ސޫރިޔާގެ ސަލާމަތީ ބާރުތަކުން އެ ޤައުމުގެ ކުރީގެ ރައީސް ބައްޝާރު އަލް-އަސަދު ނިސްބަތްވާ އަލް-ޢަލަވީ ދަރިކޮޅުގެ ހަނގުރާމަވެރިންނާ ދެކޮޅަށް ހިންގަމުންދާ ކުރިމަތިލުންތަކުގައި ގިނަ ޢަދަދެއްގެ މީހުން މަރުވެއްޖެއެވެ.
މިދިޔަ ޑިސެމްބަރު މަހުގެ 8ވަނަ ދުވަހު ސޫރިޔާގެ ހަތިޔާރު އެޅި ނިރުބަވެރި ޖަމާޢަތެއް ކަމަށްވާ ހަޔިއަތު ތަޙްރީރް އަލް-ޝާމް (އެޗްޓީއެސު)ން ވަނީ ކުއްލި ގޮތަކަށް އަސަދުގެ ވެރިކަން ވައްޓާލައިފައެވެ. އެ ޖަމާޢަތުގެ ހަނގުރާމަވެރިން ވެރިރަށް ދިމިޝްޤަށް އެރުމާ އެކު، އަސަދު ވަނީ އޭނާގެ ޢާއިލާއާ އެކު ފިއްލަވައިގެން ރަޝިޔާއަށް ވަޑައިގެން އެ ގައުމުގެ ހިމާޔަތް ހޯއްްދަވައިފައެވެ. އަސަދު ވެރިކަމުން ދުރު ކުރުމަށް ފަހު އެޗްޓީއެސުން ވަނީ އެ ޖަމާޢަތުގެ ސަރުކާރެއް އެކުލަވައިލައި، އެ ޖަމާޢަތުގެ ވެރިޔާ އަޙްމަދު އަލް-ޝަރާޢު އެ ސަރުކާރުގެ އިންތިޤާލީ ރައީސް ކަމުގެ މަޤާމަށް އިސްކޮށްފައެވެ.
މިދިޔަ ބުރާސްފަތި ދުވަހު ސޫރިޔާގެ ސަލާމަތީ ބާރުތަކާއި އަލަވީތުންނާ ދެމެދު ބަދަލު ކުރަން ފެށި ޙަމަލާތަކުގައި އެ ދުވަހު އެކަނި ވެސް ސޫރިޔާގެ ސަލާމަތީ ބާރުތަކަށް ނިސްބަތްވާ 13 ސިފައިން މަރުވެފައި ވެއެވެ. ޙަމަލާތައް ދެވަނަ ދުވަހަކަށް ދެމިގެން ގޮސްފައިވާއިރު ސީރިޔަން އޮބްސަވޭޓަރީ ފޮރ ހިޔުމަން ރައިޓްސުން ބުނީ ސޫރިޔާގެ ފަރުބަދަމަތީ އައްސޭރިފަށުގެ ސަރަޙައްދުގައި އަލަވީތުންނާ ދެކޮޅަށް ސަލާމަތީ ބާރުތަކުން ހިންގަމުންދާ ހަމަނުޖެހުންތަކުގައި މިހާތަނަށް 130އަށް ވުރެ ގިނަ މީހުން މަރުވެފައިވާ ކަމަށެވެ. އެ ސަރަޙައްދަކީ މީސްމަދު އަލަވީތުންގެ އާބާދީ ބޮޑު ސަރަޙައްދެކެވެ.
