މުނިފޫހިފިލުވުން

ފާފައިގެ ނަތީޖާ


  • ލިޔުނީ: ޝަރުމާ އަބްދުއް ރަހީމް – ނިރު އދ. މަހިބަދޫ

ވަށައިގެންވަނީ ކަނު އަނދިރިކަމެވެ. މިއަނދިރިކަމުގައި އަހަރެން ޣަރަޤުވެ ނިމިއްޖެއެވެ. ޝައިޠާނީ ބާރުތަކާ ޚިޔާލުތަކުން ސިކުނޑި ފުރި ނޭވާ ހަފުސްވެފައިވާ ކަހަލައެވެ. މިރޭވެސް އަހަރެންގެ ފިރިމީހާ އެދިޔައީ ޑިޔުޓީއަށެވެ. ގަޑިން ދިހައެއް ޖަހާ ބޮޑުވެއްޖެއެވެ. އަހަރެންގެ ދެދަރިން އެތިބީ ފުންނިދީގައެވެ. މުޅިރަށް ހަމަހިމޭން ވެފައިވާ ކަހަލައެވެ. އެއްވެސް ފަރާތަކުން އަޑެއް އިވި ހިލަމެއް ނުވެއެވެ. މިރަށުމީހުން މިރޭ ކޮބައިބާވައެވެ. ރަމަޟާން މަސްކަމުން އަޅުކަމުގައި ބަންދުވެފައި ތިބީކަން ގައިމެވެ. މަސްހުނި ޚިޔާލުތަކެއްގައި އާގަމަވެފައި އޮއްވާ ، ގޭގައި އިންނަ ބޮޑުގަޑިން ދިހަގަޑި ބައިވެއްޖެކަމުގެ ރަނގަބީލު އަޅާލިއެވެ. ފުންމައިގެން ތެދުވެ އެނދު ކައިރީ ވަށައިގެން އުކާލެވިފައިވާ ކުޅޭތަކެއްޗާއި، އަދާތުތައް ނަގާ ކައިރީގައި ހުރި ވަށިގަނޑަށް އަޅާލީމެވެ.

ކުޑަކޮށް ހަމަޖެހިލުމަށްފަހު ފޯނު ނަގައިގެން އެނދުގައި ހުރަހަށް ބުރަކަށި ޖައްސާލީމެވެ. އެވަގުތު ފޯނު ރިންގުވާން ފެށިއެވެ. ހިތްތެޅިގަތެވެ. އެގުޅަނީ އަހަރެންގެ ހިތުގެ ރަސްގެފާނެވެ. އެހެން ރޭރޭފަދައިން ފޯނުކަނޑާލުމަށްފަހު މެސެޖް ކުރަންފެށީމެވެ. ލޯބީގެ ބަގީޗާގައި މާތައް ފޮޅުވަން ފެށީމެވެ. ތަރިބާލައި ހަނދު ހެކިކޮށް، ވަޢުދާ އަޙްދުތައް ވަމުން ދިޔައީމެވެ. ކުއްލިއަކަށް ތަޅުދަނޑިއެއްގެ އަޑާއެކު ދޮރު ހުޅުވުނެވެ. މިއީ އަހަރެން އެއްގޮތަކަށްވެސް އުއްމީދުކުރި ގޮތެއްނޫނެވެ. އެހެންނޫނީ އަހަރެންގެ ފިރިމީހާ ޑިޔުޓީގައި ހުރެފައި އެންމެ އަވަހަށްވެސް އަންނާނީ ބާރައިގެ ފަހުންނެވެ. އެވަގުތު ބިރުން ރޫރޫ އަޅައިގަތެވެ. ވޮށިމަސް މިޔަރެއް ގަތުމުން އަތުގައި އޮންނަ ނަނު ލޫދޭފަދައިން ފޯނު އަތުގެ ތެރެއިން ފިރުކިގެން ދިޔައެވެ. އޭނާ ފުންމައިގެން އައިސް ފޯނު ނެގިއެވެ. އަދި މެސެޖުތަކަށް ކަޅި ހިންގާލާފައި އަހަންނާ ދިމާއަށް ބަލާލީ ސިންގާ އޭގެ ޝިކާރައަކަށް ބަލައިލާ ފަދައިންނެވެ. އެވަގުތު އިނގިލި ދިއްކޮށްފައި ރުޅިވެރި ރާގެއްގައި ބުންޏެވެ. " ޝާނީ ތިޔައިނީ ވަރިކޮށްފައި " މިހެން ބުނެފައި މަޑުވެސް ކޮށްނުލާ ދޮރު ބާރަށް ޖެހުމަށްފަހު ހިނގައްޖެއެވެ. ދޮރާށިލައްޕާލި އަޑާއެކު އަހަންނަށް ހޭވެރިކަންވިއެވެ.

ހަދާނެގޮތެއް ނޭނގޭ ޙާލު ކޮޓަރިން ނުކުމެ ، ކަތޭރި ހުރަސްކޮށް ބޭރަށް ނުކުތީމެވެ. އަދި ގޭގެ ކުރިމަތީގައި ބަހައްޓާފައިވާ ޖޯއްޔެއްގެ ތެރެއަށް ގެނބިލީމެވެ. ގައިގެ ވަރު ހުސްވެ ހަތަރު އުދަރެސް ފެނުޖެހުނު ހެން ހީވިއެވެ. އެހިނދު ކުށްވެރި ޚިޔާލުތަކުން ބޯހާސްވާން ފެށިއެވެ. އާއެކެވެ. މިވަގުތު އަހަރެން ތަޙައްމަލް ކުރަމުން މިދަނީ އެތައް މަސްތަކެއްވަންދެން އަހަރެން ކުރި ފާފައިގެ ނަތީޖާއެވެ. ހިލޭ ފިރިހެނަކާއެކު ހިންގި ނާޖާއިޒު ގުޅުމުގެ އަދަބެވެ. އެތަންވަޅު އަހަރެންގެ ލޮލުން ހޯސްލާފާ އޮހިގަތް ކަރުނައިން، ކޯތާފަތް ތެންމަމުން ދިޔައެވެ. އެހެނަސް އެތަން ދެކެން އަންނާނެ ފުރާނެއެއް ނެތެވެ. ދުރުދުރުން ފެންނަން ހުރި، ކުޑަކުޑަ ފަސްވޯޓްގެ ބޮކީގެ ފަނޑުއަލިކަން ފިޔަވައި އިތުރު އަލިކަމެއް ނެތެވެ. މުޅިފަޒާގައި ފެތުރިފައިވަނީ ނާމާންކަމާއި ބިރުވެރިކަމެވެ. ގައިގައި ބީހިލާ މަޑުމަޑު ހުޅަންވައިރޯޅި ތައް ފިރުމާލާފައި ދިޔަޔަސް، އެއްވެސް ފިނިކަމެއް ނުލިބޭފަދައެވެ. މުޅިމީހާ ދާހިއްލާ ފޯވިއެވެ. އެވަގުތު އަހަރެންގެ ޚިޔާލު ދަތުރުކުރީ މީގެ ވިއްސަކަށް އަހަރު ކުރިއަށެވެ.

