އެ ހަމަ ހިމޭން ދޮންވެލި ތުނޑީގައި ހުރި ޖޯލިފައްޗެއްގައި އަހަރެން އިށީންދެލައިގެން އިނީމެވެ. ޖެހެމުން ދިޔަ ނަލަ ރީތި ވައިރޯޅިތައް އަހަރެންގެ ގައިގައި ބީހިލަމުން ދިޔައެވެ. ބިޔަ ބޮޑެތި ރުއްތަކާ ގަސްތަކުގެ ވަށައިގެން ވަނީ އީދުގެ ޖޯޝާ ފޯރިއެވެ. ވަގުތަކީ ހަވީރުގެ ހިޔާޖެހިފައިވާ ވަގުތުކަމުން މާދުރުނޫން ހިސާބުތަކުގައި އެކި އުމުރުފުރައިގެ މީހުންނާ ކުދިން ހެލިފެލިވެ އެޅެއެވެ. ކުޑަކުދިން އެކި ކުޅިވަރުތަކުގާ ދެކޮޅަށް ދުވެ ބޯޅަކުޅެމުން ދިޔައިރު ފިރިހެންވެރިން ބައިބަލާކުޅެމުން ދިޔައެވެ. އީދުގެ ކުޅިވަރުތައް ބެލުމަށް އަންހެންވެރިން ނަލަ ހެދުމުގާ އެތުރިލައިގެން ތިބިއިރު، އަންބާގެ އަޑުތަކުން ހިސާބުގަނޑުވަނީ ގުގުމާލާފައެވެ. މީން އެއެއްވެސްކަމަކަށް އަހަރެންގެ ޝަޢުޤެއްނެތެވެ. އަހަރެންގެ ހިޔާލުތައްވަނީ އެތައްދުރަކަށް ދަތުރުކޮށްފައެވެ. އެ އުމުރުފުރައިގެ ކުދިން ކުޅިވަރުގެ ރޫހުގައި އުޅޭތަން ފެނުމުން އަހަރެންގެ ހިތް އިތުރަށް ނުތަނަވަސްވެގެން ދިއައެވެ. ލޯމަރާލާ ކޮންމެފަހަރުކުމެ ފެންނަނީ އެ ސާދާ މޫނެވެ. މާޔޫސްވެ ކަންބޮޑުވެފައިވާ އެމަންޒަރެވެ. އަސަރުންފުރިފައިވާ ދެލޮލެވެ.
އެއީ 2006 ވައަހަރުގެ ޑިސެމްބަރު މަހުގެ ބޮޑުޗުއްޓީގެ ދުވަސްވަރެވެ. އޭރު އަހަރެންގެ އުމުރުން ވާނީ ގާތްގަނޑަކަށް 17 އަހަރެވެ. އަހަރެންގެ އުމުރު ފުރައިގެ އެހެންކުދިން ފަދައިން އަހަރެންވެސް ކުޅުމާ މަޖަލުގަ ހޭދަކުރީމެވެ. ސްކޫލް ޗުއްޓީދުވަސްވަރުކަމުން އަހަރެންވެސް ގިނައިން އުޅެނީ ރައްޓެހިކުދިންނާ އެކީ ބޭރުގައެވެ. ރަށުގެ އާބާދީއަކީ މާބޮޑު އާބާދީއެއްނޫންކަމުން އެކަކު އަނެކަކު ދެކިފަރިތަވެ ވަރަށް ގާތެވެ. އެހެންކަމުން ރައްޓެހިކުދިންނާއެކީ އެކިގޭގެއަށް ގޮސް ހަދަމެވެ. މަޖަލާ ސަކަރާތުގައި ވަގުތުތައް ހޭދަކުރީމެވެ. ޗުއްޓީދުވަސްވަރުކަމުން މާލެއިންވެސް ވަރަށްގިނަ މީހުން ރަށަށް އައިސް އުޅުނުވެ. އާދައިގެމަތިން އަހަރެން އެދުވަހުވެސް ހެނދުނު ތެދުވެގެން ދިޔައީ ރައްޓެހިންނާ އެކީ ބޭރަށެވެ. އެހެންގޮސް އުޅުމުގެތެރޭގައި އަހަންނާ ބައްދަލުވީ އެތަނުން ގެއަކަށް އައިސް ހުރި މާލެ މީހެކެވެ. އެއީ އުމުރުގެ ގޮތުން ބެލިކަމުގައި ވީނަމަވެސް އަހަންނަށްވުރެއް އެތައް އަހަރެއް ދޮށީ މީހެކެވެ. ބަލާބެލުމަށް އެމީހާޔަށް ވާނީ 30 ހަކަށް އަހަރެވެ. އަހަންނާ ސަލާމްކޮށްލުމަށްފަހު އަހަރެންގެ ނަން އޮޅުންފިލުވިއެވެ. އަހަރެންވެސް މާބޮޑު ކަމަކަށް ނުހަދާ އަހަންނަށްކިޔަނީ ނަދާ ކަމަށް ބުނީމެވެ.
ނަދާ!. ވަރަށް ރީތި ނަމެއް. ޖަވާބުގައި އަހަރެން ޝުކުރިއްޔާ އޭބުނީމެވެ. އަދި އެމީހާ އަމިއްލައަށް އަހަންނަށް ތަޢާރަފް ވިއެވެ. އަހަންނަށްކިޔަނީ ޖިނާ. އަހަރެން މިރަށަށް މިއައީ ވިޔަފާރި ކަމަކު. އަހަންނަކީ ވިޔަފާރީވެރިއެއްކަމުން ދޭތެރެ ދޭތެރެއިން އެކި ރަށްރަށަށް ގޮސް އުޅެން. އަދި މިފަހަރު ކަންދިމާކުރިގޮތުން މިއާދެވުނީ މިރަށަށް. އަހަރެން ވަރަށް އަވަހަށް މާލެދާން ފުރާނަން.
