ލިވަޕޫލް އެއްބަސްވުމަކީ ފަތުރުވެރިކަމާއި އިގުތިސާދަށް ކުރެވޭ މުހިންމު އިންވެސްޓްމަންޓެއް: ރައީސް

ރާއްޖޭގެ ފަތުރުވެރިކަން އިޝްތިހާރުކުރުމަށް ލިވަޕޫލް ފުޓްބޯޅަ ކުލަބާއެކު ވެފައިވާ އެއްބަސްވުމަކީ ރާއްޖޭގެ ފަތުރުވެރިކަމާއި އިގުތިސާދަށް ކުރެވޭ މުހިންމު އިންވެސްޓްމަންޓެއް ކަމަށް ރައީސުލުޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ "ރައްޔިތުންނާއިއެކު" ޕޮޑްކާސްޓްގެ ދެވަނަ އެފިސޯޑުގައި ދެއްކެވި ވާހަކަފުޅުގައެވެ.

ރައީސް ވިދާޅުވީ އިނގިރޭސިވިލާތަކީ ރާއްޖެއަށް ވަރަށް ގިނަ ފަތުރުވެރިން އަންނަ ޤައުމަކަށްވުމާއެކު ލިވަޕޫލްގެ ޓޫރިޒަމް ޑެސްޓިނޭޝަނަކަށް ރާއްޖެ ހެދުމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އާއެކު ވީ އެއްބަސްވުމުގެ ސަބަބުން މުޅި ޔޫރަޕަށްވެސް، އަދި ދުނިޔެއަށްވެސް މީގެ އެކްސްޕޯޝަރ ލިބޭ ކަމަށެވެ.

އެހެންކަމުން މި ޕްރޮމޯޝަން އިޝްތިހާރު ދައްކަން ފަށައި، މެޗަށް ރައީސްއަށް ދައުވަތު ދެއްވީ ލިވަޕޫލުން ކަމަށާއި ރައީސް އެ ދައުވަތު ގަބޫލުފުޅު ކުރެއްވީ، ރާއްޖެއަށް މީގެ އެންމެ ބޮޑު އެކްސްޕޯޝާއެއް ލިބޭނެގޮތަށް މިކަން ކޮށްދެއްވުމަށް ކަމަށެވެ.

"އެއީ، ރާއްޖޭގެ ޓޫރިޒަމާއި އަދި އިޤްތިޞާދަށް ކުރެވޭ މުހިންމު އިންވެސްޓްމަންޓެއް ޙަޤީޤަތުގައި މިއީ. މިކަން ކުރިއަށް ގެންދިޔުމަކީ މިއީ، މި ޕާޓްނަރޝިޕްގެ ތެރެއިން ރާއްޖެއަށް މިކަން ފަހިކޮށްދިނުން. އެހެންވީމާ، އަޅުގަނޑު ދާން އެ ދަޢުވަތު ގަބޫލުކުރީ." ރައީސް ވިދާޅުވިއެވެ.

ރޭ ލިވަޕޫލްގެ އެންފީލްޑްގައި ލިވަރޕޫލާއި އެވަޓަން ބައްދަލުކުރި މެޗުގައި އެ ދަނޑުގައި ހުންނަ ލެޑް ޕެނަލްތަކުން ވަނީ ރާއްޖޭގެ އިޝްތިހާރު ދައްކަން ފަށާފައެވެ. އަދި އޭގެއިތުރަށް، ލިވަޕޫލުގެ ހުރިހާ ސޯޝަލް މީޑިއާ ޕްލެޓްފޯމްތަކާއި، ހުރިހާ މާރޗެންޑައިޒެއްގައި ރާއްޖޭގެ އިޝްތިހާރު ވަނީ ދައްކަން ފަށާފައެވެ.

ރައީސް ވިދާޅުވީ މި ދަތުރުފުޅުގެ އަނެއް ބޭނުމަކީ ލިވަރޕޫލްގެ ފުޓްބޯލް އެކަޑަމީއެއް ރާއްޖޭގައި ހެދުމަށް މަގުފަހިކުރުމާއި، އެކަމުގެ މަޝްވަރާތައް ކުރިއަށްގެންދެވުން ކަމަށެވެ. ރާއްޖޭގައި ލިވަޕޫލުގެ އެކަޑަމީއެއް ހެދިއްޖެ ނަމަ ރާއްޖޭގެ ފުޓްބޯޅައަށް ކުރިއެރުން ގެނެސްދެވޭނެ ކަމަށްވެސް ރައީސް ފާހަގަކުރެއްވިއެވެ.

"އެހެންވީމާ، ލިވަރޕޫލްގެ ފުޓްބޯލް އެކަޑަމީއެއް ރާއްޖޭގައި ހެދިއްޖިއްޔާ އެއީ، ވަރަށްބޮޑު ކަމަކަށްވާނެ ދޮގެއްތޯ. ރާއްޖޭގެ ފުޓްބޯޅަ ކުރިއެރުވުމަށް، ކުޑަކުދިންނަށް ޚާއްޞަކޮށް، ޒުވާން ކުދިންނަށް ދެވޭ ފުރުޞަތަކަށްވާނެ. ދެން ޖުމްލަކޮށް، ރާއްޖޭގެ ފުޓްބޯޅައަށް ކުރިއެރުން ގެނެސްދިނުމަށް." ރައީސް ވިދާޅުވިއެވެ.

މިދަތުރުފުޅުގައި ބްރެޑްފަރޑަށްވެސް ވަޑައިގަންނާވެ ކަމަށާއި، ބްރެޑްފަރޑް ޔުނިވަރސިޓީގެ އިސްނެންގެވުމުގެ ދަށުން ބްރެޑްފަރޑްގައިވެސް ފުޓްބޯޅައިގެ މުހިންމު މަޝްރޫޢެއް ހިނގާކަން ރައީސް ފާހަގަ ކުރެއްވިއެވެ.

ރައީސްގެ މި ދަތުރުފުޅަކީ މައިގަނޑު ގޮތެއްގައި ރާއްޖޭގެ ޓޫރިޒަމް ޕްރޮމޯޓް ކުރުމާއި، ރާއްޖޭގެ ފުޓްބޯޅައަށް ކުރިއެރުން ހޯދިދާނެ ގޮތްތަކާއި ގުޅޭ މަޝްވަރާތައް ކުރެއްވުމެވެ. ލިވަޕޫލްގެ ޓޫރިޒަމް ޑެސްޓިނޭޝަން ޕާޓްނަރެއްގެ ގޮތުގައި ރާއްޖެ ޕްރޮމޯޓްކުރުމުގެ ކެމްޕޭން ބުދަދުވަހުގެ ރޭ އެންފީލްޑް ގައި ރައީސުލްޖުމްހޫރިއްޔާ ވަނީ އިފްތިތާހުކޮށްދެއްވާފައެވެ.

މި ކެމްޕޭން ފެށުމުގެ ރަސްމިއްޔާތުގައި ރައީސް ޑރ. މުހައްމަދު މުއިއްޒުގެ އިތުރުން ޓުއަރިޒަމް މިނިސްޓަރ ތޯރިގް އިބްރާހިމް އާއި ކުޅިވަރު ވަޒީރު އަބްދުﷲ ރާފިއު އަދި އެމް.އެމް.ޕީ.އާރް.ސީގެ މެނޭޖިން ޑިރެކްޓަރ އިބްރާހިމް ޝިޢުރީވެސް ބައިވެރިވެވަޑައިގެންނެވިއެވެ.