެނުންނާއި 14 އަންހެނުންނެވެ. އެއީ މ.ލޯކަށިގެ، މ.ކުދިމާވިލާ، އަދި މ.ލޫބިޔާ މި ތިން ގޭގެ މީހުންނެވެ.

އެންޑީއެމްއޭއިން ވިދާޅުވީ، 29 މީހުންގެ ތެރެއިން 5 މީހުން ވަނީ އެމީހުންގެ ގެއަށް ބަދަލުވެފައިކަމަށެވެ. އަދި ބާކީ 22 މީހުން 5 ދުވަހަށް ވަގުތީ ބޯހިޔާވަހިކަން އިތުރުކުރެވިފައިވާކަމަށްވެސް އެންޑީއެމްއޭއިން ވިދާޅުވިއެވެ. އެމީހުންގެ ޒަރޫރީ ބޭނުންތަކަށް މިވަގުތު ޚަރަދު ކުރަމުންދަނީ ސަރުކާރުންނެވެ.

ތިން ވުޒާރާގައި ހިނގި އަލިފާނުގެ ހާދިސާގައި އެ ވުޒާރާތައްވަނީ އެއްކޮށް އަނދާ ހުލިވެފައެވެ. އަދި އެ ވުޒާރާތަކުގެ މަސައްކަތް ވަނީ ދަރުބާރުގެއަށް ބަދަލުކޮށް ޚިދުމަތްދޭން ފަށްޓަވާފައެވެ.