ޖިނާދެއްކި ވާހަކަތަކަށް ބޯޖަހާލުމަށްފަހު އަހަރެން ދެންދަނީ އޭ ބުނުމަށްފަހު ހިނގައިގަތީމެވެ. ޖިނާއެވާހަކަތައް އަހަންނާ ހިއްސާކުރުމުގެ ބޭނުމަކީ ކޮބާބާއޭ އަހަރެންގެ ހިތަށް އެރިއެވެ. ނަމަވެސް މާބޮޑުކަމަށް ނުހަދާ އަހަރެންގެ ސަކަ މިޒާޖުގައި ކުދިންނައެކީ ރަށުގެ ފުށްޓަރުފަރާތަށް ހިނގައިގަތީމެވެ. އެތަނުގައި އަހަރެން އެކި ކުޅިވަރުކުޅުނީމެވެ. މަޖަލުގައި ވަގުތުތައް ހޭދަކުރުމަށްފަހު މެންދުރުގެ ވަގުތަށް ގެއަށް ދާން ހިނގައިގަތީމެވެ. ކުއްލިއަކަށް އަހަރެންގެ ލޮލުގައި އަޅައިގަތީ އަހަރުމެންތިބި ތަނާ މާދުރު ނޫން ހިސާބެއްގައި ބަލަހައްޓައިގެން ޖީނާ ހުރި މަންޒަރެވެ. ސިއްސައިގެން ދިޔައެވެ. ޖީނާ މިތާ ކީއްކުރަނީ ބާއޭ ހިތަށް އެރިއެވެ. އަހަރުމެން އެއްގަމަށް އެރުމަށްޓަކައި ގަސްތަކުތެރޭންލާފައި ގޮސް މައިމަގަށް ނުކުތީމެވެ. އަދި އޭރު އެފެނުނީ ޖިނާބާއޭވެސް ހިތަށް އެރިއެވެ. ގެއަށް އާދެވުނު އިރު މެންދުރު ނަމާދަށް ބަންގި ގޮވަނީ އެވެ. ނަމާދާށްފަހު އައިސް އާދައިގެ މަތިން މަންމަ އާއި ބައްޕަ އަދި ކޮއްކޮއާއެކީ ކާން އިށީންނީމެވެ. އަހަރުމެން ދިރިއުޅެމުން އައިގެއަކީ ކާފަގެ މުސްކުޅިގެއެވެ. ގެއަށް ވަންނައިރު ދޮރުމަތީގައި މާބޮޑުނޫން މާބަގީޗާއެއް އޮވެއެވެ. އެތެރެގެއަށް ވަންނައިރު ކަނާތްފަރާތުގައި ބޮޑުފެންޑާއެކެވެ. އަދި ފެނޑާގައި އެއްތެޔޮފުރި ގޮނޑިއާއި އަދަރާދަގޮނިޑިން ތަން ފަޅުފިލުވާލަދެއެވެ. އެތެރެގޭގައި ހުންނަނީ 03 ކޮޓަރިއެވެ. ބޭރުންއަންނަ މެހެމާނުން މަޑުކޮށްލަން އެއްކޮޓަރި ހުންނަނީ ބަހައްޓާފައެވެ. އަހަރެންނާ އަދި އަހަރެންގެ އަންހެން ކޮއްކޮ ނިދަނީ އެއްކޮޓަރީގައެވެ. ބަދިގެފަރާތުގައި ކެއިން ބުއިމުގެ ކަންތައް ހަމަޖައްސަން ހުންނަނީ އާދައިގެ މޭޒަކާ ދެފަރާތުގަ ކޮޅުފިލާގޮނޑިއެއް. އާންމުގޮތެއްގައި އެއްފަޅީގައި އަހަންނާއި ކޮއްކޮ އިންނައިރު އަނެއްފަޅީގައި މަންމައާއި ބައްޕަ އެވެ. ގެއަކީ އިހުޒަމާނުގެ މުސްކުޅިގެއަކަށްވުމާއެކު ގެވަނީ ވަރަށްވެސް ބާވެފައެވެ. ނަމަވެސް ތަނަވަސްކަން ނެތުމުން ގެ ވަނީ ހެދޭގޮތް ނުވެފައެވެ.
މިބުނާދުވަހެވެ. ކެއުމުގެ ތެރެއިން ބައްޕަ އަހަންނަށް ވަރަށް ރީތިކޮށް ގޮވާލިއެވެ. ދަރިފުޅާ ނަދާ! އާންމުގޮތެއްގައި ބައްޕައަކީ ވަރަށް ބަސްމަދު މީހެކެވެ. ކޮންމެހެން ދައްކަންޖެހޭވާހަކައެއް ފިޔަވާ އިތުރު ވާހަކައެއް ނުދައްކާނެއެވެ. ބައްޕަގޮވާލިގޮތުން އަހަރެން ކުޑަކޮށް ހުއްޓުން އެރިއެވެ. ކެއުމުގެ ތެރޭގައި އަހަރެން، ބައްޕަގެ ގޮވާލުމުމަށް އިޖާބަ ދިނީމެވެ. ބައްޕާ!. ކިހިނެއްތޯވީ. ދަރިފުޅާ، ބައްޕަ ވަރަށް ބޮޑު ނިންމުމެއް ނިންމައިފިން. މިކަމުގައި ބައްޕަ މިނިންމި ނިންމުމަށް ދަރިފުޅުވެސް އިޖާބަދީ އެއްބަސް ވާނެކަމަށް އުންމީދުކުރަން. އެހާހިސާބަށް ދިޔައިރުވެސް އަހަންނަށް އަދި ވާނުވާއެއް ނޭންގެއެވެ.
ބައްޕަ ކުރިއަށް ގެންދެވިއެވެ. ދަރިފުޅާ، ބައްޕަ ބޭނުންވަނީ ނަދާ ވިޔަފާރިވެރިޔާ ޖިނާއާއި ކައިވެނިކުރުމަށް. ބައްޕަ މިނިންމުން މި ނިންމީ ވަރަށް ވިސްނާފަ. ބައްޕަމެންގެ އަދި ދަރިފުޅުގެ ވެސް މުސްތަޤްބަލަށްޓަކައި ވިސްނާފަ. އަހަރެން ދިޔައީ ސިއްސައިގެނެވެ. ކުއްލިއަކަށް "ޖިނާ" ގެ ނަން އަހަރެންގެ ސިކުނޑީގައި އެނބުރިގަތެވެ. ކުރިންދުވަހު އަހަންނާ ބައްދަލުވެ ސަލާންކޮށްލި މީހާކަން ދެނެގަނެވުނެވެ. ކޮންފަދަ އަނދިރި ގަނޑެއްގެ ތެރެއަށް ބައްޕަ އަހަރެން ވައްޓާލަން އުޅެނީބާވައޭ އަހަރެންގެ ހިތަށްއެރިއެވެ. ކައިރީގައި އިން މަންމަ އިސް ޖަހާލައިގެން އިނެވެ. އަދި ބައްޕަގެ ވާހަކަތަކަށް ހިތްވަރުދޭ މޭރުމަކުން ބުނެލިއެވެ. ދަރިފުޅާ ނަދާ!. ނަސީބުއައިސް އަތުގާ ހިފީމާ އެއަށް ފުރަގަސްދިނުމަކީ ބުއްދި ވެރިކަމެއް ނޫން.
