އިރު އޭގެ ވާޖިބު އަދާކުރުމަށް ފަހު ހަވީރު އަލްވަދާޢު ކިޔުމަށް ތައްޔާރުވަމުންދަނީއެވެ. ޖެހެމުންދިޔަ ފިނިފިނި ވައިރޯޅިތައް ވެސް އެ ވަދާޢުގައި ބައިވެރިވާކަހަލައެވެ. ވިލާ ކޮޅެއްނެތް ސާފު އުޑާއި ވަށައިގެންވާ ފެހިކަމާ އޮއްސެމުންދާ އިރުގެ ރަން ދޯދިތަކުން އަންގައިދެނީ ކާއިނާތުގެ ފުރިހަމަކަމެވެ. ދޫނި ސޫފާސޫފި ވެސް އެސޮރުމެންގެ މަސައްކަތްތައް ނިންމުމައްފަހު ދަތުރުކުރަމުންއެދަނީ އިރުއަލިކަމާއި ލައިގެން އެސޮރުމެންގެ މަންޒިލްތައްފެނޭތޯއެވެ.
ތެޅިގަލުގެ ފާރަކާއި ފަން ފުރާޅެއް ލައިފައިވާ ގެއެއްގެ ކުރިމަތީގައި ބަހައްޓާފައި ހުރި އަށްޓެއްގައި އޮތް މެދުއުމުރުގެ އަންހެނެކެވެ. އޭނާގެ މޫނުމަތިންނާއި ލޮލުންފެންނަނީ އެކަނިވެރިކަމާއި މާޔޫސްކަމެވެ. ބަލާބެލުމައް ހީވަނީ އަޅާލާނެ މީހެއްނެތް އެކަނިވެރިއެއްހެންނެވެ. ފަރާތަކައް ގުޑިވެސް ނުލައި އޮތްއިރު ހީވަނީ މަރުވެފައިވާ މައްޔިތެއްހެންނެވެ. ނަމަވެސް އޭނާގެ ފުރާނަހުރިކަން ރަމްޒުކޮއްދެނީ އެތައްއިރަކުން ވިޔަސް އޭނާ ޖަހަމުންދާ އެސްފިޔައިންނާއި ނޭވާލާއިރު އޭނާގެ މޭ މަތިންނެވެ. ޒާތަކައް ކުނޑިކިޔަމުން ގޭތެރެއިން ނިކުމެގެން އައީ އޭނާއަށް ވުރެ ހަގު އަންހެނެކެވެ. އޭނާގެ އަތުގައި ފެންތައްޓަކާއި މުށުގައި ކޮންމެވެސް އެއްޗެހި ތަކެއް ހުއްޓެވެ. އެއީ އެމީހާއަށް ކާންދޭން އޭނާގެ ބައްޕަ ދީފައިވާ ބޭސްތަކެވެ.
"ޝަރީފާ! މި ބޭސްގުޅަ ކާލައިގެން އޮވޭ! އޭރުން މިރޭވެސް ކަލޭއަށް ނިދޭނީ! އެހެންނޫނީ އަހަރެން މިރޭވެސް ޖެހޭނީ ދެ ގެ ދޭތެރޭގައި ދެމެން! "
އެމީހާ އަށީގައި އޮތް އެ އަންހެންމީހާގެމީހާގެ ގާތަށް އައުމައްފަހު ފޫހިކަމާއި ރުޅިވެރިކަމުގެ ރާގަކައް ގޮވާލިއެވެ. ގޮވާލި ގޮތުންނާއި ވާހަކަ ދެއްކި ގޮތުން އެމީހާއާއި ދޭތެރޭ އެއްވެސް ރަހުމެއް ހަމްދަރުދީއެއްނެތްކަން އެ އަޑު އަހާލި ކޮންމެ މީހަކަށްވެސް އެނގޭނެވެ. ޝަރީފާ އެއަޑަކަށް އެއްވެސް ސަމާލުކަމެއް ނުދެއެވެ. މަޑުމަޑުން އަނގަ ހުޅުވާލުމައްފަހު އެ ބޭސް ގުޅަ ކާލިއެވެ. ޝަރީފާ އަބަދުވެސް އެ އަންހެން މީހާ އާއި ދިމާއަށް ވަރަށް ބަލާނެއެވެ. ޝަރީފާ ބަލާ ގޮތުން ހީވަނީ އެއަންހެންމީހާއަކީ ޝަރީފާގެ ވަރަށް ގާތްމީހެއްހެންނެވެ. ދުލުން އެއްޗެއް ބުނަން ބޭނުން ވިޔަސް މިއަދު ޝަރީފާ އަކަށް އެކަމެއް ނުކުރެވޭނެއެވެ. އާއެކެވެ. މިއަދު ޝަރީފާގެ ދޫ އެވަނީ ބަންދުވެފައެވެ. އޭނާގެ ދޫ ހަލުވަންބޭނުންވިޔަސް މިއަދަކު އެކަމެއް އޭނާއަކައް ނުކުރެވޭއެވެ. ޝަރީފާގެ ދުލުގެ ވާގި ވަނީ ގޮސްފައެވެ.