މަރުވި މީހުންގެ ތެރޭގައި އަލަވީތުން ދިރިއުޅޭ އަވަށެއް ކަމަށްވާ އަލް މުޚްތާރިޔާގައި ދިރިއުޅޭ 24 މީހުން ހިމެނޭ ކަމަށް ސީރިޔަން އޮބްސަވޭޓަރީ ފޮރ ހިޔުމަން ރައިޓްސުންނާއި އަލަވީތުންނަށް ނިސްބަތްވާ އެކްޓިވިސްޓުން ވަނީ ބުނެފައެވެ. މަރުވި މީހުންގެ ތެރޭގައި އަލަވީތުންގެ ދީނީ އިލްމުވެރިއެއް ކަމަށްވާ ޝައިޅް ޝަޢްބާން މަންސޫރާއި އޭނާގެ ފިރިހެން ދަރިފުޅު ހިމެނެއެވެ. އެއީ ސޫރިޔާގެ ހުޅަނގުގައި އޮންނަ އަވަށެއް ކަމަށްވާ ސަހްލާބުގައެވެ. އަލަވީތުންނަށް ނިސްބަތްވާ އެކްޓިވިސްޓުން ބުނީ އެ މީހުންގެ މީހުން ބަޑި ޖަހައި މަރާލާފައި ވަނީ ވަގުތީ ސަރުކާރާ ގުޅުންހުރި ބައެއް ކަމަށެވެ. ނަމަވެސް ސަރުކާރުން އެ ތުހުމަތުތަކާ ގުޅޭ ގޮތުން ބަހެއް ބުނެފައެއް ނުވެއެވެ.
ސޫރިޔާގެ ރަސްމީ އިދާރާތަކުން ބުނީ ކުރިމަތިލުންތައް ފެށުނީ ސޫރިޔާގެ ސަލާމަތީ ބާރުތަކަށް އަމާޒުކޮށް އަސަދަށް ވަފާތެރި ހަނގުރާމަވެރިން ދުރާލާ ރާވައިގެން ދިން ވަރުގަދަ ޙަމަލާތަކެއްގެ ސަބަބުން ކަމަށެވެ. އެ ޙަމަލާތަކުގެ ސަބަބުން އަލް-ޝަރާޢު ސޫރިޔާގެ ކަންކަން ކޮންޓްރޯލް ކޮށް އެ ޤައުމާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލެވޭތޯ ކުރަމުންދާ މަސައްކަތަށް ވަނީ ހިޔަނި އެޅިފައެވެ.
ޙަމަލާތަކާ ގުޅިގެން ސޫރިޔާގެ ގިނަ ޢަދަދެއްގެ ރައްޔިތުން ވަނީ ވަގުތީ ސަރުކާރަށް ތާއީދު ކޮށް މަގުތަކަށް ނިކުމެފައެވެ. އޭގެ އިތުރުން ސޫރިޔާއާ ގާތް ގުޅުމެއް ބާއްވާ ދެ ޤައުމު ކަމުގައިވާ ސަޢުދީ ޢަރަބިއްޔާއާއި ތުރުކީވިލާތުން ވެސް ވަނީ ވަގުތީ ސަރުކާރާއެކު އޮތް ކަމަށް އިޝާރާތް ކޮށްފައެވެ. އަސަދުގެ ސަރުކާރުގެ އެންމެ ބޮޑު އެއް މަދަދުގާރު ކަމުގައިވާ ރަޝިޔާއިން ވެސް ވަގުތީ ސަރުކާރާ ގުޅުން ބަދަހި ކުރުމަށް މަސައްކަތް ކުރަމުންދާއިރު ރަޝިޔާއިން ވަނީ ސޫރިޔާގައި މިހާރު ހިންގަމުންދާ ހަމަނުޖެހުންތަކާ މެދު ކަންބޮޑުވުން ފާޅު ކޮށްފައެވެ. ސޫރިޔާގެ ސަރުކާރުގެ އިސް ވެރިން ލޭއޮހޮރުވުންތަކަށް ނިމުމެއް ގެންނަން ޖެހޭ ކަމަށް ރަޝިޔާއިން ވަނީ ބުނެފައެވެ.
ލޭއޮހޮރުވުންތަކާ ގުޅިގެން ސޫރިޔާގެ ޠަރްޠޫސާއި އަލްލާޛިޤިއްޔާގައި މިހާރު ވަނީ ކާފިއު އިޢުލާނު ކޮށްފައެވެ. ދެ ސަރަޙައްދުގައި އާއި ކައިރި ފަރުބަދަތަކުގައި ސޫރިޔާގެ ސަލާމަތީ ބާރުތަކުން ދަނީ ބަލައިފާސް ކުރުމުގެ އޮޕަރޭޝަންތަކެއް ކުރިއަށް ގެންދަމުންނެވެ.