ސަރުކާރެއް ބަދަލުވިނަމަވެސް ޤައުމުތަކަށް ކަނޑައަޅާފައި ތިއްބަވާ ޑިޕްލޮމެޓުންގެ ދައުރު ނުހުއްޓި، ދޭދޭ ޤައުމުތަކުގެ ގާތްގުޅުމާއި ރަޙްމަތްތެރިކަން އޮންނަންޖެހޭ ކަމަށާއި، ޕްރޮފެޝަނަލްކޮށް ޑިޕްލޮމެޓުން މަސައްކަތްކުރުމަށް ފޮރިންގ ސަރވިސްގެ ޤާނޫނެއް ވަރަށް މުހިންމުކަމަށް ފޮރިންގ މިނިސްޓަރ ޑރ. މުޙައްމަދު ޢާޞިމް ވިދާޅުވެއްޖެއެވެ.
ރާއްޖޭގައި މިހާތަނަށް ފޮރިން ސަރވިސްއަށް ޚާއްޞަ ޤާނޫނެއް ނޯވެއެވެ. އެހެންކަމުން މިފަދަ ޤާނޫނެއް ވުޖޫދުކުރައްވައި ތަންފީޒުކުރެއްވުމަށް ސަރުކާރުން ނިންމަވައި މިފަދަ ޤާނޫނެއްގެ ބިލެއް ވަނީ އެކުލަވާލައްވާފައެވެ.
ފޮރިންގ ސަރވިސް ބިލް ހުށައެޅުމުގެ ބޭނުމަކީ ޚާރިޖީ ސިޔާސަތު މެދުވެރިކޮށް، ދިވެހިރާއްޖޭގެ މިނިވަންކަމާއި ސަރަޙައްދުގެ ރައްކާތެރިކަން ދެމެހެއްޓުމުގައާއި، ބައިނަލްއަޤްވާމީ މުޖުތަމަޢުގައި ދިވެހިރާއްޖޭގެ ޤައުމީ ސިޔާދަތަށް އިޙްތިރާމްކުރުން އިތުރުކުރުމުގައި މަސައްކަތްކުރުމެވެ.
ޕީއެސްއެމްއަށް ދެއްވި ޚާއްޞަ އިންޓަރވިއުއެއްގައި ފޮރިންގ މިނިސްޓަރ ޑރ.މުޙައްމަދު ޢާޞިމް ވިދާޅުވީ، ސަރުކާރެއް ބަދަލުވިމަވެސް، ޤައުމުތަކަށް ކަނޑައަޅާފައި ތިއްބަވާ ޑިޕްލޮމެޓުންނާއި، ދޭދޭ ޤައުމުތަކުގެ ދޭތެރޭގައި އޮންނަ ގާތްގުޅުން އޮންނަންޖެހޭ ކަމަށާއި، އެކަމަށްޓަކައި ޕްރޮފެޝަނަލް މީހުން ތަމްރީންކުރަން ޖެހޭކަމަށެވެ. ޤައުމުތަކަށް ޢައްޔަންކުރައްވާ ސަފީރުންގައި ހުންނަންޖެހޭ ޝަރުތުތައް ފޮރިންގ ސަރވިސް ބިލްގެ ސަބަބުން ކަނޑައަޅައި، ސަފީރުން ފޮނުވުމާއި، އަނބުރާ ގެނައުމާބެހޭ އުޞޫލުތައްވެސް ޤާނޫނުގެ ތެރެއިން ހަމަޖެހިގެންދާނެއެވެ.
މިނިސްޓަރ ޢާސިމް ވިދާޅުވިގޮތުގައި، ފޮރިންގ ސަރވިސް ޤާނޫނެއްގެ އެންމެ ބޮޑު އެއްބޭނުމަކީ، ޚާރިޖިއްޔާ ޕްރޮފެޝަނަލްކޮށް ހިންގުމަށްޓަކައި ބޭނުންވާ އުޞޫލުތަކާއި ޤަވާޢިދުތައް އެކަށައެޅުއްވުމާއި އަދި ފޮރިންގ އިންސްޓިޓިއުޓްގެ މަސައްކަތް ހަރުދަނާވުންކަމަށެވެ. އެގޮތުން އަމަލީގޮތުން ޑިޕްލޮމެޓުން ތައްޔާރުކޮށް، އެންޓްރީލެވެލް، ޑިޕްލޮމާ، އަދި ޑިގްރީ ލެވެލްގެ މަސައްކަތްތަކެއް ކުރިއަށް ގެންދެވޭނެކަން މިނިސްޓަރ ފާހަގަކުރެއްވިއެވެ. މިކަމުގެ އެންމެ ބޮޑު ބޭނުމަކީ ރާއްޖެއިން ބޭރަށް މިޤައުމު ރިޕްރެޒެންޓްކުރުމަށް ފޮނުވާ ބޭފުޅުން ތަމްރީންކުރުން ކަމުގައި ވިދާޅުވިއެވެ.