އެމީހާ ޝަރީފާ އަށް ބޭސްކާންދިނުމައްފަހު އަށިމަތިންނަގާ ގޭތެރެއަށް ވެއްދުމައްފަހު ގޭގެ ދޮރުލައްޕާލަފައި ހިނގައްޖެއެވެ. ޝަރީފާގެ އެ ދެލޮލުގެ އަދޭސްތައް އެއަންހެންމީހާއަކަށް ނޭގެއެވެ. ބުނަންބޭނުންވާ އެތައް ވާހަކަތަކެއް ޝަރީފާގެ ހިތުގައިވެއެވެ. ހަރަކާތެއް ނެތް އެ ނިކަމެތި މީހާގެ ހާލުބަލާލަން މިއަދު އެގެއަށް ޒިޔާރަތް ކުރާނެ އެއްވެސް މީހަކު ނެތެވެ. އޮތީ މަރުވެފަތޯ ނޫނީ ދުނިޔޭގައި އޮތްތޯވެސް ބަލާލާނެ މީހަކުނެތެވެ. އޭނާގެ އެ އެކަނިވެރިކަން ފިލުވުމައް ހަމައެކަނި ހުރި އެއްޗަކީ ގޭތެރޭގައި ދިއްލާފަހި ހުރި ނިދާބޮކި އެކަންޏެވެ. ގޭތެރެއިން ދެން އިވެނީ ދިރޭ ސޫފާސޫފި ގޮވާއަޑެވެ. މިއިން އެއްވެސް ކަމެއް އޭނާއަށް އިހުސާސްވާހެންނެއް ހިޔެއް ނުވެއެވެ.
މިގޮތުގައި ދުވަސްތައް ވޭތިކުރަމުން ޝަރީފާ އެދަނީ ހިތްދަތިކަމާއި އެކަނިވެރިކަމުގައެވެ. އަޅާލާނެ ޔާރެއް އިޔާރެއް ނެތިއެވެ. އެމީހާ ކާއެތިކޮޅެއް ގެނައި އިރަކުން ނޫނީ ޝަރީފާއަކަށް ކާއެތިކޮޅެއްވެސް ނުލިބެއެވެ. އެމީހާ ނައިސްފިނަމަ ޝަރީފާ އޮންނާނީ ހައިބަނޑާއެވެ. މިކަމުގައި ޝަރީފާ ޝަކުވާ ކުރާނެފަރާތެއް ނެތެވެ. މިކަމުގައި އޮތީ އޭނާގެ ވަގުތު ޖެހޭންދެން ކެއްތެރިކަމާއި އެކު އޮތުމެވެ. ނަމަވެސް އެމީހާ ހަޅޭއް ލެވިކަމުގައި ވީނަމަވެސް ޝަރީފާ ދުވާލަކު އެއްފަހަރު ފެންވަރުވާ ސާފުކުރެއެވެ. ރޭގަނޑުވެސް އެއްފަހަރު ޝަރީފާ ސާފުކުރުމައް އާދެއެވެ.
އާދައިގެ މަތިން މިރޭވެސް އެމީހާ ޝަރީފާ ސާފުކުރުމައް އެގެއަށް ދިޔައެއެވެ. ގޭގެ ދޮރު ހުޅުވާލުމައްފަހު ގޭތެރެއަށް ވަދެ ޝަރީފާގެ ގާތައް ދިޔައެވެ. ގޮސް ފުރަތަމަވެސް ކުރަންފެށީ ޝަކުވާތަކެކެވެ.
" އަހަރެންގެ ބައްޕަ ވެސް މިނޫން ކަމެއް ކުރަން އަހަރެންނަކަށް ނުޖެއްސިވިއްޔަ! ބަލާނެ މީކަހަކު ނެތީވިއްޔާ އަމިއްލަ ރަށުގަ އޮތްނަމަ! ރަށު އޮފީހުން މީހުންނަށް މުސާރަ ދީގެން ވެސް ކަލޭ ބެލީހެއްނު! އަހަރެން ބައްޕައަށް ކޮން އުނދަގުލެއް ކުރާކައްތަ! " މިހިސާބައް ޝަކުވާ ކުރިތަނާ ޝަރީފާ ނޭވާ ނުލާ ހިމޭން ވެފައިއޮތްކަން މީނާއަށް ފާހަގަ ކުރެވުނެވެ. ނަމަވެސް ޝަރީފާގެ ދެލޯ ހުރީ ހުޅުވިފައެވެ. އެވަގުތު މީނާގެ އެ ހަރު ގޮތްގަނޑު މަޑުވެލިއެވެ. އަދި ޝަރީފާގެ ފުރާނަ ނެތްކަން މީނާއަށް ޔަގީންވިއެވެ.
މަޑުމަޑުން ޝަރީފާގެ ދެލޯ އޭނާ މަރުވާލިއެވެ. إِنَّا لِلَّٰهِ وَإِنَّا إِلَيْهِ رَاجِعُونَ އެފަކީރު ދުނިޔެ ދޫކޮއް އެދިޔައީ މިއަދު އަޅާލާނެ އެއްވެސް މީހަކުނެތި އެކަނިވެރި ހާލުގައި އޮވެއެވެ. ދުނިޔޭގެ އެންމެ ފަހު ވަގުތު ކޮޅުތައްވެސް ގުނަމުން އެގެންދިޔައީ އެކަނިމާއެކަންޏެވެ. މަރުވަމުން ދިޔަ ވަގުތު އެފަކީރަށް ޝަހާދަތުގެ ދެކަލިމަވެސް ލައިދޭނެ އެއްވެސް މީހަކު ނެތެވެ. ހަތްއުޑުމަތިން ﷲ ސުބުހާނަހޫ ވަތައާލާ ފިޔަވައި އެނިކަމެތި ފަރާތުގެ ހާލު ދެނެހުރި ފަރާތެއް ނެތެވެ. ހަށިގަނޑުގައި އަޅަމުން ދިޔަވޭނުގެ އިހުސާސް އެނގޭނެ މީހަކު ނެތެވެ.
