"މޯލްޑިވްސް 2.0" ސަމިޓު ކާމިޔާބުކަމާއެކު ނިންމާލައިފި

ސަރުކާރުގެ ޑިޖިޓަލައިޒޭޝަން ސިޔާސަތު ތަންފީޒުކުރުމަށް ކުރިއަށްގެންދާ "މޯލްޑިވްސް 2.0" ސަމިޓު ނިންމާލައިފިއެވެ.

މިސަމިޓު ނިންމުމުގެ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒެވެ.

"މޯލްޑިވްސް 2.0" ސަމިޓު ކުރިއަށްގެންދިޔައީ މިމަހުގެ 10 އަކުން 12 އަށް ބާސެލޯ ނަސަންދުރާގައެވެ. ދިވެހިރާއްޖެ 2.0 އަކީ ރައީސުލްޖުމްހޫރިއްޔާގެ ޚާއްޞަ އިސްނެންގެވުމުގެ މަތިން، މުޅި ދައުލަތުގެ ހުރިހާ މުއައްސަސާތައް ގުޅިގެން މަސައްކަތްކޮށް ޑިޖިޓަލް ދާއިރާއިން ރާއްޖެ އިންޤިލާބީ އަދި އިސްލާހީ ބަދަލުތަކަކާ ދިމާލަށް ގެންދިއުމަށް އިފްތިތާޙްކުރި ޕްރޮގްރާމެކެވެ. އަދި މޯލްޑިވްސް 2.0 އަކީ ހަލުވި، ރައްކާތެރި އަދި ދެފުށްފެންނަ ޚިދުމަތް ދިނުމުގެ އަމާޒު ހާސިލުވާގޮތަށް ދިވެހިރާއްޖެ ޑިޖިޓަލް އައު ޒަމާނަކަށް ވާސިލުކޮށްދިނުމަށް ހިންގަންފަށާ މަޝްރޫޢެކެވެ. މި މަޝްރޫޢަކީ ޑިޖިޓަލް ވަސީލަތްތަކުގެ އެހީގައި ރައްޔިތުންނަށް މުޅި ދައުލަތުން ފޯރުކޮށްދޭ ޚިދުމަތްތަކާއި މުއައްސަސާތައް އިދާރީ ގޮތުން ހިންގާ ގޮތަށް އިންޤިލާބީ ބޮޑެތި ބަދަލުތައް ގެނައުމަށް އަމާޒުކޮށް، ކުރިއަށް އޮތް 3 އަހަރުން ނަތީޖާ ނެރެދިނުމަށް ހިންގާ މަޝްރޫޢެކެވެ.

'ދިވެހިރާއްޖެ 2.0 ޑިޖިޓަލް ޓްރާންސްފޮމޭޝަން ސަމިޓް' އަކީ މިރޮނގުން ޚިދުމަތުގެ ނިޒާމު ހަރުދަނާކުރުމަށް ސަރުކާރުގެ ކަމާބެހޭ މުވައްސަސާތަކުގެ މެދުގައި ބޭއްވި ސަމިޓެކެވެ. މި ސަމިޓުގައި، މޯލްޑިވްސް 2.0 ގައި ސިޔާސަތުތަކުގެ ތެރޭގައި ހިމެނޭ، ސައިބަރ ސެކިއުރިޓީ ހަރުދަނާކުރުމާއި، ބައިނަލްއަޤްވާމީ މިންގަނޑުތަކަށް ފެތޭ ޑިޖިޓަލް އައިޑީގެ ޒަރީޢާއިން އިތުބާރާއެކު ބަރޯސާވެވޭ ޑިޖިޓަލް މުޢާމަލާތްތަކަށް މަގުފަހިކުރުމާއި، ދައުލަތުގެ މުއައްސަސާތަކުގެ މެދުގައި ޒާތީ މަޢުލޫމާތާއި ޑޭޓާ، ރައްކާތެރި ކަމާއެކު އެއް މުއައްސަސާއިން އަނެއް މުއައްސަސާއަށް، ވަގުތުން ވަގުތަށް ފޮނުވޭނެ، ޑޭޓާ އެކްސްޗޭންޖް ލޭޔަރެއް ޤާއިމުކުރުމާއި، ދައުލަތުގެ މުއައްސަސާތަކުގެ ހައްސާސް މަޢުލޫމާތުތައް ރައްކާތެރިކަމާއެކު ބަލަހައްޓާ އާރކައިވްކުރުމަށް ސޮވަރިން ކްލައުޑް ޤާއިމުކުރުމާއި، ދައުލަތުން ފޯރުކޮށްދޭ ޚިދުމަތްތައް ޑިޖިޓަލްކޮށް ފޯރުކޮށްދިނުމުގައި ސިޓިޒެން-ސެންޓްރިކްކޮށް، ވީހާވެސް ބޮޑަކަށް އެއް ފުރާޅެއްގެ ދަށުން ފޯރުކޮށްދިނުމަށް މަގުފަހިކުރުމާއި، ޑިޖިޓަލް ރޮގުން މުސްތަޤްބަލަށް ފައްކާވެފައިވާ ޖީލެއް ބިނާކުރުމާއި، އަދި އައި.ސީ.ޓީ ސެކްޓަރގައި ދިވެހިންނާއި ދިވެހި ވިޔަފާރިތަކަށް އޮތް ފުރުސަތުތައް ފުޅާކުރުމާއި ގުޅޭގޮތުން މުހިއްމު ނިންމުންތަކެއް ވަނީ ނިންމާފައެވެ.

