ހުޅުމާލޭގައި ޤާއިމްކުރާ ފެން ރައްކާކުރާ ޕްލާންޓުގެ މަސައްކަތް މިމަހު ނިންމާ ޚިދުމަތްދޭން ފެށޭނެ: މަތީން

ފެން ރައްކާކުރުމުގެ ޤާބިލްކަން އިތުރުކުރުމަށް ހުޅުމާލޭގައި ޤާއިމްކުރާ ފެން ޕްލާންޓުގެ މަސައްކަތް މިމަހު ނިންމާ ޚިދުމަތަށް ނެރެވޭނެކަމަށް މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިއުއެސްސީގެ މެނޭޖިން ޑިރެކްޓަރ އަބްދުލް މަތީން މުހައްމަދު ވިދާޅުވެއްޖެވެ.

ފެނުގެ ޚިދުމަތުގެ ކަށަވަރުކަން އިތުރުކުރުމަކީ އެމްޑަބްލިއުއެސްސީގެ އެންމެ މުހިންމު އެއް އަމާޒެވެ. އެގޮތުން، ގްރޭޓަރ މާލެ ސަރަހައްދުގައި ހުންނަ ފެން އުފައްދާ މައި މަރުކަޒުގެ އިތުރުން މާލޭގެ އެހެން ދެ ސަރަހައްދެއްގައި ފެން އުފައްދާ ދެ މަރުކަޒެއް ގާއިމްކޮށް، ފެން އުފެއްދުން ވަނީ ލާމަރުކަޒު ކުރެވިފައެވެ.

އެމްޑަބްލިއުއެސްސީގެ މެނޭޖިން ޑިރެކްޓަރ އަބްދުލް މަތީން މުހައްމަދު ވިދާޅުވީ މާލެ ސަރަހައްދުގައި ފެން އުފެއްދުމުގެ ގާބިލްކަމާއި ފެން ރައްކާކުރުމާއި ފެން ފޯރުކޮށްދިނުމުގެ ޤާބިލްކަން އިތުރުކުރުމަށް ކުރާ މަސައްކަތްތައް ހަލުވި ކުރުމަށް ގިނަ މަސައްކަތްތަކެއް ކުރައްވަމުން އަންނަކަމަށެވެ. އަދި ހުއްޓިފައި ހުރި މަސައްކަތްތަކާއި އަލަށް ފަށާ މުހިންމު މަސައްކަތްތައް ހިމަނައިގެން ގިނަ މަސައްކަތްތަކެއް ކުރަމުން އަންނަކަމަށް މަތީން ވިދާޅުވިއެވެ.

މަތީން ވިދާޅުވީ މާލޭ ސަރަހައްދުގެ ފެން އުފެއްދުމުގެ ނިޒާމު ހަރުދަނާ ކުރުމުގެ ގޮތުން އިތުރު 10،000 ޓަނުގެ ފެން އުފެއްދުމުގެ މަސައްކަތުގެ އަމަލީ މަސައްކަތް މިހާރު ކުރިއަށްދާކަމަށެވެ. އެގޮތުން މިއަހަރުގެ އޮގަސްޓު ނިިިިމުމުގެ ކުރިން މި 10 ހާސް ޓަނު އިތުރު ކުރެވޭނެކަމަށް މަތީން ވިދާޅުވިއެވެ. މީގެއިތުރުން މާލެ ސަރަހައްދަށް ހިޖުރަކުރާ ފަރާތްތައް އިތުރުވެދާނެކަމަށް ބަލައި އިތުރު 1000 ޓަނު އިތުރުކުރުމުގެ މަސައްކަތް 3 މަސް ދުވަހުގެ ތެރޭގައި ނިމޭނެކަމަށް އޭނާ ވިދާޅުވިއެވެ.

އެމްޑަބްލިއުއެސްސީގެ މެނޭޖިން ޑިރެކްޓަރ އަބްދުލް މަތީން ވިދާޅުވީ މާލެ ސަރަހައްދުގައި މިހާރު ފެން ރައްކާކުރެވޭ ނިސްބަތަށް ބަލާއިރު ފެން ރައްކާކުރެވެނީ އެއްދުވަހަށް ވާވަރަށްކަމަށެވެ. އެގޮތުން މިއީ މާލެ ފަދަ އާބާދީ ބޮޑު ސަރަހައްދަކަށް އެކަށީގެން މިންވަރެއް ނޫންކަމަށެވެ. އެހެންކަމުން ހުޅުމާލޭގައި 10000 ޓަނުގެ ފެން ރައްކާކުރެވޭ ނިޒާމު ޤާއިމްކުރުމުގެ މަސައްކަތް ކުރަމުން އަންނަ ކަމަށާއި މިމަސައްކަތް މިމަހުގެ ނިމި ޚިދުމަތަށް ނެރެވޭނެކަމަށް މަތީން ވިދާޅުވިއެވެ.

" ހުޅުމާލޭގައި 10ހާސް ޓަނުގެ ސްޓޯރޭޖެއްގެ މަސައްކަތް މި ދިޔަ އަހަރު ފަހުކޮޅު ފަށާފައި. އެމަސައްކަތް ނިންމާލެވޭނެ އޭޕްރީލް މަހަށް 10 ހާސްޓަނުގެ. ހުޅުމާލޭގައި ފެން ރައްކާކުރެވޭނެ ގާބިލްކަން މިހާރު ހުރި މިންވަރާއި އަޅާބަލާއިރު 90 އިންސައްތަ އިތުރުވެގެން ދާނެ" މަތީން ވިދާޅުވިއެވެ.

މާލެއާއި ހުޅުމާލޭގައި ފެން ރައްކާކުރާ އިތުރު ތާނގީތައް ހެދުމާއި އިތުރު ފެން ޕްލާންޓްތައް ބެހެއްޓުމުގު މަސައްކަތްވެސް އެމްޑަބްލިއުއެސްސީންދަނީ ކުރަމުންނެވެ. އެގޮތުން، މިއަހަރު ނިމޭއިރު ފެން އުފެއްދުމުގެ ކެޕޭސިޓީ %26 އަދި ފެން ރައްކާކުރެވޭ މިންވަރު %28 އަށް އިތުރުކުރެވޭނެކަމަށް އެމްޑަބްލިއުއެސްސީން ވިދާޅުވެއެވެ.