ޚިޔާލު ފާޅުކުރަން ފުރުޞަތު ދެއްވުމުގައި ސަރުކާރުގެ ފަރާތުން ފެންނަނީ ލާމަސީލު ނަމޫނާއެއް

2008ވަނަ އަހަރުން ފެށިގެން އަމަލުކުރަން އަންނަ ޤާނޫނު އަސާސީއާއެކު ދިވެހީންނަށް ލިބިގެންދިޔަ އެންމެ ބޮޑު ހައްގަކީ ނޫސްވެރިކަންކުރުމާއި ހިޔާލު ފާޅުކުރުމުގެ މިނިވަންކަމެވެ. ނަމަވެސް ނިމިދިޔަ ވެރިކަންތަކުގައި އެ ހައްގުތަކަށް ހުރަސް އަޅައި، ނޫސްވެރިކަމުގެ މިނިވަންކަމަށް އެކި ކަހަލަ ހުރަސްތައް ވަނީ ކުރިމަތިވެގެން ގޮސްފައެވެ.

އިހުތިޖާޖުތަކަށް ނުކުތް މީހުންނަށް އެކި ވަރުގެ އަނިޔާ ލިބި، އެ މީހުން ފައްސާލުމަށް ކަރުނަ ގޭހާއި ފެން ޖަހައި، މީހުން ހައްޔަރުކުރި މަންޒަރު ރައްޔިތުން ވަނީ ދެކެފައެވެ. ނަމަވެސް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވެރިކަމާއި ހަވާލުވެވަޑައިގަތުމަށްފަހު ތަކުރާރުކޮށް ވިދާޅުވާ އެއް ވާހަކަފުޅަކީ ޚިޔާލު ފާޅުކުރުމުގެ މިނިވަންކަން ފުރިހަމައަށް ދެއްވާނެކަމަށާއި ބިނާކުރަނިވި ފާޑުކިޔުމުގެ ފުރުޞަތު ރައްޔިތުންނަށާއި ޚާއްސަކޮށް، ނޫސްވެރިންނަށް އޮންނާނެކަމުގެ ވާހަކައެވެ. ވެރިކަމަށް 2 އަހަރުވާން ކައިރިވެފައިވާއިރު، އެ ސިޔާސަތު އަދިވެސް އޮތީ އެގޮތަށްކަން އެމަނިކުފާނު ގެންދަވަނީ ބަހާއި އަމަލުން ސާބިތުކޮށްދެއްވަމުންނެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު ނޫސްވެރިން ބާރުވެރިކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. ނަމަވެސް، މީޑިއާތައް ރެގިއުލޭޓްކޮށް، ދާއިރާގެ ކުރިއެރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލަކާ ގުޅިގެން ވަކި ސިޔާސީ މަޤުޞަދެއް ޙާސިލުކުރުމަށް ބައެއް ފަރާތްތަކުން ދަނީ ރައްޔިތުންނަށް އޮޅޭ ގޮތަށް ވާހަކަތައް ދައްކަމުންނެވެ. އެ ބިލުގެ ސަބަބުން ޚިޔާލު ފާޅުކުރުމަށާއި މިނިވަން ނޫސްވެރިކަމެއްކުރުމަށް ހުރަސްއެޅޭނެކަމަށް ބުނެ ބައެއް ފަރާތްތަކުން ދަނީ އަޑުފަތުރަމުންނެވެ.

މި ބިލާ ގުޅޭގޮތުން ބައެއް ނޫސްވެރިންވެސް އިހުތިޖާޖުކޮށް، އަޑު އުފުލަމުންދާއިރު، ސަރުކާރުގެ ފަރާތުން ފެނުނީ އެ ވާހަކަތައް އަޑު އައްސަވައި، ނޫސްވެރިންގެ ޚިޔާލުތަކަށް ރިޢާޔަތްކުރައްވާނެކަމަށް ވިދާޅުވަމުން ގެންދަވާ މަންޒަރެވެ.

ރައީސުލްޖުމްހޫރިއްޔާގެ އޮފީސް ހިމެނޭ ސަރަހައްދަކީ އެއްވެ އުޅުން މަނާކޮށްފައިވާ ސަރަހައްދަކަށްވީނަމަވެސް މީޑިއާގެ ބިލާ ދެކޮޅަށް ނޫސްވެރިންތަކެއް އެއްވެ އިހުތިޖާޖުކުރުމުގެ ފުރުސަތު ވަނީ ދެއްވާފައެވެ.

ސަރުކާރުގެ މިނިސްޓަރ ފޯރ ސްޓްރެޓީޖިކް ކޮމިޔުނިކޭޝަން އިބްރާހިމް ޚަލީލާއި ޒުވާނުން ބާރުވެރިކަމާއި މަޢުލޫމާތާއި ފަންނާބެހޭ ވަޒީރު އިބްރާހިމް ވަޙީދު، އެ ތަނަށް ވަޑައިގަތް، ޚިޔާލު ފާޅުކުރަމުންދިޔަ ނޫސްވެރިންގެ ވާހަކަތައް އަޑުއެއްސެވިއެވެ.