ޝަރީފާގެ ކަންތައްތައް ބަލައްޓަން އަންނަ މިއަންހެންމީހާ ކޮންމެ ފަހަރަކުވެސް މިގެއަށް އައިސް ކުރަން ބޭނުންވާ އެއްކަންތައް އޮވެއެވެ. އެއީ ޝަރީފާގެ ބޯލާ ކޮޅުގައި ހުންނަ ޝަރީފާގެ އެ ކުޑަކުޑަ ލަކުޑި ފޮށި ހާވާލުމެވެ. ނަމަވެސް ވެފައި ހުންނަ ފޫހިންނާއި އައިސްފަ ހުންނަ ރުޅިން ކޮންމެ ފަހަރަކުވެސް ދަނީއެވެ. ނަމަވެސް މިރޭ އޭނާ އެފޮށި ބަލާލަން ބޭނުންވިއެވެ. ބޭނުމަކީ ޝަރީފާއަކީ ކޮންތާކު އައިސްހުރި ކާކުތޯ ބަލާލުމަށެވެ. ބައްޕަ ގާތު އެހުމުންވެސް ބައްޕަގެ ދުލަކުން އެއްވެސް ޖަވާބެއް މިކަމުގައެއް ނުލިބެއެވެ. ބުނާހާވެސް އެއްޗަކީ އޭނައަށް ކޮންމެވެސް ގޮތެއް ވަންދެއް އޭނާބަލާދިނުމަށެވެ.
މަޑުމަޑުން އޭނާ ޝަރީފާގެ އުނަގަޑުގައި އޮތް ދަޅުދަނޑި ނަގާ ފޮށި ހުޅަވާލިއެވެ. ހުދުކުލައިގެ ފޮތިގަނޑަކުން ފޮށީގެ އެތެރޭގައި ވާ ހުރިހާއެއްޗެއް ބަނދެލާފައި ހުއްޓެވެ. އޭގެ އެތެރޭގައި ހުރި ކޮންމެ އެއްޗެއްވެސް ހުރީ ވަރަށް ތަރުތީބުން އަޅާފައެވެ. އެންމެ މަތީގައި އޮތީ ކުޑަކުދިން މަސަލަސް ކުރަން ގެންގުޅޭ ބޮލިރަވައެކެވެ. އޭގެ ދަށުގައި ހުރީ އުމުރުން 4 މަހާއި 9 މަހުގެ ކުއްޖެއްގެ އަންނައުނެވެ. މިކަމާއި އޭނަ ވަރަށް ހައިރާންވިއެވެ. ސަބަބަކީ މިކަމުން ދޭހަވަނީ ޝަރީފާގެ ދަރިއަކު ކޮންމެވެސް ތަނެއްގައި ވާކަމެވެ. އޭނާ ހިތާއި ހިތުން ކިޔާލިއެވެ. މީނަގެ ދަރިފުޅު ވީ ކޮންތާކުބާވައެވެ. އެދަރިފުޅު ދުނިޔޭގައި ހުރިބާވައެވެ. ދުނިޔޭގައި ހުރިނަމަ ޝަރީފާ މި ހާލުގައި މި އުޅެންޖެހުނީ ކީއްވެބާވައެވެ. މިކަހަލަ ބައިވަރު ސުވާލު މީނާގެ ހިތައް އެރިއެވެ.
މަޑުމަޑުން އޭގައި ހުރި އެއްޗެހި ނަގަމުން ދިޔައެވެ. އަންނައުނު ތަކުގެ އެންމެ އަޑީގައި އޮތީ ފަށްޖަހާލާފައިވާ ކަރުދާސް ގަނޑެކެވެ. އެކަރުދާސް ގަނޑު އޮތީ ގިނަދުވަސްވުމުގެ ސަބަބުންނާ އެހެން އޮތުމުގެ ސަބަބުން ރަތްވެ ހަލާކުވާން ފަށާފައެވެ. އަވަސް އަވަހަށް އެނަގާ ހުޅުވާލިއެވެ. އެއީ ޝަރީފާގެ ހެޔޮހާލު އިރުގައި ލިޔެފައިވާ ލިޔުމެކެވެ. އެކަން އެނގެނީ އެގައި ޖަހާފައިވާ ތާރީހަށް ބަލާލުމުންނެވެ. އެއީ މީގެ 40ހަކަށް އަހަރު ކުރީގެ ތާރީހެކެވެ. މަޑުމަޑުން އިނދެ ކަރުދާސް ގަނޑުގައި ވާއެއްޗެއް ކިޔަން ފެށިއެވެ. ފުރަތަމަވެސް ލޮލުގައި އަޅައިގަތީ އޭނާގެ ބައްޕަގެ ނަމެވެ. އަދި އެލިޔުމުގެ އެޑުރެހަކަށް ޖަހާފައި އޮތީ އޭނާގެ ބައްޕަގެ އެޑުރެހެވެ.
