އެހަނދާންތަށް މިހިތުން ނުފިލާނޭ...

އިރު އޭގެ ވާޖިބް އަދާކުރުމަށް ނުކުޅެދިފައިވަނީ ވިއްސާރަވިލާތަކުގެ ސަބަބުންނެވެ. ވައިބާރުކަމުން ދުއްވާއެއްޗެހިވެސް ދުއްވަމުންދިޔައީ ވަރަށް ބަލައިގެންނެވެ. ބްރިޖުގެ މެދާކަށް ހިސާބުގައި ވިއްސާރަކޯޓު ލައިގެން މަޑުކޮށްލައިގެން އެތިބީ ރާޔާ އާއި ފައިސަލްއެވެ. ރާއްޖެއިން ބޭރުގައި 6 މަސް ދުވަހު އުޅުމަށްފަހު ފައިސަލް ރާއްޖެއައި ފުރަތަމަ ދުވަހެވެ. ރާޔާއާއި ބައްދަލުވުމުން އޭނާ އަތުތެރޭގައި ފޮރުވާލުމަށް ކިތަންމެ ބޭނުންވިކަމުގައިވިނަމަވެސް ރާޔާ އެފުރުސަތު ފައިސަލް އަކަށް ނުދިނެވެ.
"އަހަރެން ބޭނުމެއްނޫން ދެން މިގުޅުން ކުރިޔަށް ގެންދާކަށް." ރާޔާ ރުޅިއައިސް ފައިސަލްގެ އަތްފޮޅުވާލަމުން ބުނެލިއެވެ.
"ކީއްވެތަ ތިހެން ތި އުޅެނީ.. މަޖަލެއް ނޫން އިނގޭ.. މިހާރު ކިރިޔާ ކަމެއްވާއިރަށް ދުރުވާ ވާހަކަ.. މައްސަލައެއް ނުޖެހޭ ތަނަކުވެސް މައްސަަލަ އުފައްދައިގެންވެސް ރުޅިވާ ވާހަކަ. ކޮބާތަ މައްސަލަ އަކީ؟" ފައިސަލްގާތައްވެސް މިފަހަރު އައީ ރުޅިއެވެ.
"ނޭނގެ. ތީ މަ ލޯބިވީ ފައިސަލް އެއް ނޫން." ރާޔާ ފައިސަލް މޭގައި އަތް އަޅާ ދުރުކޮށްލިއެވެ.
"އާނ.. މަ މީ ޖިންނިއެއް. ބޭނުންވީމަ ބޭނުން ފައިސަލްއަކަށް ބަދަލުވާނަން މަ.." ފައިސަލް ރުޅިމަޑުކުރަމުން ޖެއްސުން ރާގަށް ބުނެލިއެވެ.
"ކޮންމެ ކަމެއް ސަކަރާތަކުން ނިންމާލަން ފައިސަލް ބޭނުންވާނީ. އެކަމަކު މިފަހަރަކު ނޫން. ކޮންމެ ފަހަރަކު މައްސަަލައެއް ޖެހޭ އިރަށް އޮއްބާލަނީ.. ފައިސަލް ކަންތައްތައް ކުރާގޮތުން އަހަރެން ހުންނަނީ ބޯހަލާކުވެފަ. ރައްޓެހިން ކުރިމަތީވެސް މަދެކެ މާ ލޯބިވާ ކަމަށް ހެދިގެން..." ރާޔާ މިހިސާބަށް ބުނެފައި ފައިސަލްގެ މޫނުމައްޗަށް ބަލާލުމަށްފަހު ހުއްޓުނެވެ. ދެމީހުން މައްސަަލަ ޖެހިގެން ކިތަންމެ ޒުވާބެއް ކުރިނަމަވެސް ފައިސަލްގެ މޫނުމަތިން މިވަގުތު ފެންނަންއެހުރިގޮތަށް ހިތާމައިގެ އަސަރެއް ދުވަހަކުވެސް ނުފެންނާނެއެވެ.
"ލޯބިވާކަމަށް ހެދިގެންނޭ... ރާޔާ ކިހިނެތް ވެގެންތަ ތި އުޅެނީ.. ރާޔާ އެއްނު ކިޔަނީ އުފާވާވާހަކަ މަ އެހާ ލޯބިވާތީ.. މިހާރު މަ ދެއްކެން ކުރާކަމަކަށް އެވީ؟ މަހީކުރީ މަ ދުރުގަ ހުރީމަކަމަށް ދެމީހުން މައްސަލަ ޖެހެނީ. އައީމަ ރަނގަޅުވާނެކަމަށް. އެހެންވެ ކުރަންހުރި ކަންކަން ހުއްޓާލާފަ މިއައީވެސް" ފައިސަލް ކުޑަކޮށް ފަހަތައް ޖެހިލިއެވެ.
"އާނ.. ހުސް ދެއްކެން.. މަ ހާދަ ލަދުގަނެޔޭ.. އަދި އިނދެވޭނެ ދުވަހެއްވެސް އެނގެނީއެއް ނޫން. ދެމީހުންނަށް އެކަކު އަނެކަކު ރަނގަޅަށް ދަސްވެސް ނުވަނީސް މަގޭ އާއިލާ މީހުންނާވެސް ބައްދަލުކޮށް، އެމީހުންގެ ރުހުންވެސް ހޯދައިގެން ފައިސަލް ހީކުރީ މަ އަތުއަޅުވާލެވުނީއޭތަ؟ މަށަށް ދެން ދުރަށް ދާކަށް ނުކެރޭނެޔޭތަ؟" އެވަގުތު ރާޔާ ފެންކަޅިވިކަން ފައިސަލް އަށް ދަށްކަން ބޭނުންނުވާތީ ރާޔާ އަނެއްފަރާތަށް އެނބުރިލިއެވެ. "އެހެންނޫނަސް ކީއްކުރަންތަ އެނބުރި ތިއައީ؟ އަހަރެން ނުބުނަމެއްނު އަންނާކަށް."