މީޑިއާގެ ބިލާ ގުޅޭގޮތުން ކަންބޮޑުވުން ފާޅުކުރަމުންދިޔަ ނޫސްވެރީންގެ އަޑު އެއްސެވުމަށް ސީދާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޫސްވެރިންނާ ބައްދަލުކުރެއްވިއެވެ. މޯލްޑިވްސް ޖާރނަލިސްޓް އެސޯސިއޭޝަނާ ބައްދަލުކުރައްވައި، އެ ބޭފުޅުންގެ ވާހަކަތައް އަޑުއައްސަވައި، މީޑިއާގެ މިނިވަންކަން ހަނިކުރުމަށް އެއްވެސްކަމެއް ނުކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ. އެއާއެކު މީޑިއާ ބިލަށް ނޫސްވެރީން ބޭނުން ވަރަކަށް ޚިޔާލުތަކާ އިޞްލާޙުތައް ހުށަހެޅުމުގެ ފުރުޞަތު 10 ދުވަހުގެ މުއްދަތަކަށް މިހާރު ވަނީ މަޖިލީހުން ހުޅުވާލާފައެވެ.

މީޑިއާ ބިލާ ގުޅޭގޮތުން ނޫސްވެރީންގެ ހުރި ސުވާލުތަކަށް ފުރުޞަތު ދެއްވުމުގެ ގޮތުން ދައުލަތުގެ ބަންޑާރަނައިބު ނޫސްވެރިންގެ ބައްދަލުވުމެއްވެސް ބޭއްވިއެވެ. ނޫސްވެރިން ބޭނުންވަރަކަށް ސުވާލުކުރުމުގެ ފުރުޞަތުދެއްވިއެވެ. އަދި މި ބިލު ކޮމިޓީ މަރުޙަލާގައި އިސްލާހުވެގެން އަންނާނީ ނޫސްވެރިންގެ ޚިޔާލާއި މަޝްވަރާއާއެކީގައިކަމަށް ބަންޑާރަނައިބު ތަކުރާރުކޮށް ވިދާޅުވިއެވެ. ރައީސް އޮފީހުގައި ބޭއްވި އެ ނޫސްވެރިންގެ ބައްދަލުވުމުގެ ތެރެއިންވެސް ބައެއް ނޫސްވެރިން އިހުތިޖާޖުކުރަން ފެށިއެވެ. އެކަން ނުހުއްޓުވައި، ރައީސް އޮފީހުގެ އެތެރޭގައި ޚިޔާލު ފާޅުކުރުމުގެ ފުރުޞަތުދެއްވިއެވެ. މިއީ ރައީސް މުޢިއްޒުގެ ސަރުކާރުގެ ސިޔާސަތެވެ. ޚިޔާލު ފާޅުކުރުމަށް ދެއްވާ މިނިވަންކަމެވެ.

ހަމަ އެ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އޮފީހުގެ މަސައްކަތްތައް ނިންމަވާލައްވައި، ގެއަށް ވަޑައިގަތް މަގުމަތީގައިވެސް ބައެއް ނޫސްވެރިން ތިބީ ޚިޔާލު ފާޅުކުރާށެވެ. ރައީސް ގެއަށް ވަޑައިގެން މަގުމަތީ ނޫސްވެރިން އެމަނިކުފާނު ފަހަތުން އައިސް، އަޑުގަދަކުރަން ފެށުމުންވެސް، ބާރުގެ ބޭނުންކޮށް އިހުތިޖާޖު ރޫޅާލުމަށް މަސައްކަތްކޮށްފައެއް ނުވެއެވެ.

މިއަދު ފެނިގެންދާ މަންޒަރުތަކަކީ މި ދިވެހިރާއްޖޭގައި ޚިޔާލުފާޅުކުރުމަށް އޮތް ތަނަވަސްކަމެވެ. މި ޙައްޤު އޭގެ އެންމެ ފުރިހަމަ ގޮތުގައި ރައްޔިތުންނަށް ހޯދައިދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭނުންފުޅުވާލެއް ބޮޑުކަމެވެ. ކަންބޮޑުވުންފާޅުކުރަމުންދިޔަ ނޫސްވެރިންނާ ސަރުކާރުގެ އިސްވެރިންނާއި ރައީސުލްޖުމްހޫރިއްޔާވެސް ބައްދަލުކުރެއްވިއެވެ. މިކަންކަމުން ދޭހަވެ، ފެނިގެން މިދަނީ ރާއްޖޭގެ ޑިމޮކްރަސީގެ ޙަޔާތުގައި ތަފާތު މަންޒަރެކެވެ. ޑިމޮކްރަސީގެ ރިވެތި ހަމައެކެވެ. މިއީ ޚިޔާލު ފާޅުކުރަން ފުރުޞަތު ދެއްވުމުގައި ރައީސް މުޢިއްޒު ދައްކަވަމުން ގެންދަވާ ލާމަސީލު ނަމޫނާއެވެ.