ބާސެލޯނާ އަތުން ބަލިވުމަކީ ނާކާމިޔާބީއަކަށް ނުވާނެ ކަމަށް އެތުލެޓިކޯ މެޑްރިޑުގެ ކޯޗު ޑިއެގޯ ސިމިއޯނީ ބުނެފިއެވެ. އޭނާ މިހެން ބުނެފައިވަނީ ސްޕެނިޝް ކަޕުގެ ސެމީ ފައިނަލުގައި މިރޭ ބާސެލޯނާއާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުންނެވެ.
މި މެޗަށް ނުކުންނައިރު މި ދެ ޓީމު އެންމެ ފަހުން ކުޅުނު މެޗު 4-2 އިން ބާސެލޯނާ ކާމިޔާބުކުރީ އެތުލެޓިކޯ ދެ ލަނޑު ޖަހާފައި އޮއްވައެވެ. އަނެއްކޮޅުން މި މެޗަށް ނުކުންނައިރު އެތުލެޓިކޯ ވަނީ ޗެމްޕިއަންސް ލީގުން ވެސް ކަޓާފަ އެވެ. އަދި ސްޕެނިޝް ލީގުގެ ޗެމްޕިއަކަން ހޯދުނުގެ ރޭހުގައި ވެސް އެ ޓީމު ވަނީ ބާސެލޯނާ އާއި ރެއާލް މެޑްރިޑަށްވުރެ ފަހަތަށް ވެއްޓިފަ އެވެ. މިހެންވެ ކޮޕާ ޑެލްރޭ އަކީ މި ސީޒަނުގައި އެތްލެޓިކޯ އަށް ތައްޓެއް ހޯދެން އޮތް އެންމެ ސާފު ފުރުސަތެވެ.
"ފެއިލް ވުމަކީ ނުވަތަ ބަލިވުމަކީ މަސައްކަތް ކުރަން ނުޖެހޭ ސަބަބެއްނޫން. އަބަދުވެސް މަސައްކަތް ކުރަންވާނީ މޮޅުވާން. އަހަރެންނަށް މިއީ ވަރަށް ރަނގަޅު ސީޒަނެއް. އަހަރުމެން މި ތިބީ ކޮޕާ ޑެލްރޭގެ ސެމީ ފައިނަލުގައި،" ސިމިއޯނޭ ބުންޏެވެ.
މި ދެ ޓީމު މި މުބާރާތުގެ ސެމީ ފައިނަލްގައި ކުޅުނު ފުރަތަމަ މެޗު ނިމުނީ 4-4އިން އެއްވަރުވެގެންނެވެ.
މި މެޗު ފަށާނީ މިރޭ މާލޭ ގަޑިން 12:30 ގައެވެ. މި މުބާރާތުގެ ފައިނަލުން ޖާގަ ހޯދާފައިވަނީ ރެއާލް ސޮސިއެޑާޑް ބަލިކޮށް ރެއާލް މެޑްރިޑުންނެވެ.