ޣައްޒާ އިސްތިޢުމާރު ކުރަން ނިންމައި ޔަހޫދީ ފައުޖުން ދެމުންދާ ޙަމަލާތައް އިތުރަށް ވަރުގަދަކޮށްފި
ފަހުގެ ހަފްތާތަކުގައި ނުދޭވަރުގެ ވަރުގަދަ ޙަމަލާތަކެއް ފާއިތުވި 24 ގަޑިއިރުގެ ތެރޭގައި ޔަހޫދީން ފަލަސްޠީނުގެ ޣައްޒާއަށް ދީފިއެވެ.
ޔަހޫދީން ޣައްޒާއަށް ދެމުންދާ ޙަމަލާތައް ވަރުގަދަކޮށްފައި ވަނީ ޣައްޒާގައި ޔަހޫދީން ހިންގަމުންދާ ޢުދުވާން ވަރަށް އަވަހަށް އިތުރަށް ފުޅާކޮށް ޣައްޒާ އެއްކޮށް އިސްތިއުމާތުކުރާނެ ކަމަށް ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ބުނިތާ މާ ގިނައިރުތަކެއް ނުވެއެވެ. އެ ޙަމަލާތަކަކީ ޔަހޫދީން ޣައްޒާގައި ހިންގާ އަސްކަރީ ޙަރަކާތް އިތުރަށް ފުޅާކުރާނެ ކަމުގެ އިޝާރާތެއް ކަމަށް ގިނަ ބަޔަކު ޤަބޫލުކުރެއެވެ.
ފާއިތުވި 24 ގަޑިއިރުގެ ތެރޭގައި ޔަހޫދީން ޣައްޒާއަށް ދިން ޙަަމަލާތަކުގެ ތެރޭގައި ޣައްޒާގެ އަލް-ޝިފާ ހަސްފަތާލުގެ ގޯތިތެރޭގައި ޤާއިމުކޮށްފައިވާ އަލްޒަޒީރާ ނޫހުގެ ނޫސްވެރިންގެ ފޭލިގެއަކަށް އަމާޒުކޮށް ދީފައިވާ ވައިގެ ޙަމަލާއެއް ހިމެނެއެވެ. އެ ޙަމަލާގައި ދުނިޔެއަށް ޣައްޒާގެ ޚަބަރުތައް ގެނެސްދެމުންދިޔަ ނޫސްވެރިއެއްކަމަށްވާ އަނަސް އަލް ޝަރީފްއާއި އިތުރު ހަތަރު ނޫސްވެރިންނާއި އެހީތެރިއެއް ޔަހޫދީން ޝަހީދުކޮށްލާފައިވެއެވެ. އެ ޙަމަލާއަކީ ޢުދުވާން ފެށި ފަހުން ނުސްވެރިންނަށް އަމާޒުކޮށް ދީފައިވާ ޙަމަލާތަކުގެ ތެރެއިން އެންމެ ގިނަ ޢަދަދެއްގެ ނޫސްވެރިން ޝަހީދުވި ޙަމަލާއެވެ. ޢުދުވާން ފެށިފަހުން ޣައްޒާގައި 238 ނޫސްވެރިން ޝަހީދުކޮށްލާފައިވެއެވެ.
ޔަހޫދީންގެ ފަހުގެ ޙަމަލާތައް ޣައްޒާގެ އިރުމަތީގައި އޮންނަ ތިން އަވަށެއް ކަމަށްވާ ސަބްރާއާއި ޒައިތޫންއާއި ޝަޖާއިޔާއަށް ވެސް އަމާޒުކޮށްފައިވެއެވެ. އެ ޙަމަލާތަކުގައި ޔަހޫދީންގެ ޓޭންކަރުތަކާއި މަތިންދާބޯޓުތައް ބޭނުންކޮށްފައިވެއެވެ. އެއާއެކު އެ ސަރަޙައްދުގައި ހިޔާވަހިކަން ހޯދުަމުންދިޔަ ގިނަ ޢަދަދެއްގެ ޢާއިލާތަކަށް ވަނީ ޣައްޒާގެ ހުޅަނގަށް މިސްރާބު ޖެހުމަށް މަޖުބޫރުވެފައެވެ.
ޣައްޒާގެ ރައްޔިތުން ނަސްލުހޭދުކުރުމަށް 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޔަހޫދީން ދޭން ފެށި ޢުދުވާނީ ޙަމަލާގައި މިހާތަނަށް 61،430އަށްވުރެ މީހުން ޝަހީދުކޮށްލާފައިވެއެވެ. ޔަހޫދީން ޣައްޒާއަށް ކާބޯތަކެއްޗާއި އެހީގެ ސާމާނު ވެއްދުމަށް ދަތިކޮށްފައިވާއިރު، ޣައްޒާގެ ރައްޔިތުން ދަނީ އިންތިހާ ދަރަޖައަށް ބަނޑުހައިހޫނުކަން ތަހައްމަލް ކުރަމުންނެވެ. ބަނޑުހައިހޫނުކަމުގެ ސަބަބުން ޣައްޒާގައި މިހާތަނަށް 200އަށްވުރެ ގިނަ މީހުން ވަނީ ޝަހީދުވެފައެވެ. އޭގެ ތެރޭގައި 100އަށްވުރެ ގިނަ ކުޑަކުދިން ހިމެނެއެވެ.
ޣައްޒާއަށް ދެމުންދާ ޙަމަލާތަކުގައި ފާއިތުވި 24 ގަޑިއިރުގެ ތެރޭގައި ވެސް ޔަހޫދީން ޣައްޒާގެ 34 ރައްޔިތުން ޝަހީދުކޮށްލާފައިވެއެވެ. ޔަހޫދީން ދަނީ ބަނޑަށްޖެހި ގޮތް ހުސްވެފައިވާ ޣައްޒާގެ ރައްޔިތުން އެހީގެ ސާމާނު ބަހާ މަރުކަޒުތަކަށް ދިޔުމުން އެ ސަރަޙައްދުތަކުން ވެސް އެ މީހުންނަށް ޙަމަލާދީ ޝަހީދު ކުރަމުންނެވެ. ޔަހޫދީންނާއި އެމެރިކާއާ ގުޅުންހުރި ޣައްޒާ ހިޔުމެނިޓޭރިއަން ފައުންޑޭޝަން (ޖީއެޗްއެފް) މެދިވެރިކޮށް މިދިޔަ މެެއި މަހުގެ ފަހުކޮޅު ޣައްޒާގައި އެހީ ބަހަން ފެށި ފަހުން، އެހީ ބަހައި މަރުކަޒުތައް ކައިރިން މިހާތަނަށް 1،373 މީހުން ވަނީ ޝަހީދުކޮށްލައިފައެވެ. ފާއިތުވި 24 ގަޑިއިރުގެ ތެރޭގައި ޝަހީދުކޮށްލި މީހުންގެ ތެރޭގައި ވެސް އެހީ ބަހާ މަރުކަޒުތަކުން ތަކެތި ހޯދުމަށް މަސައްކަތް ކުރަމުންދިޔަ 12 މީހުން ހިމެނެއެވެ.