ށ.މިލަންދޫ ހަކުރާގެ. ލޯބިވާ އިސްމާއިލްއެވެ. މަޔަކާއި ދަރިއަކު މިއަދު ތިޔަ ވަކިކޮއްލީ އިސްމާއިލްގެ ހިތުގައި ރަހުމެއް ހަމްދަރުދީއެއް އެއްވެސް ވަރަކަށް ހަމަ ނެތީހެއްޔެވެ. ދަރިފުޅު ގެންދިޔުމުން އަހަރެންގެ ހިތުގައި އަޅަމުން މިދާ ވޭން އިސްމާއީލް އަކަށް އިހުސާސް ވެސް ނުކުރެވޭނެއެވެ. އެދަރިފުޅު ބަނޑުހައިވެގެން އުޅޭ ކޮންމެ ވަގުތަކު އަހަރެންނަށް އެކަން އިހުސާސް ކުރެވެއެވެ. ދަރިފުޅު ގާތުން ބޯން ބޭނުންވާ ކޮންމެ ވަގުތަކު އެކަން އަހަރެންގެ ހަށިގަނޑުން އަންގައިދެއެވެ. ދަރިފުޅު ގޮވައިގެން އިސްމާއީލްގެ ރަށައް ދިޔަނަމަވެސް އެދަރިފުޅު ބަލާނެ މީހަކު އިސްމާއީލްގެ ފަރާތަކު ނުހުންނާނެކަން އަހަރެންނަށް އެނގެއެވެ. އެހެންކަމުން އެދަރިފުޅު އުޅޭނެ ހާލު މިހާރުވެސް އަހަރެންގެ ހިތައް އިހުސާސް ކުރެވެއެވެ. އަހަރެންނަށް ތިޔަފަދަ އަނިޔާއެއް ތިދެނީ އަހަރެންގެ ކޮންކުށެއް އޮވެގެންހެއްޔެވެ. އަހަރެންނަށް އިސްމާއީލް އާއި މެދު ކުރެވުނީ ކޮން ގޯސްކަމެއްހެއްޔެވެ.
މިހިސާބަށް މި ގަނޑުގައިވާ އެއްޗެއް ކިއިތަނާ އޭނާގެ ލޮލުން ހޯސްލާފައި ކަރުނަ އަންނަން ފަށައިފިއެވެ. ގަނޑުގެ ތިރީގައިވާ ލިޔުންތައް ކިޔީ ގިސްލާރޮމުންނެވެ. ލިޔުމުގެ އެހިސާބުގައި ވަނީ އޭނާގެނަމެވެ. ކޮންމެވެސް ދުވަހަކުން އަހަރެންގެ ދަރިފުޅު ހަލީމައާއި ބައްދަލުވާނެކަމުގައި އުންމީދު ކުރަމެވެ. އެދުވަހަކުން އަހަރެންނަށް އަޅާލާ އޯގާތެރި ވާނެދަރިއަކު ހުންނާނެ ކަމުގައިވެސް އުންމީދުކުރަމެވެ. އަހަރެންނަކީ އެ ކުޑަކުޑަ ދަރިފުޅުގެ މަންމަ ކަން އެ ދަރިފުޅަށް ބުނެދޭއްޗެވެ. ހަލީމާއަކަށް އިތުރަކަށް އެއްވެސްއެއްޗެއް ނުކިޔުނެވެ. އާއެކެ ހަލީމާގެ ކުރިމަތީގައި މިއަދު މަރުވެފައި އެއޮތީ އޭނާގެ ބަނޑުއަޅާ ވިހޭ މައިމީހާއެވެ. ހަލީމާގެ ލޯބިވާ މަންމައެވެ. މަންމަ ދުނިޔޭގައި ހުރިއިރު ބަލަން ލިބުނުކަމަކު އެ މަންމަ އާއި މެދު އަމަލު ކުރެވުނީ ހާދަހާވާ ގޯސްކޮށެވެ. ބައްޕަ މީ މަންމަ ކަމުގައި ނުބުނެދިނީ ކީއްވެބާވައެވެ. ބައްޕަ މަންމަ ދެކެ އެހާ ރުޅިއަންނަނީ ކީއްވެބާވައެވެ. ހަލީމާ އޭނާގެ މަންމަގެ ކިބައިން މާޢާފަށް އެދެންބޭނުންވިއެވެ. ނަމަވެސް މަންމަ އެވަނީ އޭނާ އާއި އަބަދުގެ އަބަދަށް ވަކިވެފައެވެ. މި ހުރިހާ ސުވާލުތަކަކުން ހަލީމާގެ ސިކުނޑި ހުރީ ހުއްޓިފައެވެ. މީހާ ހުރީ ގަބުވެފައެވެ. ވީ ނުވީއެއްނޭގި ހަލީމާގެ މޫނުމައްޗައް އަނދިރިވެ ބިންމައްޗައް ވެއްޓިއްޖެވެ.
ހަލީމާ ހޭވެރިކަން ވީ ވަރަށް ގިނައިރުންނެވެ. ހޭވެރިކަން ވީއިރު ހަލީމާ އޮތީ ރަށު ސިއްޙީމަރުކަޒު ގައެވެ. ކުއްލިޔަކައް ހަލީމާ ފުންމައިގެން ތެދުވެއްޖެއެވެ. ތެދުވެ ދިމަދިމާ ހޯދަންފެށިއެވެ. އޭރު ޝަރީފާ އެއް ފެންނާކަށް ނެތެވެ. ޝަރީފާ ފެންނަން ނެތުމުން ހަލީމާ ސުވާލު ކުރިއެވެ. ކޮބާ އަހަރެންގެ މަންމަ މަންމަ ކޮންތާކުވީ އަހަރެން މަންމަގެ ގާތަށް ދާންބޭނުން އަހަރެންގެ މަންމަ އާއި ބައްދަލު ކޮއްދީ ހަލީމާ ގެ އެ ވާހަކަތަކުން އެތާ ތިބި އެންމެންވެސް ތިބީ ބުނާނެ އެއްޗެއް ނޭގިފައެވެ. ޝަރީފާ އާއި ދިމާއަށް ހަލީމާ މަންމަ ކިޔަން ޖެހުނީ ކީއްވެ ކަމެއް އެތާ ތިބި އެއްވެސް މީހަކަށް ނޭގެއެވެ. ހަލީމާގެ ގާތުގައި ހުރި މީހަކު ހަލީމަ ހަމަޔަކައް އެޅުވޭތޯ ވަރަށް މަސައްކަތް ކުރިއެވެ. އޭނާ ހަލީމާ ގާތު ބުނި ޝަރީފާ މިހާރު ވަޅުލައިފިއެވެ. މިހެން ބުނުމުން ހަލީމާގެ އެ ސުވަލުތަކަށް ހުއްޓުންއެރިއެވެ. އިތުރަށް ހަލީމާއަށް އެއްވެސް އެއްޗެއް ނުބުނެވުނެވެ. ކުއްލިއަކަށް ހަލީމާ ހަމަހިމޭންވިއެވެ. ހަލީމާ ބާއްވާފަ އޮތް އެނދުގެ އަނެއްފަރާތުގައި އިނީ އޭނާގެ ބައްޕަ އިސްމާއީލްއެވެ. ބައްޕަ ފެނުމުން ހުރިހާ ސުވާލެއް އެއްފަހަރާ ބައްޕަ އާއި ކުރިމަތި ކުރުވިއެވެ. ރޮމުން ގިސްލަމުން ބައްޕަގެ ގާތުގައި ޝަކުވާ ކުރަމުން ގެންދިޔައެވެ. ހަލީމާގެ ހިތުގައިވާ ހުރިހާ ސުވާލެއް އޭނާގެ ބައްޕަ އާއި ކުރިއެވެ.