ރަށުސްކޫލް ގްރޭޑް ދިހައެއް ނިންމާފައި އަހަރެން ދިޔައީ ނަރުސްކަން ކިޔަވާށެވެ. އަހަރެން މާލެ ފައިބާހުރީ މަންމަގެ ރަޙްމަތްތެރިއެއް ކަމުގައިވާ އާމިނާފާނުގެ ގޭގައެވެ. އެގޭގައި އުޅެނީ އާމިނާފާނާ އޭނާގެ ދެ ފިރިހެން ދަރިންނެވެ. އޭނާގެ ފިރިމީހާވަނީ ކުދިން ކުޑައިރު ނިޔާވެފައެވެ. ހުވަފަތްވެ އެކަނިވެރިވުމުންވެސް ،ހިތްވަރު އެލުވާނުލާ ދަރިން ތަރުބިއްޔަތު ކުރިއެވެ. ހަގުދަރިފުޅު ޢަލީ އޭރުއުޅުނީ ގްރޭޑް ބާރާގައެވެ. އަދި ދޮށީދަރި ޖިނާޙް އަކީ ކުޅަދާނަ ލަޔާޤަތުހުރި މުދައްރިސެކެވެ. ދެދަރިންވެސް އޭރުތިބީ ހުއްސަރިބައި ކޮށެވެ. އެގޭގައި ހުންނަނީ ތިން ކޮޓަރިއެވެ. އެއްކޮޓަރީގައި ދިރިއުޅެނީ އާމިނާފާނު އަހަރެން ކިޔާގޮތުންނަމަ އާމިނާއްތައެވެ. އެކޮޓަރީގެ ދޮރާދިމާއަށް ވާގޮތަށް ހުންނަ ކޮޓަރީގައި އުޅެނީ އަހަންނެވެ. އަދި ޑެގްއަޅާފައި މައްޗަށް ހަދާފައިވާ މަތީކޮޓަރީގައި އުޅުނީ އާމިނާއްތަގެ ދެ ދަރިންނެވެ. ސިޑި ހަދާފައި ހުންނަގޮތުން ފޭބޭނީ އަހަރެންގެ ކޮޓަރީގެ ދޮރުމައްޗަށެވެ. އެތާ ގައި ހުސް ޖާގައެއް އޮންނައިރު އިސްތިރިކުރާ މޭޒަކާއި އެއްޗެހި އަޅުވަން އަޅުވާފައިވާ ދަނގަނޑު ހޮޅިއެއް، މަތީގައި ހަރުކޮށްފައި ހުރެއެވެ.

ގޭގެ ހުރިހާ ކަމެއްވެސް ބަލަހައްޓަނީ އާމިނާއްތައެވެ. މަންމަޔާ އޮންނަ ގާތްކަމެއްގެ ސަބަބުން އެގޭގައި ހުރުމަކަށް އެއްވެސް އަގެއް ނުނަގައެވެ. އެއީ ފިސާރި މުރާލި އަތްމަތި އަވަސް މީހެކެވެ. ސާފުތާހިރުކަމާ، ފާޑުވެރިކަން ހުރެއެވެ. ކޮންމެ ކަމެއްވެސް ކުރަން ޖެހެނީ ވަކި ތަރުތީބަކުންނެވެ. އަހަރެން ކިޔަވަންދަނީ ފެކަލްޓީ އޮފް ހެލްތު ސައިންސަސް އަށެވެ. އޭރުގައި ނަރުސްކަން ކިޔަވަނީ އެތަނުންނެވެ. ހެނދުނު އަށެއްޖަހާއިރު ކިޔަވަން ދާގޮތަށް އާދެވެނީ ތިނެއްޖަހާ ބޮޑުވާ ފަހުންނެވެ. ބައެއްފަހަރު ރަޙްމަތްތެރި ކުދިންނާއެކު ގްރޫޕްގައި ކިޔެވުމަށް ރޭގަނޑު ދަމެވެ. އެފަދަ ރޭރޭ އާމިނާއްތަ އަހަރެން އެކަނި ފޮނުވަން ނުކެރިގެން ދޮށީދަރި ޖިނާޙްގެ ސައިކަލު ފަހަތުގައި ފޮނުވައެވެ. އަދި ނިމޭއިރަށް ބަލާވެސް ފޮނުވައެވެ. އަންހެން ދަރިއަކު ނެތުމުން އާމިނާއްތަ އަހަރެންދެކެވަނީ އަމަށަކު ލޯތްބެއް ނޫނެވެ.