"ރާޔާ... ކީކޭތަ ތިޔަ ކިޔަނީ؟ މަގޭ ރާޔާއަށް މަށާ ދިމާލަށް ތިހެން ބުނާކަށް ނުކެރޭނެ.. އެނގޭތަ މަ މި އައީ ކީއްކުރަންކަން. ރާޔާއާއި މެރީކުރަން. މެރީކޮށްގެން ދެމީހުން އެއްކޮށް ދުބާއީއަށް އަހަރެއްވަރު އުޅެލަންދާން.. ރާޔާގެ ކިޔެވުންވެސް އެކޮޅުން މާރަނގަޅުވާނެތީ" ފައިސަލް މިހެން ބުނުމުން ރާޔާ ލޯ މަރާލިއެވެ. ހިތް ބާރަށް ތެޅެން ފެށިއެވެ. ނަމަވެސް އޭނާގެ ލޮލަށް ޖަމާވެފައިވާ ކަރުނަތަށް ހިންދާލަމުން ބުންޏެވެ. "ފައިސަަލް ގަމާރީތަ؟ މަ ނުވެޔޭ ތި ފައިސަލް ދެކެ ލޮތްބެއް. އަޖައިބެއް ނުވާނެތަ."
ރާޔާ މިހެން ބުނުމާއި އެކު ފައިސަލް ރާޔާ ކޮނޑުގައި ހިފާ ފައިސަލް އާދިމާލަށް އަނބުރާލިއެވެ. އަދި ރާޔާގެ ލޮލާ ލޯ ސީދާކޮށްލިއެވެ. "ދެން ބުނެބަލަ. ލޯތްބެއް ނުވޭތަ؟" ރާޔާގެ ކޮނޑުގައި ހިފާ ގާތްކޮށްލަމުން ފައިސަލް އެހިއެވެ.
"ފައިސަލް... ތަދުވޭ..." ރާޔާ މިހެން ބުނުމުން ރާޔާގެ ކޮނޑުން ދޫކޮށްލުމުގެ ބަދަލުގައި އިތުރަށް ކައިރިކޮށްލިއެވެ.
"ލޯބި ނުވޭހޭ.." ފައިސަލް އަނެއްކާވެސް އަހާލިއެވެ.
"އާނ.." ރާޔާ އަނެއްފަރާތަށް މޫނު އަނބުރާލަމުން ބުނެލިއެވެ.
"މަގޭ ލޮލަށް ބަލަހައްޓައިގެން ހުރެ ބުނާށޭ .." ރާޔާގެ މޫނު ފައިސަލްއާއި ދިމާލަށް އަނބުރާލަމުން ފައިސަލް އަނެއްކާވެސް އެހިއެވެ. ފައިސަލްގެ ލޯ ފެންކަޅިވެފައިވިނަމަވެސް އަޑުގައި ހުރީ ހަރުކަށިކަމެވެ.
ރާޔާ ލޮލަށް ޖަމާވަމުންދިޔަ ކަރުނަތަށް އަނެއްކާވެސް ހިންދާލިއެވެ. އަދި ފޫހި ގޮތަކަށް ފައިސަލް އާއި ދިމާލަށް ބަލާލިއެވެ. ސީދާ ފައިސަލްގެ ލޮލަށެވެ. "ފޫހިވޭ އަހަރެން ފައިސަލްދެކެ.... އަހަރެން ފައިސަލްދެކެ އެއްގޮތަކަށްވެސް ލޮތްބެއްނުވޭ" ރާޔާ ލަސްލަހުން ބުނެލި މި ބަސްތަކުން ފައިސަލްގެ ލޮލަށް ޖަމާވެފައިވާ ކަރުނަތަށް ކޯތާފަތްމައްޗަށް ފައިބައިގަތެވެ. ފައިސަލް މަޑުމަޑުން ފަހަތަށް ޖެހިލިވަގުތު ކުޑަކޮށް އަރިއަޅާލުމުން ރާޔާއަށް ބޭއިހްތިޔާރުގައި ފައިސަލްގެ އަތުގައި ހިފާލެވުނެވެ. އެވަގުތު ފައިސަލް ރާޔާގެ އަތް ފޮޅުވާލިއެވެ. އިތުރަށް އެއްޗެއް ބުނާނެ ހިތްވަރެއް ފައިސަލްގެ ނެތެވެ. ގަބޫލުކުރަން ފައިސަލް ކިތަންމެ ބޭނުން ނުވިނަމަވެސް ރާޔާ އަށް އަންނަމުން ދިޔަ ބަދަލުތަކާ، ފައިސަލްގެ ލޮލަށް ބަލަހައްޓައިގެެން ހުރެ ރާޔާގެ އަނގައިން އެބޭރުވި ބަސްތަކުން ފައިސަލް އަށް ރާޔާ ގެއްލިއްޖެކަން އޭނާއަށް ޔަގީންވިއެވެ. އިތުރަށް އެކައްޗެކޭވެސް ނުބުނެ ފައިސަލް އެ ތަނުން ދާން ފެށުމުން ފަހަތުންގޮސް ބައްދައިގަންނަށް ރާޔާ ކިތަންމެހާވެސް ބޭނުންވިއެވެ. ކަންތަށް ކުރެވުނު ގޮތާ، ކިޔުނު އެއްޗެއްސަކީ ތެދު ނޫންކަން ބުނެދޭން ކިތަންމެހާވެސް ރާޔާ ބޭނުންވިއެވެ. ރާޔާގެ މަޖުބޫރީހާލަތު ފައިސަލް އަށް އެނގޭކަށް ރާޔާ ބޭނުމެއް ނޫނެވެ. އެ ހިތަދަތިކަން ފައިސަލްއަށް ދޭން ރާޔާ ބޭނުން ނުވެއެވެ. ފައިސަލް ލޯމަތިން ގެއްލުމާއި އެކު ރާޔާގެ ދެފައިން ވާގިދޫވިކަހަލައެވެ. ލޮލަށް ޖަމާވަމުންދިޔަ ކަރުނަތަށް ހިފޭއްޓުމަށް ކުރަމުންދިޔަ ހިތްވަރުއެލި ރޯންފެށެއެވެ. އެވަގުތު ވިދާލުމަށްފަހު ވާރޭ ވެހެންފެށިއެވެ.