އިސްމާއިލް އިނީ އޭނަގެ ދަރިފުޅައް ޖަވާބު ދޭނެގޮތެއް ނޭގިފައެވެ. ނަމަވެސް އިސްމާއިލް އަށް މިއަދު މިވަނީ ދަރިފުޅުގެ މި ހުރިހާ ސުވާލަކަށް ޖަވާބު ދޭން މަޖުބޫރުވެފައެވެ. އިރުގަނޑަކު އިނުމައްފަހު އިސްމާއިލް ކުރެހިފައިވާ އަޑަކުން ދަރިފުޅާ ވާހަކަ ދައްކަން ފެށިއެވެ. އާ ދަރިފުޅާ އަޑުއަހާ އެއީ މީގެ 45 އަހަރު ކުރި ބައްޕަ ދިރިއުޅެމުން އައީ ދަރިފުޅުގެ މަންމައާއި އިނދެން ދަރިފުޅުގެ މަންމަގެ ރަށުގައެވެ. ބައްޕަމެން ދެމަފިރިން ދިރިއުޅެމުން އައީ ވަރަށް އުފާވެރި ދިރިއުޅެމެއް ދިރިއުޅުމުގެ ދުވަސްތައް ހޭދަކުރަމުން ދިޔައީ އުފަލާއި ހިތްހަމަ ޖެހުމުގަ ބައްޕަ އަށް އުނިވާ އެއްވެސް ކަމެއްނެތް މަންމަ ބައްޕަ ގެންގުޅުނީ ބައްޕަ ބޭނުންވާ ހުރިހާ ކަމެއް ކޮއްދީގެން މަންމަ އަކީ ހެޔޮ ކަމުގައި ދެވަނައެއް ނެތް މިސާލެއް ދަރިފުޅު ލިބުމުންވެސް ދަރިފުޅުގެ ހުރިހާ ޒިންމާއެއް އަދާކުރަމުން ބައްޕަގެ އެއްވެސް ކަމެއް އުނިނުކޮއް ކޮއްދިނީ އުފަލާއެކުގައެވެ.
ބައްޕަމެންގެ ދިރިއުޅުމުގެހަޔާތް ބަނަވާންފެށީ ދަރިފުޅުގެ އުމުރުން 8 މަހުގައެވެ. ބައްޕަގެ އެކުވެރި އާދަނު ބޯއްޓު ދަތުރު ކުރުމައްފަހު ރަށައް އައިސް ބައްޕަމެންގެ ގެއަށް އަންނަން ފެށި ހިސާބުންނެވެ. ނަމަވެސް އާދަނު ގެ އަށް އަންނަނީ ބައްޕަގެ ރައްޓެހިކަމުގައެވެ. ބައްޕަ ގޭގައި ނޫޅޭ ގަޑި ތަކުގައިވެސް އާދަނު ގެ އަށް އައިސް އުޅެއެވެ. އަބަދުހެން ކަހަލަ ގޮތަކަށް އާދަނު އުޅެނީ ބައްޕަމެން ގޭގައެވެ. ފަހުން އެކަމާއި ބައްޕަ ހިތްހަމަ ނުޖެހެން ފެށިއެވެ. ބައްޕަނެތި އާދަނު ގެއަށް އަންނަން ފެށި ހިސާބުން ބައްޕަގެ ބޮލަށް ޝައިތޯނާ ވަނެވެ. އެހިސާބުން ދުނިޔެ އުމުރު އެކުގައި އުޅުމަށް ވަޢުދު ވަމުން އައި އަނބިމިހާ އާއި މެދު ބޮޑެތި ޝައްކުތެއް ބައްޕަ އަށް ކުރެވެންފެށުމުންނެވެ. މަންމަ އާދޭހާއި އެކު އެހުރިހާ ކަމަކަށް އިންކާރު ކުރަމުން ގެންދައިރުވެސް ބައްޕަ ދިނީ ބީރުކަންފަތެކެވެ. ދުވަހަކުވެސް ނުކުރާނެކަމަށް ބުނެވުނު އަނިޔާ ބައްޕަގެ މިދެއަތުން އެދުވަހު މަންމައަށް ކުރީމެވެ. އެތައްރެއަކު ގެއިން ނެރެލާ ބޭރު ކޮއްލީމެވެ. އާދަނު އާއި ދެމީހުން ސިއްރު ލޯބީގެ ސައްލާ ކުރާ ކަމައްބުނެ އެ ފަކީރުގެ ބޮލުގައި ދޮގު ތުހުމަތުތައް އެޅުވީމެވެ. މަންމަ ރޮއި ރޮއިފާ ކުރަމުން ގެންދިޔަ އާދޭސްތައް ބައްޕަގެ ސިކުނޑި ބުނަމުން ގެންދިޔައީ އެއީ ހުސް ދޮގުކަމުގައެވެ. އާޙިރުގެ ނަތީޖާ އަކައް ވީ މަންމަ ރޮއިރޮއި އޮއްވާ ދުވަހަކުވެސް ނުމަހާނެކަމަށް ބުނެ ބާރައް ޖަހާލި ގޮށް މަހާލުމެވެ. އާއެކެވެ. މަންމަ ވަރިކުރީއެވެ. އަދި އެވަރަކުންވެސް ބައްޕަގެ ހިތަކަށް ހިތްހަމަ ޖެހުމެއް ނުލިބުނެވެ. ރެއާއި ދުވާލު ފޫހިކަމެއް ވަރުބަލިކަމެއްނެތި ހޭހަން ކުރަމުންގެދިޔަ ލޯބިލޯބި ދަރިފުޅުވެސް އެ މަންމަގެ އަތުން ޖަހައިގަތީއެވެ. އެދުވަހު މަންމަ ވާނެ އެކަނިވެރިކަމާއި ވާނެ ދެރަ ބައްޕަ އަކަށް އިހުސާސްވެސް ނުކުރެވެއެވެ. މަންމަގެ އެ އާދޭސްތަކައް ބީރު ކަންފަތެއް ދިނުމައްފަހު މަންމަގެ ރަށުން ފުރައިގެން އައީ މި ރަށަށެވެ. މީ ބައްޕަގެ ވެސް އަދި މަންމަގެ ވެސް އުފަންރަށެއްނޫނެވެ. މަންމައަށް އެނގިދާނެތީ ބައްޕަ ބައްޕަމެންގެ ރަށައްވެސް ދާކައް ބޭނުމެއްނުވިއެވެ. ސަބަބަކީ ބައްޕަ އާއި ދަރިފުޅު ހޯދުމަށް މަންމަ އައިސްފާނެތީއެވެ.
