ފުލުހުންގެ އުޅަނދަކުން ޖެހި އިންޑޮނޭޝިޔާގައި އާންމުންގެ މީހެއް މަރުވުމާ ގުޅިގެން އެ ޤައުމުގެ އެކި ސަރަޙައްދުތަކުގައި އެތައް ސަތޭކަ ބަޔަކު މުޒާހަރާކޮށްފިއެވެ. މުޒާހަރާގެ ބައިވެރިން ފުލުހުންގެ އިސްލާހަށް ގޮވައިލަމުންދިޔައިރު، މިއީ މީގެ އަހަރެއްހާ ދުވަސް ކުރިން އިންޑޮނޭޝިޔާގެ ރައީސްގެ މަޤާމާ ޙަވާލުވެވަޑައިގެންނެވި ޕްރަބޮވޯ ސުބިއަންތޯގެ ސަރުކާރަށް ކުރިމަތިވެފައިވާ ބޮޑު ގޮންޖެހުމެވެ.
ސައިކަލު ޓެކްސީ ދަތުރުކޮށްދޭ އާންމުންގެ މީހެއްގެ ކަމަށްވާ އުމުރުން 21 އަހަރުގެ ޢައްފާން ކުރުނިއާވަންގެ ގައިގައި ފުލުހުންގެ އުޅަނދަކުން ޖެއްސީ އެ ޤައުމުގެ ޤާނޫނުހަދާ މަޖިލީސް ކައިރީގައި އާންމުން ކުރަމުންދިޔަ މުޒާހަރާއެއް ރޫޅާލަން ފުލުހުން މަސައްކަތްކުރަމުން ދިޔުމުގެ ތެރޭގައެވެ. އޭނާއަކީ މުޒާހަރާތަކާ ގުޅުންހުރި މީހެއް ނޫނެވެ. މުޒާހަރާގެ ބައިވެރިން ދިޔައީ ޤާނޫނުހަދާ މަޖިލީހުގެ މެންބަރުންނަށް ދޭ މުސާރަ ބޮޑުވުމާއި ތައުލީމީ ދާއިރާއަށް ކުރާ ޚަރަދު ކުޑަވުމުގެ ސަބަބުން އެކަމާ ހިތްހަމަނުޖެހުން ފާޅުކުރަމުންނެވެ.
ކުރުނިއާވަން މަރުވުމާ ގުޅިގެން ގިނަ ޢަދަދެއްގެ ޑްރައިވަރުންނާއި ދަރިވަރުންގެ ބައިވެރިވުމާއެކު ކުރަން ފެށި މުޒާހަރާތަކުގެ ސަބަބުން ޖަކާޓާގެ ގިނަ މަދަރުސާތަކުގެ އެ ދުވަހުގެ ދަންފަޅި ވަނީ ކުރުކޮށްލައިފައެވެ. އަދި ބޭންކުތަކާއި ވިޔަފާރިތަކުން ވަނީ މުވައްޒަފުން ގޭގައި ތިބެގެން މަސައްކަތްކުރުމަށް އަންގައިފައެވެ. ބައެއް ސަރަޙައްދުތަކުގައި ސިފައިން ވެސް ޙަރަކާތްތެރިވެފައިވެއެވެ. މުޒާހަރާގެ ބައިވެރިން ޤާނޫނުހަދާ މަޖިލިސްދޮށަށާއި ފުލުހުންގެ އިދާރާ ދޮށަށް އެއްވެ އެ އިމާރާތްތަކަށް ގާ އުކާފައިވެއެވެ. އަދި ފުލުހުންނަކީ މީހުން ޤަތުލްކުރާ ބައެއް ކަމަށް އެ މީހުން ދިޔައީ ބުނަމުންނެވެ. ޖަކާޓާގެ އިތުރުން އެހެން ސިޓީތަކުގައި ވެސް މުޒާހަރާކޮށްފައިވެއެވެ. މުޒާހަރާގެ ބައިވެރިން ވަނީ އެ ޤައުމުގެ ބަންޑަންގުގައި ހުންނަ ޤަނޫނުހަދާ މަޖިލީހުގެ އިމާރާތެއްގައި ހުޅުޖަހައިފައެވެ. އޭގެ އިތުރުން މަކައްސަރު ސިޓީގައި ހުންނަ ފުލުހުންގެ ޕޯސްޓެއްގައި ރޯކޮށްލާފައިވެއެވެ.
ކުރުނިއާވަން މަރުވުމާ ގުޅިގެން އިންޑޮނޭޝިޔާގެ ފުލުހުން ވަނީ އޭނާގެ ޢާއިލާގެ ކިބައިން މަޢާފަށް އެދިފައެވެ. އިންޑޮނޭޝިޔާގެ ޤައުމީ ފުލުހުންގެ ޚިދުމަތުގެ ފަރާތުން އަބްދުލް ކަރީމް ވިދާޅުވީ ކުރުނިއާވަންގެ ގައިގައި ޖެއްސި އުޅަނދުގައި ތިބި ހަތް ފުލުހުން 20 ދުވަހުގެ މުއްދަތަށް ބަންދުކުރާނެ ކަމަށެވެ. އެއީ ސުލޫކީ މިންގަނޑުތަކާ ޚިލާފުވެފައިވާތީއެވެ.
އެ ހާދިޘާއާ ގުޅިގެން ރައީސް ޕްރަބޮވޯ ވަނީ ޞުލްޙަ ދެމެހެއްޓުމަށް ގޮވާލައްވައިފައެވެ. އަދި ކުރުނިއާވަން މަރުވުމާ ގުޅިގެން އޭނާ ވެސް ތައުޒިޔާ ފޮނުއްވާފައިވެއެވެ. އެ މައްސަލަ ބެލުމަށް ރައީސް ޕްރަބޮވޯ އަމުރުކުރައްވާފައިވާއިރު، މުޒާހަރާ ރޫޅާލުމުގައި ފުލުހުންގެ ޢަމަލުތައް ހުރިގޮތާ މެދު ކަންބޮޑުވެވަޑައިގަންނަވާ ކަމަށް ވެސް ރައީސް ވިދާޅުވެފައިވެއެވެ. އަދި މައްސަލައިގައި ހިމެނޭ ފުލުހުންގެ އޮފިސަރުން ޒިންމާދާރުކުރުވަން ޖެހޭ ކަމަށް ވެސް އޭނާ ވަނީ ފާހަގަކުރައްވައިފައެވެ.
އިންޑޮނޭޝިޔާގައި ހިނގަމުންދާ ހަމަނުޖެހުންތަކުގެ ސަބަބުން އެ ޤައުމުގެ ޙިއްޞާގެ ބާޒާރުގެ އަގުތައް ވަނީ 2 އިންސައްތަ ދަށަށް ގޮސްފައެވެ. އަދި އެ ޤައުމުގެ ފައިސާގެ އަގު ވެސް ވަނީ ދަށަށް ގޮސްފައެވެ. ޤައުމުގެ އިޤްތިޞާދީ ޙާލަތާމެދު ކަންބޮޑުުވުންތައް މިހާރު ވެސް އޮތް އިރު މި ޙާލަތުގައި ރައީސް ޕްރަބޮވޯގެ ސަރުކާރުން ޢަމަލުކުރާ ގޮތަކީ އިންޑޮނޭޝިޔާގެ ސިޔާސީ މަސްރަހަށާއި އިޤްތިޞާދީ ޙާލަތު ބައްޓަންކޮށްދޭނެ ކަންކަމެވެ.