ކޮޓަރިތެރެއަށްވަދެ އެނދުމަތީ ރޯން އޮވެވުނީ ކިހާ އިރަކު ކަމެއްވެސް ރާޔާއަކަށް ނޭނގެއެވެ. ހިތަށް އަރާ ފައިބަމުންދިޔަ ހުރިހާއެއްޗެއް ލޮލުން ކަރުނައިގެ ސިފައިގައި ފައިބަމުން ދިޔައެވެ. ކަންތަށް މިކުރެވުނީ ރަނގަޅަށްކަމާއިމެދު ހުދު ރާޔާއަށްވެސް ޝައްކެވެ. ނަމަވެސް މިއަދު ރާޔާއަށް އެގޮތަށް ކަންތަށްކުރަން މަޖުބޫރެވެ. ހަމަ ފައިސަލްއަށްޓަކައެވެ.
ދެމަސް ފަހެވެ.
އެރޭ ރާޔާދޫކޮށްލުމަށްފަހު ޖެހިގެންއައިދުވަހު ފައިސަލް ރާއްޖެ ދޫކޮށް އެނބުރި ދުބާއި އަށް ދިޔައެވެ. ރާއްޖޭގައި ހުރިނަމަ ރާޔާ އާއި ދުރަށް ދިޔުމަށް ފައިސަލްއަށް ފަސޭހަ ނުވާނެތީއެވެ. ދުބާއީގައި ހުރި ފައިސަލްގެ އެކުވެރި ޖައުފަރު ކައިރިއަށް އައިސް ހުރިހާ ވާހަކައެއް ޖައުފަރަށް ކިޔައިދިނުމުން އެކި ގޮތްގޮތުން ފައިސަލް ރާޔާމަތިން ހަނދާންނައްތާލެވޭތޯ ޖައުފަރު މަސައްކަތްކުރިއެވެ. ނަމަވެސް ފައިސަލް އަށް އެއްގޮތަކަށްވެސް ރާޔާ ކަންތަށް ކުރިގޮތް ގަބޫލެއް ނުކުރެވެއެވެ. ނަމަވެސް ރާއްޖެ ދޫކޮށް އައިތާ ތިން ހަފްތާތެރޭގައި ފޭސް ބުކުން ފެނުން ފޮޓޯތަކަކުން ރާޔާ މީހަކާ އިންކަން ފައިސަލް އަށް އެނގުމުން ރާޔާ މަތިން ހަނދާންނައްތާލަން ފައިސަލްވެސް ބޭނުން ވިއެވެ. ނަމަވެސް އެއީ ފަސޭހަކަމެއް ނޫނެވެ. ރާޔާ މަތިން ހަނދާންނައްތާލަން ކިތަންމެ ފިލިޔަސް އެކަމެއް އޭނާއަކަށް ނުވާނެއެވެ. ހިތްވަރުކޮށްފައި އަލުން ފަށަން ފައިސަލް ނިންމިއެވެ. ފައިސަލް ބޭނުންވީ އެނބުރި ރާއްޖެ ދިޔުމަށެވެ. އަދި އާ ފެށުމަކުން ފަށަންށެވެ.
ދިވެހިރާއްޖެ އައިސް ފުރަތަމަވެސް ފައިސަލް ދިޔައީ އޭނާގެ ކޮއްކޮ މުތިޔާގެ ގެޔަށެވެ. އަންގާވެސް ނުލާ ކުއްލިއަކަށް އޭނާގެ ބޭބެ ކުރިމަތިން ފެނުމުން މުތިޔާ ހައިރާންވިއެވެ. އަދި އުފަލުން ބައްދާލިއެވެ. އަދި ނުދެއްކި ހުރި ވާހަކަތަށް ދައްކަންފެށިއެވެ. ވިޔަފާރި ކުރިއަށްވުރެ މި ދެމަހު ރަނގަޅަށް ދާތީ އެވާހަކައާއި ފައިސަލް ނެތުމުން ވީ އުނދަގުލުގެ ވާހަކައެވެ. ފައިސަލްގެ އާއިލާގައިވެސް ހުންނަނީ މުތިޔާ އެކަންޏެވެ. މަންމަ އާއި ބައްޕަ ނިޔާވުމަށްފަހު މުތިޔާ މީހަކާ އިންނަންދެން ދެމީހުން އުޅުނީ އެއްގެއެއްގައެވެ. ފައިސަލްގެ އެދުމުގެ މަތިން މުތިޔާގެ ފިރިމީހާއާއި ވަހަކަ ދެއްކުމަށްފަހު އެގޭގައި ފައިސަލް ދުވަސްކޮޅަކު ހުރެލުމަށް މުތިޔާ އެއްބަސްވިއެވެ. މުތިޔާ ހުރިހާ ވާހަކައެއް ދެއްކި އިރުވެސް ރާޔާގެ ނަންވެސް ނުގަނެއެވެ. އެކަހަލަ ވާހަކައެއް ދެކެވެން އުޅުނަސް މުތިޔާ މަޢުލޫ ބަދަލުކޮއްލައެވެ.