އެދުވަހު ބައްޕަ މިރަށުގެ މީހުންނައްވެސް ހެދީ ދޮގެވެ. ދަރިފުޅު ގޮވައިގެން މި އައީ އެދަރިފުޅުގެ މަންމަ ނިޔާވެގެން އަޅާލާނެ އެއްވެސް މީހެއް ނެތިގެން ކަމާއި ބައްޕަގެ އާއިލާގަވެސް އެއްވެސް މީހަކު ނެތްކަމައް ބުނެ ދޮގުހަދައިގެންނެވެ. ސަބަބަކީ މިއިން އެއްވެސް ކަމެއް އެއްވެސް މީހަކައް ބައްޕަ އަންގަންބޭނުން ނުވާތީއެވެ. ދަރިފުޅު ބަނޑުހައިވެގެން ރޯ ކޮންމެ ވަގުތަކު ބައްޕަ އަށް ދަރިފުޅު މައްސަލާ ކުރެވެނީ ވަރަށް ހާލުންނެވެ. އަބަދު ބޭނުންވަނީ މަންމަގެ ގާތުން ބޯށެވެ. ނަމަވެސް އެދުވަހު ބައްޕަ އަށް ދަރިފުޅުގެ އެ އެދުމެއް ފުއްދައެއް ނުދެވުނެވެ. އެގޮތް މިގޮތުން ކޮންމެވެސް ކާއެއްޗެއް ދީގެން ދަރިފުޅު މަސަލަސް ކުރަނީއެވެ.
އެއްވެސް މީހަކަށް ތަޤުދީރަކާއި ދެކޮޅެއް ނުހެދޭނެއެވެ. ހުރިހާކަމެއްވެސް ﷲ ސުބަހާނަހޫ ވަތަޢާލާ ވަނީ ލިޔެ ނިންމަވާފައެވެ. ކަން ދިމާކުރި ގޮތުން މަންމައަށް ފަހުން ކައިވެނި ކުރެވުނީ މިރަށު މީހަކާއެވެ. ނަމަވެސް މިހާރު އެމީހާ ވަނީ ނިޔާވެފައެވެ. މަންމަ ދިރިއުޅެމުން އެގެންދިޔައީ އޭނާގެ ފިރިމީހާގެ ގޭގައެވެ. މަންމަ އެމީހާ އާއި އިނދެގެން އައިއިރު މަންމައަކަށް އެއްވެސް ވަރަކަށް ވާހަކައެއް ނުދެއްކެއެވެ. މަންމަގެ ދޫ ވަނީ ބަންދުވެފައެވެ. ފަހުން މަންމަގެ އެއްވެސް ކުށެއްނެތްކަން ބައްޕައަށް އެނގުނެވެ. ހުރިހާ ހަޤީގަތެއް ބައްޕައަށް އެނގުނު އިރު ވަޤުތު ފާއިތުވެއްޖެއެވެ. ބައްޕަ އަށް ހުރިހާ ހަގީގަތެއް ކިޔައިދިނީ ފަހުން މަންމަ ކައިވެނި ކުރިމީހާއެވެ. އޭނާ ބުނިގޮތުން މަންމަ ދަރިފުޅު ގެނައިފަހުން އެކަމާއި ވިސްނާ ވިސްނާ އެންމެފަހުން މަންމަގެ ސިކުނޑި ސަކަރާތްވީއެވެ. އަދި މަންމައަށް ސްޓްރޯކެއްޖެހި މަންމަގެ އެއްފަޅިން ވާގިވެސް ދިޔައީއެވެ. އެހުރިވަރަށްވެސް މަންމަ ރަނގަޅު ކުރެވުނީ މަންމަގެ އާއިލާގެ މީހުންގެ ރަނގަޅުކަމުންނެވެ. އޭގެ ފަހުން މަންމަގެ ދޫ މަސައްކަތް ކުރުން ހުއްޓުނެވެ. މަންމަ އިނދެގެން އައި މީހާ ނިޔަވުމުން އޭގެ ފަހުން މަންމަގެ ހުރިހާ ކަމެއްވެސް ބަލަހައްޓަމުން މިގެންދިޔައީ ބައްޕައެވެ. މަންމަ ގަބުވެއި އެއިންނަނީވެސް އެފަކީރައް ނަފުސަނީ ގޮތުން އަސަރު ކޮއްފައިވާލެއް ބޮޑުކަމުންނެވެ. ދަރިފުޅު މަންމައަށް ކޮންމެ ދުވަހަކުވެސް ކާންތިދޭ ބޭހަކީ މަންމަގެ ނަފުސާނީބޭހެވެ. އެބޭސް ނުކައިފިނަމަ މަންމަ ހީވާނީ މޮޔަވެފައިވާ މީހެއްހެންނެވެ. އެކަނި އޮވެ އަޑުލެއްވުމާ ހަޅޭއްލެވުމަކީ މަންމައަށް ބޭސް ނުދީ އޮންނަ ރޭރޭ ދިމާވާކަމެކެވެ.
