ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ހުޅުމާލެއިން ދިން ބިމާއި، މާފަންނު ސްޓޭޑިއަމްގައި ގުދަންބަރިއެއް ހަދާފައިވާ ބިމުގައި އެއްވެސް އިތުރު މަސައްކަތެއް ނުކުރުމަށް އަންގައިފިއެވެ.
އެފްއޭއެމްއިން ރޭ ނެރެފައިވާ އިއުލާނެއްގައި ބުނެފައިވަނީ އެ ބިންތަކަށް އެއްވެސް އުނި އިތުރެއް ގެނެސްގެން ނުވާނެ ކަމަށެވެ.
އެ ބިންތަކަށް އިތުރު ބަދަލެއް ނުގެނައުމަށް އަންގާ އެފްއޭއެމްއިން ނެރެފައިވާ އިއުލާނުގައި ބުނެފައިވަނީ މާލޭ 387 ނަމްބަރު ކޮށީގެ ބިމަކީ ފީފާގެ ހަރަދުގައި އޮފީހަކާއިއެކު ސްފޯޓްސް އެރީނާއެއް ތަރައްގީކުރުމަށް ދީފައިވާ ބިމެއްކަމަށެވެ. އެ ބިން ދޫކޮށްފައިވަނީ 1 ފެބުރުވަރީ 2017 ވަނަ އަހަރު 50 އަހަރަށް ކުޅިވަރާ ބެހޭ ވުޒާރާއަށެވެ.
އެފްއޭއެމްއިން އެދިފައިވަނީ މާފަންނު ސްޓޭޑިއަމް އޮފީސް ހުރި ބިން މިހާރު ބޭނުން ކުރާ ފަރާތްތަކުން އެތަން ބޭނުން ކުރުމުގައި އެފްއޭއެމް އާއެކު ނުވަތަ އެހެން ފަރާތަކާއި މެދު އެއްބަސްވުމެއްވެފައިވާނަމަ އެއްބަސްވުމުގެ ކޮޕީއާއި ކަމާއިގުޅޭ ލިޔެކިއުންތައް މިމަހުގެ 24 ވަނަ ދުވަހުގެ 14:30 ގެ ކުރިން އެފްއޭއެމްއަށް އީމެއިލްގެ ޒަރިއްޔާއިން ނުވަތަ ގަލޮޅު ދަނޑުގައި ހުންނަ އެފްއޭއެމްގެ އިދާރާއަށް ހުށަހެޅުމަށެވެ.
މީގެ އިތުރުން އެފްއޭއެމްއިން އެދިފައިވަނީ ހުޅުމާލޭ ފުޓްބޯޅަ ސުކޫލް އެޅުމަށް އެއިދާރާއަށް ދިން ބިމުގައިވެސް އެއްވެސް އިމަރާތެއް ނުކުރުމާށާއި އެއްވެސް ބަދަލެއް ނުގެނައުމަށެވެ. ހުޅުމާލޭގައި ފުޓްބޯޅަ ސުކޫލު އެޅުމަށް އެޗްޑީސީން އެފްއޭއެމްއަށް ބިމެއް ދިނީ 11 ޖުލައި 2018 ގައެވެ.
އެއީ ފުޓްބޯޅަ ޓްރޭނިން ފެސިލިޓީތަކާއި އެހެނިހެން ހިދުމަތްތަކާއެކު ފުޓްބޯޅަ ސުކޫލެއް ތަރައްޤީކުރުމަށް 25 އަހަރަށް އެއްވެސް ކުއްޔެއް ނުނަގާގޮތަށް ދިން ބިމެކެވެ. އެހެންނަމަވެސް އެފްއޭއެމްގެ އޭރުގެ ވެރިންވަނީ އެ ބިން 15 ފަރާތަކަށް ސަބްލީސްކޮށް ކުލި ނަގަން ފަށާފައެވެ.
އަދި 7 ޑިސެމްބަރު 2022 ގައި ވަނީ ބިމުގެ އެއްބައިން އެޗްޑީސީއަށް ކުލި ދައްކަން ޖެހޭ ގޮތަށް އެގްރީމެންޓަށް ބަދަލު ގެނެސްފައެވެ. އެފްއޭއެމުން އެ ބިމަށް ދައްކަން ޖެހޭ ކުއްޔާއި ޖޫރިމަނާ ދައްކާފައިނުވާތީ ބިން ހުސްކުރަން އަންގާ އެބިން އެޗްޑީސީއާއި ހަވާލުކޮށްފައިނުވާތީ އެ ބިން އަނބުރާ ހޯދުމަށް އެދި ވަނީ ސިވިލްކޯޓުގައި ދައުވާވެސް ކޮށްފައެވެ.
އެފްއޭއެމްއިން ރޭ ނެރެފައިވާ އިއުލާނުގައިވަނީ ފުޓްބޯޅަ ސުކޫލުގެ ބިމާއި ގުޅޭ ގޮތުން އެއްވެސް ސައްހަ އެއްބަސްވުމެއް އޮތްނަމަ އެކަން މިމަހުގެ 24 ވަނަ ދުވަހުގެ 14:00ގެ ކުރިން އެފްއޭއެމަށް އެންގުމަށް އެދޭކަމަށެވެ.