ޔޫކްރެއިންގެ ހަކަތައާއި ގޭސް އުފައްދާ މަރުކަޒުތަކަށް އަމާޒުކޮށް ރަޝިޔާގެ ވަރުގަދަ ޙަމަލާތަކެއް

ރަޝިޔާއިން ޔޫކްރެއިނަށް އަމާޒުކޮށް ވަރުގަދަ މިސައިލް އަދި ޑްރޯން ޙަމަލާތަކެއް ދީފިއެވެ. މިއީ އެމެރިކާއިން ޔޫކްރެއިނާއެކު ޖާސޫސީ މަޢުލޫމާތު ޙިއްޞާ ކުރުން ހުއްޓާލި ފަހުން ރަޝިޔާއިން ދީފައިވާ ފުރަތަމަ ވަރުގަދަ ޙަމަލާއެވެ.

ޔޫކްރެއިނުން ބުނީ ރަޝިޔާއިން 67 މިސައިލާއި 194 ޑްރޯން އެ ޤައުމަށް އަމާޒުކޮށް ފޮނުވާފައިވާ ކަމަށެވެ. އޭގެ ތެރެއިން ޔޫކްރެއިނަށް ކާމިޔާބުކަމާއެކު ހުއްޓުވުނީ 34 މިސައިލާއި 100 ޑްރޯނެވެ.

ރަޝިޔާއިން ދިން ޙަމަލާގެ ސަބަބުން ޔޫކްރެއިންގެ ހަކަތަ އަދި ގޭސް އުފައްދާ މަރުކަޒުތަކަށް ބޮޑެތި ގެއްލުންތައް ލިބިފައިވެއެވެ. ޔޫކްރެއިންގެ ހަކަތައާ ބެހޭ ވަޒީރު ޖާމަން ގަލުޝެންކޯ ވަނީ ޔޫކްރެއިންގެ އެކި ސަރަޙައްދުތަކުގައިވާ ހަކަތަ އަދި ގޭސް އުފައްދާ މަރުކަޒުތަކަށް ރަޝިޔާއިން ޙަމަލާ ދީފައިވާކަން ޔަޤީން ކޮށްދެއްވާފައެވެ. ޔޫކްރެއިންގެ ހަކަތަ އުފައްދާ އެންމެ ބޮޑު އަމިއްލަ ކުންފުނި ކަމުގައިވާ ޑީޓެކުން ބުނީ ރަޝިޔާއިން ހުކުރު ދުވަހު ދިން ޙަމަލާގެ ސަބަބުން ޕޮލްޓޯވާ ސަރަޙައްދުގައި ގޭސް އުފެއްދުން މެދުކަނޑާލާފައިވާ ކަމަށެވެ.

މި އަހަރުގެ ތެރޭގައި ރަޝިޔާއިން ދިން ގިނަ ޙަމަލާތަކެއް ވަނީ ޔޫކްރެއިންގެ ހަކަތަ އަދި ގޭސް އުފައްދާ މަރުކަޒުތަކަށް އަމާޒު ކޮށްފައެވެ. އޭގެ ސަބަބުން ޔޫކްރެއިންގެ ކަރަންޓު އުފެއްދުމުގެ ޤާބިލިއްޔަތަށް ވަނީ ހީނަރުކަން އައިސްފައެވެ.

ޙަމަލާތަކާ ގުޅޭގޮތުން ޔޫކްރެއިނުން ބުނީ އެ ޤައުމުގެ ދެވަނައަށް އެންމެ ބޮޑު ސިޓީކަމުގައިވާ ޚާކިވްގައި ޢާންމުންނަށް އަމާޒުކޮށް ދިން ޙަމަލާއެއްގައި އަށް މީހުން ޒަހަމްވެފައިވާ ކަމަށެވެ. އޭގެ އިތުރުން ޕޮލްޓާވާގައި ކުޑަ ކުއްޖެއް ހިމެނޭގޮތަށް ދެ މީހުންނަށް ޒަހަމް ވެފައިވާ ކަމަށާއި ޓަރނޮޕިލްގެ ހަކަތަ އުފައްދާ މަރުކަޒަކާއި އެހެނިހެން އިމާރާތްތަކަށް ގެއްލުން ލިބިފައިވާ ކަމަށެވެ.