"އިޓްސް އޯކޭ ކޮއްކޯ.. ދޮންބެ ފައިން އޭ މިހާރު. ބޭވަފާތެރިންނާއި މެދު ވިސްނާ ވަގުތު ބޭކާރު ކުރާނެ ޓައިމް އެއް ދެން ނެތް." ފައިސަލް މިހެން ބުނުމުން މުތިޔާ އަނެއްފަރާތައް އެނބުރުނެވެ. އަދި ފުންނޭވާއެއް ބޭރުކޮއްލުމަށްފަހު ހިނިގަނޑެއް ޖަހާލިއެވެ. "ދޯ" މުތިޔާ އަނގައިން ބޭރުވި އެންމެ އަކުރެއްގެ މި ބަހުން ފައިސަލް އަށް ވަރަށް އުނދަގޫ ވިއެވެ. މުތިޔާގެ ކިތަންމެ ކުޑަ ހަރަކާތެއްވެސް ފައިސަލްއަށް އެނގެއެވެ. އެގޮތަށް މޫނު އަނެއްފަރާތަށް ލުމަށްފަހު ހިނިގަނޑެއް ޖަހާލާފައި "ދޯ" މިހެން ބުނާނީ އޭނަ އެކަމަކާ އެއްބަސް ނުވަންޏާއެވެ. ފައިސަލް އަށް ކަމެއް ސިއްރު ކުރަންޏާއެވެ. އިތުރަށް ބުނެވޭ އެއްޗަކުން ފައިސަލް އަށް ކަމެއް އެނގިދާނެތީއެވެ.
"މުތީ" ފައިސަލް މުތިޔާއަށް ގޮވާލުމުން މުތިޔާ ދެ ލޯ މަރާލިއެވެ. އޭނާގެ ބޭބެ އަށް ދޮގުހަދާކަށް އޭނާއަކަށް ނުކެރޭނެއެވެ. "އެބަ އަންނަން އިނގޭ..." ފައިސަލް އާއި ދިމާލަށް އެނބުރިވެސް ނުލާ ކޮޓަރިއަށްދާން ހިނގައިގަތްވަގުތު މުތިޔާގެ ފިރިމީހާ އަފްޒަލް މުތިޔާ ކުރިމަށްޗައް އަރާ އޭނާ ހުއްޓުވިއެވެ. އަފްޒަލް މުތިޔާއާއި ދިމާލަށް ބަލަން ހުރިގޮތުން މުތިޔާގެ މޭ ތެޅެންފެށިއެވެ. އަދި ވައި އަޑުން ހަމައެކަނި އަފްޒަލް އަށް އަޑުއިވޭވަރަށް ނޫނެކޭ ބުނެލިއެވެ. މި މަންޒަރު ބަލަން ފައިސަލް ހުރީ ވާނުވާ ނޭނގިފައެވެ.
"ކިހިނެތްވީ..." ފައިސަލް އިންތަނުން ތެދުވެލަމުން ބުނެލިއެވެ. މުތިޔާއަށް ދެން އިތުރަށް ސިއްރު ނުކުރެވޭނެކަން އެނގުމުން އަފްޒަލް މޭމަތީ ބޯއަޅާލުމަށް ފަހު ރޯންފެށިއެވެ. "ހީ ޑަޒަންޓް ޑިޒާވް ދިސް".. އަފްޒަލް މަޑުމަޑުން މުތިޔާ ގައިގައި ބައްދާލަމުން ބުނެލިއެވެ. "ބަޓް ހީ ޑިސަރވްސް ޓު ނޯ ދަ ޓްރުތް.."
"ކޯޗެއްތަ.. އަފްޒަލް ކީކޭތަ ދެމީހުން ތި ކިޔަނީ.." ފައިސަލްގެ ހިތްތެޅެންފެށިއެވެ.
"އައި އެމް ސޮރީ ދޮންބޭ.. ފުރަތަމަ އެނގުނު ދުވަހުވެސް ބޭނުންވި ބުނަން.. މުތީ ހުއްޓުވީ.. އެތަށް ފަހަރަކު ބުނިން ދޮންބެއަށް އެނގެން ޖެހޭނެޔޭ.. މީ ދޮންބެގެ ލައިފް އޭ.. އެކަމް މުތީ ހަމަ އެއްގޮތަކަށްވެސް ގަބޫލެއް ނުވި. އެކަމަކު މުތީގެ ކުށެއްވެސް ނޫން މީ... އަހަރެންވެސް މުތީގެ ޖާގާގައި ހުރިނަމަ ކަންތަށްކުރާނީ އެހެން ކަންނޭނގެ." އަފްޒަލް މިހެން ބުނުމުން ފައިސަލް އަށް ވިސްނިއްޖެއެވެ.
