ޔުއެފާގެ ރައީސްގެ އިނާމު ސްވިޑެންގެ ފޯވާޑް ޒްލަޓާން އިބްރަހިމޮވިޗަށް ދީފިއެވެ.
ކޮންމެ އަހަރެއްގެ ޔޫރަޕިއަން ޗެމްޕިއަންސް ލީގުގެ ގރު ނެގުމުގެ ރަސްމިއްޔާތުގެ ކުރިން ދޭ މި އެވޯޑަކީ ކުޅިވަރުގައި އެމީހަކު ހާސިލްކޮށްފައިވާ ކާމިޔާބީ އާއި އެމީހެއްގެ އަހުލާގާއި ޝަހުސިއްޔަތަކަށް ބަލައިފައި ދޭ އެވޯޑެކެވެ. މި އެވޯޑް ދޭން ފެށީ 1988ގަ އެވެ.
ޔޫރަޕުގެ އެންމެ ގަދަ ކުލަބުތަކަށް ކުޅުނު އިބްރަހިމޮވިޗާ ބެހޭ ގޮތުން ޔުއެފާގެ ރައީސް އެލެގެޒެންޑާ ސެފެރިން ވިދާޅުވީ އެއީ އޭނާ ހިނގައިދިޔަ މަގު ހަނދާން ނުނެތޭ މީހެއް ކަމަށެވެ.
"އޭނާ އަކީ ވަރަށް ވަރުގަދަ ވާދަވެރިއެއް. އުފެދުމުގައި ވެސް ކާމިޔާބު މީހެއް. ވަރަށް ވަރުގަދަ ތާރީހެއް އޮތް އައިކަން އެއް. މި ހުރިހާ ކަމަކަށްވުރެ ބޮޑަށް ފާހަގަ ކުރެވެނީ އޭނާގެ އިންސާނިއްޔަތުކަން. އޭނާ އަކީ އޭނާ ހިނގައިދިޔަ މަގު ހަނދާން ނުނެތޭ މީހެއް. މި ފަހަރުގެ އެވޯޑް އޭނާ އަށް ލިބުމުން އަހަރެން ވަރަށް އުފާކުރަން،" ސެފެރިން ވިދާޅުވި އެވެ.
އެވޯޑް ލިބިގަތުމަށްފަހު އިބްރަހިމޮވިޗް ބުނީ މިއީ ފުޓްބޯޅަ ކުޅުންތެރިއެއްގެ ގޮތުގައި އޭނާ އަށް ކޮންމެވެސް ކަމެއް ކޮށްދެވިފައިވާ ކަމުގެ ހެއްކެއް ކަމަށެވެ.
އުމުރުން މިހާތު 43 އަހަރުގެ އިބްރަހިމޮވިޗް ކުޅުން ހުއްޓާލީ 2023 ވަނަ އަހަރު އެވެ. އޭނާ ކުޅުން ހުއްޓާލީ އޭސީ މިލާނުގަ އެވެ. އޭގެ ކުރިން ވަނީ އިޓަލީގެ އިންޓަމިލާނާއި ޔުވެންޓަސް އަށް ވެސް ކުޅެފަ އެވެ. މޮޅު ފޯވަޑެއްގެ ގޮތުގައި ފާހަގަ ކުރެވުނު އިބްރަހިމޮވިޗް ވަނީ ބާސެލޯނާ އާއި އަޔެކްސް އަދި ޕީއެސްޖީ އާއި މެންޗެސްޓާ ޔުނައިޓެޑަށް ވެސް ކުޅެ ކުލަބު ލެވެލްގައި 637 މެޗުން 405 ގޯލު ޖަހައިދީފަ އެވެ. އަދި އޭނާ ވަނީ ސްވިޑްންގެ ގައުމީ ޓީމަށް 23 އަހަރުން 122 މެޗު ކުޅެދީ 62 ގޯލު ޖަހައިފަ އެވެ.