ރަޝިޔާއިން ކޮންމެ ރެއަކު ވެސް ޔޫކްރެއިންގެ އެކި ސިޓީތަކަށާއި އަވަށްތަކަށް އަމާޒު ކޮށް ޑްރޯން ޙަމަލާތައް ދެއެވެ. ނަމަވެސް މިއީ މި ހަފުތާގެ ތެރޭގައި އެމެރިކާއިން އަސްކަރީ އެހީއާއި ޖާސޫސީ މަޢުލޫމާތު ޔޫކްރެއިނަށް ދިނުން ހުއްޓާލި ފަހުން ދިން މި ފަދަ ފުރަތަމަ ބޮޑު ޙަމަލާއެވެ. ތިން އަހަރު ދުވަހަށް ދެމިގެން ގޮސްފައިވާ ރަޝިޔާ-ޔޫކްރެއިން ހަނގުރާމަ ނިމުމަކަށް ގެނައުމަށް އެމެރިކާގެ ރައީސް ޑޮނަލްޑް ޓްެރަމްޕް ހިތްވަރުދެއްވަމުންދާ މި ދަނޑިވަޅުގައި ޔޫކްރެއިންގެ އެންމެ ބޮޑު މަދަދުގާރުގެ ގޮތުގައި އޮތް އެމެރިކާއިން އެ ޤައުމަށް ދެމުންދިޔަ އެހީތެރިކަން މެދުކަނޑައިލުމުން ޔޫކްރެއިންގެ ރައީސް ވޮލޮޑޮމީރު ޒެލެންސްކީއަށް ހަނގުރާމަ ހުއްޓާލުމަށް އޮތް ޕްރެޝަރު ވަނީ ވަރަށް ބޮޑަށް އިތުރުވެފައެވެ.

ޙަމަލާތަކާ ގުޅޭގޮތުން ޓެލެގްރާމްގައި ލިޔުއްވި މެސެޖެއްގައި ޒެލެންސްކީ ވިދާޅުވީ ހަޤީޤީ ޞުލްޙަ ޤާއިމް ކުރުމަށް އެޅޭނެ އެންމެ ފުރަަތަމަ ފިޔަވަޅަކީ ހަނގުރާމަ ފެށި މަސްދަރު ކަމުގައިވާ ރަޝިޔާއިން ޙަމަލާ ދިނުން ހުއްޓުވުން ކަމަށެވެ. ޒެލެންސްކީ އިތުރަށް ވިދާޅުވީ ޞުލްޙައިގެ މަގު ޚިޔާރު ކުރުމަށް ޔޫކްރެއިނުން ތައްޔާރަށް އޮތް ކަމަށާއި ހަނގުރާމަ ފެށުނީއްސުރެ ވެސް ޔޫކްރެއިނުން މަސައްކަތް ކުރަނީ ޞުލްޙައަށް ކަމަށެވެ.

ފާއިތުވި ހަފުތާތަކުގައި އެމެރިކާއިން ރަޝިޔާއާއެކު ގުޅުން ދަބަހި ކުރަމުން ދާތީ ޔޫކްރެއިންގެ ރައީސް ޒެލެންސްކީ މަސައްކަތް ކުރައްވަމުން ދަނީ އެ ޤައުމަށް ހުޅަނގުގެ ޤައުމުތަކުގެ ތާއީދު ހޯއްދެވުމަށެވެ. އޭނާ ވަނީ ވައިގެ މަގުންނާއި ކަނޑުގެ މަގުން ދެމުންދާ ޙަމަލާތައް މެދުކަނޑައިލުމަށް ހުށަހަޅުއްވާފައެވެ. ނަމަވެސް އެ ހުށަހެޅުމުގައި އެއްގަމުމަގުން ދޭ ޙަމަލާތައް ނުހިމެނެއެވެ.