މިހާތަނަށް ރާއްޖެއަށް ދޭ އެންމެ ބޮޑު ކޯޓާއާއެކު އިންޑިއާއިން މިއަހަރަށް ކޯޓާތައް އައުކޮށްފި

އަސާސީ މުދަލުން އިންޑިއާއިން ރާއްޖެއަށް ދީފައިވާ ކޯޓާގެ މިންވަރު ބޮޑުކޮށް، މިއަހަރާއި އަންނަ އަހަރަށް ކޯޓާ ދޭ މުއްދަތު އިތުރު ކޮށްފިއެވެ.

އިންޑިއާ ސަރުކާރުގެ ގެޒެޓުގައި އެޤައުމުގެ ވިޔަފާރިއާއި ބެހޭ ވުޒާރާއިން ޝާޢިއުކޮށްފައިވާ ނޮޓިފިކޭޝަންގައިވާގޮތުން، އިންޑިއާ އާއި ރާއްޖެ ދެމެދު އޮންނަ ގުޅުމުގެ ތެރެއިން ޚާއްސަ ކޯޓާއެއްގެ ދަށުން އަބަދުވެސް އަސާސީ ބާވަތްތަކުގެ މުދާ ރާއްޖެއަށް ބޭރުކުރެއެވެ. އެގޮތުން މިއަހަރާއި އަންނަ އަހަރަށް ކޯޓާގެ މުއްދަތު އިތުރުކޮށްފައިވަނީ އެކި ބާވަތްތަކުން ކޯޓާ ދޭ މިންވަރުވެސް އިތުރުކުރުމަށް ފަހުއެވެ.

ކޯޓާއަށް ގެނައި ބަދަލަށް ބަލާއިރު، ފިޔާ، ބިސް، އަލުވި، ހަކުރު، ހަނޑޫ އަދި ފުށުގެ ކޯޓާ ވަނީ %5 އިތުރުކޮށްފައެވެ. އަދި މުގުން ދެމުން ދިޔަ ކޯޓާ ވަނީ %56 އިތުރުކޮށްފައެވެ. ކެއިން ބުއިމުގެ ބާވަތްތަކުގެ އިތުރުން އިމާރާތް ކުރުމުގެ ސިނާޢަތަށް ބޭނުންވާ ހިލައާއި ހިލަވެލީގެ ކޯޓާވެސް %30 އިތުރުކުރުމަށް އިންޑިޔާއިންވަނީ ނިންމާފައެވެ.

އަސާސީ މުދަލަށް އިންޑިއާއިން ދީފައިވާ ކޯޓާތައް

* ބިސް - 448,913,750
* އަލުވި - 22،589 ޓަން
* ފިޔާ - 37،537 ޓަން
* ހަނޑޫ - 130،429 ޓަން
* ފުށް - 114,621 ޓަން
* ހަކުރު - 67,719 ޓަން
* މުގު - 350 ޓަން
* ހިލަ - 1,300,000 ޓަން
* ހިލަ ވެލި - 1,300,000 ޓަން

މިއީ 1989 ވަނަ ކޯޓާ ދޭން ފެށި ފަހުން އެންމެ ބޮޑު އަދަދަކަށް ކޯޓާ ދެވުނު ފަހަރު ކަމަށް އިންޑިޔާއިންވަނީ ހާމަކޮށްފައެވެ. އަދި މީގެކުރިން އިންޑިއާއިން ހަނޑޫ، ހަކުރު އަދި ފިޔާ ބޭރުކުރުން ހުއްޓާލި ނަމަވެސް ރާއްޖެއަށް ޚާއްސަ ކޯޓާގެ ދަށުން މި ބާވަތްތައް ފޯރުކޮށްދިން ކަމަށާއި، މިހާރުވެސް އެގޮތަށް ކުރިއަށް ދާނެ ކަމަށް އިންޑިޔާ ސަރުކާރުންވަނީ ހާމަކޮށްފައެވެ.

ރާއްޖޭގެ އިންސާނީ ތަރައްޤީއަށް އަބަދުވެސް އިސްކަމެއް ދޭ ކަން ފާހަގަކޮށް އިންޑިޔާއިންވަނީ މިއީ އެޤައުމުގެ "ނެއިބަރހުޑް ފަސްޓް ޕޮލިސީ"ގެ ދަށުން ކުރާ ކަމެއް ކަމަށް ބުނެފައެވެ.