ބައްޕަ މިހުރިހާ ވާހަކައެއް ދަރިފުޅައް ކިޔާދޭން ވަރަށް ބޭނުންވިއެވެ. އަދި މިއިން އެއްވެސް ވާހަކައެއް މިރަށުގެ އެއްވެސް މީހަކަށް މިހާތަކަށް އެނގިފައެއްނުވާނެއެވެ. ނަމަވެސް މިއަދު ބައްޕައަށް މިހުރިހާ ވާހަކަތަކެއް ކިޔައިދޭން މި މަޖުބޫރުވީ މަންމަގެ އެ ސިޓީ ދަރިފުޅައް ފެނުނީމައެވެ. ދަރިފުޅު ބައްޕަދެކެ ރުޅިއައިސްފާނެތީ މިއިން އެއްވެސް ވާހަކައެއް މިހާތަނައްވެސް ކިޔައި ނުދިނީއެވެ. މި ހުރިހާ ވާހަކައެއް ކިޔައިދީފިނަމަ ދަރިފުޅު ބައްޕަ އާއި ދޭތެރޭ ކަންތައް ކުރާނެ ގޮތެއް ނޭގޭތީއެވެ. ދަރިފުޅު ކުޑައިރުއްސުރެ އަބަދުވެސް ބައްޕަ ބުނެދެމުން އައީ އެއަންހެންމީހާ އަކީ ވަރަށް ވިޔާނުދާ މީހެއްކަމުގައެވެ. ބައްޕައަށް މިހުރިހާ ކަމެއްވެސް މި ކުރެވުނީ ވިސްނުމެއްނެތި އަބަދުވެސް ސިކުނޑި ދެމުންގެންދިޔަ ކޮންމެ މެސެޖަކީ ރަނގަޅު އެއްޗެއް ކަމުގައި ދެކެވެމުންނެވެ. ހެޔޮލަފާ ހުލްގުހެޔޮ އިންސާނެއް ނިމިގެން އެދިޔައީ ބައްޕަ ކަހަލަ އަނިޔާވެރ މީހެއްގެ ސަބަބުންނެވެ. އަހަރެންނަކީ ކިހާ ނުލަފާ މީހެއް ހެއްޔެވެ. މަޔަކާއި ދަރިއަކު ވަކިކޮށް އެ ދަރިފުޅުލައްވާ އެމަންމަ ބެލުވީވެސް އެހާ އިހާނެތި ކޮށެވެ. ތަންމަތި ވެފައިވާ އެފަކީރަކީ އެދަރިފުޅުގެ މަންމަ ކަމުގަވެސް ބުނެނުދީއެވެ. އާއެކެވެ. ޝަރީފާ އަކީ ދަރިފުޅުގެ އުފަން މަންމައެވެ. މަންމަގެ ބޯލާކޮޅު ފޮށީގައި އެވަނީ ދަރިފުޅުގެ އަންނައުނެވެ. މިއަދު ބައްޕަ މަންމަގެ ގާތުން މަޢާފަށް އެދެން ބޭނުމެވެ. ނަމަވެސް މަންމަ އެވަނީ ދަރިފުޅާއި ބައްޕަ ދޫކޮއް އަބަދުގެ އަބަދައް ވަކިވެފައެވެ. މަންމަ އެދަތުރު ކުރީ ނިމުމެއްނުވާ ދާއިމީ ގޯއްޗަށެވެ. މި ކެހިވެރި ދުނިޔެއަށްވުރެ އާޙިރަތް މަންމައަށް މާ ހެޔޮކަންބޮޑެވެ. އެތާކު މީހަކު ކުރާނެ ޝަކުވާއެއް ލަވާނެ ހަޅޭކެއް ނޯންނެއެވެ. އެތާވާނީ މަންމަގެ ހެޔޮ ޢަމަލު ތަކެވެ.