އަހަރެން ބުނީމެވެ. ބައްޕާ، އެކަމު އަހަރެންގެ ކިޔެވުމޯ. އަދި އަހަންނަކީ އުމުރުން އެންމެ 17 އަހަރުގެ ކުއްޖެއް. އަދި އެއީ އަހަރެންގެ އުމުރާ އަޅާބަލާއިރު މާ ދޮށީމީހެއް. ބާއްޕާ. އަހަރެން ތިކަމަށް އެއްބަސްވާކަށް ނެތިން. އަހަރެން ބޭނުންވަނީ އަދި ކިޔަވަން. އަހަރެންބޭނުންވަނީ މޮޅުމީހަކަށްވާން. އަހަރެންގެ އުންމީދަކީ ކިޔަވައިގެން ޑޮކްޓަރަކަށްވާން، އިތުރަށް އަހަރެން ބުނީމެވެ. ބައްޕަ ނުރިހިފާ ބުނުއްވިއެވެ. ނަދާ!. ކިތަންމެ މައްޗަށްކިޔެވިޔަސް އަންހެންކުދިން ހަޔާތެއް ފެށީމާ އެކިޔެވިއްޗެއްގެ ބޭނުމެއް ނުހިފާނެ. ގިނަފަހަރު ތިބޭނީ ގޭގައި ދަރިންބަލަން. އަދި މީހަކާ އިނުމަކީ ކިޔެވުމަށް އޮތް ހުރަކެއްކަމަކަށް ބައްޕަމެން ނުދެކެން.
ބާއްޕާ!. ތި ދައްކަވަނީ ވަރަށް ބޯދާ ވާހަކަތަކެއް. މިޒަމާނުގައި އަންހެންކުދިންނެކޭ ފިރިހެން ކުދިންނެކޭ ވާނީ ހަމަ އެއްވަރެއް. ކިޔެވުމަކީ ހަމައެކަނި ވަކި ބަޔަކަށް އޮންނަ ކަމެއްނޫން. އަދި މަތީ މަޤާމްތަކުގައިވެސް އަންހެން ކުދިންނަށްވެސް ހަރަކާތްތެރިވެވޭނެ. އަހަރެން ބުނީމެވެ. ރައްދުގައި ބައްޕަ ނުރުހުންވެފައި ބުންޏެވެ. އެކަމުވެސް ބައްޕަޔަށް ހެޔޮ. ބައްޕަބޭނުންވަނީ ދަރިފުޅު މިކަންކުރަން. އަދި ޖިނާ ވަނީ ބައްޕަޔާ ބައްދަލުކޮށް މިވާހަކަ ދައްކާފަ. ޖިނާ ދަރިފުޅަކަށް ދެރަގޮތެއް ނުހަދާނެ. ޖިނާއާއި ކައިވެނި ކޮށްގެންވެސް ކިޔަވަން ބޭނުމިއްޔާ ކިޔެވިދާނެ.
ބައްޕަގެ އެނިންމުމާގުޅިގެން ވަކިއެއްޗެކޭ ނުބުނެ އަހަރެންދިޔައީ ކޮޓަރިއަށެވެ. ޖެހިގެން އައިދުވަސްތަކުގައި އަހަރެން ގެއިން ބޭރަކަށް ނުނިކުންނަމެވެ. މާޔޫސްވެ ފިކުރުތަކުގެ ތެރެއަށް އަހަރެންވަނީ ގެއްލިގެން ގޮސްފައެވެ. ބައްޕަ އެ ބުނުއްވާ ކަހަލަ ކަމަކަށް އަހަރެން އަދި ތައްޔާރެއްނޫނެވެ. އަހަރެންނަކީ އަދި ޅައުމުރުފުރައިގެ ކުއްޖެކެވެ. ޒަމާން މިވަނީ ވަރަށް ބޮޑަށް ބަދަލުވެފައެވެ. މީގެ އެތެއް އަހަރުތަކެއް ކުރިން ކިޔެވުން ހުއްޓާލުމަށްފަހު ހަޔާތެއްފެށިކަމުގައި ވިޔަސް މިއަދު ހާލަތު މިވަނީ ބަދަލުވެފައެވެ. ކޮންމެ ކުޖަކަށްވެސް ހައްޤުތަކެއްވަނީ ކަށަވަރުކޮށްދީފައެވެ. މީ ތަޢްލީމީ ޒަމާނެކެވެ. އަހަރެން ނިންމާ އެންމެ ނިންމުމަކުން އަހަރެން ވާނީ ސަފުން ބާކީއެވެ. އޭރު ތަފާތުކަންތައްތަކާހެދި އާބާދީގެ ބޮޑުބައެއް ޅައުމުރު ފުރައިގައި ހަޔާތެއްފަށައެވެ.
އޭގެ ހަފްތާއެއްފަހެވެ. ބައްޕަ އަނެއްކާވެސް އަހަރެންނާ އެވާހަކަ ތަކުރާރުކުރިއެވެ. އަދި ކައިވެނީގެ ކަންތައް ޖެހިގެން އަންނަ ހަފްތާ ބަންދަށް ހަމަޖައްސާ ވާހަކަ ބުނުއްވިއެވެ. ބައްޕަ އެންމެ ފުރަތަމަ އެވާހަކަ ދެއްކެވި ހިސާބުން އަހަރެން އެއްގޮތަކަށްވެސް ގޭންބޭރަކަށް ނުނިކުންނަމެވެ. މުޅި ރަށުތެރޭވެސް ދެކެވެނީ އެވާހަކައެވެ. އަހަރެންނާއެކީ ސަކަރާތުގައި އުޅުނު އަހަންނާ އެއް އުމުރު ފުރައިގެ ކުދިންވެސް އަބަދުމެ އަހަންނާ އެސުވާލުކުރެއެވެ. އަދި އެކަން އެގޮތަށް ނުކުރުމަށް ނަސޭހަތްތެރިވިއެވެ. ނަމަވެސް ބައްޕަމެންގެ ނުފޫޒާ މަޖުބޫރީ ހާލަތުގައި އަހަރެންނަށް ޖެހުނީ އެކަންއެގޮތަށް ނިންމާށެވެ.