"މަގޭ މޮޔަ ކޮއްކޮ.. ދޮންބެއަށް އެނގެޔޭ އެކަން.. އޭނަ މެރީކުރިކަން ދޮންބެއަށް އެނގިއްޖެއޭ މިހާރު. ދޮންބެ ދެރަވެދާނެތީ ނުބުނަން ދޯ ތި އުޅެނީ.." ފައިސަލް ހީލަމުން މުތިޔާ ބޮލުގަ ފިރުމާލުމުން މުތިޔާ އިތުރަށް ރޯން ފެށިއެވެ. "ކޮށްކޮ ހުއްޓާލާ ދެން. ދޮންބެ އޯކޭ އޭ. އެކަހަލަ ނުލަފާ އަންހެނުންނަށް ދުވަހަކުވެސް ރަނގަޅުގޮތެއް ނުވާނެ. އަޅާ ނުލާ.." ފައިސަލް އަށް މިހިސާބަށް ބުނެވުނުތަނާ މުތިޔާ ފައިސަލް ހުއްޓުވިއެވެ. "ނޫން ދޮންބޭ.. ތިހެން ނުބުނޭ..." މުތިޔާއަށް ކެތެއް ނުވިއެވެ. މުތިޔާ އަފްޒަލް އަތުން ކާރުގެ ތަޅުދަނޑިނަގައިގެން ފައިސަލް އަތުގައި ހިފައިގެން ބޭރަށް ނުކުތެވެ. ފައިސަލް ހުރީ ވާނުވާ ނޭނގިފައެވެ. އަފްޒަލް ވެސް އެ ދެމީހުން ފަހަތުން ގޮސް ކާރަށް އެރިއެވެ.
"ކޮއްކޯ.. ކިހިނެއްތަ ވީ... ކޮންތާކަށްތަ މި ދަނީ.." ފައިސަލް އެވަރަށް ސުވާލު ކުރިއިރުވެސް މުތިޔާ އެއްވެސް އެއްޗެއް ނުބުނެ ކާރު ދުއްވަން އިނެވެ. "ދޮންބޭ.. އަހަރުމެން އެންމެނަށްވެސް މާފުކުރޭ.. ކުޑައިރުކޮޅަކު އިހަށް މަޑުކޮށްލާ ހުރިހާ ކަމެއްވެސް އެނގިދާނެ." އަފަޒަލް ފަހަތު ސީޓުގައި އިނދެ ފައިސަލް ކޮނޑުގައި އަތްބާއްވާލަމުން ބުނެލިއެވެ.
މުތިޔާ ކާރު ދުއްވަމުން މަޖީދީމަގުންގޮސް ޗާނދަނީ މަގަށް އެޅުމާއި އެކު ފައިސަލްގެ ހިތް ބާރު ބާރަށް ތެޅެން ފެށިއެވެ. ކާރު ގޮސް މަޑުކޮށްލީ ރާޔާމެންގޭ ދޮރުމައްޗަށެވެ. ފައިސަލްގެ ލޯކުރިމަތިން މާޒީ ފެންނަންފެށިއެވެ. ކާރު ދޮރު ހުޅުވާލިކަން ފައިސަލް އަށް އެނގުނީ މުތިޔާ ގޮވާލުމުންނެވެ. ކާރުންފޭބި އިރުވެސް ފައިސަލް އަށް ދިޔައީ މާޒީގެ ހަނދާންތަށް އާވަމުންނެވެ. ހަނި ގޯޅިގަނޑުގެ ތެރެއިން މުތިޔާ ފަހަތުން ފައިސަލް ދިޔައިރު ފައިސަލް އަށް ސިފަވަމުންދިޔައީ ރާޔާ އާއި ފައިސަލް ދުވަމުން އެގޯޅިގަނޑުގެ ތެރެއިން ދާ މަންޒަރެވެ. ހެމުން ސަކަރާތްޖަހަމުންނެވެ. ލިފްޓްއަށް އެރުމާއި އެކު ލިފްޓްތެރޭގައި ރާޔާ ގިލި ގިލި ކޮށްޓަމުންދަނިކޮށް ކައްސާލާއިގެން ދެމީހުން ވެއްޓުނު ހަނދާންވެފައި ފައިސަލްގެ ތުންފަތަށް ހިނިތުންވުމެއް ގެނުވިއެވެ. ލިފްޓް ދޮރު ހުޅުވުމާއި އެކު އެގޭގައި ޖަހާފައިވާ އެއަރ ފްރެޝްނާގެ ވެސް ޖެހުމާއި އެކު ފައިސަލް އަށް ކުއްލިއަަކަށް އެންމެފަހުން ދެމީހުން ދިމާވި ރޭ މަތިން ހަނދާންވިއެވެ. " ފޫހިވޭ އަހަރެން ފައިސަލްދެކެ. އަހަރެން ލޮތްބެއް ނުވޭ ފައިސަލްދެކެ.." އެއްމަތި މައްޗަށް ފައިސަލްގެ ކަންފަތްދަށުގައި ރާޔާގެ އަޑު ގުމުގުމަން ފެށިއެވެ.
