އަންހެން މީހާ ވެއްޓުނު ހާދިސާއާ ގުޅިގެން އިދާރާތައް އަމަލުކުރަމުންދާގޮތް އެޗްއާރުސީއެމުން ތަޙުޤީޤުކުރަން ފަށައިފި

މާލޭގެ ގެއެއްގެ ފުރާޅު މައްޗަށް 21 އަހަރުގެ އަންހެނަކު ވެއްޓުނު ހާދިސާއާ ގުޅިގެން އިދާރާތަކުން އަމަލުކުރަމުންދާ ގޮތް ތަޙުޤީޤުކުރަމުންދާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމުން ވިދާޅުވެއްޖެއެވެ.

އެ ކޮމިޝަނުން ވިދާޅުވީ އެ މައްސަލަ ތަޙުޤީޤުކުރުމުގައި، މި ހާދިސާ ތަޙުޤީޤުކުރުމުގައި ފުލުހުންގެ އިހުމާލުތަކެއްވާ ކަމަށް ބުނެ އަދި މި މައްސަލައިގައި ޝާމިލްވާ ފަރާތްތަކަކީ ދައުލަތުގެ އިސް ފަރާތްތަކާ ގުޅުންހުރި ފަރާތްތަކެއް ކަމަށް ތުހުމަތުކޮށް މައްސަލައިގެ ތަޙުޤީޤަށް ނުފޫޒު ފޯރުވަމުންދާކަމަށް ބުނެ ބޮޑެތި ތުހުމަތުތަކެއް އާންމުން ސޯޝަލް މީޑިއާގައި ހިއްސާކޮށްފައިވާތީ އެކަންކަމަށް ރިއާޔަތް ކުރާނެ ކަމަށެވެ.

އެޗްއާރުސީއެމްގެ ސަމާލުކަށް އެހާދިސާ އައުމާއެކު އަނިޔާވެފައިވާ އަންހެން މީހާގެ އާއިލާގެ ބަހެއް ހޯދުމަށް ތަކުރާރުކޮށް މަސައްކަތްކޮށްފައިވާނެ ކަމަށާއި އާއިލާގެ ފަރާތުން މައުލޫމާތު ލިބިފައި ވަނީ މިއަދުގެ ވަގުތެއްގައި ކަމަށް އެ ކޮމިޝަނުން ވިދާޅުވިއެވެ. އަދި އާއިލާގެ ފަރާތުން ފުލުހުންނާއި އެހެނިހެން އިދާރާތަކުގެ މަސައްކަތްތަކާމެދުވެސް ކަންބޮޑުވުން ހިއްސާކޮށްފައިވާކަމަށް އެޗްއާރުސީއެމުން ވިދާޅުވިއެވެ.

ޖިނާއީ ތަހުޤީގެއްގެ ފުރަތަމަ މަރުހަލާގައި އަދި ވަށައިގެންވާ ހުރިހާ ހެކިތައް ދެނެގަނެ، އެ ހެކިތައް ހޯދުމަށް މަސައްކަތް ކުރަމުންދާ މަރުހަލާގައި ލިބިފައިވާ ވަކި ހެކިތަކެއް އެކަނި އާންމުކުރުމަކީ ތަޙްޤީގަށް އަސަރުކުރުމުގެ ފުރުސަތު އޮންނާނެ ކަމެއް ކަމަށް އެޗްއާރުސީއެމުން ފާހަގަކުރައްވައެވެ. އެގޮތުން، މިދިޔަ ހޯމަ ދުވަހާއި މިއަދު ދިވެހި ފުލުހުންގެ ޚިދުމަތުން ބޭއްވި ނޫސްވެރިންގެ ބައްދަލުވުމުގައި، މައްސަލައިގައި އަނިޔާވި ފަރާތް އެންމެ ފަހުން ފެނިފައިވާ އިމާރާތާއި އިމާރާތުގެ ބޭރު ފެންނަ ސީ.ސީ.ޓީ.ވީ ފުޓޭޖް އެކަނި ދައްކާފައިވުމަކީ ކަންބޮޑުވާ ކަމެއް ކަމަށާއި މީގެ ސަބަބުން، އެ ވީޑިއޯގައި ފެނިގެންދިޔަ ފަރާތްތަކުގެ ކަރާމާތަށް އުނިކަން އައިސްފައިވާކަމަށް އެ ކޮމިޝަނުން ވިދާޅުވިއެވެ.