ބައްޕަމެން ބުނުއްވިގޮތަށް ޖެހިގެންއައި ހަފްތާ ބަންދުގައި އަހަރެންގެ ކައިވެނި ޖިނާއާއި ކުރެވިގެން ދިޔައެވެ. އަހަރެންގެ ކައިވެނި ކުރެވުމުން އަހަރެންގެ މައިންބަފައިން އެކަމާ ވަރަށް އުފާކުރިއެވެ. ނަމަވެސް އެކަމާ ކުޑަ މިންވަރަކަށް ނަމަވެސް އަހަރެން އުފަލެއް ނުވެއެވެ. ކައިވެނީގެ ހަފްލާ ބޭއްވިގެން ދިޔައީ ރަށު ސްކޫލްގައެވެ. އަދި ރަށުގެ ގިނަ އަދަދެއްގެ މީހުންނާ އެކުވެރިން ބައިވެރިވި މި ހަފްލާގައި މަލާމާތުގެ ބަސްތައްވެސް އަހަންނަށް އަމާޒުވެގެން ދިޔައެވެ. އުމުރުގެ ތަފާތާ، ފައިސާޔަށް ވިއްކާލި ކަމުގެ ތުހުމަތާ، އަހަރެންގެ މުސްތަޤްބަލް ހަލާކުވެގެންދިޔަ ކަމުގެ ބަސްތަކެވެ. ނަމަވެސް މީންހުރިހާ ބަސްތަކަކާމެދު އަހަރެން ކިތަންމެ ދެރަވިކަމުގައި ވީނަމަވެސް އެދުވަހު އަހަރެން ދޭން ޖެހުނީ ބީރު ކަންފަތެކެވެ. ހަމައެންމެ ސަބަބަކަށްޓަކައެވެ. މައިންބަފައިންނަށް ޓަކައެވެ. އެކަމަށް ނޫނެކޭ ބުނެފައި ހުރުމުގެ އިޚްތިޔާރުވެސް އޮތެވެ. ނަމަވެސް އަހަންނާމެދު ދުވަހަކުވެސް އެމީހުން ހިތްހެވެއް ނުވާނެކަން އެނގެއެވެ.
ކައިވެނީގެ ހަފްލާއަށްފަހު ޖެހިގެން އައިދުވަހު ޖިނާއާއެކީ އަހަރެން މާލެ ބަދަލުވީމެވެ. ކައިވެނީގެ ކުރިން އަހަރެން ޖިނާއާއި ބައްދަލުވީ ހަމަ އެންމެ ދުވަހަކުއެވެ، އެއީ ކުރިންވެސް ބުނިފަދައިން ރަހުމަތްތެރިންނާ އެކީ ކުޅިވަރުކުޅެން އުޅުމުގެތެރޭންނެވެ. އަހަންނަށް ޖިނާ އަކީ ކާކުކަމެއްވެސް ނޭންގެއެވެ. އަދި ޖިނާގެ މިޒާޖަކީ ކޮބައިމަކެއްވެސް ނޭންގެއެވެ.
މާލޭ އިންޓަރނޭޝަނަލް އެއަރ ޕޯޓުން އަހަރުމެން ނުކުމެގެން ލޯންޗްގައި މާލެއައިސް ފޭބިއިރު އަހަރުމެން ބަލާ ޖިނާގެ ކާރު އައިސް އޮތެވެ.
ކާރު މާލޭގެ ކާރޫބާރުބޮޑު ސިޓީތެރެއަށް ވަދެގެން އައިއިރު އަހަރެން އިނީ ހިޔާލުތަކުގެ ތެރެއަށް ގެއްލިފައެވެ. ދުވަހަކުވެސް އަހަރެން ހިޔާލުކޮށްފައިނެއް ކަމަކާ ކުރިމަތިލުމުގެ ފިކުރެވެ. ޅަ ސިކުނޑިއެއްގައި ދިރިއުޅުމުގެ ބޮޑެތި ޒިންމާ ނެގުމުގެ ފިކުރެވެ. ސިއްސައިގެން ގޮސް އަހަންނަށް ބަލާލެވުނީ ޖިނާ އަހަރެންގެ ގައިގައި ކޮށްޓާލުމަށްފަހު ގެއަށް މިއާދެވުނީ އޭ ބުނުމުންނެވެ. އަދި ޖިނާ އަހާލިއެވެ. ނަދާ ހާދަ ފުން ހިޔާލެއްގަ؟ ކޮން ކަމަކާ ތި ވިސްނަނީ.
އަހަރެން ބުނީމެވެ. ހިޔާލެއްގަ އެއްނޫން. ހަމަހިމޭންކަމާއެކި އިނދެވުނީ. އަހަންނަކީ ހަގީގަތުގައި ވެސް ވަރަށް ސަކަ މިޒާޖެއްގެ ކުއްޖެކެވެ. ނަމަވެސް މި ފަހަކަށް އައިސް ހަމަހިމޭންކަން މަތީ އިނދެވުމަކީ އަހަންނަށް ބޭއިޚްތިޔާރުގައި ނަމަވެސް ކުރެވޭ ކަމެކެވެ. ގޭގެ ދޮރުމަށްއްޗަށް ކާރުއައިސް މަޑުކޮށްލުމުން ޑްރައިވަރު އައިސް ކާރުގެ ދޮރު ހުޅުވަލަދިނެވެ. އަދި ޖިނާއާއިއެކީ އަހަރެން ގެއަށް ވަންނަން ހިނގައިގަތީމެވެ. އަހަރުމެންގެ އިންތިޒާރުގައި ބަޔަކު ތިބި ކަހަލައެވެ. ނަމަވެސް މައި ދޮރުން ވަދެގެން ދިޔައިރުވެސް މީހަކު ފެންނާކަށް ނެތެވެ. މައިދޮރު ފަހަނައަޅާ ދިއުމަށްފަހު ދެން ވަދެވުނީ ގެގޭ ސިޓީންގް ރޫމަށެވެ. ވަރަށްވެސް ތަނަވަހެވެ. ސީލިންގް ގައި ހަރުކޮށްފައިހުރި ބޮޑު ޗާންދަލިޔާގެ އަލިން މުޅި ސިޓިންގްރޫމް ވަނީ ދިއްލާލާފައެވެ. އަދިވެސް މީހެއްގެ ހިލަމެއް ނެތެވެ. އަހަރެން ޖިނާގާތު އަހާލީމެވެ.