"ދޮންބޭ.. ދޮންބޭ.." ހިޔާލީ ފޮލާތެރެއިން ފައިސަލް ހޭލައްވާލީ މުތިޔާ ގޮވާ އަޑެވެ. "އާދެބަލަ..." ހާސްވެފައި ހުރެ މުތިޔާ ފައިސަލް އަތުގަ ހިފާލިއެވެ. ފަސްޖެހުނު ކަމުގައިވިނަމަވެސް ފައިސަލް އަށް ނުގޮހެއް ނުހުރެވުނެވެ. ބެލް އަޅާލުމާއި އެކު ދޮރުހުޅުވާލީ ރާޔާގެ މަންމައެވެ. މުތިޔާ އާއި އަފްޒަލް ފެނުމާއި އެކު ހީލުމަށްފަހު އެތެރެއަށް ވަންނާށޭ ބުނެލާފައި ފަހަތް ބަލާލިއިރު ފައިސަލް ފެނުމުން ކުއްލިއަކަށް ރާޔާގެ މަންމަ ފެންކަޅިވިއެވެ. ހާސްވެފައިހުރެ މުތިޔާ އާއި ދިމާލަށް ބަލައިލުމުން މުތިޔާ ރާޔާގެ މަންމަ އަތަށް މަޑުމަޑުން ފިތާލިއެވެ. "ޕްލީޒް.." މުތިޔާ ލޯވެސް ފެންކަޅިވިއެވެ. "ފައިސަލް.." ރާޔާގެ މަންމަ ފައިސަލްގާގައި ބައްދާލިއެވެ. ރާޔާގެ މަންމަގެ ފެންކަޅިވެފައިވާ ލޮލުގައިވާ ރިހުމާއި ހާސްކަން ފައިސަލްއަށް ވަގުތުން ނަގައިގަނެވުނެވެ. ނަމަވެސް ފައިސަލް އަށް ބުނާނެއެއްވެސް އެއްޗެއް ނޭނގިފައިހުއްޓާ ފައިސަލް އެތެރެއަށް ވެއްދިއެވެ. ފައިސަލް އެތެއަށް ވަދެ ދެފަރާތް ބަލާލީ ރާޔާ ފެނޭތޯއެވެ.
"ރާޔާ ވެއްޖެ ކޮޓަރީގަ... ދޭބަލަ.." ފެންކަޅިވެފައިހުރެ ރާޔާގެ މަންމަ ފައިސަލްގާތު ކޮޓަރިއަށް ދިޔުމަށް ބުންޏެވެ. އޭރު ފައިސަލްގެ ހިތް ބާރަށް ތެޅެމުން ދިޔައެވެ. މި ވަނީ ކިހިނެތްކަމެއް ކުރެވެނީ ކީއްކަމެއް ހުދު ފައިސަލް އަަކަށްވެސް ނޭނގެއެވެ. މަޑު ހިނގުމެއްގައި ފައިސަލް ގޮސް ރާޔާގެ ކޮޓަރީގައި މަޑުމަޑުން ޖަހާލިއެވެ. އެތެރެއިން އެއްވެސް އަޑެއް ނީވުމުން އަނެއްކާ ތަންކޮޅެއް ބާރަށް ޖާހާލިއެވެ. "ވަދެބަ.. ތަޅެއްނުލަން.." ރާޔާގެ އަޑު ޖެހުމާއިއެކު ފައިސަލްގެ ތެޅި ތެޅި އޮތް ހިތް އިތުރަށް ތެޅެން ފެށިއެވެ. ރާޔާގެ މޫނު ފައިސަލްގެ ލޯކުރިމަތިން ފެނުންކަހަލައެވެ. މަޑުމަޑުން ދޮރު ހުޅުވާލުމަށްފަހު ފައިސަލް އެތެރެއަށް ވައިން އިރު ރާޔާ އިނީ އެނދުމަތީ ފުރަގަސްދީގެން އިށީނދެއެވެ. އަޅާފައިވާ ނަމާދު ދޮޅި ބާލަމުން ރާޔާ ފަހަތް ބަލާލި އިރު ފައިސަލް ހުރީ ހުރިތާ ގަނޑުވެފައެވެ. ފައިސަލް ފެނިފައި ރާޔާ ވެސް ހުއްޓުންއެރިއެވެ. ވާންވީ އުފާކަމެއް ނޫނީ ދެރަކަމެއް ރާޔާ އަކަށް ނޭނގުނެވެ. ދެފިކުރުގައި ހުއްޓާ ރާޔާގެ ލޮލުން ކަރުނަތަށް ފައިބައިގަތެވެ. ފައިސަލް ހުރިތާ ހުރީ ރާޔާއަށް އައިސްފައިވާ ބަދަލުތަށްފެނިފައި ހައިރާންވެފައެވެ. ހިކި އަނަރޫފަވެފައިވާ މޫނުމަތިން އުފާވެރިކަމުގެ ކުޑަ މިންވަރެއްވެސް ފެންނަން ނެތެވެ. ބޮލުގައި އެންމެ އިސްތައްޓެއްވެސް ނެތް އިރު އެކި ދިމާ ދިމާލުން ފާރު ހެދިފައިވެއެެވެ. ދެލޯކައިރި ވަޅުޖަހައިގެންގޮސް އަނދިރިވެފައެވެ. ތުންފަތް ހިކިގެންގޮސް ކަނޑަ ކަނޑައިން ގޮސްފައިވެއެވެ. ރާޔާ ފެނުމާއި އެކު ފައިސަލްއަށް ހުރިހާ ކަމެއް ވިސްނުނު ކަހަލައެވެ. "ކީއްވެ ނުބުނީ..." ފައިސަލް ބާރު ހިނގުމެއްގައި ގޮސް ރާޔާ ކައިރީ އުޑަފައިން އިށީނދެލާފައި ބުންޏެވެ.
