އޯޓިޒަމާއި ގުޅުވާ މުޖުތަމަޢުގެ ތަފާތު ކުލަތަކެއް؛ މިއީ ބައްޔެއް ނޫން ހޭލުންތެރިވާންޖެހޭ!

މިއަދަކީ މިއަހަރު ބައިނަލްއަޤުވާމީ ގޮތުން ފާހަގަކުރާ އޯޓިޒަމަށް ހޭލުންތެރިކުރުވުމުގެ ދުވަހެވެ. މިދުވަސް މިއަހަރު މި ބައްދަލުކުރި ދުވަސްވަރަކީ އޯޓިޒަމާއި ގުޅިގެން އެތައް ވާހަކަތަކެއް ދެކެވެމުންދާ ދުވަސްވަރެއްގައެވެ.

އޯޓިޒަމާއި ގުޅިގެން މުޖުތަމަޢުގައި މީހުންގެ ހޭލުންތެރިކަން ތަފާތުގޮތަކަށް ފެނިގެންދިޔައީ، މީގެ ދުވަސްކޮޅެއްކުރިން ސިޔާސީބައެއް ފަރާތްތަކުން ސިޔާސީވާދަވެރިއަކަށް ނިސްބަތްކޮށް އޯޓިޒަމް ހުންނަ މީހެއްކަމަށް ބުނެ ޕްރޮގްރާމެއްގައި ވާހަކަދެއްކި ހިސާބުންނެވެ. އެއީ މައްސަލައަކަށް ހެދީ އާންމު ރައްޔިތުންނެވެ. އާންމުންގެ ގިނަ ބަޔަކު އެކަން ކުށްވެރިކޮށް އެކަން ހުއްޓުވާ ފިޔަވަޅުއެޅުމަށް ވަނީ ގޮވާލާ އަޑުއުފުލާފައެވެ.

މިކަމުންވެސް ޚާއްސަކޮށް މުޖުތަމަޢުގައި ތިބި ތަކުލީފު އުފުލާ ބަޔަކަށް ކުޑައިމީސް ވާގޮތަށް ނުވަތަ އެމީހުންނަށް ނޭދެވޭގޮތްތަކަށް ވާހަކަދައްކައި ހެދުންވެސް ރައްޔިތުން ބަލައި ނުގަންނަކަން ހާމަވެއެވެ. ހަމައެއާއެކު އެއްވެސް ފިކުރެއްގައި އަނެކާ ދަށްކޮށްލުމަށް މިސާލެއްގެ ގޮތުގައި އޯޓިޒަމް ހުންނަ މީހެކޭ ބުނާބުނުމުން އެކަމުގައި އެފަރާތްތަކުގެ ހޭލުންތެރިކަމާއި ވިސްނުމުގެ ކޮށިކަން ހާމަވާކަން މިކަމާމެދު ޝޫއޫރުފާޅުކުރި އެތައް ބަޔަކު ވަނީ ފާހަގަކޮށްފައެވެ.

އޯޓިޒަމަކީ ބައްޔެއް ނޫނެވެ. އަދި އެއީ ނުކުޅެދުންތެރިކަމެއްވެސް ނޫނެވެ. އޯޓިޒަމަކީ އެހެން މީހުންނާއި ތަފާތުގޮތަކަށް ސިކުނޑި މަސައްކަތްކުރުމެވެ. އުފެދުމުގައި ހުންނަ މިތަފާތަކީ ބައްޔެއް ނޫންކަމުން، މިއީ ބޭސް ދީގެން ނުވަތަ އެއްފަރާތްކޮށް ފަރުވާ ހޯދަންޖެހޭ ފަދަ ކަމެއްވެސް ނޫނެވެ. އެގެ ބަދަލުގައި އެތަފާތުތަކާއެކު އޯޓިޒަމް ހުންނަ މީހުންނާއި ކުދިންނަކީވެސް އަޅުގަނޑުމެން ފަދައިން މުޖުތަމަޢުގައި ޙައްޤުތަކަކާއި ރައްކާތެރިކަން ލިބިގެންވާ ބައެއްގެ ގޮތުގައި ދެކި އެމީހުންގެ ކިބައިގައި ހުންނަ ކުޅަދާނަކަމާއި ޤާބިލު ސިފަތައްވެސް ބަލައިގަތުމަކި މުހިއްމުކަމެކެވެ. އޯޓިޒަމް ހުންނަ ފަރާތްތަކަކީ ތަފާތު ބައެކެވެ. އެމީހުންގެ ޚާއްސަކަމާއި އެމީހުންގެ ކިބައިގައި ހުންނަ ބައެއް ސިފަތަކަކީ އާންމު މީހުންނަށްވުރެވެސް ބައެއް ކަންކަމުގައި ނުހަނު ފާހަގަކޮށްލެވޭ ފަދަ ކަންކަމެެވެ. އަޅުގަނޑުމެންގެ މި ދިވެހި މުޖްތަމަޢުގައިވެސް އެފަދަ ހުނަރުވެރި އެތައް ބަޔަކު އެވަތިއްބެވެ.

