ސަރުކާރުގެ ގެދޮރުވެރިކުރުމުގެ ޕްރޮގްރާމުގެ ދަށުންފްލެޓްއަޅުއްވާ އެއްރަށަކީ، ގއ. ވިލިނގިލި. އެރަށުގައި ޢިމާރާތްކުރެއްވި ހައުސިންގ ޔުނިޓްތަކަށް ކުރިމަތިލުމަށް ހުޅުއްވާލެއްވި ފުރުޞަތުގައި މިހާތަނަށް 80 ފޯމް ހުށަހަޅާފައިވާކަމަށް އެރަށު ކައުންސިލުން ވިދާޅުވެއެވެ. މި ހައުސިންގ ޔުނިޓްތަކަށް އެދި ފޯމް ހުށަހެޅުމުގެ މުއްދަތު މިދިޔަ ޖޫންމަހުގެ ނިޔަލަށް ވަނީ ހަމަވެފައެވެ. އެހެންނަމަވެސް މިކަމަށް ކުރިމަތިލާން ޝައުޤު ފާޅުކުރާ އެކަމަކު މުއްދަތު ހަމަވިއިރު، ފޯމް ހުށަނޭޅުނު ބައެއް މީހުންގެ އެދުމުގެ މަތިން މި މުއްދަތު އިތުރުކުރައްވަން މަސައްކަތްކުރައްވަމުން ގެންދަވާކަމަށް ވިލިނގިލީ ކައުންސިލުން ހާމަކުރައްވައެވެ.
ސަރުކާރުގެ ގެދޮރުވެރިކުރުވުމުގެ ޕްރޮގްރާމުގެ ދަށުން ގއ. ވިލިނިގިލީގައި ޢިމާރާތްކުރައްވަނީ 52 ރޯ ހައުސްއެވެ. މީގެތެރެއިން އޭ ކެޓަގެރީގައި ހިމެނޭ 37 ހައުސިންގ ޔުނިޓް އަދި ބީ ކެޓަގަރީގައި ހިމެނޭ 5 ހައުސިންގ ޔުނިޓަށް ކުރިމަތިލުމުގެ ފުރުޞަތު ވަނީ ހުޅުވާލައްވާފައެވެ. އޭ ކެޓަގަރީގައި ހިމެނޭ 37 ހައުސިންގ ޔުނިޓަކީ ވިލިނގިލީގެ ރައްޔިތުންގެ ތެރެއިން ހައުސިންގ ޔުނިޓް ބޭނުންވާ ޢާއިލާތަކަށް ދިގުމުއްދަތަކަށް ބަހާލައިގެން ފައިސާ ދައްކާ ޚަލާސްކުރާގޮތަށް، ދޫކުރެއްވުމަށް ހަމަޖެހިފައިވާ ހައުސިންގ ޔުނިޓްތަކެކެވެ.
ބީ ކެޓަގަރީގައި ހިމެނޭ 5 ހައުސިންގް ޔުނިޓަކީ ވިލިނގިއްޔަށް ދިރިއުޅުން ބަދަލަކުރަން ބޭނުންވާ ފަރާތްތަކަށް ދިގުމުއްދަތަކަށް ބަހާލައިގެން ފައިސާ ދައްކާ ޚަލާޞްކުރާގޮތަށް ދޫކުރެއްވުމަށް ހަމަޖެހިފައިވާ ޔުނިޓްތަކެކެވެ.
ސީ ކެޓަގަރީގެ ދަށުން 10 ހައުސިންގ ޔުނިޓް ދޫކުރެއްވުމަށް ވަނީ ހަމަޖެހިފައެވެ. މި ކެޓަގަރީގައި ހިމެނޭ ޔުނިޓްތަކަކީ ސަރުކާރުން ހިންގަވާ ރިއަލް އެސްޓޭޓް ނުވަތަ ގެދޮރުވެރިކަމުގެ ވިޔަފާރި އުޞޫލުގެ ދަށުން ވިއްކެވުމަށް ހަމަޖެހިފައިވާ ހައުސިން ޔުނިޓްތަކެކެވެ.
ވިލިނގިލި ކައުންސިލުން ވިދާޅުވީ އޭ ކެޓަގަރީ އަށް 61 ފަރާތަކުން ފޯމް ހުށަހަޅާފައިވާއިރު، ބީ ކެޓަގަރީއަށް 19 ފޯމް ހުށަހަޅާފައިވާކަމަށެވެ. ޕީއެސްއެމްއަށް މައުލޫމާތުދެއްވަމުން ވިލިނގިލި ކައުންސިލްގެ ރައިސް ނިޔާޒު ނިޒާރު ވިދާޅުވީ ކުރިން ހައުސިންގ ޔުނިޓްތަކުގެ ފުރަތަމަ ޕޭމަންޓްގެ ގޮތުގައި ވިހިހާސް ރުފިޔާ ދައްކާގޮތަށް އޮތްނަމަވެސް އެ އަގަށް ބަދަލު ގެންނަވައި މިހާރު ފަންސަވީސް ހާސް ރުފިޔާ އެއްފަހަރާ ނަންގަވާގޮތަށް ނިންމަވާފައިވާކަމަށެވެ. އެހެންކަމުން މިކަމުގައި އާންމުންގެ ކަންބޮޑުވުންތަކެއް ހުރިކަމަށާއި، މިކަމާ ބެހޭގޮތުން ހައުސިންގ މިނިސްޓްރީއާ މަޝްވަރާކުރަމުންދާކަމަށް ނިޔާޒު ވިދާޅުވިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން ހައުސިންގ މިނިސްޓަރ ޑރ މުހައްމަދު މުއިއްޒު ވިދާޅުވީ މިއަހަރު ނިމެންވާއިރަށް ހައުސިންގ ޔުނިޓްތަކުގެ މަސައްކަތް ނިމޭނެކަމަށެވެ. ހައުސިންގ ޔުނިޓްތަކުގެ ޑައުންޕޭމަންޓް ބޮޑުކުރެއްވުމާ ގުޅޭގޮތުން ސުވާލު ދެންނެވުމުން މިނިސްޓަރ ވިދާޅުވީ، މިހާރު އިމާރާތްކުރަމުންދާ ހައުސިންގ ޔުނިޓްތަކުގެ އަގު ކުރިން އިމާރާތްކުރި ޔުނިޓްތަކަށްވުރެ ކޮންސްޓްރަކްޝަން ކޯސްޓް ބޮޑުކަމަށެވެ. އަދި މިހާރު ހައުސިންގް ޔުނިޓަކަށް ޖެހޭއަގު ކަނޑައަޅާފައިވަނީ ސަބްސިޑައިޒް ކޮށްގެންކަމަށް މިނިސްޓަރ ވިދާޅުވިއެވެ.