މޫސުމީ ބަދަލުތަކުން އަރައިގަތުމަށް ޖީސީއެފްގެ 25 މިލިޔަން ޑޮލަރުގެ އެހީގައި މުހިންމު މަޝްރޫޢެއް
ގްރީން ކްލައިމެޓް ފަންޑުން ރާއްޖެއަށް ދޭން ނިންމި 25 މިލިއަން ޑޮލަރުގެ އެހީގައި އދ. ގެ ތިމާވެށްޓާބެހޭ ޖަމްޢިއްޔާއާ ގުޅިގެން ހިންގާ މަޝްރޫޢު ރަސްމީކޮށް ފަށާފައިވާކަން ތިމާވެއްޓާއި ބެހޭ ވަޒީރު ޠާރިޤް އިބްރާހީމް އިއުލާންކުރައްވައިފިއެވެ.
ވަޒީރު މިކަން ހާމަކުރެއްވީ 6ވަނަ މިނިސްޓާސް އެންޑް އެންވަޔަރަމަންޓް އޮޓޯރިޓީސް އޮފް އޭޝިއާ ފެސިފިކް ފޯރަމްގެ ހަވާސާގެ ތެރެއިން ކުރިއަށްދިޔަ ހަރަކާތެއްގައި ވާހަކަދައްކަވަމުންނެވެ.
ފަތުރުވެރިކަމާއި ތިމާވެއްޓާއި ބެހޭ ވަޒީރު ތާރިގް އިބްރާހިމް ވިދާޅުވީ، މިއީ އެ ވުޒާރާއާއި ޔުނައިޓްޑް ނޭޝަންސް އެންވަޔަރަމަންޓް ޕްރޮގްރާމް ގުޅިގެން ކުރިއަށްގެންދާ ޕްރޮގްރާމެއްކަމަށެވެ. މިއީ ގްރީން ކްލައިމެޓް ފަންޑުން ހަމަޖައްސާފައިވާ 25 މިލިޔަން ޑޮލަރުގެ އެހީގައި ކުރިއަށްގެންދާ މަޝްރޫއެކެވެ.
މި 25 މިލިޔަން ޑޮލަރުގެ ހިލޭ އެހީއާއިއެކު ރާއްޖޭގެ މުޖްތަމައަށް މޫސުމީ ބަދަލުތަކާއި ހިރާސްތަކުގެ މައުލޫމާތު ފޯރުކޮށްދެވިގެންދާނެކަމަށާއި މޫސުމީ ބަދަލުތަކުން ރައްކާތެރިވުމަށް އެލާމް ސިސްޓަމްތައް ރާއްޖޭގެ ރަށްތަކުގައި ގާއިމްކުރުމަށް އެހީތެރިވެދޭނެކަމަށެވެ.
On the sideline of #APENVFORUM Minister @Thoriqibrahim , announced the formal launch of collaboration between the Ministry of Tourism and Environment and the United Nations Environment Programme (UNEP) for the newly approved 25 Million USD Grant project from the Green Climate… pic.twitter.com/o4nRpyjYUg
— Ministry of Tourism and Environment (@MoTmv) August 29, 2025
މިނިސްޓަރގެ ވާހަކަފުޅުގައި ވަނީ ރާއްޖެފަދަ ޖަޒީރާ ގައުމުތަކަށް މޫސުމީ ބަދަލުތަކުގެ ސަބަބުން ބޮޑު އަސަރެއް ކުރާކަން ފާހަގަކުރައްވާފައެވެ. އަދި މޫސުމީ ބަދަލުތައް ކުރިއާލާ ދެނެގަނެ އެކަމަށް ތައްޔާރުވުމުގެ މުހިންމު ކަމުގެ މައްޗަށް އަލިއަޅުވާލެއްވިއެވެ.
6 ވަނަ މިނިސްޓާސް އެންޑް އެންވަޔަރަމަންޓް އޮޓޯރިޓީސް އޮފް އޭޝިއާ ފެސިފިކް ފޯރަމް ކުރިއަށްގޮސްފައިވަނީ މިމަހުގެ 26 އިން 29 ގެ ނިޔަލަށް ފިޖީގައެވެ. މި ފޯރަމްގެ ތެރެއިން ބައިނަލްއަޤްވާމީ ކަމާގުޅުންހުރި ފަރާތްތަކާއި ފަތުރުވެރިކަމާއި ތިމާވެއްޓާއި ބެހޭ ވަޒީރު ވަނީ ބައްދަލުކުރައްވައި މަޝްވަރާކުރައްވާފައެވެ.