ރާޔާއަށް ބުނާނެ އެއްޗެއް ނޭނގުނެވެ. އިސްދޮށަށް ޖަހާލަމުން ގިސްލަ ގިސްލާފައި ރޯން ފެށިއެވެ. ފައިސަލް އަށް ކެތެއްނުވިއެވެ. ރާޔާގެ ގައިގައި ބައްދާލިއެވެ. އަދި ބޮލުގައި ފިރުމާލިއެވެ. "ކީއްވެ ސިއްރުކުރީ.. ރާޔާއަށް އެނގެއެއްނު ކޮންމެ ކަމެއް ދިމާވިޔަސް އަހަރެން ހުންނާނެކަން. ދެމީހުން ދިރިއުޅުމުގެ ހަނގުރާމަ ކުރާނީއެކީ އޭ އަބަދުވެސް ބުނަމެއްނު. ދެން މިހަނގުރާމައިގައި އަހަރެން ބައިވެރި ނުކުރީ ކީއްވެ..." ރޮމުން ރޮމުން ރާޔައި ގައިގައި ބައްދައިގެންހުރެ ފައިސަލް ވާހަކަދެއްކިއިރު ރާޔާވެސް ފައިސަލް ގައިގައި ބައްދަމުން ރޮނީއެވެ. "އަހަންނަށް މާފު ކުރޭ ފައި. އަހަންނަށް ނުކެރުނީ ފައި އަށް އެހާބޮޑު ދެރައެއްދޭން...." ރާޔާ ރޮމުން ކެއްސަމުން ވާހަކަދައްކަން ފެށުމުން ފައިސަލް ރާޔާ ތުންފަތްމަތީ އިނގިލި ޖައްސާލިއެވެ. "ޝްޝް.. އަހަންނަށް އެނގިއްޖެ ކީއްވެކަން.. އިތުރަށް ކިޔައިދޭނެ ކަމެއް ނެތް. ރާޔާ އަށް ބަދަލު އަންނަންފެށި ހިސާބާއި ކަންތަށްތަށް ވީގޮތް މިހާރު ސާފުކޮށް އެނގިއްޖެ. އޭރުވެސް ވިސްނާލިނަމަ އަހަންނަށް އެނގުނީސް.. އަހަރެން އަމިއްލަ ނަފްސުދެކެ ރުޅިއާދޭ މިހާރު އެބަ.. ރާޔާ އަހަރެން ދެކެ ލޯބި ނުވެޔޭ ބުންޏަސް އަހަންނަށް އެކަން ޤަބޫލެއް ނުކުރެވޭ. ފަހުން ގުޅާނެޔޭ ހިތާ ދިޔައީ ރާއްޖެއިން ބޭރަށް. އެކަމަކު ދިޔަތާ ދުވަސްކޮޅެއް ނުވެ ވެޑިންގ ފޮޓޯތަކެއް ފެނުނީ.. އެހެންވެ ޔަގީންކުރީ.. އެކަމަކު އޭރުވެސް އަހަރެންގެ ހިތް ބުނަމުންދިޔަ ކޮންމެވެސް އެހެން ކަމެއް އެބަ އުޅެޔޭ... އަހަންނަށް މާފުކުރޭ ރާޔާ.." ގިސްލަމުން ގިސްލަމުން ފައިސަލް ރާޔާގެ އުނގުގައި ބޯއަޅާލައިގެން ވާހަކަދައްކަމުން ދިޔައިރު ރާޔާގެ ލޮލުން ފައިބަމުން ދިޔަ ކަރުނަތަށް ފައިސަލްގެ މޫނުމަށްޗައް ފައިބަމުން ދިޔައެވެ.
"ނޫން ފައިސަލް.. ފައިސަލް އަހަރެން ކިބައިން މާފަށް އެދޭކަށް ނުޖެހޭ.. އެއީ ދޮންބެ ލައްވާ އެޑިޓްކޮށްގެން ހެދި ފޮޓޯތަކެއް. ފައިސަލް އަށް ދައްކަން. ފައިސަލް އެހެން މީހަކާ... އެނގޭ އަހަރެން މީހަކާ ނީންނަނީސް ގައިމުވެސް ފައިސަލް ނީންނާނެކަން... އަހަރެން ބޭނުން.. ބޭނުމެއްނުވޭ އަހަރެން ނެތް ދުނިޔެ އެއްގައި ފައިސަލް އެހެން މީހަކާ ނީނދެ ދުވަސްތަށް ދުއްވާލާކަށް.. އެހެންވެ.." ރާޔާ ގިސްލަމުން ވާހަކަދައްކަމުން ދިޔައެވެ. "އަހަންނަށް މާފުކުރޭ ފައީ.." ގިސްލަމުން ގިސްލަމުން ރާޔާ ވާހަކަދައްކަމުން ބުނެލިއެވެ. ފައިސަލް ބަލާކަށް ނުހުރެ ރާޔާގައިގައި ބައްދާލިއެވެ. "ވަރަށް ލޯބިވޭ..." ރާޔާ މިހެން ބުނުމާއި އެކު ފައިސަލް ރާޔާ އިތުރަށް ގާތްކޮށްލަމުން ބުނެލިއެވެ. "އެއަށްވުރެ މާބޮޑަށް ލޯބިވޭ".