ދުވަސްތައް ފާއިތުވަމުން ދިޔައެވެ. ކޯހުގެ ސެމިސްޓަރ އަކަށްފަހު ސެމިސްޓަރއެއް ނިމެމުން ދިޔައެވެ. އަހަރެން ބައިވެރިވެގެން އުޅުނީ ތިން އަހަރުގެ ޑިގްރީ ކޯހެއްގައެވެ. . ދެއަހަރު ފާއިތުވީއިރު މުޅި ފެކަލްޓީއިން އަހަރެންގެ ނަން ވިދާލިއެވެ. ކިޔެވުމުގެ އިތުރުން އެތާންގައި ހިންގާ އެކިއެކި ކުޅިވަރުތަކާއި އަދި ޕްރޮގްރާމްތަކުގައި ބައިވެރިވެ ރަންވަނަތައް ހޯދަމުން ދިޔައިމެވެ. އެދުވަސްވަރު އަހަންނަށް އެންމެ ބޮޑު އެހީތެރިކަމެއް ލިބުނީ އާމިނާއްތަގެ ދޮށީދަރި ޖިނާޙްގެ ފަރާތުންނެވެ. އޭނާ އަހަރެންގެ ފަސްފަހަތުގައި ހިޔަންޏެއް ފަދައިން ހުރެއެވެ. ކޮންމެ ކަމެއްގައިވެސް އެހީތެރިވެއެވެ. ބޮޑުފަތިހާ އަހަރެން ތެދުވެ މުޅި ގޯތިތެރެއާއި މަގުމަތި ކުނިކަހަމެވެ. އަހަންނަށް ފާހަގަކުރެވުނީ އަހަރެން ކުނިކަހާ މަންޒަރު ޖިނާޙްގެ ކޮޓަރީގެ ކުޑަދޮރުން އޭނާ ބަލަން ހުންނަކަމެވެ. އަދި ކުނިކަހާ ނިންމާފައި އައިސް އާމިނާއްތަ މޮޑެދީފައި އޮންނަ ފުއްގަނޑު(ން ރޮށި) ފިހަން އަންނައިރަށް، ބައެއް ދުވަސްދުވަހު އައިސް ދޭފަތް އަތުލައިގެން، އަހަރެން ރޮށިދަމާ ވަރަކަށް ރޮށިފިހެދެއެވެ. އެހެންވެ ލަދުން މޯޅިވަމުން އަހަންނަށް ރޮށިދެމެނީވެސް އެކި ބައްޓަމަށްވާ ގޮތަށެވެ. ވައްކޮށްވެސް ދެމެއެވެ.. އަހަންނަށް އޭނާ ގޮވަނީވެސް ނިކަން ލޯބިންނެވެ. ޝާނީއޭ އެގޮވާލާގޮތަށް އެހެން މީހަކު އެރާގުގައި ގޮވާތީ އަޑެއް ނާހަމެވެ. އެވަގުތު ހިތަށްއެވާގޮތް ބުނެދޭންވެސް ނޭނގެއެވެ. އޭނާފެނުމުން ގައިން ވަރުހުސްވެ، ހިތަށް ގޮތްނޭނގޭ އިޙްސާސްތަކެއް ވާންފަށައެވެ. ހީވަނީ ސައިބޯނި ބޮކިތަކެއް އަރައިގެންދާހެނެވެ. މިވެވެނީ ލޯބިކަން ޔަޤީނެއް ނުވެއެވެ.
ދުވަސްތައް ފާއިތުވަމުން ދިޔައީ ހީނުކުރާހާ އަވަހަށެވެ. އެއްރެއެއްގެ އަށެއް ޖަހާކަންހާއިރެވެ. އަހަރެން އިނީ އާމިނާއްތައާއެކު ހުވަނދުމާ ފެނުއަޅާށެވެ. ޖިނާޙްއައިސް ބުންޏެވެ. " މަންމާ އަހަރެން މިހާރު މާ ފަލަވާން ފަށައިފިއެވެ. ބަނޑުން މިހުންނަނީ ލޯއަޑު ކިޔަކިޔައެވެ. އެހެންވެ ދުވަންދާން ނިންމައިފީމެވެ. ހަފްތާއަކު ތިންރޭ ދުވުމުން ރަނގަޅުވާނެކަމަށް ރަޙްމަތްތެރި ޑޮކްޓަރެއް ބުންޏެވެ." އާމިނާއްތަ ޖަވާބުދިނެވެ. " ދަރިފުޅާ ތިއީ ވަރަށް ރަނގަޅު ކަމެކެވެ. ދުވަން ދާއިރު ޝާނީވެސް ގޮވައިގެން ދާށެވެ. އޭނާވެސް ބޭރަށްގޮސް ހިތްހަމަޖައްސާލަން ޖެހޭނެއެވެ. މިޢުމުރުގައި އުފާކޮށް ހިތްހަމަ ޖެއްސުން އެއީވެސް އޮންނަ ކަމެއް ނޫންތަ؟ އަބަދު ކިޔެވުމުގެ ބަދަލުގައި، ސިކުނޑިއަށް އަރާމެއްވެސް ލިއްބައިދޭންވާނެއެވެ." އަހަރެންވެސް އެކަމަށް އެއްބަސްވީ ކަސްރަތު ކުރާހިތްވާތީއެވެ. އަދި ޖިނާޙްއާއެކު ބޭރަށް ދާހިތްވެސް ނުހަނު ބޮޑަށް އޮތުމާ އެކުގައެވެ. އޭގެފަހުން ކޮންމެ ހަފްތާއަކު ތިންރޭ ދުވަން ދާންފަށައިފީމެވެ. އަހަރެމެން ބަނދަރު ސަރަޙައްދު ތޮށިގަނޑުމަތީގައި ދުވެހަދާއިރު ، ބައެއް ފަހަރު އޭނާ އަހަރެން ބިރުގަންނަވަން ކޮންމެވެސް ޖިންނި އެއްގެ ވާހަކަ ދައްކާނެއެވެ. އަދި ހެއްވާ މަޖާ ޖޯކެއްވެސް ކިޔާލާނެއެވެ. އަހަރެން ނިކަން ގަޔާވެއެވެ. އޭނާގެ ވާހަކަތަކުން ހިތްއުފާކަން ހޯދަމުން ހެމެވެ. ރޭތަކާއި ދުވަސްތައް ފާއިތުވެ، ތިން އަހަރުގެ ކޯސް ނިންމާފައި އަހަރެން ރަށަށް ދާން ތައްޔާރުވާން ފެށީމެވެ. ބާޒާރުކުރުމާއި އެހެނިހެން ކަންކަމުގައިވެސް ޖިނާޙްގެ އެހީތެރިކަން ނުހަނު ބޮޑަށް ލިބުނެވެ. އަހަރެންގެ ހިތުގައި ޖިނާޙްގެ ލޯބި ފޮރުވިފައިވާ ކަމެއް އޭނާއަކަށް ނޭނގޭނެއެވެ. އަދި އޭނާގެ ހިތުގައި އަހަންނަށް ޓަކައި އޮތް ލޯބި ހާމަކޮށްފައި ނުވާތީ، އަހަރެން ނިންމީ އެވީ އެހީތެރިކަމަކީ ﷲއަށް ޓަކައި ކޮށްދިން ކަންތައްތަކެއްގެ ގޮތުގައެވެ.

