ރިހެބިލިޓޭޝަން ދާއިރާގެ ދެ ތަމްރީން ޕްރޮގްރާމްގެ ނިމުމުގެ ރަސްމިއްޔާތު ބާއްވައިފި

މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ބެލުމުގެ ދަށުގައިވާ ޤައިދީންގެ ރިހެބިލިޓޭޝަން ހަރުދަނާކުރުމުގެ ގޮތުން ދެ ތަމްރީން ޕްރޮގްރާމްގެ ނިމުމުގެ ރަސްމިއްޔާތު މިއަދު ބާއްވައިފިއެވެ.

ކަސްޓަމްސްގެ ހޯލްގައި ބޭއްވި ރަސްމިއްޔާތު ޝަރަފްވެރިކޮށްދެއްވީ ދާހިލީ ސަލާމަތާއި ފަންނިއްޔަތާއި ބެހޭ ވަޒީރު ޢަލީ އިޙްސާންއެވެ. މި ރަސްމިއްޔާތުގައި ކޮމިޝަނަރ އޮފް ޕްރިޒަންސް ޙަސަން ޒަރީރު، ޑެޕިއުޓީ ކޮމިޝަނަރ އޮފް ޕްރިޒަންސް އަލްއުސްތާޛް އިބްރާހިމް މުޙައްމަދު ދީދީ، ކޮމިޝަންޑް އޮފިސަރުންނާއި ޖޫނިއަރ އޮފިސަރުންގެ އިތުރުން މޯލްޑިވްސް ކަސްޓަމްސް ސަރވިސްގެ ޑެޕިއުޓީ ކޮމިޝަނަރުން ޢަބްދުﷲ ވަހީދު އާއި އިބްރާހިމް މަފާޒު ބައިވެރިވެވަޑައިގެންނެވިއެވެ.

މި ރަސްމިއްޔާތުގައި މެލޭޝިޔާ ޕްރިޒަން ޑިޕަރޓްމަންޓްއާ ގުޅިގެން ހިންގި “ފެއިތް-ބޭސްޑް ރިހެބިލިޓޭޝން ޓްރޭނިންގ ޕްރޮގްރާމް” އާއި “ވަރކިންގ ވިތް ވިމެން ޕްރިޒަނަރސް: އަ ޓީއޯޓީ” ޕްރޮގްރާމް ފުރިހަމަ ކުރި ބައިވެރިންނަށް ވަނީ ސެޓްފިކެޓް ޙަވާލުކޮށްދީފައެވެ. މި ދެ ޕްރޮގްރާމްވެސް ކުރިއަށް ގޮސްފައިވަނީ 06-08 އޮކްޓޫބަރ 2025 އަށެވެ.

މޯލްޑިވްސް ކަރެކްޝަނަލް ސަރވިސްއިން ވިދާޅުވީ “ފެއިތް-ބޭސްޑް ރިހެބިލިޓޭޝަން ޓްރޭނިންގ ޕްރޮގްރާމް” ގެ ބޭނުމަކީ އިސްލާމް ދީންގެ ރިވެތި ސިފަތަކާއި އުސޫލުތައް ހިމަނައިގެން ޤައިދީންގެ ރިހެބިލިޓޭޝަން ޕްރޮގަރާމްތައް ފަރުމާ ކުރުވޭނެ ގޮތްތައް ހޯދުންކަމަށެވެ. މި ތަމްރީން ޕްރޮގްރާމްގައި 37 އޮފިސަރުން ވަނީ ބައިވެރިވެފައެވެ.

“ވަރކިންގ ވިތް ވިމެން ޕްރިޒަނަރސް: އަ ޓީއޯޓީ” ޕްރޮގްރާމަކީ ބްރިޓިޝް ހައި ކޮމިޝަންގެ މޯލްޑިވްސް ސެކިއުރިޓީ އެންޑް ޖަސްޓިސް ޕްރޮގްރާމްގެ ދަށުން ކުރިއަށް ގެންދިޔަ ޕްރޮގްރާމެކެވެ.

މި ޕްރޮގްރާމްގެ ބޭނުމަކީ އަންހެން ޤައިދީން ބެލެހެއްޓުމުގައި ބައިނަލްއަޤްވާމީ ބެސްޓް-ޕްރެކްޓިސްތައް ދެނެގަނެ، އަނިޔާ ލިބިފައިވާ އަދި ދިރިއުޅުމުގައި ނިކަމެތިކަމާއި ދަތިކަން އިޙުސާސްކުރާ އަންހެން ޤައިދީންނާމެދު ޢަމަލުކުރާނެ އެންމެ އެކަށޭނެ ގޮތްތައް ދަސްކޮށްދިނުމެެ. މި ޕްރޮގްރާމްގައި މޯލްޑިވްސް ކަރެކްޝަނަލް ސަރވިސް އަންހެން ޔުނިޓްގައި މަސައްކަތްކުރާ ހަތް އަންހެން އޮފިސަރުން ވަނީ ބައިވެރިވެފައިވެއެވެ.

“ފެއިތް-ބޭސްޑް ރިހެބިލިޓޭޝން ޓްރޭނިންގ ޕްރޮގްރާމް” ހިންގުމުގައި މެލޭޝިޔާ ޕްރިޒަން ޑިޕަރޓްމަންޓްގެ ފަރާތުން ބައިވެރިވެފައިވަނީ ސީނިއަރ އެސިސްޓަންޓް ކޮމިޝަނަރ އަޙްމަދު ޒުލްކަރްނައިން ބިން ޢަބްދުލް ޚާލިދު، ސުޕްރިންޓެންޑެންޓް މުޙައްމަދު ޒުލްހިމްނަން ބިން ރޮސްލާން އާއި އިސްލާމިކް ރިލިޖަސް އޮފިސަރ މޮހްދް ޝިހާމް ބިން ރަމްލީއެވެ. އަދި “ވަރކިންގ ވިތް ވިމެން ޕްރިޒަނަރސް: އަ ޓީއޯޓީ” ޕްރޮގްރާމްގެ ހިންގުމުގައި ހަރަކާތްތެރިވެފައިވަނީ ބްރިޓިޝް ހައި ކޮމިޝަންގެ މޯލްޑިވްސް ސެކިއުރިޓީ އެންޑް ޖަސްޓިސް ޕްރޮގްރާމްގެ ޕްރިޒަން އެކްސްޕަރޓް ޓޯނީ ހެސަލްއެވެ.