ޖިނާ!. މިގޭގައި އިތިރު މީހެއް ނޫޅެނީތަ؟ ޖަވާބުގައި ޖިނާ ބުންނެވެ. ނޫނޭ!. އަހަރެންގެ މަންމަޔާ ކޮށްކޮމެން އުޅޭނެ. ވެދާނެ މިވަގުތު ގޭގައި ނެތީކަމަށް. ޖިނާ މިހެން ބުނެ ނުނިމި އުޅެނިކޮށް ސިޓިންގްރޫމްގެ ދޮރު ހުޅުވާލުމަށްފަހު އަންހެނަކާ ބަލާބެލުމަށްވުރެއް އަހަންނަށްވުރެ ދޮށީ ތިން އަންހެން ކުދިން ގޭތެރެއަށް ވަނެވެ. މަންމާ އޭ ކިޔާފަ ޖިނާ ގޮވާލުމުން އެއީ ޖިނާގެ މަންމަ ކަން އެނގުނެވެ. އަދި ކައިރީގައި ތިބީ ޖިނާގެ ކޮއްކޮމެން ކަންވެސް އެނގުނެވެ.
އަޑު ތުރުތުރުލާފާ ހުރި ރާގަކަށް އަނެއްކާވެސް ޖިނާ އޭނާގެ މަންމަ އަށް ގޮވާލިއެވެ. މަންމާ!. މިއީ ނަދާ. އަހަރެންގެ އަންހެނުން. ނަދާއަކީ އުތުރުގެ އަތޮޅަކަށް ނިސްބަތްވާ ކުއްޖެއް، ތަޢާރަފް ކޮށްދިނުމުގެ ގޮތުން ބުންޏެވެ. . ޖިނާގެ މަންމަގެ މޫނުމަތިން ފެނިގެންދިޔައީ ނަފްރަތާ ރުޅިވެރިކަމުގެ ކުލަވަރެވެ. މަންމަގެ މޫނަށް ބަލާލުމުން ވަރަށް ރުޅިއައިސްފާކަން އެގުނެވެ. އަދި ޖިނާގެ މަންމަ ބުނެލިއެވެ. ޖިނާ ތިވަރުކަމެއްކުރި އިރު މަންމަގާތު ބުނެނުލީ ކީއްވެ؟ ޖިނާއަށް ހަމަ ރަނގަޅަށް އެނގޭނެ މަންމަ ގަބޫލެއްނުވާނެކަން ތިކަންކުރާކަށް. މިހެންބުނެފާ މަންމަ އެތެރެއަށް ވަދެގެން ދިއައެވެ. އަދި މަންމަގެ ފަހަތުން ޖިނާގެ ކޮއްކޮމެންވެސް ވަދެގެން ދިޔައެވެ. އަހަންނާ ސަލާންކޮށް ތަޢާރަފްވެސް ވާކަށް ބޭނުމެއް ނުވިއެވެ. އަހަރެން ވަރަށް ދެރަވިއެވެ. އަހަރެންގެ މި ހަޔާތުގެ ފެށުމަކީ މީބާވައޭ ހިތަށް އެރިއެވެ.
އަހަރެން އެގޭގައި އުޅެމުން ދިޔައީ ނޯކިރީއެއްގެ އުސޫލުންނެވެ. އެގޭގައި ޖެހުނު މަސައްކަތެއްކުރަމުންމެވެ. ހިތުން ރުހުމުން މަންމަ އާއި ކޮށްކޮމެން އަހަންނާ ވާހަކައެއް ނުދައްކައެވެ. މުޅިންވެސް އަހަންނާ ވާހަކަ ދައްކަނީ އަމުރުކުރާ އުސޫލުންނެވެ. ނަމަވެސް ޖިނާ އަހަންނާ ދޭތެރޭ ރަނގަޅޭ ބުނެވިދާނެއެވެ. އަޅާލަންވާ އެންމެ ފުރިހަމައަކަށް އަޅައެއްނުލައެވެ. ކައިވެނީގެ ކުރީކޮޅު އަހަންނަށް ވަރަށް އުންމީދު ދިނެވެ. އަހަރެން ބޭނުން އެއްޗެއް ކިޔެވުމުގެ ފުރުސަތު އަހަންނަށް ހޯދަދޭނެކަމަށްވެސް އޭރު ބުންޏެވެ. ނަމަވެސް މިހާރު އެއިން އެއްވެސް ކަމެއް ހަނދާހުރިހެނެއް ހިޔެއްނުވެއެވެ. ޖިނާގެ ތަނަވަސްކަމާ ކެރިފޯރުންތެރިކަމަކީ އަހަރެންނަށް މާބޮޑު އެއްޗެއްނޫނެވެ. އެއީ ދިރިއުޅުމެއްގައި އަހަރެން ބަލާނެ އެއްޗެއްނޫނެވެ. ލޯތްބާ، އަޅާލުމާ، އޯގާތެރިކަމަކީ އަހަރެންގެ ކުރިމަތީގައި މާ އަގުހުރި އެއްޗިއްސެވެ.