މިއަދަކީ ރަށަށް ދާން ފުރާ ދުވަހެވެ. ފުރަން ހަމަޖެހިފައިއޮތީ ރޭގަނޑު އަށެއްޖަހާ އިރެވެ. އާމިނާއްތަ އަންގާފައި އޮތީ މިއަދު މެންދުރު ހޮޓަލަކުން ކާން ގެންނާނެ ވާހަކައެވެ. އަހަރެން ކޮޓަރި ހުޅުވާލާފައި ނިކުތްއިރު ޖިނާޙް މަތިން ފައިބަނީއެވެ. އޭނާގެ ފަން އިސްތަށިގަނޑު ވިހުރުވިފައިވެއެވެ. ބައިމަތި ފުޅާކަން ލާފައިވާ ޓީޝާޓުން ހެކިކޮށްދެއެވެ. ދިގުއިސްކޮޅެކެވެ. ހެދިހުރި ހަށިގަނޑެކެވެ. މިއީ އަހަރެން އެންމެ ގަޔާވާ ސިފަތަކެވެ. އެކަކު އަނެކަކާ ހަތަރުކަޅި ބައްދަލުވި ވަގުތު ، އެލޮލުން އެހެންޏާ ނުފެންނަ އަސަރުތަކެއް ފެނުނެވެ. ދެލޯ ރަތްވެފައި ހިތާމައެއްގެ އަސަރު ލޮލުގެތެރެއިން ފެނުނެވެ. ކަތި ފިޔަވަޅުތަކެއްގައި މަޑުމަޑުން އަހަންނާ ދިމާއަށް އަންނަން ފެށިއެވެ. ވަރަށް ތަފާތު ގޮތަކަށެވެ. ފިސާރި ގާތަށް އައިސް ހުއްޓިލިއެވެ. އެވަގުތު އަހަރެންގެ ފަޔަށް ފިނިވާން ފެށިއެވެ. އެހެންނަމަވެސް ހިތްވަރު ކޮށްފައި ބުނީމެވެ. " ތިއައީ ކަމެއް ބޭނުން ވެގެން ހެއްޔެވެ" ގަމީސްތައް ހުންނާނީ އިސްތިރިކޮށްފައެވެ. އިއްޔެގައި ޖިނާގެ ކޮޓަރި ވަރަށް ސާފުވެސް ކުރީމެވެ." ވަރަށް މަޑުމަޑުން ކަންފަތާ އަނގަ ކައިރިކޮށްލާފައި އޭނާ ބުންޏެވެ. " އާއެކެވެ. ތިޔަކަން އެނގެއެވެ. އެކަމަކު ބުނަންހެއްޔެވެ. އަހަރެން ޝާނީދެކެ ވަރަށް ލޯބިވަމެވެ." އަހަންނަށް ތެޅިގަނެވުނެވެ. ކަންފަތަށް މިއިވުނީ ރަނގަޅު ވާހަކައެއް ބާވައެވެ. މި އޮތްހާ ދުވަހު އެވާހަކަ ނުބުނެ ލަސްކުރީ ކީއްވެ ބާއެވެ. ޖިނާ ވާހަކަދައްކަން ފެށިއެވެ. " އަންނަ މަހުގައި އަހަރެން ކިޔަވަން މެލޭޝިޔާއަށް ދާން ފުރަމެވެ. މަންމައާ ކޮއްކޮ ވެސް ގޮވައިގެން ތިން އަހަރަށް ބަދަލުވާން ނިންމައިފީމެވެ. ޝާނީ މަތިން ވަރަށް ހަނދާން ވާނެއެވެ." މިހެންބުނެފައި އަހަރެންގެ އަތުގައި މަޑުމަޑުން ހިފާލިއެވެ. އަދި އަތަށް ފިތާލަމުން ބުންޏެވެ. " ޝާނީ އާނުލާ އުޅެން ވަރަށް އުނދަގޫ ވާނެއެވެ. އަހަންނަށް އިންތިޒާރު ކުރަންވާނެއެވެ. " އެހެން ބުނުމަށްފަހު މަޑުމަޑުން އަހަރެންގެ އަތްދޫކޮށްލައި މައްޗަށް އަރައިގެން ހިނގައްޖެއެވެ. ހުރިތަނަށް ގާވެފައި ހުރެވުނެވެ. މާލޭގައި މަޑުކުރަންވެސް ހިތަށް އެރިއެވެ. އެކަމަކު ރަށަށް ދާންވެސް ޖެހެއެވެ. އަހަންނަކީ މަންމަޔާއި ބައްޕަގެ ހުރި ހަމައެކަނި ދަރިފުޅެވެ. އެމީހުންގެ ހުރިހާ އުއްމީދެއް ގުޅިފައިވަނީ އަހަންނާއެވެ. ބުރަ މަސައްކަތުން މާލެ ފޮނުވާ ކިޔަވާ ނިމުމުން އެމީހުން ދޫކޮށް އެހެންތާކު އުޅޭނީވެސް ކިހެނެއް ހެއްޔެވެ.؟ އަހަރެންގެ ޢުމުރުން އަދި މިވީ އެންމެ ވިހި އަހަރެވެ. ޖިނާޙްވެސް ކައިވެންޏެއްގެ ވާހަކައެއް ނުދައްކައެވެ. އެންމެ ފަހުވަގުތު ލޯބިވާ ވާހަކަ ބުނެލުން ފިޔަވައި އިތުރު އިޝާރާތެއް ނުކުރެއެވެ. މަޑުމަޑުން " ޙަސްބުނަﷲ ވަނިޢުމަލް ވަކީލް" އޭ ބުނެލެވުނެވެ. އަދި އަހަރެންގެ ހުރިހާ ކަމެއްގައި ވަކީލުކުރާ އެންމެ ލޮބުވެތި ފަރާތާ ހުރިހާ ކަމެއް ޙަވާލުކޮށް ކެތްތެރިވީމެވެ.

