ބާސެލޯނާއިން އެ ޓީމުގެ އެޓޭކިން މިޑްފީލްޑަރު ފާމިން ލޮޕޭޒް ވިއްކާލަން އުޅޭތީވެ، ކުރީގެ ކެޕްޓަން ސާޖިއޯ ބުސްކެޓްސް ފާޑުކިޔައިފިއެވެ.
އެމެރިކާގެ އިންޓަރ މަޔާމީއަށް މިހާރު ކުޅެމުން އަންނަ ބުސްކެޓްސް ބުނީ ބާސެލޯނާއިން އެ ކުލަބުގެ އެކަޑަމީގެ ގްރެޖުއޭޓުން ވިއްކާލުން މަދު ކުރަން ޖެހޭ ކަމަށެވެ.
"އަހަރެންނަކަށް ނޭނގެ އޭނާ ވިއްކާލަން އުޅެނީ ކީއްވެ ކަމެއް. އަދި އެއީ ކޮންމެހެން ކުރަންޖެހޭ ކަމެއްކަން ވެސް ނޭނގެ. އެކަމަކު ބާސެލޯނާއިން އެބަޖެހޭ ލަމާސިއާގެ ގްރެޖުއޭޓުންނަށް ޓީމުން ފުރުސަތުދޭން. އެ މީހުން ވިއްކާނުލައި ޓީމުގައި ތިބޭނެ ގޮތެއް ހޯދަން ޖެހޭ. ސަބަބަކީ އެމީހުންނަކީ ދުރުން އަންނަ ކުޅުންތެރިންނަށްވުރެ ޓީމު މާބޮޑަށް އެނގޭ އަދި ޓީމު ވަންތަ ބަޔަކަށްވާނެތީވެ،" ބުސްކެޓްސް ބުންޏެވެ.
ލަޔޮނަލް މެސީ އަށް ފަހު ބާސެލޯނާގެ ކެޕްޓަންކަން ކުރި ކުރީގެ މިޑްފީލްޑަރު ބުނީ ފާމިން ލޮޕޭޒަކީ ބާސެލޯނާގައި މިހާރު ހުރި އެންމެ ވިދުން ގަދަ ކުޅުންތެރިޔާ ކަމަށެވެ.
އޭނާ ގަތުމަށް މަސައްކަތް ކުރަނީ އިނގިރޭސި ދެ ކުލަބަކުންނެވެ. ޗެލްސީ އާއި ނިއުކާސަލް ޔުނައިޓެޑެވެ. މި ދެ ކުލަބުން ވެސް އޭނާ އަށް 50 މިލިއަން ޑޮލަރު ކިޔާފައިވާއިރު ބާސެލޯނާ ބޭނުންވަނީ މަދުވެގެން 90 މިލިއަން ޑޮލަރެވެ. ނަމަވެސް އެއީ ފާމިން ކުލަބު ދޫކޮށްލަން ބޭނުންވާ ނަމަ އެވެ.
ސްޕޭނުގެ ނޫސްތަކުން ބުނާ ގޮތުގައި ފާމިން ހުރީ ބާސެލޯނާ ދޫކޮށްލާ ވިސްނުމެއްގައެއްނޫނެވެ. އޭނާ ވިއްކާލަން ބާސެލޯނާ އުޅުނީ އެ ކުލަބަށް ދިމާވެފައިވާ މާލީ މައްސަލަތަކާހުރެ ކުޅުންތެރިން ރަޖިސްޓަރ ކުރުމުގައި ދަތިތަކެއް ހުރުމުންނެވެ. މާދަމާ އަކީ ޓްރާންސްފާ މާކެޓްގެ ފަހު ދުވަހަށްވާއިރު މިހާރު ވެސް ބާސެލޯނާގެ މުހިންމު ތިން ކުޅުންތެރިއަކު ތިބީ ރަޖިސްޓަރ ނުކުރެވި އެވެ. މި ކުޅުންތެރިން ރަޖިސްޓަރ ކުރުމަށް ކުލަބުގެ ބޯޑު މެމްބަރުން ވަނީ އަމިއްލަ ޖީބުން ހޭދަކުރަން އެއްބަސްވެ އެކަމުގެ ޔަގީންކަން ސްޕެނިޝް ލީގަށް ދީފަ އެވެ.