ދުވަސްތައް މާޒީވަމުން ދިޔައެވެ. މިހާރު އަހަރުމެންގެ ކައިވެންނަށް 17 އަހަރު ވީއެވެ. ކައިވެންޏަށް 17 އަހަރު ވީއިރު އަހަންނަށް ވަނީ ލޯބިލޯބި ފިރިހެން ކުއްޖެއް ލިބިފައެވެ. ވޭތުވެ ދިޔަ އަހަރުތަކުގައި އަހަރެން މިގޭގައި ކެއްކުރީ ކިހިނެތްކަމެއްވެސް އަހަންނަށް ބުނެދޭކަށް ނޭންގެއެވެ. ޖެއްސުންކުރުމާ ފުރައްސާރަކުރުމާ، ގުލާނުކުރުމުގެ ތެރޭގައެވެ. ޖިނާގެ މަންނައާއި ކޮއްކޮމެން އަހަންނާ ދޭތެރޭ ކަންތައް ކުރަނީ ވަރަށް ރަހުމް ކުޑަކޮށެވެ. އެއްވެސް ހަމްދަރުދީވުމެއް ނެތިއެވެ. ދިއުޅުން އަހަންނަށްވަނީ ވިހައެއްޗަކަށްވެފައެވެ. ބައެއްފަހަރު ކެއްނުކުރެވިގެން ރަށަށްދާންވެސް ކިތަންމެފަހަރަކު ހިތަށްއަރައެވެ. ނަމަވެސް އަހަރެންގެ ދިރިއުޅުމުގެ ހާލަތު އަހަރެންގެ މައިންބަފައިންނަށް އަންގާކަށް ބޭނުމެއްނެވެއެވެ. އެމީހުން އަހަރެން ކައިވެނި ކުރުވީ ފޮނި އުންމީދުތަކަކާއެކުއެވެ. ވޭތުވެދިޔަ 17 އަހަރު ތެރޭ މައިންބަފައިންކައިރިއަށް ދެވުނީ ވަރަށް މަދު ފަހަރަކުއެވެ.
ވޭތެވެދިޔަ 17 އަހަރުގެ ތެރޭގައި ޖިނާގެ އުޅުމަށްވެސް ބޮޑެތި ބަދަލުތަކެއް ވަނީ އައިސްފައެވެ. ލަހުން ގެއަށް އައުމާ، އެއްޗެއް އަހާލި ކަމުގައިވިޔަސް ރުންކުރުވުމާ، އަދިމީގެ އިތުރުން އަތް އިސްކޮށް އަނިޔާކުރުން ވަނީ އިންތިހާޔަށް ގޮސްފައެވެ. ގޭތެރޭގެ މަސްލަހަތު ގެއްލޭ ފަދަ އެއްވެސް ވާހަކައެއް އަހަރެން ޖިނާގާތު ނުކިޔަމެވެ. އަދި އެއްވެސް ޝަކުވާއެއްވެސް ނުކުރަމެވެ. އަހަރެންގެ ލޯބިވާ ދަރިފުޅުގެ ހަޤުގައެވެ. މިހާރު އަހަރެންބޭނުންވަނީ އެދަރިފުޅަށް ރަނަގަޅު ދިރިއުޅުމެއް ހޯދަދޭށެވެ.
މިގޮތުގައި ދުވަސްތައް ހޭދަކުރީމެވެ. ވަރަށް އަސަރާ ހިތްދަތިކަމުގެ ތެރޭގައެވެ. އެއްދުވަހެއްގެ ރޭގަނޑެވެ. ރޭވަނީ ވަރަށް ދަންވެފައެވެ. އަހަރެންގެ ގައިގައި ރިއްސާލެއްބޮޑުކަމުން ލޮލަށް ނިދިނައިސް އެނދުމަތީގައި އިށީންދެލައިގެން އިނީމެވެ. ޖިނާގެ އިންތިޒާރުގައެވެ. ދަންވަރު 2 ޖަހަން ގާތްވެފައިވަނިކޮށް ޖިނާ އައިސް ކޮޓަރިއަށް ވަނެވެ. އަހަރެން ސުވާލުކޮށްލީމެވެ. ޖިނާއެވެ. ހާދަ ލަސްވެއްޖެއެވެ. ހާދަލަސްވަންދެން ތިއުޅުނީ ކޮންތާކުހެއްޔެވެ. އަހަރެން ގައިގާ ވަރަށް ރިއްސައެވެ. ބޭސްކޮޅެއް އުނގުޅާލަދެވިދާނެތަ؟.
ޖިނާގެ މޫނިމަތި ހީވަނީ އަނގުރު އަލިފާންގަނޑެއްހެންނެވެ. ރުޅިއައިސް ރަތްވެއްޖެއެވެ. އަދި ކައިރިއަށް އައިސް ބުންޏެވެ. އަހަރެން ކޮންމެތާކުން އަޔަސް އެއީ ނަދާޔާ ބެހޭކަމެއްނޫނެވެ. އަހަންނަކީ ނާދާގާއިގާ ބޭސް އުނގުޅަން ހުރިމީހެއްނޫނެވެ. އަހަންނަށް ރޮވިއްޖެއެވެ. އަހަންނަށް ރޮވުމުން އަދި ވަކިން ބޮޑަށް ރުޅިއަތުވެއްޖެއެވެ. ރުޅިކޮންޓޮރޯލް ނުވެގެން ޖިނާއަހަންނަށް އަނިޔާކުރަންފެށިއެވެ. އެނދުމަތިން އަހަރެން ދަމާ ވައްޓާލިއެވެ. އަދި އަހަރެން ކޮށްޕާލުމުން ގޮސް ބޯޖެހުނީ އަލަމާރީގެ ދާރުގައެވެ. އަހަންނަށް ބާރަށް ހަޅޭއްލަވައިގަނެވުމެވެ. އަދި ކުއްލިއަކަށް އަހަންނަށް ކޮޓަރީގެ ދޮރާދިމާލަށް ބަލާލެވުނެވެ. ދޮރުން ބޯދިއްކޮށްގެން ބަލަން ހުރީ އަހަރެންގެ 15 އަހަރުގެ ފިރިހެން ދަރިފުޅު އަމާން އެވެ. އޭނާގެ ލޮލުން ކަރުނަ އާދެއެވެ. ޖިނާ އަހަންނަށް އަނިޔާ ކުރާތަން ބަލަން އޭނަހުއްޓެވެ. ގޮތްހުސްވެފައެވެ. މީ އަމާންއަށް މިމަންޒަރު ފެންނަ ފުރަތަމަ ފަހަރެއްނޫނެވެ. އަމާން ބޮޑުވަނުންއައީ މިމަންޒަރުގެ ތެރެއިންނެވެ. ޖިނާ އަހަންނަށް ހުތުރުބަހުން މުޢާމަލާތްކޮށް އަނިޔާކުރާ މަންޒަރު އަމާންއަށް ފެނެއެވެ. އެކަމާ ހިތްދަތިވެގެން އެތައްފަހަރަކު އަހަރެންގާތު އެވާހަކަ ދައްކައެވެ. ކާފަމެންކައިރިއަށް ރަށަށް ބަދަލުވާން ހިޔާލުދެއެވެ. އަހަރެންގެ ބޯގޮސް އަލަމާރި ދާރަގައި ޖެހި ބޯފަޅައިގެން ދިޔައެވެ. ނަމަވެސް ޖިނާ އަހަންނާ ދޭތެރޭ އެއްވެސް ހަމްދަރުދީ އެއް ނުވިއެވެ. ނުކުމެގެން ދިޔައީ ބޭރަށެވެ. އަމާން އަހަންނަށް އެހީތެރިވިއެވެ. އަދި އަހަރެންގެ ބޮލުގައި އައިސް އަޅައިދީ ހެދިއެވެ. އަމާންގެ އެހީގައި އަހަރެން ގެންގޮސް އެނދުގައި ބާއްވާ ރަޖާގަނޑު އަޅައިދިނެވެ.އަދި އަރާމުކޮށްލުމަށްވެސް ބުންޏެވެ. ޖެހިގެން އައިދުވަހު އަމާން ސްކޫލަކަށް ނުދެއެވެ. އަހަރެން އަމާން އަށް ވަރަށް ވިސްނައިދިނީމެވެ. ރަނގަޅަށް ކިޔަވާ ހަރުދަނާ މީހަކަށް ވުމަށެވެ. ނަމަވެސް ކިޔެވުމުގެ ޝަޢުގު އަމާންގެ ނެތްވާހަކަ ބުނަމުން ދިޔައެވެ. އަހަރެން އެކަމާ ވަރަށް ދެރަވިއެވެ. މިހާރު ގިނައީ އަމާން ސްކޫލަށް ނުދާ ދުވަސް ތަކެވެ. ގިނައިން އިންނަނީ ކޮޓަރިތެރޭ އެކަނިއެވެ. އަމާންއާ ގޭގެ އެހެން މީހުން ވާހަކަ ދައްކައެއް ނޫޅެއެވެ. އެއީ އަހަރެންދެކެ އަންނަރުޅީގައެވެ. ވަރަށް ސުވާލުކޮށްގެން އަމާން އަހަންނަށް ކިޔައިދިނެވެ.
މަންމާ. އަހަރެންގެ ހިތަށް ވަރަށް އަސަރުކުރޭ މަންނަ ރޯއިރު. އަދިއަހަރެން ވަރަށް ދެރަވޭ ބައްޕަ މަންނަ އަށް އަނިޔާކޮށް ފުރައްސާރަކުރާއިރު. އޭގެ އިތުރުން ސްކޫލްގައިވެސް އަހަންނަށް އަންނަނީ ގަނާކޮށް ފުރައްސާރަކުރަމުން. މިވާހަކަތައް މަންމަ ނޫނީ ދައްކާނެ އިތުރު ފަރާތެއްނެއް. ބައްޕަ އަހަންނާ އެހާ ގާތެއްނޫން. އަހަރެން މި ބޮޑުވަމުން އަންނަނީ ހަމައެކަނި މަންނަގެ ލޯބިލިބިގެން. ބައްޕައެއް ކައިރީގައި ހުއްޓަސް އެއީ ހަމަ ނެއްފަދަމީހެއް. އެހެން ކުދިން ސްކޫލަށް ބަލާ އެކުދިންގެ ބައްޕަ ދާއިރު އަމާންގެ ބައްޕަ ދުވަހަކުވެސް އަމާން ބަލާ ސްކޫލަށް ގޮސްފައެއް ނުވޭ. އަމާންއަކަށް ދެނެއް ކެތެއް ނުކުރެވޭނެ. އަމާންގެ ހިތުގެ އުދާސްތައް އަހަންނާ ހިއްސާކުރިއެވެ. އަމާންގައިގާ އަހަންނަށް ބައްދާލެވުނެވެ. އަދި އަމާންގެ ހިތްފުރެންދެން އަހަރެންގެ ކޮނޑުގައި ބޯއަޅައިލައިގެން އޮވެ ރޯލިއެވެ. އަހަރެން އަމާންއަށް ހިތްވަރު ދިނީމެވެ. އަމާންގެ ކުށެއްނެތެވެ.
މިވޭނާ މި ކެކުޅުން ތަކުރާރުވަމުން ދިޔައެވެ. ޖިނާގެ އުޅުމަށް އަދި އަނިޔާކުރުމަކަށް ބަދަލެއް ނާދެއެވެ. ޖިނާގެ މިއަމަލުން ހަމައެކަނި ނިމިގެންދަނީކީ އަހަރެން އެކަންޏެއްނޫނެވެ. އަހަރެންގެ ލޯބިވާ ދަރިފުޅުވެސްމެއެވެ. އަހަރެން ގޭން ނުކުމެގެން ދިއުމަށް އެތައްފަހަރަކު ޖިނާ ބުނަމުން ދިޔައެވެ. ނަމަވެސް ގޮތްހުސްވެ މާޔޫސްވެފައިވާތީ އަދި ނިކުމެގެން ގޮސް ވަންނާނެ ތަނެއް ނެތުމުން އަހަރެންނަށް މަޑުކުރަން މަޖުބޫރުވަނީއެވެ.