މީގެ އިތުރުން، ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި، ހާދިސާގައި އަނިޔާވި ފަރާތް ފިޔަވައި މައްސަލައާ ގުޅުންހުރި އެހެން ފަރާތްތަކުގެ ނަމާއި މައުލޫމާތު ހާމަނުކޮށް، ހަމައެކަނި މި ހާދިސާގައި އަނިޔާވި ފަރާތުގެ މަޢުލޫމާތު ހާމަކޮށްފައިވުމަކީ، އަނިޔާވި ފަރާތާއި ހާދިސާގައި ހިމެނޭ އެހެން ފަރާތްތައް ތަފާތުކުރުން ކަމުގައި ބެލެވޭ ކަމަށްވެސް އެޗްއާރުސީއެމުން ވިދާޅުވިއެވެ. މީގެ ސަބަބުން އަނިޔާވެފައިވާ މީހާ އިތުރަށް ވިކްޓިމައިޒްވެފައިވާ ކަމަށްވެސް ވިދާޅުވިއެވެ.

އެޗްއާރުސީއެމުން ވިދާޅުވީ ވަށައިގެންވާ ހުރިހާ ހެކިތަކަށް ރިއާޔަތްކޮށް ހާދިސާ ހިނގައިދިޔަ ގޮތްކަމުގައި ވަކި ގޮތެއް ކަނޑައެޅޭނެ މަރުހަލާއަކަށް ފުލުހުންގެ ތަޙުޤީޤު ގޮސްފައި ނުވަނީސް، ހާދިސާ ހިނގައިދިޔަގޮތް ކަމަށް ދޭހަވާނެފަދަ ގޮތަކަށް ފުލުހުން ނޫސްވެރިންނާ މައުލޫމާތު ހިއްސާކުރުމަކީވެސް ކަންބޮޑުވާ ކަމެއް ކަމަށެވެ. އަދި މިއީ ފުލުހުންނާމެދު އާންމުންގެ އިތުބާރު ގެއްލި ތަޙުޤީޤުގެ ނަޒާހާތްތެރިކަމާމެދު ސުވާލު އުފެދޭނެފަދަ ކަމެއް ކަމަށްވެސް ވިދާޅުވިއެވެ.

އެއްވެސް ފަރާތެއްގެ ނުފޫޒުން އެއްކިބާވެތިބެ، ވަށާޖެހޭ، ފުރިހަމަ އަދި ނަޒާހާތްތެރި ތަޙުޤީޤެއް ހިންގުމަށް ދިވެހި ފުލުހުންގެ ޚިދުމަތަށް އެޗްއާރުސީއެމުން ވަނީ ގޮވާލާފައެވެ. އަދި ފުލުހުންގެ ތަޙުޤީޤު ކުރިއަށްދާ ގޮތް އެ ކޮމިޝަނުން މޮނިޓަރ ކުރަމުން ގެންދާނެކަމަށްވެސް ވިދާޅުވިއެވެ.

މި ހާދިސާގައި އަނިޔާވި މީހާއާއި އޭނާގެ އާއިލާގެ ގަދަރާއި ކަރާމާތަށް އިޙްތިރާމްކޮށް، އޭނާގެ ފޮޓޯއާއި ވީޑިއޯ ސޯޝަލް މީޑިއާގައި އެއްވެސް ފަރާތަކުން އާންމު ނުކުރުމަށް އެޗްއާރުސީއެމުން ވަނީ އިލްތިމާސްކުރައްވާފައެވެ.