ސަމިޓުގައި ކަމާބެހޭ އިދާރާތަކުން ކުރި މަޝްވަރާތަކަށްފަހު އެކަންކަމުގެ މައްޗަށް އެކުލަވާލާފައިވާ ޤައުމީ ޑިޖިޓަލް އިޤުރާރު، ސަމިޓު ނިންމުމުގެ ރަސްމިއްޔާތުގައިވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް އަރުވާފައެވެ.

މިރަސްމިއްޔާތުގައި ވާހަކަދައްކަވަމުން ޓްރޭޑް ނެޓުގެ މެނޭޖިންގ ޑިރެކްޓަރ ސަޢީދާ ޢުމަރުވަނީ މޯލްޑިވްސް 2.0 ސަމިޓަކީ ވަރަށް ކާމިޔާބު ސަމިޓެއްކަން ފާހަގަކުރައްވާފައެވެ. އެގޮތުން ދައުލަތުގެ އެންމެ މަތީ ފަންތީގެ ބޭފުޅުންނާއި ވުޒާރާގެ ބައިވެރިވުމާއި ފަންނީ އަދި ބިނާކުރަނިވި މަޝްވަރާތަކެއް ކުރެވުނުކަން ސަޢީދާވަނީ ފާހަގަކުރައްވާފައެވެ. އަދި މިސަމިޓުގެ ތެރެއިން މޯލްޑިވްސް 2.0ގެ އަމާޒުތަކަށް ވާސިލުވުމަށް ކަމާބެހޭ އިދާރާތަކުގެ މެދުގައި ހުރި ޝައުގުވެރިކަން ވަރަށް ބޮޑަށް ހާމަވެގެންދިޔަކަމަށް ވިދާޅުވިއެވެ.

President Dr @MMuizzu attends the closing ceremony of the Maldives 2.0 Digital Transformation Summit. The summit gathered key stakeholders from government agencies alongside local and international experts to discuss the realisation of the President's @digitalgovmv vision. This… pic.twitter.com/e1yqfbdH1T

— The President's Office (@presidencymv) May 11, 2025

"ޑިޖިޓަލައިޒޭޝަންގެ މަސައްކަތުގައި އަޅުގަނޑުމެން އެންމެން ވަރަށް ބޮޑަށް ގުޅިގެން މަސައްކަތްކުރަންޖެހޭކަން އަޅުގަނޑުމެންނަށް ޤަބޫލުކުރެވޭ. އަދި މިދާއިރާއަކީ ނިސްބަތުން ފަންނާއި ހުނަރު ބިނާކުރަންޖެހޭ ދާއިރާއަކަށްވާތީ މިފަދަ ސަމިޓުތަކަކީ މިކަމުގައި ދުނިޔޭގައި ކުރިއަރާފައިވާ ގިނަ ޤައުމުތަކުގެ ބައިވެރިވުމާއި އެބޭފުޅުންގެ ތަޖުރިބާއާއެކު ބޭއްވޭ ސަމިޓުތަކަކަށް ހެދުމަކީ މިސަމިޓުގެ ބައިވެރިންގެ ވަރަށް ބޮޑު ހުށައެޅުމެއް." ސަޢީދާ ވިދާޅުވިއެވެ.

މިސަމިޓުގައިވަނީ 3 ކީނޯޓް ސްޕީކަރުންގެ ހުށައެޅުން ހުށަހަޅާދީފައިވެއެވެ އަދި 10 ކަރުދާސް ހުށައަޅާ މަޝްވަރާކޮށްފައިވެއެވެ. އަދި ސަމިޓު ހުޅުވުމުގެ ރަސްމިއްޔާތުގައިވަނީ މިކަމާއި ގުޅޭ ޚާއްސަ ޕެނަލް ޑިސްކަޝަންއެއް ކުރިއަށްގެންދަވާފައެވެ. މޯލްޑިވްސް 2.0 އަކީ އަހަރަކު އެއްފަހަރު ބާއްވާ ސަމިޓަކަށް ހެދުމަށް ރައީސުލްޖުމްހޫރިއްޔާވަނީ ނިންމަވާފައެވެ.

މި މަޝްރޫޢުން ތަންފީޒުކުރެވޭ އިސްލާހީ މަސައްކަތްތަކާއެކު ފިޒިކަލް އަދި ޑިޖިޓަލް ކިއުތަކުގެ ބަދަލުގައި މަދު ކްލިކްތަކަކުން ޚިދުމަތް ލިބޭނެގޮތަށް ޚިދުމަތްތައް ފަރުމާކުރެވޭނެއެވެ. އަދި ހިންގުމުގައި އަދި ޚިދުމަތް ހޯދުމުގައި ވަކިވެފައިވާ ރަށްތަކެއްގެ ވިސްނުމާއި ޚިދުމަތް ދިނުމަށް ވަކި ވަކި ނިޒާމުތެއް ގެންގުޅޭކަމުގެ އިހުސާސްގެ ބަދަލުގައި، ގުޅިފައިވާ ވިއުގައަކުން ޚިދުމަތް ލިބޭ ޤައުމެއް ގޮތަށް ރައްޔިތުންގެ އިހްސާސްތަކާއި ތަޖްރިބާ ބަދަލުކުރެވޭނެކަމަށް ސަރުކާރުން ހާމަކުރައްވައެވެ.