އެއްދުވަހެއްގެ ހެނދުނެވެ. އަމާން ސްކޫލަށް ދާން ގޮވަންވެގެން ގޮސް ދޮރުގައި ޓަކިޖެހީމެވެ. ހަބަރެއްނުވިއެވެ. އެތައްފަހަރަކު އަމާންއަށް ގޮވާހެދީމެވެ. ސްކޫލްއަށް ދާގަޑި ފާއިތުވެގެން ގޮސްސިއެވެ. ހިލަމެއް ނުވިއެވެ. ނިދާފަ އޮތް ޖިނާއަށް ގޮވާ އާދޭސްކޮށް އަމާން އަށް ވީގޮތެއް ބަލާދިނުމަށް އެދުނީމެވެ. ނަމަވެސް ޖިނާގެ އެއްވެސް އެހީތެރިކަމެއް ނުލިބުނެވެ. އަހަރެން ޑަބަލްތަޅުދަނޑި ހިފައިގެންގޮސް އަމާންގެ ކޮޓަރީގެ ދޮރު ހުޅުވާލީމެވެ.
ދޮރު މަޑުމަޑުން ހުޅުވިގެން ދިޔައިރު، ބިރުވެރި ކަމުން ފުރިފައިވާ މަންޒަރެއް ހާމަވެގެން ދިޔައެވެ. ފަރުދާތަކުގެ ތެރެއިން އިރުގެ އަލި ފާއްދާލަމުން ގޮސް ނަޒަރު ހުއްޓުނީ ކޮޓަރީގެ އެނދާނިމާލަށެވެ.
އަހަރެންގެ ހަށިގަނޑު ފިނިވެގެން ދިޔައެވެ. ލޯކުރިމަތިން ފެންނަށް ހުރި މަންޒަރުން ބިރުން ތުރުތުއަޅައިގެން ދިޔައެވެ. ބޮލަށް އެނބުރުން އެރިއެވެ. ނަމަވެސް ހިތްވަރުކޮށްލާފައި ކޮޓަރިއަށް ވަނީމެވެ.
ޒުވާންކަމުގެ އުއްމީދުން އުޖާލާވެފައިވާ އަމާންއަށް އެވަނީ އަނދިރިކަމުގެ ވިލާގަނޑެއް ވެރިވެފައެވެ. އަހަންނަށް އަމާންގެ ކޮޓަރިތެރެއަށް ނަޒަރު ހިންގާލެވުނެވެ. ފާރުތަކުގައި ހަރުކޮށްފައިވާ ޕޯސްޓަރުތަކާއި، މޭޒުމަތީގައިވާ ފޮތްތަކާއި، އެތައްހަފްތާއެއްވަންދެން ބޭނުން ނުކޮށް އަތްނުލާ ކަނެއްގައި ހުރި ސްކޭޓްބޯޑަށެވެ. ކޮންމެ އެއްޗަކުން ވެސް އުފާވެރި ވަގުތުތަކުގެ ހަނދާންތައް އާވަމުން ދިޔައެވެ.
އެތެރެއަށް ފިޔަވަޅު އަޅަމުން ދިޔައިރު އަހަންނަށް އިހުސާސް ކުރެވުނީ ނުތަނަވަސް ކަމެވެ. އަމާންގެ ނަމުން ގޮވަން ހިތް ތެޅިގަތް ނަމަވެސް އެ ބަސްތައް ކަރުތެރޭގައި ތާށިވިއެވެ. ކޮންމެ ފިޔަވަޅެއްވެސް އެޅުނީ ވަރަށް ހާލުންނެވެ.
ސްކޫލުގައި ބުލީ ކުރުމުގެ އަނިޔާވެރިކަމާއި ފިރިމީހާގެ ހަރުކަށި އަނިޔާވެރި މާހައުލަށް ކެތްނުކުރެވިގެން އުޅުނު މަންޒަރު އަހަންނަށް ސިފަވެގެން ދިޔައެވެ. އަމާންގެ ވޭން އަހަންނާ ހިއްސާކުރުމަށް ކުރި މަސައްކަތް އިހްސާސްވެގެންދިޔައެވެ.
ފަންކާގައި ދަންޖެހިފައިހުރި އަމާންގެ ފައިގާ ހިފާ އޮޅުލައިގަނެވުނެވެ. ބާރަށް ރޮއިގަނެވުނެވެ. އަހަރެންގެ ހަޔާތުގެ ނިމުން އައިކަހަލައެވެ. ހަމަރަނަގަށްވެސް އަހަރެންގެ ހަޔާތަށް ނިމުން އައީއެވެ. އަހަރެންގެ ދެލޯފަދަ އަމާން އަބަދުގެ އަބަދަށް އަހަންނާ ވަކިވެގެން އެދިޔައީއެވެ. ނަފްސާނީގޮތުން ލިބުނު ގެއްލުންތަކަށް ކެތްނުކުރެވިގެނެވެ.
ޖޯލިފަތީގައި އަހަރެން ކުޅިވަރުބަލަން އޮތްއިރު އަހަރެންގެ ދެލޮލުން ކަރުނަ ފައިބަމުން ދިޔައެވެ. އަނިޔާވެރި ދިރިއުޅުމަކުން އަހަރެން މިވަނީ މިއަދު މިނިވަންވެ އަމިއްލަ ފަސްގަނޑުގާ ދިރިއުޅެން ފަށާފައެވެ. މިއަދު އަހަރެންގެ މައިބަފައިންވެސް ދުނިޔެއަކު ނެތެވެ. މާޒީން އިބްރަތް ހާސިލް ކޮށް ހަޔާތާއެކި ކުރިއަށް ދިއުން ނޫންގޮތެއްއަހަންކަށް ނެތެވެ. އަހަރެންގެ ދެލޯފަދަ އަމާންގެ ހަނދާންތައް އަހަރެންގެ ހިތުން ދުވަހަކުވެސް ފިލައިގެން ނުދާނެއެވެ. މިއީ އަހަރެންގެ މާޒީގެ ހަޔާތެވެ. އަހަރެންގެ އޭރު ދިރިހުރި ހަމައެކަނި ފުރާނަކަމުގައިވާ އަމާންއެވެ. ދުނިޔެއަށް ނޭވާލާ ކޮންމެ ވަގުތެއްގަމެ އެހަނަދާންތައް އަހަރެންގެ ހިތުން ފިލައިގެން ނުދެއެވެ. އެއީ އަހަރެންގެ މާޒީގެ ހަޔާތް ކަމުގައިވީނަމަވެސް އަހަނަނަށް އެއީ އަހަރެންގެ މިހާރެވެ. އަހަރެންގެ ދިރިއުޅުމެވެ. އަހަރެންގެ މުސްތަޤްބަލެވެ.
- ނިމުނީ -