މިހާތަނަށް 36 މަސްވެރިއަކަށް މާލީ އެހީތެރިކަންވަނީ ފޯރުވައިދީފައި: ވަޒީރު ޝިޔާމް

މަސްވެރިކަމުގެ ޤައުމީ ދަފުތަރުގައި ރަޖިސްޓްރީވެފައިވާ ފަރާތްތަކަށް އަމާޒުކޮށްގެން ކުރިއަށްގެންދާ ލޯނު ޕްރޮގްރާމުގެ ދަށުން މިހާތަނަށް 36 މަސްވެރިއަކަށް މާލީ އެހީތެރިކަން ފޯރުވައިދީފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ، ރާއްޖޭގައި ސްޕޯޓްސް ފިޝިން ނުވަތަ މުނިފޫހި ފިލުވުމަށް ކުރާ މަސްވެރިކަމުގައި ހަރަކާތްތެރިވާ ފަރާތްތަކަށް އަމާޒުކޮށްގެން ކުރިއަށްގެންދިޔަ މަސައްކަތު ބައްދަލުވުމުގައި ވާހަކަފުޅުދައްކަވަމުންނެވެ.

މަސްވެރިންނަށް ބޭންކިންގ ނިޒާމުގެ ތެރެއިން ލުއިލޯނާއި ކްރެޑިޓް ފެސިލިޓީއަށް އެދުމުގެ ފުރުޞަތު ފަހިކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، މަސްވެރިންނަށް ފަސޭހަކަމާއެކު ފައިނޭންސް ލިބޭނެ މަގު ތަނަވަސްކޮށްދިނުމަށް ބޭންކް އޮފް މޯލްޑިވްސް އާއި މަސްވެރިކަމާއި ބެހޭ ވުޒާރާއާއި ދެމެދު އެއްބަސްވުމެއްގައި ސޮއިކޮށްފައިވަނީ މިދިޔަ އެޕްރީލް މަހުގެ 28ވަނަ ދުވަހުއެވެ. މިއެއްބަސްވުމުގެ ދަށުން މަސްވެރިންނަށް ލޯނު ދޫކުރަން ފަށާފައިވަނީ މެއި މަހުގެ 1ވަނަ ދުވަހުއެވެ.

މިކަމާގުޅޭގޮތުން ވާހަކަފުޅުދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، މަސްވެރިކަމުގެ ޤައުމީ ދަފުތަރުގައި ރަޖިސްޓްރީވެފައިވާ ފަރާތްތަކަށް އަމާޒުކޮށްގެން ކުރިއަށްގެންދާ ލޯނު ޕްރޮގްރާމަށް ގިނަ ފަރާތްތަކުން އެޕްލިކޭޝަން ހުށަހަޅާފައިވާކަމަށެވެ.

"މަސްވެރިކަން ތަރައްޤީކުރުމަށްޓަކައި މަސްވެރިކަމުގައި ހަރަކާތްތެރިވާ ފަރާތްތަކަށް މާލީ އެހިތެރިކަން ފޯރުކޮށްދިނުމަށްޓަކައި މިސަރުކާރުން މިވަނީ 30 މިލިޔަން ރުފިޔާގެ ލޯނު ޕްރޮގްރާމެއްވެސް މީގެ ކުރިން ހުޅުވާލާފައި. އަޅުގަނޑުމެންނަށް ގާތްގަނޑަކަށް 62 ފަރާތެއްގެ އެޕްލިކޭޝަން ލިބުނު. މިހާތަނަށް 36 ފަރާތަކަށް މިވަނީ މި ލޯނު ޕްރޮގްރާމުގެ ތެރެއިން އެހީތެރިކަން ފޯރުކޮށްދީފައި." މަސްވެރިކަމާއި ބެހޭ ވަޒީރު އަޙްމަދު ޝިޔާމް ވިދާޅުވިއެވެ.

ވަޒީރު ވިދާޅުވީ، މިހާރު ކުރިއަށްދާ ލޯނު ޕްރޮގްރާމާއެކު ބޭންކުތަކުން ލޯނު ނުވަތަ ފައިނޭންސިންގ ހޯދުމަށް މަސްވެރިންނަށް މީގެ ކުރިން ދިމާވަމުންދާ އުނދަގޫތަަކަށް ހައްލެއް ލިބިފައިވާކަމަށެވެ. އަދި މިހާރު މަސްވެރިން އެކި ބޭނުންތަކަށް ލޯނު ނަގަމުންދާކަން ވަޒީރު ފާހަގަކުރެއްވިއެވެ.

"މި ފަރާތްތަކުން އެކިއެކި ކަންކަމަށް މި ވަނީ ލޯނު ނަގާފައި. ބައެއް ފަރާތްތަކުން މަސްވެރިކަމުގައި ބޭނުންކުރާ އުޅަނދު ގަތުމަށް، އަދި މަސްވެރިކަމާއި ގުޅުންހުރި އެހެން ކަންކަން ކުރުމަށް މި ލޯނު ޕްރޮގްރާމުގެ ބޭނުން ހިފަމުންދާކަމަށް އަޅުގަނޑުމެންނަށް ފާހަގަވެގެންދިޔަ." މަސްވެރިކަމާއި ބެހޭ ވަޒީރު އަޙްމަދު ޝިޔާމް ވިދާޅުވިއެވެ.

މަސްވެރިންނަށް އެމީހުންގެ އާމްދަނީއަށް ބިނާކޮށް ޕަރސަނަލް ފައިނޭންސިންގް، ކްރެޑިޓް ކާޑު އަދި ގެދޮރު ގަތުމާއި އިމާރާތްކުރުމާއި މަރާމާތު ކުރުން ފަދަ އެކި ބޭނުންތަކަށް ކްރެޑިޓް ފެސިލިޓީއަށް ފަސޭހައިން ވާސިލުވުމުގެ ފުރުސަތު މިހާރު ދަނީ ލިބެމުންނެވެ.

މި އިންތިޒާމުގެ ދަށުން، ޝަރުތު ހަމަވާ މަސްވެރިންނަށް ރަހުނަކާ ނުލައި އަދި އިކުއިޓީ (އަމިއްލައަށް ޚަރަދުކުރަންޖެހޭ ފައިސާ) ނުލައި 300,000 ރުފިޔާއާ ހަމައަށް ޕަރސަނަލް ފައިނޭންސިންގް ނެގެއެވެ. އަދި މަސްވެރިކަމުގެ މޫސުމަށް އަންނަ ބަދަލުތަކާއެކު އާމްދަނީއަށް ރިއާޔަތްކޮށް އަނބުރާ ފައިސާ ދެއްކުމަށް ލުއިފަސޭހަ ގޮތްތަކެއްވެސް ބޭންކުން ވަނީ ހަމަޖައްސާދީފައެވެ.

މި ސަރުކާރުން ދަނީ ރާއްޖޭގެ މަސްވެރިކަމުގެ ސިނާޢަތް ކުރިއަރުވައި ސިންދަފާތުކުރުމަށް ގިނަ މަސައްކަތްތަކެއް ކުރައްވަމުންނެވެ. މަސްވެރިކަމުގެ ސިނާޢަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާޢަތަކަށް މަސްވެރިކަން ހެދުމަކީ ސަރުކާރުގެ އަމާޒެކެވެ.