ފަލަސްޠީނުގެ ޣައްޒާގެ މުސްލިމުން ނިކަމެތިކޮށް ހާލުގައި ޖެއްސުމަށް ހައްދުފަހަނަ އެޅި ޔަހޫދީން ހިންގަމުންދާ ޖަރީމާގެ ދަށުން އެ ސަހަރަށް ކާބޯތަކެއްޗާއި އިންސާނީ އެހީ އެތެރެ ކުރުމަށް ކުރިމަތި ކޮށްފައި އޮތް ހުރަސްތައް ނައްތައިލުމަށް ޙޫޘީ ޖަމާޢަތުން ހަތަރު ދުވަހުގެ މުހުލަތެއް ދީފިއެވެ. ޙޫޘީންނަކީ ޔަމަންގައި ހަރަކާތްތެރިވާ ހަތިޔާރު އެޅި ޖަމާޢަތެކެވެ. ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީ ފައުޖުން ހުސްވި އަހަރު ހިންގި ލާއިންސާނީ ޖަރީމާތަކުގެ ރައްދުގައި ޔަހޫދީންނާ ދެކޮޅަށް ޙޫޘީން ނުރައްކާތެރި އަސްކަރީ ހަރަކާތެއް ހިންގާފައިވެއެވެ.
ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީން ޢުދުވާން ހިންގަން ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެ ޢުދުވާނުގައި 61,700ށްވުރެ ގިނަ މީހުން ޝަހީދު ކޮށްލިއެވެ. އަދި، 111,000ށްހާ މީހުން ޒަޚަމު ކޮށްލިއެވެ. ޢުދުވާން ހިންގުން މެދުކަނޑައިލާފައި ވަނީ، ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީންނާ ދެމެދު ޖަނަވަރީ 19ވަނަ ދުވަހު އަމަލު ކުރަން ފެށި އެއްބަސްވުމެއްގެ ދަށުންނެވެ.
އެ ޢުދުވާނުގެ ރައްދުގައި ޙޫޘީން ހިންގާފައިވާ އަސްކަރީ އޮޕަރޭޝަނުގެ ދަށުން ރަތް ކަނޑު ހުރަސްކޮށް ދަތުރު ކުރާ އާގުބޯޓުފަހަރަށް އަމާޒުކޮށް ނުރައްކާތެރި ޙަމަލާތަކެއް އަމާޒު ކުރުން ހިމެނެއެވެ. ޙޫޘީންގެ ޙަމަލާތައް އަމާޒު ކޮށްފައިވާ އުޅަނދުފަހަރުގެ އަދަދު 100ށް އުފުލިފައިވާއިރު، އޭގެ ތެރެއިން ދެ އުޅަނދު ވަނީ ފައްތައިލާފައެވެ. މީގެ އިތުރުން، ދުރު-ރާސްތާ ހަތިޔާރު ބޭނުން ކޮށްގެން ޒަޔަނިސްޓު އިސްރާއީލުގެ ރަށްތަކަށް އަމާޒުކޮށް ނުރައްކާތެރި ޙަމަލާތަކެއް ދީފައިވެއެވެ.
މިއީ ޔަހޫދީންގެ އިތުރުން އެމެރިކާއަށް ވެސް ދިން އިންޒާރެއް
ޙޫޘީންގެ އަސްކަރީ އޮޕަރޭޝަނުގެ ބޭނުމަކީ ފަލަސްޠީނުގެ މިނިވަން ކަމަށް ޖިހާދު ކުރާ ޖަމާޢަތްތަކުގެ އިތުރުން ފަލަސްޠީނުގެ ރަައްޔިތުންނަށް ވާގިވެރިވުމެވެ. ޙޫޘީންގެ ނުރައްކާތެރި ޙަމަލާތައް އަމާޒު ކޮށްފައި ވަނީ ޒަޔަނިސްޓުންގެ އިސްރާއީލަށް މުދާ އުފުލާ އުޅަނދުފަހަރަށެވެ. އަދި، ޔަހޫދީންނާ ގުޅުން އޮތް އާގުބޯޓުފަހަރަށެވެ. ޙޫޘީންނާ ދެކޮޅަށް އެމެރިކާއާއި އިނގިރޭސިވިލާތުން ގުޅިގެން އަސްކަރީ ކެމްޕޭނެއް ފެށުމާ އެކު، ޙޫޘީންގެ ޙަމަލާތައް އެ ދެ ޤައުމުގެ އަސްކަރީ މަނަވަރުތަކަށް ވެސް އަމާޒު ކޮށްފައިވެއެވެ.