ބޮޑުބެ އަހަރެން ބަލައި އައީ ރޭގަނޑު ހަތްގަޑި ބައިގައެވެ. ގޭމީހުންނާއި ސަލާމްކޮށްފައި ވަދާޢުގެ ހިތި ވާހަކަތައް ދައްކައި ގެއިން ނުކުންނަން ހިނގައިގަތީމެވެ. ޖިނާޙެއް ނެތެވެ. އެންމެ ފަހުވަގުތުވެސް ކުޑަދޮރާ ދިމާއަށް ބަލާލީމެވެ. އޭނާގެ ހިޔަނިވެސް ފެންނާކަށް ނެތެވެ. ހާދަހާ އަޑިނޭނގޭ ސޮރެއްތާއޭ ހިތް ބުނެލިއެވެ. ކާރަށް އަރައިގެން ފުރަން ހަމަޖެހިފައިވާ ދޯންޏަށް އަރާ އިށީނީމެވެ. ފޮޓޯއަލްބަމެއް ހުޅުވާ ބަލާލުމުން ހަނދާން އާވާހެން މާޒީގެ ތިން އަހަރު ސިފަވާންފެށިއެވެ. ދެލޯމަރާލެވުނެވެ. ލޯހުޅުވާލެވުނީ އިންޖީނު ހިންގާލި އަޑާއެކުގައެވެ. އެއާއެކު ދޯނި މަޑުމަޑުން ބޭރުކުރަން ފެށިއެވެ. ބަނދަރުމަތީގައި ދޯނި ފުރާ މަންޒަރު ބަލަން އެއިނީ ދެވަނަ މީހެއްނޫނެވެ. ޖިނާޙެވެ. ނެރުން ދޯނި ނުކުތްއިރުވެސް އޭނާ ސައިކަލްމަތީގައި ދޯންޏާ ދިމާއަށް ބަލަން އިނެވެ. އެއީ މޯބައިލް ފޯނު ގެންގުޅުން އެހާ އާއްމު ޒަމާނަކަށް ނުވާތީ ގުޅޭނެގޮތެއް ވެސް ނެތެވެ. ދޯނި އައިސް ރަށަށް ލަފައިފިއެވެ. މަންމަޔާ ބައްޕަ އަދި ދުރުތާ ތިމާގެ މީހުން އަހަރެން ބާލަން އައިސް ތިއްބެވެ. އެންމެން އެކުގައި ގެޔަށްގޮސް ޙަޔާތުގެ އާބާބެއް ފެށީމެވެ.

އަހަރެން ރަށަށް އައިސް ދުވަސް ކޮޅަކުން ރަށުހޮސްޕިޓަލުން ވަޒީފާ ލިބުނެވެ. އަހަރެން އެންމެ ބޮޑަށް ސަމާލުކަން ދިނީ ޙަލާލު މަސައްކަތެއް ކޮށްގެން މައިންބަފައިންނާއެކު ސުވަރުގެ ހޯދުމަށް ގަދަ އަޅައި މަސައްކަތް ކުރުމަށެވެ. ދުވަސްތައް ފާއިތުވަމުން ދިޔައެވެ. ޖިނާޙްގެ އެއްވެސް ޚަބަރެއް ނުލިބެއެވެ. އާމިނާއްތަ ރަށަށް އަންނަ މީހުންގެ އަތަށް ދީފައި ހަދިޔާ ފޮނުވައެވެ. އަހަރެންވެސް ހަދިޔާ ފޮނުވަމެވެ. އެހެނަސް ޖިނާޙް ކޮބައިތޯ ކިހެނެއްތޯ ވެސް އަހާނުލަމެވެ. ހިތުގެ އެންމެ އަޑީގައި އެނަން ރައްކާކުރީމެވެ. ދުވަސްވީވީހެން އެ ހަނދާންތައް ނެތެމުން ދިޔައެވެ.

ރަށަށް އައިތާ ދެމަހެއްހާ ދުވަސްފަހުން ރަށުގައި އުޅޭ ދީންވެރި ޢާއިލާއެއްގެ ފިރިހެން ކުއްޖެއް އަހަރެންނާ ޚިތުބާވުމަށް އެދުނެވެ. ރައްޓެހިންގެ އެދުމާއި، މައިންބަފައިންގެ ބާރުއެޅުމާއެކު އަހަރެން އެކަމަށް އެއްބެސްވީ އެއީ ވަރަށް ޞާލިޙް ރަނގަޅު އަދި އަހަންނާ ކުފޫވެސް ހަމަވާ މީހެއްކަމުގައި ވުމުންނެވެ. ދިރިއުޅުމުގައި އެކަކު އެކަނި ކަންކަމާ ކުރިމަތިލުމުގެ ބަދަލުގައި، ﷲ ކަނޑައަޅުއްވާފައިވާ ފަދައިން ދެޖިންސުގެ ދެމީހެއް ބައްދަލުވެ ދިރިއުޅުމާ ކުރިމަތިލުމުން، ދިރިއުޅުން ފަސޭހަވާނެތީއެވެ. އަދި އަހަންނަކީ ކުޑަކުދިން ގެންގުޅޭހިތްވާ އަބަދުވެސް އަމިއްލަ ދަރިއެއް ލިބުމުގެ ހުވަފެން ދެކެމުން އަންނަ މީހަކަށް ވާތީއެވެ. ކައިވެންޏެއް ކޮށްގެން ލޯބިވެތި ރީތި ދިރިއުޅުމެއް އުޅުމަކީ އަހަރެން ކުޑައިރުއްސުރެ ދެކެމުން އައި ފޮނި ހުވަފެނެކެވެ. އަހަރެންގެ ބައްޕަގެ ރުހުމާއެކު ކައިވެޏަށް އާނބަސްބުނެ ކައިވެނި ކުރާނެ ތާރީޚަކަށް ހަމަޖެއްސީ ރަޖަބު މަހެއްގެ ހަތާވީސް ވަނަދުވަހެވެ. ލޯބިވާނީ ކައިވެނީގެ ފަހުންނޭ ބުނެ ރަޙްމަތްތެރިންނާ ކުރި ބަހުސްތައް ޙަޤީޤަތަކަށް ހެދުމުގެ ނިޔަތުގައި މާޒީ ހަނދާން ނައްތާލުމަށްފަހު އާ ޞަފްޙާއެއް ހުޅުވާލައި، ވަލީމާގެ އިންތިޒާމު ހަމަޖައްސަން ފެށީމެވެ. ކައިވެނި ކުރާ ދުވަހު ދެފަރާތުގެ ގާތްތިމާގެ މީހުންނާއި ރަށުގެ ހުރިހާ ފަންތިއެއްގެ މީހުން ހިމެނޭހެން ސަޔެއް ހެދުމަށް ތައްޔާރު ވަމުން ދިޔައީ ދެޢާއިލާ ގުޅިގެންނެވެ.

ކައިވެނި ކުރަން އޮތީ އެދުވަހުގެ ހަވީރު ހަތަރެއް ޖަހާއިރުގައެވެ. ދެފަރާތުގެ ކަމުވޮށިގެންވާ މީހުންނާއި ކޯޓުން އައިސްތިބި މީހުން އަދި ހެކިވެރިން ޖަވާމީ ރަށު ސްކޫލު ހޯލަށެވެ. ކައިވެނީގެ ވަލީމާ އޮތީވެސް އެތަނުގައެވެ. އަންހެން ފިރިހެން ދެޖިންސު މަސްހުނި ނުވާނެ ފަދައަކުން އިސްލާމްދީނުގެ އުސޫލުތަކުގެ މަތީގައި މިޙަފްލާ އިންތިޒާމު ކުރުމަށް ކައިވެނި ކުރާ ފިރިހެނާ، އާދެ ޔަޙްޔާ އޮތީ ރާވާފައެވެ. ވަރަށްވެސް ފުރިހަމަކޮށް ކައިވެނީގެ ޙަފުލާ ނިމި އެންމެން ސަޔަށް އިންސާފުކުރަންފެށިއެވެ. ފަހަރަކު ބަޔަކު ވަންނަމުން ނިކުންނަމުން ދިޔައެވެ. އަހަރެމެންވެސް އިސްތިޤްބާލްކުރަމުން އުފަލާއެކު ބައްދަލުކޮށް ފޮޓޯ ނަގާ ހެދީމެވެ. ޙަފުލާ ނިމި އެއްބަސްވެފައިވާ ފަދައިން ފިރިމީހާގެ ގެއަށް އަހަރެން ބަދަލުވީ އެރޭ ބާރަ ޖަހާކަން ހާއިރުއެވެ. ކައިވެނީގެ ފުރަތަމަ ރޭވެސް ނިމިއްޖެއެވެ. ކައިވެނީގެ ފަހުން އަހަރެން ދިރިއުޅެމުން ދިޔައީ ފިރިމީހާގެ ގޭގައެވެ. ފިރިމީހާ ހެޔޮވެފައި އޯގާތެރިއެވެ. ފިރިއެއްގެ ފަރާތުން ލިބެންޖެހޭ ކުލުނާ ލޯބި އަދި އަޅާލުން ލިބެއެވެ. މައިންބަފައިންނާ ކޮންމެ ދުވަހަކު ބައްދަލު ކުރެވެއެވެ. އެމީހުންނާއެކުވެސް ވަގުތު ހޭދަކުރެވެއެވެ. އުފާވެރި ދުވަސްތަކެއް ގުނަމުން ދިޔައީމެވެ.

އެއްދުވަހެއްގެ ހަވީރެވެ. ސައިބޯ ނިމުނުތަނާހެން ހޮޑުލަވައި ގަތެވެ. ފާޚާނާއަށް ދިއުމުން ހޮޑުލެވުނެވެ. ފިރިމީހާގާތު އެވާހަކަ ބުނުމުން އޭނާގެ މޫނު އަލިވެގެން ދިޔައެވެ. ވަރަށް އުފަލުން ބުންޏެވެ. " މާދަމާ ހޮސްޕިޓަލަށް ގޮސް ޓެސްޓު ހަދަންވާނެއެވެ" އެވަގުތު އަހަންނަށްވެސް ވިސްނުނެވެ. އަލްޙަމްދުލިއްލާޙިއޭ ބުނެވުނެވެ. އަދި އުފާވެރިކަމުގެ ރާޅެއް ޙަޔާތަށް ބިންދާލިހެން ހީވިއެވެ. ޖެހިގެން އައިދުވަހު ޑޮކްޓަރަށް ދެއްކުނެވެ. ޓެސްޓުތަކެއް ހެދުމަށްފަހު ލިބުނު ޚަބަރަކީ އަލަތު ދަރިއަކު ލިބެން އުޅޭކަމުގެ އުފާވެރި ޚަބަރެވެ. އަހަރެމެން ދެމަފިރިން ވަރަށް އުފަލުން އެވާހަކަ ޢާއިލާއާ ރަޙްމަތްތެރިންނާ ޙިއްސާ ކުރީމެވެ. ދެން އައީ އުފާވެރި ދުވަސްތަކެވެ. މާބަނޑު ދުވަސްވަރު ފިރިމީހާ، ޔަޙްޔާގެ ފަރާތުން އަޅާލުން ލިބުނެވެ. އޭނާގެ އޮފީސް ވަގުތު ފިޔަވައި ހުރިހާ ވަގުތެއްގައިވެސް ހުންނަނީ އަހަރެންގެ ޚިދުމަތުގައެވެ.

