ކުރިއަށް އޮތް ޔުއެފާ ޗެމްޕިއަންސް ލީގުގެ ފުރަތަމަ ބުރުގައި ލިވަޕޫލް އާއި މެންޗެސްޓާ ސިޓީއަށް ވަރުގަދަ މެޗުތަކެއް ކުޅެން ޖެހިއްޖެއެވެ.
ފްރާންސްގެ މޮނާކޯގައި ރޭ ބޭއްވި ގުރުއަތުލުމުގައި މި މުބާރާތުގެ ޗެމްޕިއަންކަން 15 ފަހަރު ހޯދާފައިވާ ރެއާލް މެޑްރިޑް އާއި ދެކޮޅަށް ފުރަތަމަ ބުރުގައި އިނގިރޭސިވިލާތުގެ މެންޗެސްޓަރ ސިޓީ އާއި ލިވަޕޫލް އަށް ވަނީ ކުޅެން ޖެހިފަ އެވެ.
އެންމެ ފަހުގެ ޗެމްޕިއަން ފްރާންސްގެ ޕީއެސްޖީ އަށް ފުރަތަމަ ބުރުގައި ސްޕެއިންގެ ބާސެލޯނާގެ އިތުރުން ޖަރުމަނުގެ ވަރުގަދަ ބާރެއް ކަމުގައިވާ ބަޔާން މިއުނިކްގެ އިތުރުން ޔޫރޮޕާ ލީގުގެ ޗެމްޕިއަންކަން އެންމެ ފަހުން ހޯދާފައިވާ ޓޮޓްނަމް ހޮޓްސްޕަރ އާއި ދެކޮޅަށް ކުޅެން ޖެހޭނެ އެވެ.
ލިވަޕޫލް އިން ރެއާލް މެޑްރިޑްގެ އިތުރުން ކުޅެން ޖެހޭ ވަރުގަދަ ޓީމު ތަކުގެ ތެރޭގައި އިޓަލީގެ އިންޓަރ މިލާނާއި ސްޕެއިންގެ އެތްލެޓިކޯ މެޑްރިޑްގެ އިތުރުން ޖަރުމަނުގެ އެއިންޓްރެކްޓް ފްރެންކްފަރޓް ހިމެނެ އެވެ.
އިނގިރޭސި ވިލާތުގެ ހަ ޓީމެއް މި ފަހަރުގެ ޗެމްޕިއަންސް ލީގުގައި ވާދަކުރާއިރު މިދިޔަ ސީޒަނުގެ ސެމީ ފައިނަލުގައި ކުޅުނު އާސެނަލް އިން އެތްލެޓިކޯ މެޑްރިޑްގެ އިތުރުން ކްލަބް ބްރޫޖް އާއި ދެކޮޅަށް ކުޅޭނެ އެވެ.
އަދި ކޮންފަރެންސް ލީގުގެ ޗެމްޕިއަން ޗެލްސީއިން ސްޕެއިންގެ ބާސެލޯނާގެ އިތުރުން ޖަރުމަނުގެ ބަޔާން މިއުނިކް އާއި ދެކޮޅަށް ކުޅެން ވަނީ ޖެހިފަ އެވެ.
ކުރިއަށް އޮތް ޗެމްޕިއަންސް ލީގުގެ ފައިނަލް މެޗު ކުޅުމަށް ހަމަޖެހިފައިވަނީ ހަންގޭރީގެ ބުޑަޕެސްޓްގަ އެވެ.