ކުޑައިރުކޮޅަކު މިހެން ބައްދާލައިގެން ތިބެފައި ފައިސަލް ރާޔާ ކުޑަކޮޮށް ދުރުކޮށްލިއެވެ. އަދި ރާޔާގެ ލޮލުން ފައިބަމުންދިޔަ ކަރުނަތަށް ފޮހެލަދިނެވެ.
"ލެޓްސް ގެޓް މެރިޑް." ފައިސަލް މިހެން ބުނުމުން ރާޔާ އިސްދޮށަށް ޖަހާލިއެވެ."އައި އޭމް އެޓް ދަ ލާސްޓް ސްޓޭޖް އޮފް ކެންސަރ.." ރާޔާ ކުރަކި އަޑަކުން ބުނެލިއެވެ.
"ސޯ ވަޓް.. ރާޔާއަށް އެނގެ އެއްނު އަހަރެން ދުވަހަކުވެސް ރާޔާ އަށް ދެރަގޮތެއް ނުހަދާނެކަން." ރާޔާ މޫނުގައި ހިފާ ހިއްލާލަމުން ފައިސަލް ބުންޏެވެ.
"މަށަށް ކާކަށް ކޮން ދެރައެއް ދެން ދެވޭނީ ފައިސަލް.. އަހަރެން ބޭނުން ނުވަނީ ފައިސަލް އަށް ދެރައެއް ދޭން." ރާޔާއަށް މިހިސާބަށް ބުނެވުނުތަނާ ފައިސަލް ރާޔާގެ ތުނފަތްމަތީ އިނގިލި ޖައްސާލިއެވެ. "އަހަންނަށް ދެރައެއް ދޭން ބޭނުން ނޫނިއްޔާ އަހަންނާ އިންނަން އުޅޭ. އަހަރެން ދެރަވާނީ މިކަމާ ރާޔާ ދެކޮޅު ހަދައިފިއްޔާ. ކުރިޔަށް އޮތް އެންމެ ދުވަހެއްވެސް އެންމެ ގަޑިއިރެއްވެސް ރާޔާ އާއި ދުރުގަ ހުންނަން އަހަރެން ބޭނުމެއްނޫން. އެންމެ ސިކުންތެއްވެސް." ފައިސަލްގެ މި ބަސްތަކުން ރާޔާއަށް ރޮވުނެވެ. އިތުރަށް ދެކޮޅުހަދާނެ ހިތްވަރެއް ރާޔާގެ ނެތެވެ. ފައިސަލްގާގައި ބައްދާލުމަށްފަހު އަނެއްކާވެސް ބާރަށް ރޯން ފެށިއެވެ. އަދި ފައިސަލް އާއި އިންނަން ޤަބޫލުވިއެވެ. ފައިސަލްގެ ހިތަށް ކޮންމެވެސް ވަރެއްގެ ލުއި ކަމެއް ލިބުނެވެ. ފައިސަލް ބޭނުންވަނީ ވީ އެންމެ އަވަހަކަށް ރާޔާއާއި އިންނަންށެވެ. މާދަން ވާނެ ގޮތެއް އެނގޭނީ ކާކަށް ހެއްޔެވެ. ރާޔާ މި ދުނިޔެއިން ދިޔުމުގެ ކުރިން ފައިސަލް ބޭނުންވަނީ ރާޔާ ފައިސަލްގެ އަތްބެއްގެ ގޮތުގައި ހުރުމަށެވެ.
"ރާޔާއަކަށް ނޭނގޭނެ އަހަރެން ރާޔާދެކެ ލޯބި ވާވަރެއް. ބައެއްފަހަރު އަހަރެން ހިތަށް އަރާ އަހަރެންގެ ހިތްނަގާ ރާޔާއަށް ދެއްކޭނެ ނަމައޭ. އޭރުން އެނގޭނެ އެ ހިތް ފުރިފާވަނީ ރާޔާދެކެ ވާ ލޯބިކަން. އެ ހިތުގަ ނޯންނާނެ ލޭހިނގާލާނެ ޖާގަވެސް. އެ ހިތުން އަހަރެންގެ ހަށިގަނޑުތެރެއަށް ޕަމްޕް ކޮށްދެނީ ރާޔާގެ ލޯބި." ފައިސަލް މިހެން ބުނުމުން ދެމީހުނަށް އެއްކޮށް ހިނިގަނޑެއް ޖަހާލެވުނެވެ. އެވަގުތު ރާޔާ ފުން ނޭވާއެއް ދޫކޮށްލުމާއިއެކު ފައިސަލްގާގައި ބައްދާލައިގެން އޮތް އަތް ދޫވެއްޖެއެވެ. ފައިސަލްގެ ހިތް ކުދިކުދިވިކަހަލައެވެ. "ނޫން.. ނޫން.. ރާޔާ އަހަރެން ދޫކޮށްފަ ނުދޭ.. ރާޔާ ޕްލީޒް..." ފައިސަލް ރޮމުން ރޮމުން ރާޔާ އާއި ވާހަކަދައްކަމުންދިޔައެވެ.
ރާޔާ ބުނިގޮތަށް ފައިސަލްގެ އުފާވެރިކަމާއި ހުރިހާކަމެއް ރާޔާއާއި އެކު މި ދުނިޔެ ދޫކޮށް ދިޔައީއެވެ. ކިތަންމެ ބޭނުން ވިޔަސް ރާޔާ އާއި ނުލާ ފައިސަލް އަކަށް އުފާވެރިކަމެއް ނުލިބޭނެއެވެ. އެހަނދާންތަކެއް ފައިސަލްގެ ހިތަކުން ނުފިލާނެއެވެ.
-ނިމުނީ-