ނުވަމަހާއި ފޮއި ދުވަސްފަހުން އަހަރެން އަންހެން ކުއްޖަކު ވިހައިފީމެވެ. ދަރިފުޅަށް އަހަރެމެން ދިން ނަމަކީ ނޫރާއެވެ. އެއީ އަހަރެންގެ ހިތުގެ ނޫރެވެ. ދެލޮލުގެ އަލިކަމެވެ. ފުރާނައިގެ ކާނާއެވެ. އެދަރިފުޅު ލިބުމުން ޙަޔާތް އުފާވެރިކަމުން ފުރާލިއެވެ. ދެމަފިރިންގެ ގުޅުމާ ލޯބި އިތުރުވެގެން ދިޔައެވެ. ކުޑަކުޑަ ފުރާނަޔާއެކު ދުވަސް ނިމިގެންދަނީ އެކިއެކި ހަނދާންތައް ހިތުގައި ބިންވަޅު ނެގެމުންނެވެ. އޭގެ ދެއަހަރުފަހުން އަހަރެން އަނެއްކާވެސް ބަލިވެ އިނދެފިއެވެ. މިފަހަރު ލިބުނީ ލޯބިލޯބި ފިރިހެން ކުއްޖެކެވެ. ﷲގެ ނިޢުމަތް ތަނަވަސްވެފައިވިއެވެ. ދެވައްތަރުން ދަރީން ލިބުން އެއީ އަހަރެން އެންމެ ދެކެން ބޭނުންވި ދުވަހެވެ. އެކަންވެސް ފުރިހަމަ ވީއެވެ. ދެން އޮތީ މިކުދީންނަށް ރަނގަޅު އިސްލާމީ ތަރުބިއްޔަތެއްދީ ދިރިއުޅުމަށް ހޭނެވުމެވެ. އެކަން ކުރުމުގައި އަހަރެންގެ ފައިތިލަ ސާބިތުކޮށް މަސައްކަތް ފެށީމެވެ. ހަގުދަރިފުޅަށް ފަސްއަހަރު ވީއިރު އަހަރެމެންގެ ދިރިއުޅުން ތަނަވަސްވެގެން ދިޔައެވެ. ﷲގެ ރަޙްމަތާއެކު އަހަރެމެން ދެމަފިރިންގެ މަސައްކަތުން ރީތި ފުރިހަމަ ގެއެއް ބިނާކުރީމެވެ. އަދި އުފަލާއެކު އެގޭގައި ދިރިއުޅެން ފެށީމެވެ. ކުރިމަތިން އަންނާނެ ކޮޅިގަނޑުގެ ޚަބަރެއް ހިލަމެއް އޭރަކު ނެތެވެ. ދުނިޔެއިން ލިބޭނެ ހުރިހާ އުފަލަކާ ހިތްހަމަޖެހުމެއް އަހަންނަށް ލިބިފައިވެއެވެ. ރީތި ގެއެކެވެ. ރަންގަނޑެއްފަދަ ފިރިއެކެވެ. ލޯބި ލޯބި ދެދަރިންނެވެ. ނިޔަނެތި ހިތްވަރުދޭ މައިން ބަފައިންނެވެ. ވަފާތެރި ރަޙްމަތްތެރިންނެވެ.

ހޮނިހިރު ދުވަހެއްގެ ހެނދުނުގެ ވަގުތެކެވެ. ފޯނުރިންގުވާން ފެށިއެވެ. އަހަރެން ފޯނުނެގީމެވެ. އެކޮޅުން " އައްސަލާމް ޢަލައިކުމް " އޭ ބުނެލިއެވެ. އަހަރެން " ވަޢަލައިކުމުއްސަލާމް ވަރަޙްމަތުﷲ" އޭ ބުނީމެވެ. ދަންނަ އަޑެއްހެން އެވަގުތު ހީވިއެވެ. އަހަންނަށް ހީވިހީވުން ޔަގީނަށް ބަދަލުވީ އޭނާ މިއީ ޖިނާޙްއޭ ބުނުމުންނެވެ. އަހަރެން ބުނީމެވެ. " މިހާ ދުވަސްކޮށްފަ ތިގުޅާލީ . ކޮބައިތަ މަންމައާއި ކޮއްކޮ ؟ " އޭނާ ޖަބާދިނެވެ. " މަންމަ ނިޔާވިތާ އަހަރެއް ވެއްޖެ. މެލޭޝިޔާގައި އުޅުނު ދުވަސްވަރު މަންމަ ނިޔާވީ. ކޮއްކޮ މީހަކާ އިނދެގެން މިހާރު ދެކުދިންވެސް ތިބެއެވެ." އަހަރެން އަވަސް އަވަހަށް ބުނީމެވެ. "އަހަރެންވެސް މީހަކާ އިނދެ ދެކުދިން ލިބިއްޖެއެވެ. ހަގުކުއްޖާއަށްވެސް މިހާރު ހައަހަރުވަނީއެވެ." އޭނާ ހިނދުކޮޅަކު ވާހަކަ ނުދައްކާ ހުރެފައި ބުންޏެވެ. " އަހަރެން ހީކުރީ އަހަރެން ގުޅާނެ ދުވަހަކަށް އިންތިޒާރު ކުރާނެކަމަށެވެ. " އަހަރެން ޖަވާބުދިނީމެވެ. " "ހަތަރު ފަސް އަހަރުވާއިރު ޚަބަރެއް ހިލަމެއް ނުވުމުން އަހަރެންވެސް ހުސްކޮށެއް ނުހުންނާނެކަން އެނގެންވާނެތާއެވެ." އެކޮޅުން ފަހުން ގުޅާނަމޭ މިވަގުތު ކަމަކަށް ދާނެވެއްޖެޔޭ ކިޔާފައި ފޯނު ކަނޑާލިއެވެ.

