ކުޅިވަރު

ސޯސަން ކަޕް: ޗެމްޕިއަން ހެލޯ ބޭބީ ސެމީ ފައިނަލަށް


ރިލެކްސް ކަމަނަ ސޯސަން ފުޓްސަލް ކަޕް 2025 ގެ ސެމީ ފައިނަލުގެ ޖާގައެއް އެންމެ ފަހުގެ ޗެމްޕިއަން ހެލޯ ބޭބީން ހޯދައިފިއެވެ.

އަރިއަތޮޅުގައި ބާއްވާ އެންމެ އަގުބޮޑު ފުޓްސަލް މުބާރާތުގެ ސެމީ ފައިނަލުން ހެލޯ ބޭބީ ޖާގަ ހޯދީ ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށް، އެއް މެޗު އެއްވަރުކޮށްގެންނެވެ.

ގްރޫޕް ސްޓޭޖުގައި ރޭ ފްލޭޝްއާ ވާދަކޮށް 9-1 ގެ ނަތީޖާއަކުން ހެލޯ ބޭބީ މޮޅުވިއިރު، އެ ޓީމުގެ އިސްމާޢީލް މުނީޒް ވަނީ ހަތަރު ލަނޑު ޖަހާފައެވެ. މީގެ އިތުރުން އަހުނަފް ރަޝީދު ދެ ލަނޑު ޖެހިއިރު، ހާޒިމް ފައުޒީ އާއި، ނަޝާހު އަޙްމަދާއި، މުޙައްމަދު ނާއިލް، މިއިން ކޮންމެ ކުޅުންތެރިއަކުވެސް ވަނީ ލަނޑެއް ޖަހާފައެވެ.

މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، ޔަންގް ސްޓާއިން ވަނީ 5-2 ގެ ނަތީޖާއަކުން ސްޓްރީޓް ބްރޯސް ބަލިކޮށްފައެވެ. މި މެޗުގައި ޔަންގް ސްޓާއިން ޖެހި ފަސް ލަނޑުގެ ތެރެއިން ތިން ލަނޑު ޖަހައިދިނީ ޝަނާން ރަޝާދެވެ. އަދި އެ ޓީމުގެ އަނެއް ދެ ލަނޑު ޖަހައިދިނީ އަބްދުﷲ ފިޒާނެވެ. މި ނަތީޖާއާއެކު ޔަންގްސްޓާއިން ވަނީ ގްރޫޕް ސްޓޭޖުގައި މިހާތަނަށް ކުޅުނު ދެ މެޗުވެސް ކާމިޔާބުކޮށްފައެވެ. އަދި ސްޓްރީޓް ބްރޯސްއަށް ވަނީ ކުޅުނު ތިން މެޗުގެ ތެރެއިން ދެ މެޗުން ބަލިވުމާއެކު މުބާރާތުގައި ކުރިއަށްދިޔުމުގެ އަމިއްލަ ބާރު ގެއްލިފައެވެ.

މީގެ އިތުރުން މި މުބާރާތުގައި ރައިޒިން ލެޖެންޑްސްއާ ދެކޮޅަށް ކުޅުނު މެޗު 3-0 ގެ ނަތީޖާއަކުން ކާމިޔާބުކުރީ ކާންޓް ޕްލޭއިންނެވެ. މި މެޗުގައި ކާންޓް ޕްލޭގެ ލަނޑުތައް ޖަހައިދިނީ ހުމޭޒު އާއި، އަލީ މީސާގު އީސާ އަދި މުޙައްމަދު އިޝާމެވެ.

ރޭ ކުޅުނު ފަހު މެޗުގައި ވާދަކުރީ ރިޕްޓައިޑްސް އާއި އަމިގޯސް ސްޕޯޓްސް ކުލަބެވެ. މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެން. މެޗުގައި ރިޕްޓައިޑްސްގެ ލަނޑު ޖަހައިދިނީ އަޙްމަދު ނަވާފް ފައުޒީއެވެ. އަދި އަމިގޯސްއިން ޖެހި ލަނޑަކީ ނަވާފް އަތުން ބައިކޮޅަށް ވަން ލަނޑެކެވެ.

ތޮއްޑޫ ސޯސަން ކުލަބުން އިންތިޒާމުކޮށްގެން ކުރިއަށްގެންދާ މި މުބާރާތުގެ ޗެމްޕިއަން ޓީމަށް ބައިލައްކަ ރުފިޔާގެ ފައިސާގެ އިނާމު ވަނީ ހުށަހަޅާފައެވެ. މިއީ މި މުބާރާތް ބާއްވާ ހަތަރުވަނަ އަހަރެވެ.