"ބޭރަށް ޑިޕްލޮމެޓުން ފޮނުވާއިރު، އެބޭފުޅާ ރިޕްރެޒެންޓްކުރަނީ ހަމައެކަނި ދިވެހި ޚާރިޖިއްޔާއެއްނޫން. މުޅި ޤައުމު ރެޕްރެޒެންޓްކުރޭ. އެޤައުމުގަ ހިނގާ ހުރިހާ މަޢުލޫމާތާއި، އެޤައުމުން އަޅުގަނޑުމެނަށް ބޭނުންވާ އެހީ ހޯދުމަށް މަސައްކަތްކުރުމާއި، ނެގޯޝިއޭޓްކުރުމުގެ ހުނަރުތަކާއި، މުޢާމަލާތްކުރާނެ ހުނަރުތަކާ، ދޭދޭ ޤައުމުތަކުގެ ގުޅުން ބަދަހިވެ ރަޙްމަތްތެރިކަން އަބަދުވެސް އޮންނާނެ ގޮތަށް ކަންތައްތައް ގެންދިއުމާ ޢަމަލުތައް ބެހެއްޓުން. އެހެންކަމުން މިކަމުގެ ފަންނާ ހުނަރުތައް ޑިޕްލޮމެޓުންނަށް ކިޔައިދީގެން ފްރޮފެޝަނަލްކޮށް މި ދާއިރާ ބައްޓަންކުރަންއެބަޖެހޭ." ފޮރިންގ މިނިސްޓަރ ޑރ.މުޙައްމަދު ޢާޞިމް ވިދާޅުވިއެވެ.
ފޮރިންގ ސަރވިސް ޤާނޫނެއް އައުމުން ދިވެހި ޚާރިޖިއްޔާއަށް އަންނާނެ އެންމެ ބޮޑު އެއްބަދަލަކީ، ފޮރިންގ ސާރވިސްއެއް އުފެދި އެ ވުޒާރާގެ ހުރިހާ މުވައްޒަފުން އެ ސަރވިސްގެ ދަށަށް ބަދަލުވެގެންދިއުމެވެ. މިހާރު ޚާރިޖިއްޔާގެ މުވައްޒަފުން ތިއްބަވަނީ ސިވިލް ސަރވިސް މުވައްޒަފުންގެ ގޮތުގައެވެ.
"ދުނިޔޭގެ ހުރިހާ ތަނެއްގައިވެސް ޚާރިޖިއްޔާއަކީ ވަރަށް ޕްރޮފެޝަނަލް ތަންތަން. ރާއްޖޭގައި މިވަގުތު ޚާރިޖިއްޔާގެ ހުރިހާ މުވައްޒަފުންވެސް މިތިބީ ސިވިލް ސަރވިސް މުވައްޒަފުންގެގޮތުގައި. ފޮރިންގ ސާރވިސް ޤާނޫނެއް އައުމުން ފޮރިންގ ސާރވިސްކިޔާ ވަކި މުއައްސަސާއެއް އުފެދިގެންދާނެ. މިކަމުގެ އެންމެ ބޮޑު ބޭނުމަކީ ޚާރިޖިއްޔާ ޕްރިފެޝަނަލްކޮށް ހިންގުމަށްޓަކައި ބޭޏުންވާ އުސޫލްތަކާ ޤަވާއިދުތައްހަދާ އެ އުސޫލްތަކުގެ ތެރެއިން ކަންކަން ކުރިއަށްގެންދިއުން" ފޮރިންގ މިނިސްޓަރ ޑރ.މުޙައްމަދު ޢާޞިމް ވިދާޅުވިއެވެ.
ފޮރިންގ ސަރވިސް ބިލްގެ މަޤްޞަދަކީ، މިނިސްޓްރީ އޮފް ފޮރިން އެފެއަރޒާއި، ބޭރު ޤައުމުތަކުގައި ޤާއިމުކޮށްފައިވާ ރާއްޖޭގެ ޑިޕްލޮމެޓިކް މިޝަންތަކާއި، ކޮންސިއުލޭޓްތައް ހިމެނޭ ފަދައިން، ރާއްޖޭގެ ފޮރިން ސަރވިސްގެ ނަމުގައި ވަކި ޚިދުމަތެއް ޤާއިމުކުރައްވައި، އެ ޚިދުމަތުގެ ޤާނޫނީ ޙައިސިއްޔަތާއި، މަޤްޞަދުތަކާއި، އެ ޚިދުމަތް ރޭވިފައިވާ ގޮތް ބަޔާންކޮށް، ޚާރިޖީ ދާއިރާގައި ޒަމާނީ ގޮތުން ދިވެހިރާއްޖޭގެ ޤައުމީ މަޞްލަޙަތު ކުރިއެރުވޭނެ ގޮތްތައް ކުރިއެރުވުމެވެ.
ރާއްޖޭގެ ފޮރިންސަރވިސް ބިލް ސަރުކާރުގެ ފަރާތުން މަޖިލީހަށް ވަނީ ހުށަހަޅުއްވާފައެވެ. މިބިލްގެ އިބްތިދާއީ ބަޙުސްގެ މަރުޙަލާ ނިންމަވައި މިހާރު އޮތީ ކޮމެޓީގައި ދިރާސާކުރެއްވުމުގެ މަރުޙަލާގައެވެ.