ޔަހޫދީންނާ ދެކޮޅަށް ހިންގަމުން ދިޔަ އަސްކަރީ ހަރަކާތްތައް ޙޫޘީން މަޑުޖައްސައިލާފައި ވަނީ ޖަނަވަރީ 19ވަނަ ދުވަހުގެ އެއްބަސްވުމާ ގުޅިގެންނެވެ. ނަމަވެސް، އެއްބަސްވުމުގެ ފުރަތަމަ މަރުޙަލާ ނިމުމަކަށް އައުމާ އެކު، ޔަހޫދީން މި ވަނީ ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުމަށް އަނެއްކާ ވެސް ހުރަސް އަޅާފައެވެ. އެއްބަސްވުމުގެ ދެވަނަ މަރުޙަލާއަށް އަމަލު ކުރަން ފެށުމުގެ ބަދަލުގައި ޔަހޫދީން ބޭނުން ވަނީ ފުރަތަމަ މަރުޙަލާގެ މުއްދަތު އިތުރު ކުރުމަށެވެ. އަދި، ޣައްޒާއަށް ކާބޯތަކެތި އެތެރެ ކުރުމަށް ހުރަސް އަޅާފައި ވަނީ ޙަމާސުން އެ ކަމަށް އެއްބަސްނުވުމާ ގުޅިގެން މާރިޗު މަހުގެ 2ވަނަ ދުވަހުއެވެ.
މި ކަމާ މެދު ޙޫޘީން މި ވަނީ ކަންބޮޑުވުން ފާޅުކޮށް، ޔަހޫދީންނަށް ނުރައްކާތެރި އިންޒާރެއް ދީފައެވެ. އެ ޖަމާޢަތުގެ ވެރިޔާ ޢަބްދުލްމަލިކް އަލް-ޙޫޘީ ވިދާޅުވީ ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުމަށް އޮތް ހުރަސްތައް ނައްތައިލުމަށް ޔަހޫދީންނަށް ހަތަރު ދުވަހުގެ މުހުލަތެއް ދީފައިވާނެ ކަމުގައެވެ. މިއީ، އެ ގޮތަށް ޔަހޫދީން އަމަލު ނުކޮށްފި ނަމަ، އެ މީހުންނާ ދެކޮޅަށް އަލުން އަސްކަރީ ހަރަކާތްތައް ފަށާނެ ކަމުގެ ބިރުވެރި އިންޒާރެކެވެ.
ޙޫޘީންނަކީ ބާރުގަދަ ލަޝްކަރެއް ކަން އޮތީ ސާބިތު ކޮށްދީފައި
"އަޅުގަނޑުމެން ހަތަރު ދުވަހުގެ މުހުލަތެއް ދޭނަން. މިއީ، [ޣައްޒާގެ ސުލްޙައިގެ އެއްބަސްވުން އެކުލަވައިލި މެދުވެރިންގެ] މަސައްކަތްތައް ނިންމުމަށް ދީފައިވާ މުހުލަތެއް. ހަތަރު ދުވަހުގެ މުހުލަތަށް ފަހު އިސްރާއީލުގެ ދުޝްމަނުން ޣައްޒާއަށް އިންސާނީ އެހީގެ ސާމާނު އެތެރެ ކުރުމަށް ހުރަސް އަޅައި، ފުރަބަންދު ކުރިއަށް ގެންދާ ނަމަ، އިސްރާއީލުގެ ދުޝްމަނުންނާ ދެކޮޅަށް އަލުން އަސްކަރީ އޮޕަރޭޝަން ފަށާނަން،" ޔަހޫދީންނަށް އިންޒާރު ދެއްވައި އަލް-ޙޫޘީ ވިދާޅުވިއެވެ.
ޙޫޘީންގެ މި އިންޒާރަށް ޙަމާސް ޖަމާޢަތުން ވަނީ މަރުޙަބާ ކިޔާފައެވެ. "މި، ހިތްވަރު ގަދަ ނިންމުމަކީ… އެ މީހުން [ޙޫޘީން] 15 މަހުގެ މުއްދަތަކަށް އަޅުގަނޑުމެންނަށް ފޯރުކޮށްދެމުން ދިޔަ ވާތްގާއި އެހީތެރިކަމުގެ އިތުރު ބަޔެއް،" ޙޫޘީންގެ ނިންމުމަށް މަރުޙަބާ ކިޔައި ޙަމާސް ޖަމާޢަތުން ބުންޏެވެ. ޣައްޒާގެ ރައްޔިތުން ގަދަބާރުން އެ މީހުން ވަޒަނުން ބޭރުކޮށްފި ނަމަ ޔަހޫދީންނާ ދެކޮޅަށް ނުރައްކާތެރި އަސްކަރީ ކެމްޕޭނެއް ފަށާނެ ކަމުގެ އިންޒާރު ފެބުރުވަރީ މަހު ވެސް ޙޫޘީން ދީފައިވެއެވެ.