ފުޓްބޯޅައިގެ ސަބަބުން އެއްބައިވަންތަކަމާއި ސުލްހަ މަސަލަސްކަން ގާއިމުކޮށްދޭ ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ. ސާބިއާގެ ބެލްގްރޭޑްގައި ބުރާސްފަތި ދުވަހު ބޭއްވި 49 ވަނަ ޔުއެފާ ކޮންގްރެސްގައި ވާހަކަދައްކަވަމުން އިންފަންޓީނޯ ވިދާޅުވެފައިވަނީ ޔޫކްރެއިންއާ ދެކޮޅަށް ކުރަމުންދާ ހަނގުރާމަ ހުއްޓާލުމަށްފަހު، ރަޝިޔާއިން ފުޓްބޯޅަ ދަނޑަށް އެނބުރި އަންނަތަން ފެނުމަކީ އަވަސް މުސްތަގުބަލެއްގައި އޭނާ ދެކެން ބޭނުންވާ ދުވަހެއް ކަމަށެވެ.
އިންފަންޓީނޯ ވިދާޅުވީ އަބަދުވެސް މަސައްކަތްކުރަންވީ އެންމެން އެއްބައިވަންތަކަމާއެކު ވާހަކަދެކެވި، އެކަކު އަނެކަކަށް އަޅާލުމާއި، އޯގާތެރިކަންދޭ ބަޔަކަށްވުމަށް ކަމަށެވެ. އެގޮތުން ފުޓްބޯޅައަކީ އެކަމަށް ބާރު އަޅާދޭ ކުޅިވަރެއް ކަމަށް އިންފަންޓީނޯ ސިފަކުރެއްވިއެވެ. ރަޝިޔާ އާއި ޔޫކްރެއިނާ ދެމެދު ހިނގަމުންދާ ހަމަނުޖެހެންތައް ހުއްޓާލުމުގެ މަޝްވަރާތައް ކުރިއަށްދާއިރު، މިކަން ވީހާވެސް އަވަހަކަށް ހައްލުވެ، ސުލްހަ މަސަލަސްކަން ގާއިމުވެގެންދިއުމަކީ އެންމެ ބޮޑަށް އެދޭ އެދުން ކަމަށް އޭނާ ވިދާޅުވިއެވެ. މީގެ އިތުރުން އަލުން ފުޓްބޯޅަ ދަނޑަށް ރަޝިޔާއިން ނުކުމެ ވާދަކުރާތަން ދެކެން ބޭނުންކަމަށާއި، ހަމަނުޖެހުންތަކަށް ނިމުމެއް އައިސްފިކަން އެ ދުވަހަކުން ކަށަވަރުވެގެންދާނެ ކަމަށްވެސް އިންފަންޓީނޯގެ ވާހަކައިގައި ފާހަގަކުރެއްވިއެވެ.
"މިކަމަށް (ހަނގުރާމަ ހުއްޓުމަކަށް ގެނައުމަށް) އެންމެންގެ ހިތްވަރާއި ދުއާ ބޭނުންވޭ. ފުޓުބޯޅައިގެ ރޫހަކީ އެއްބައިވަންތަކަން. ބައިބައިވުމެއް ނޫން. ފުޓުބޯޅައިގެ ސަބަބުން މިންތީގެ ހަމަހަމަކަމާ އެއްބައިވަންތަކަން އެބަ ކަށަވަރުކޮށްދޭ. ފުޓުބޯޅައިގެ ސަބަބުން ދުނިޔޭގެ އެތައް މިތަނުން މީހުން އެއްބައިވަންތަވުމަށް ބާރަކަށްވެގެންދޭ" އިންފަންޓީނޯ ވިދާޅުވިއެވެ.
2022 ވަނަ އަހަރު ރަޝިޔާއިން ޔޫކްރެއިންއާ ދެކޮޅަށް ފެށި ހަނގުރާމައާއެކު ޔުއެފާއިން ވަނީ ރަޝިޔާއަށް ޔޫރަޕުގެ އެއްވެސް މުބާރާތެއްގައި ވާދަކުރުމުގެ ފުރުސަތު ނުލިބޭ ގޮތަށް އެ ގައުމުގެ ގައުމީ ޓީމާއި ކުލަބުތައް ސަސްޕެންޑްކޮށްފައެވެ.
ސަސްޕެންޑް ކޮށްފައިވާ ރަޝިޔާގެ ފުޓްބޯޅަ ފެޑަރޭޝަނަށް އަލުން އަނބުރާ ޔޫރަޕުގެ ފުޓްބޯޅައަށް އާދެވޭނީ މިހާރު ކުރިއަށްދާ ހަނގުރާމަ ހުއްޓާލުމުން ކަމުގައި ޔުއެފާގެ ރައީސް އެލެކްޒެންޑަރ ކެފަރިން ވަނީ ޔުއެފާގެ ކޮންގްރެސްގައި ވިދާޅުވެފައެވެ. ކެފަރިން ވިދާޅުވީ ރަޝިޔާގެ ސަސްޕެންޝަން އުވާލުމާއިމެދު އިތުރު އެއްވެސް ގޮތަކަށް ވިސްނާނީ ހަނގުރާމަ ނިމުމުން ކަމަށެވެ.
ހަނގުރާމައިގެ ސަބަބުން ފީފާއިން، ރަޝިޔާ ފުޓްބޯޅައިން ސަސްޕެންޑްކުރުމާ ހަމައަށް ރަޝިޔާއިން ވަނީ މިހާތަނަށް ހަތަރު ފަހަރެއްގެ މަތިން ފީފާ ވޯލްޑް ކަޕުގައި ވާދަކޮށްފައެވެ. މިހާތަނަށް އަދި ތަށްޓެއް އުފުލާލުމުގެ ޝަރަފު ރަޝިޔާއަށް ލިބިފައިނެތަސް، 2018 ވަނަ އަހަރު އެ ގައުމުގައި ބޭއްވި ވޯލްޑް ކަޕުގެ ކުއާޓާއާ ހަމައަށް ރަޝިޔާ ވަނީ ދަތުރުކޮށްފައެވެ. އެ އަހަރު ރަޝިޔާގެ މައްޗަށް ކްރޮއޭޝިއާއިން ކުރި ހޯދީ ޕެނަލްޓީގައި 4-3 ގެ ނަތީޖާއަކުންނެވެ. މީގެ އިތުރުން 2014 ވަނަ އަހަރުގެ ވިންޓަރ އޮލިމްޕިކްސްވެސް ބާއްވާފައިވަނީ ރަޝިޔާގައެވެ.