އޯޓިޒަމް ހުންނަ ބައެއް ކުދިންނަކީ، އެހެން މީހުންނަށްވުރެ ވިސްނުމާއި ތޫނުފިލިކަން ގަދަ ކުދިންނެވެ. ބައެއް ކުދިންނަށް އެހެން މީހުންނާއި ގުޅިގެން އުޅުމާއި، މުޢާމަލާތުކުރުމަށް ދަތިކަމެއް ކުރިމަތިވާތީ، ބުނަން ބޭނުންވާ ކަންކަން ބުނެ ނުދެވުމުން ރުޅިގަދަވުމަކީވެސް އެކުދިންނަށް ކުރިމަތިވާ ކަމެކެވެ. އެހެންނަމަވެސް ޒަމާނީ ޓެކްނޮލޮޖީއަށް ބަލާއިރު، އޯޓިޒަމް ހުންނަ ކުދިން މިފަދަ އާލާތްތަކަށް އަހުލުވެރި މިންވަރު އެހެން ކުދިންނަށްވުރެ އިތުރުކަންވެސް ފާހަގަކުރެވެއެވެ.

އޯޓިޒަމް ހުންނަ މީހަކަށްވާ ސަބަބު އަދި މިހާތަނަށް ހޯދިފައެއް ނުވެއެވެ. ސިކުނޑިއަށް އަންނަ ތަފާތެއްކަމުން، މިކުދިންގެ ސަމާލުކަމާއި ވިސްނުން އެހެން މީހުންނާއި ތަފާތެވެ. އެހެންނަމަވެސް އެކުއްޖެއްގެ އުޅުން ދަސްކުރެވިއްޖެނަމަ، އެކުއްޖެއްގެ ވަށައިގެންވާ މީހުންނަށްވެސް މިކުދިންނާއެކު އާންމު ދިރިއުޅުމެއް އުޅުމަކީ ކުރެވިދާނެކަމެކެވެ. މިފަދަ އެތައް މިސާލުތަކެއް އަޅުގަނޑުމެންގެ މިކުޑަކުޑަ މުޖުތަމަޢުންވެސް ފެނެއެވެ. އޯޓިޒަމް ހުންނަ ކުދިންގެ ޢާއިލާތަކުން އެކުދިންނަށް ބޭނުންވާ ޚިދުމަތްތައް ހޯދައިދީ އާންމު ދިރިއުޅުމެއް ހޯދައިދޭން ކުރާ މަސައްކަތަކީ ތަޢުރީފު ޙައްގު މަސައްކަތްތަކެކެވެ.

އޯޓިޒަމް ޖެހެނީ ކީއްވެކަން އަދި ހޯދިފައިނުވި ނަމަވެސް ދިރާސާތަކުން ދައްކާގޮތުގައި ޅައުމުރުގައި ކުއްޖެއްގެ ގައިގައި އޯޓިޒަމް ހުންނަކަން ދެނެގަނެވިއްޖެނަމަ، އެކިއެކި ތެރަޕީތަކުގެ އެހީގައި އެކުއްޖާގެ ހާލަތު ރަނގަޅު ކުރެވިދާނެއެވެ.

އޯޓިޒަމަށް ހޭލުންތެރިކުރުވުމުގެ ދުވަސް ފާހަގަކުރަމުންދާއިރު ރާއްޖޭގައިވެސް އޯޓިޒަމާއި ގުޅިގެން ކުރަންޖެހޭ މަސައްކަތް ގިނައެވެ. ބެލެނިވެރިންނާއި، އާންމުގެ ހޭލުންތެރިކަން އިތުރުކުރުމުގެ އިތުރުން އޯޓިޒަމްގެ ދަފްތަރެއް ރާއްޖޭގައި އެކުލަވާލުމަކީ މިކަމުގައި ކުރަންހުރި މުހިއްމު މަސައްކަތްތަކެވެ. ރާއްޖޭގައި ސީދާ ކަނޑައެޅިގެން ތިބީ އޯޓިޒަމް ހުންނަ ނުވަތަ އޭގެ ސަބަބުން އެހީތެރިކަން ބޭނުންވާ ކިތަން މީހުންކަން އެނގޭކަށް ނެތެވެ.

ރާއްޖޭގައި އޯޓިޒަމް ހުންނަ މީހުން ތިބި ޢަދަދު އެނގެންނެތް!

އޯޓިޒަމް އެސޯސިއޭޝަން އޮފް މޯލްޑިވްސްގެ ދަފްތަރުގައި މިވަގުތު އެތަނުން ޚިދުމަތް ހޯދާ 168 ކުދިން ތިބިކަން އެއެސޯސިއޭޝަނުން ފާހަގަކުރައްވައެވެ. އޯޓިޒަމް ދުވަހާއި ގުޅިގެން މުޅި އޭޕްރީލް މަހަށް ބަހާލައިގެން އެކި ހަރަކާތްތައް ހިންގުމަށް ސިއްޙަތާ ބެހޭ ވުޒާރާއާއި ކަމާ ގުޅުންހުރި ފަރާތްތަކުން ދަނީ މަސައްކަތް ކުރަމުންނެވެ.

އޯޓިޒަމާއި ގުޅޭގޮތުން ހޭލުންތެރިކުރުވުމުގެ ދުވަސް 2007ވަނަ އަހަރުން ފެށިގެން އދ. ފާހަގަކުރަމުންދާއިރު މިއަހަރަށް ކަނޑައަޅާފައިވާ ޝިޢާރަކީ، "އެޑްވާންސިންގ ނިއުރޯޑައިވަރސިޓީ އެންޑް ދަ ޔޫއެންސަސްޓެއިނަބަލް ޑިވެލޮޕްމަންޓް ގޯލްސް" މިޝިޢާރެވެ. މިއީ ސިޔާސަތުތައް ކަނޑައެޅުމުގައި އޯޓިޒަމް ހުންނަ ފަރާތްތަކުގެ ބައިވެރިވުން އޮންނާނެހެން ތަރައްޤީގެ މަސައްކަތްތައް ރޭވުމަށް ބާރު އެޅުމަށް އަލިއަޅުވާލާ ޝިޢާރެކެވެ.