ދެންއައީ ކަޅު ދުވަސްތަކެކެވެ. އޭނާ ދޭތެރެ ދޭތެރެއިން ގުޅައެވެ. އަހަރެންވެސް ވާހަކަ ދައްކަމެވެ. މާޒީގެ ވާހަކަ ދައްކާ ހިރަފުސް ފޮޅަމުން، އެދިމާއަށް ދެވުނީ ރޭކާވެސް ނުލައެވެ. އަހަރެންގެ ހިތާ ނަފްސު އެހެން ފަރާތެއްގެ ބާރުގެ ދަށުގައި ވާކަހަލައެވެ. ހެއްދެވި ފަރާތުގެ މަތިންވެސް ހަނދާނެއް ނެތެވެ. ފިރިމީހާ ޑިޔުޓީއަށް ދާރޭރޭ ދެމީހުން އެތައް އިރަކު ވާހަކަދައްކާ ހަދަމެވެ. ނޭނގިނަމަވެސް ލޯބީގެ ވާހަކަތައް މަޑުމަޑުން ދެކެވެންފެށިއްޖެއެވެ. އެކެއް އަނެކަކަށް ތަފާތު ފޮޓޯތައް ބަދަލުކުރެވުނެވެ. އަހަރެންގެ ޟަމީރު މިކުރެވެނީ ފާފައެއްކަން ބުނެދެއެވެ. ހިލޭ މީހުންނާ ނަހަމަ ގުޅުންތައް ހިންގުމުގެ ނުބައިކަމާ ފާފައިގެ ބޮޑުކަން އަހަންނަށް އެނގެއެވެ. ނަމަވެސް ބަސްނާހާ ހިތް އެދިމާއަށް ލެނބެމުން ލެނބެމުން ދިޔައެވެ. އެންމެ ފަހުން ދަރިންގެ ކަންކަމުގައިވެސް ފަރުވާ ކުޑަކުރެވެން ފެށިއެވެ. ފިރިމީހާގެ ޙައްޤުތަކުގައި އިޙްމާލުވެވެމުން ދިޔައެވެ. އޭނާއެކަން އިޙްސާސްވެ އެވާހަކަ އެތައް ފަހަރަކު ދެއްކިއެވެ. ނަމަވެސް އަހަރެން ސިއްރުން މި ހިންގާ ގުޅުމުގެ ޚަބަރެއް އޭނާއާ ހަމައަކަށް ނުފޯރައެވެ. އެންމެ ފަހުން މިރޭ ހުރިހާކަމެއް އެނގި އަހަރެމެން ބިނާކުރި ރީތި ގަނޑުވަރު ފުނޑުފުޑުވީއެވެ.

ޚިޔާލީ ދުނިޔެއިން އެނބުރި އާދެވުނީ ކުޑަދަރިފުޅު ރޮއިގަތް އަޑު ކަންފަތުގައި ޖެހުމުންނެވެ. މަރުވެފައިވާ މައްޔިތެއް ފަދައިން ގޭތެރެއަށް ވަނީމެވެ. އަދި ދަރިފުޅު މަސަލަސްކޮށް ނިންދެވީމެވެ. އޭގެފަހުގައި ޔަޙްޔާއަށް ގުޅާ ގުޅާ ފޯނެއް ނުނެގިއެވެ. އަހަރެންގެ ނިދިވަނީ ރުޅިވެފައެވެ. ކުރެވުނު ފާފައިގެ ސަބަބުން ހިތުގައި ކަޅުކަން އުފެދި ،ތެދުމަގުން މީހާ ކަސިޔާރުވެވުނީ އެވެ. ހާދަހާ ދެރައެވެ. ހިތްވަރުކޮށްފައި މަޑުމަޑުން ފާޚާނާއަށް ވަދެ ވުޟޫކުރީމެވެ. އަދި އައިސް މުސައްލަ މަތީގައި އިށީނީމެވެ. އެތައް ދުވަހަކަށްފަހު ހެއްދެވި ފަރާތުގެ އެހީއާ މަދަދަށް އެދުނީމެވެ. ކުރެވުނު ފާފަޔާމެދު ދެރަވެ ހިތާމަ ކުރީމެވެ. އަދި ދެން ދުވަހަކުވެސް މިފަދަ ފާފައަކަށް އަރައިނުގަތުމަށް ހިތުގައި ޢަޒުމް ކަނޑައެޅީމެވެ. އަދި ﷲގެ މަގަށް އެނބުރި ރުޖޫޢަވީމެވެ. މުސައްލަމަތީގައި އިނދެވުނީ ކިހާއިރަކުކަން އެނގުނީ ގަޑިން ދޭއް ޖެހިކަމުގެ ރަނގަބީލު ދެފަހަރު ޖަހާލުމުންނެވެ. އޭރު ނިދީގެ އަސަރުން ލޯބަރުވެ އަހަރެންގެ ދެލޯ މެރެއެވެ. މަޑުމަޑުން ތެދުވެ އެނދުގައި އޮށޯތީމެވެ. ވެފައިވާ ދެރައާއި ހިތުގައިވާ ރިހުމާއެކު ނިދިއްޖެއެވެ.

ހޭލެވުނީ ފަތިސް ނަމާދަށް ބަންގި ގޮވާ އަޑަށެވެ. އޭރުވެސް ޔަޙްޔާ ގެއަކަށް ނާދެއެވެ. ހަނދާނީ ކިހެނެއް ބާއޭ ހިތަށް އެރިއެވެ. އެންމެ ފަހުން އަހަރެން ނިންމުމެއް ނިންމީމެވެ. ދެދަރިން ގޮވައިގެން ގެއަށް ދާށެވެ. ކޮންމެވެސް އަލިމަގެއް ފެންނަންދެނެވެ. ފުނޑު ފުނޑުވެފައިވާ އަހަރެމެންގެ ދިރިއުޅުން ،އަލުން ބަލުން ނަގައި، ކޮޅަށް ޖެހޭނެ ދުވަހެއް އަންނަންދެން ،އަހަރެންގެ ގޭގައި މަޑުކުރުމަށެވެ. މަޑުމަޑުން ކޮންމެހެން ބޭނުންވާ ތަކެތި ފޮއްޓަކަށް އަޅައިފީމެވެ. އަދި ކުދިންނަށް ގޮވާ، ރީތިކުރުމަށްފަހު މާމަގެއަށް ދުވަސްކޮޅަކަށް، ދާންޖެހޭ ވާހަކަ ބުނެލުމުން ، އެއްވެސް ކުއްޖެއް ސުވާލެއް ނުކޮށް، ހަނުހިމޭނުން އަހަންނާއެކު ނިކުތެވެ. އަނދިރީގެ ތެރޭގައި އަހަރެމެން ހިނގަމުން ދިޔައިރު ، ވެދިޔަގޮތް ހިތަށްއަރާ ފައިބަމުން ދިޔައެވެ. ކާމިޔާބު އުފާވެރި ދިރިއުޅުން، ކުރެވުނު ފާފައެއްގެ ސަބަބުން ނިމިދިޔަގޮތް ފޮޓޯތަކެއްގެ ސިފާގައި ސިފަވަމުން ދިޔައެވެ. އާއެކެވެ. މިއީ އަހަރެން ކުރި ފާފައިގެ ނަތީޖާއެވެ.
- ނިމުނީ -