މިހިސާބައް ވާހަކަ ދިޔަތަނާ އިސްމާއިލްގެ އަޑު ބެދިއްޖެއެވެ. އިތުރައް އެއްވެސް އެއްޗެއް އިސްމާއީލް އަކައް ނުބުނެވުނެވެ. މިހުރިހާ ވާހަކައެއް އަޑުއަހަން ހަލީމާ އިނީ ހުއްޓިފައެވެ. ބުނާނެއެއްޗެއްވެސް އޭނާއަކަށް ނޭގެއެވެ. އެ އެނދުގެ ވަށައިގެން ތިބި އެންމެންވެސް ތިބީ ހުއްޓިފައެވެ. އަނގައިން ބުނެލާނެ މީހަކުވެސް ނެތެވެ. އެ ހަމަހިމޭން މާހައުލަށް ހަލަބޮލިކަމެއް އައީ ގޮނޑީގައި އިން އިސްމާއީލް މަޑުމަޑުން ގޮނޑީގެ އަތްގަނޑު މައްޗައް ތިރިވާންފެށުމުންނެވެ. ތިރިވަމުންދިޔަ އިރު އިސްމާއީލް އޭނަގެ މޭގައި ވަރަށް ބާރައް އަތްއަޅައިގެން އޮތެވެ. ވަގުތުން އިސްމާއިލް ނަގާ ޖެހިގެންހުރި އެނދައްލިއެވެ. އޭރުވެސް ހަލީމާ އިނީ ހުއްޓިފައެވެ. އޭނާގެ ކުރިމަތީގައި ވާ އެއްވެސް ކަމެއް އޭނާއަކަށް ނޭގޭކަހަލައެވެ. ހަލީމާގެ ގާތުގައި ހުރި މީހަކު ހަލީމާގެ ކޮނޑުގައި ހިފާފައި ތަޅުވާލިއެވެ. އަދި ބުންޔެވެ. ދަރިފުޅާ ކެއްތެރިވޭ ﷲ ސުބަހާނަހޫ ވަތަޢާލާ އިންސާނުން އިމްތިހާނު ކުރައްވަނީ އެކި ގޮތްތަށެވެ. މިއަދު ދަރިފުޅު އެ އިމްތިހާނުން ފޭލިވީކަމުގެ އިހުސާސް ކުރެވުނު ކަމުގައި ވިޔަސް އެމަންމަ ވަނީ ދަރިފުޅާއި އެކުގައެވެ. ދެން މަންމައަށް ހެޔޮދުޢާ ކޮއްދީ މިއަދު މަންމަ އެވަނީ ދަރިފުޅުގެ ދުޢާއަށް ބޭނުންވެފައެވެ. ކުއްލިއަކަށް ޑޮކުޓަރު ވަރަށް ބާރަށް ހަލީމާއަށް ގޮވާލިއެވެ.
' ހަލީމާ! ވަރަށް އަވަހަށް މިކޮޅައް އާދެބަލަ !
އެނދުމަތިން ފުންމައިގެން ތެދުވެ ހަލީމާ ޑޮކުޓަރ ގެ ގާތައްދިޔައެވެ. އޭރު އިސްމާއީލް އޮތީ އޮކްސިޖަން ގުޅާފައެވެ. އަތަށާއި ފަޔައް ހުރީ މެޝިންތައް ގުޅާފައެވެ. ހަލީމާ އައުމުން ޑޮކުޓަރ ހަލީމާގާތުގައި ބައްޕަ އެބަގޮވައޭ ބުނެ ހަލީމާ ބައްޕަގެ ގާތަށް ވެއްދިއެވެ. ހަލީމާ އައުމުން އިސްމާއީލް ހަލީމާ އާއި ވާހަކަ ދައްކަންފެށިއެވެ. ދަރިފުޅާ މަންމައަށް ހެޔޮދުޢާ ކޮއްދެއްޗެވެ. މަންމަ އަކީ ކުށެއްނެތް މައުސޫމު އަންހެނެކެވެ. އިއްފަތްތެރި ފިރިންނައް އަޅާލާ އޯގާތެރި ކެއްތެރި އަންހެނެކެވެ. ދަރިފުޅާއެވެ! ބައްޕަ އަށް މަޢާފު ކުރާށެވެ. މި ހިސާބައް ބުނިތަނާ އިސްމާއީލްގެ ގަޔައް ގުޅާފައިހުރި މެޝިންތަކުން އެލާމް އަޅަންފެށިއެވެ. އިސްމާއީލްގެ އަޑު މަޑުވަމުން ގޮސް އޭނާގެ އަޑު ކެނޑިއްޖެވެ. އިސްމާއިލްގެ ދެ ލޯ އެދަނީ ހުއްޓެމުންނެވެ. ނޭވާގެ އަޑު ކުރިއަށްވުރެ ގަދައެވެ. ދަތިހާލުގައި ދެ ފަހަރު ނޭވާއެއްލުމައްފަހު އޭނާގެ އެންމެ ފަހު ނޭވާ އެދޫކޮއްލީ އަބަދުގެ އަބަދަށެވެ. ހަލީމާއަށް ހީވީ އޭނާގެ ރިހޭ ފައި މައްޗައް ފޮއި ވެއްޓުންހެންނެވެ. މަންމަ ބަލަންލިބި އެއީ މަންމަ ކަމުގައި ނޭގި މިއަދު އެވަނީ މަންމަ ހަލީމާ އާއި ވަކިވެފައެވެ. އަް މިހާރު ވަކިވެގެން އެދިޔައީ ހަލީމާ އެންމެ ކުޑައިރުއްސުރެ ހަލީމާ ބަލާ ބޮޑުކުރި އޭނާގެ ބައްޕައެވެ. ހަލީމާ ހިތާއި ހިތުން ކިޔާލިއެވެ. އާއެކެވެ. އަހަރެން މަންމަ އާއި ބައްޕަ އަށް އަހަރެންގެ ހިތުގެ އަޑިން މަޢާފު ކޮއްފީމެވެ. މުޅި އުމުރަށެވެ.
- ނިމުނީ -